提摩太前书

2 首先，我想劝你为各种各样嘅人恳切祈求、祷告、代求、感恩， 2 亦都为君王同埋所有高官*噉样做，等我哋可以喺各方面都虔诚*庄重，过平静安宁嘅生活。 3 噉样做喺我哋嘅救主上帝眼中，系美好嘅，系令佢开心*嘅。 4 佢嘅旨意系要各种各样嘅人都可以得救，确切认识真理。 5 上帝只有一位，喺上帝同人之间亦都只有一位中间人，呢个人就系基督耶稣。 6 基督耶稣牺牲自己做对应嘅赎价，救赎所有人*。到咗指定嘅时候，就会有人为呢件事作见证。 7 呢个就系点解我受委任去传道*同埋做使徒，教导列国嘅人培养信心同认识真理（我讲嘅系真话，唔系大话）。

8 所以，无论喺边度聚集，我希望男人都怀住忠于上帝嘅心*祷告，唔怀怒，唔争拗。 9 另一方面，女人应该衣着得体*端庄*，反映健全嘅思想*，唔系用复杂嘅发型*、黄金、珍珠或者奢华嘅衣着打扮自己， 10 而系用善行*做装饰，噉先至配称为敬奉上帝嘅女人。

11 女人应该安静噉*学习，完全顺服。 12 我唔准女人教导男人，管辖男人。女人应该保持安静*。 13 因为系亚当被创造先，然后至系夏娃。 14 况且亚当并冇上当，而系夏娃*彻底受骗，结果违反咗上帝嘅命令。 15 不过，女人只要保持信心、爱心、圣洁，思想健全*，就会因为生儿育女而享有安全*。