约翰一书

1 喺最初就有一位，为人带嚟生命嘅话语*，系我哋听过、亲眼见过、观察过、亲手摸过嘅。 2 （生命已经显示咗出嚟，我哋见过，而家又作见证，亦都话俾你哋知。永远嘅生命嚟自我哋嘅天父，已经向我哋显示咗出嚟。） 3 我哋将自己见到同听到嘅讲俾你哋知，等你哋都同我哋团结一心*。呢种团结系我哋同我哋嘅天父，仲有佢嘅仔耶稣基督共享嘅。 4 我哋将呢啲说话写低，系想令我哋充满喜乐。

5 我哋喺基督嗰度听到，而家亦都向你哋宣布嘅信息系：上帝就系亮光，喺佢嗰度一啲黑暗都冇。 6 如果我哋自称同佢团结一心*，但系仍然喺黑暗之中行走*，就系讲大话，冇按照真理生活。 7 上帝系喺亮光之中嘅，如果我哋喺亮光之中行走*，我哋之间就真系团结一心*，佢嘅仔耶稣嘅血亦都洗净我哋嘅一切罪嘞。

8 如果我哋话自己冇罪*，就系自己呃自己，真理亦都唔喺我哋心入面。 9 上帝又信实又正义，如果我哋承认自己嘅罪，佢一定会宽恕我哋嘅罪，洗净我哋嘅一切不义。 10 如果我哋声称自己冇犯过罪，就等于话上帝讲大话，佢嘅话语亦都唔喺我哋心入面。