启示录
7 之后，我见到四个天使企喺大地嘅四极*，捉实大地四方嘅风，唔俾风吹到地上、海上或者任何嘅树嗰度。 2 我见到另一个天使由东边*上嚟，拎住真神*嘅印。佢大声吩咐四个奉命伤害地同海嘅天使， 3 佢话：“唔好伤害地、海、树，直到我哋喺我哋上帝嗰啲奴隶嘅额头上扱完印*。”
4 我听到扱咗印嘅人总共有14万4000。呢啲扱咗印嘅人嚟自以色列人嘅每个部族。
5 犹大部族当中扱咗印嘅，有1万2000；
吕便部族，有1万2000；
迦得部族，有1万2000；
6 亚设部族，有1万2000；
拿弗他利部族，有1万2000；
玛拿西部族，有1万2000；
7 西缅部族，有1万2000；
利未部族，有1万2000；
以萨迦部族，有1万2000；
8 西布伦部族，有1万2000；
约瑟部族，有1万2000；
便雅悯部族当中扱咗印嘅，有1万2000。
9 之后，我见到有一大群人，数目多到冇人数得到，佢哋系嚟自所有国族、部族、民族同埋语言嘅。佢哋企喺宝座同绵羊羔面前，着住白袍，手上拎住棕榈枝。 10 佢哋不断大声话：“我哋得救，全靠宝座上我哋嘅上帝，同埋绵羊羔。”
11 所有天使都企喺宝座、长老同埋四个活物周围，佢哋喺宝座前跪低崇拜上帝， 12 话：“阿们！愿赞美、荣耀、智慧、感谢、尊崇、力量、能力，永永远远归于我哋嘅上帝。阿们。”
13 呢个时候其中一个长老问我：“呢啲着住白袍嘅系咩人呢？佢哋由边度嚟嘅呢？” 14 我就同佢讲：“我主，你先至知道。”佢同我讲：“呢啲人系喺大患难当中出嚟嘅。佢哋用绵羊羔嘅血将自己嘅袍洗到洁白。 15 所以佢哋可以喺上帝嘅宝座前，日日夜夜喺佢嘅圣殿里面敬奉佢。宝座上嘅上帝会打开帐幕保护佢哋。 16 佢哋唔会再挨饿，唔会再口渴，亦都唔会俾烈日或者炎热折磨， 17 因为宝座旁边*嘅绵羊羔会牧养佢哋，将佢哋带去生命水嘅泉源。上帝亦都会抹走佢哋嘅每一滴眼泪。”