罗马书

8 所以，同基督耶稣联合嘅人，就唔系被定罪嘅人嘞。 2 神圣力量令人享有同基督耶稣联合嘅生命，神圣力量嘅法律*释放咗你，令你摆脱罪同死嘅法律。 3 由于血肉之躯唔完美，唔能够完全按照摩西法典去做，所以摩西法典唔能够彻底除罪*。于是上帝派自己个仔嚟到地上，令佢成为人嘅模样*，将罪除去。上帝噉样做，就系对血肉之躯所犯嘅罪作出不利嘅判决。 4 噉系要令我哋可以符合法典嘅正义要求。所以，我哋行事为人唔会顺应罪性*，而系会顺应神圣力量。 5 顺应罪性去生活嘅人，思想几时都顺应罪性；顺应神圣力量生活嘅人，思想几时都顺应神圣力量。 6 思想几时都顺应罪性，就会带嚟死亡；思想几时都顺应神圣力量，就会带嚟生命同安宁*。 7 因为思想几时都顺应罪性，就会同上帝敌对，唔服从上帝嘅法律，其实亦都服从唔到。 8 由此可见，顺从罪性嘅人唔能够令上帝喜悦。

9 不过，如果上帝嘅神圣力量*留喺你哋里面，你哋就唔系顺从罪性，而系顺从神圣力量。人如果冇基督嘅精神*，就唔系属于基督嘞。 10 不过，如果基督同你哋联合，即使你哋嘅身体会因为罪而死亡，神圣力量*都会因为你哋正义而俾生命你哋。 11 上帝嘅神圣力量令耶稣死而复生，如果佢嘅力量留喺你哋里面，噉呢位令基督耶稣死而复生嘅上帝，都会通过佢喺你哋里面嘅神圣力量，令你哋必死嘅身体有生命。

12 所以，各位弟兄，我哋冇义务顺应罪性去生活。 13 如果你哋顺应罪性去生活，就一定会死，但系如果凭住神圣力量处死腐败嘅行为*，就会存活。 14 所有受上帝神圣力量引导嘅人，都系上帝嘅仔女。 15 你哋得到嘅神圣力量，冇令你哋做奴隶，反而令你哋唔再惊，呢股神圣力量亦都令你哋被上帝收养，成为佢嘅仔女。神圣力量推动我哋呼唤：“阿爸，爸爸！” 16 神圣力量*本身同我哋嘅心*一齐作证，表明我哋系上帝嘅仔女。 17 我哋既然系上帝嘅仔女，就即系话我哋可以承受上帝嘅产业，而且可以同基督一齐承受产业。不过，我哋要同基督一齐受苦，先至可以同佢一齐得到荣耀。

18 我认为，比起将来会喺我哋身上显露嘅荣耀，目前嘅苦难根本微不足道。 19 受造众生都热切等待紧上帝嘅众子显露出嚟。 20 因为受造众生都受制于徒劳无功嘅情况。呢个唔系佢哋自愿嘅，而系上帝容许嘅。佢俾众生受制于呢种情况，但系同时赐希望俾人*。 21 呢个希望就系，受造众生会获得释放，唔再好似奴隶噉受制于会朽坏嘅身体，可以享有上帝儿女荣耀嘅自由。 22 我哋知道，受造众生全部都一齐痛苦呻吟，直到而家。 23 唔单止噉，虽然我哋有神圣力量呢个最早嘅收成*，不过都内心悲叹，热切等待被上帝收养，凭住赎价获得释放，脱离身体。 24 上帝将我哋从罪当中释放出嚟，我哋已经得到呢个希望。不过，如果人见到希望实现，噉呢个就唔再系希望嘞。佢已经见到希望实现，仲需要希望咩？ 25 如果我哋仲未见到希望实现，就会保持忍耐，一直热切等待。

26 另外，我哋软弱嘅时候，神圣力量都会帮助我哋。有时我哋需要祷告，不过唔知道应该求乜嘢，喺心入面叹息，唔知点讲好，神圣力量就会为我哋祈求。 27 细察人心嘅上帝明白神圣力量显示嘅意思，因为神圣力量系按照上帝嘅旨意为圣民祈求嘅。

28 我哋知道，上帝令佢做嘅所有事互相配合，系为咗爱佢嘅人好，即系为按照佢嘅旨意受呼召嘅人好。 29 上帝从最初就认识嗰啲佢会拣选嘅人，亦都决定*将佢哋塑造成佢个仔*嘅形象。就系噉，佢个仔喺好多弟兄当中成为长子*。 30 上帝预先拣选*咗嘅，系佢已经呼召嘅人；佢呼召嘅，系已经被佢称义*嘅人；被佢称义嘅，系已经得到佢赐予荣耀嘅人。

31 噉关于呢啲事，我哋想讲嘅系乜嘢呢？既然上帝支持我哋，边个能够反对我哋呢？ 32 上帝连自己个仔都冇吝惜，反而为我哋所有人牺牲咗佢，唔通上帝唔会将我哋需要嘅一切，连同个仔一齐慷慨噉赐俾我哋咩？ 33 边个能够指控上帝拣选嘅人呢？上帝已经将佢哋称为正义嘅人*嘞。 34 边个能够定佢哋嘅罪呢？基督耶稣已经为佢哋而死，而且死而复生，喺上帝右边为我哋祈求。

35 有冇任何嘢可以隔绝基督对我哋嘅爱呢？唔通系患难？痛苦？迫害？饥饿？赤身？危险？刀剑？ 36 圣经话：“我哋因为你嘅缘故，终日有人被杀，好似羊俾人任意宰割。” 37 不过，喺呢一切事上，我哋靠住爱我哋嘅嗰位，而家已经大获全胜嘞。 38 我深信，无论系死，系生，系天使，系政府，系而家嘅事，系将来嘅事，系有力量嘅， 39 系高处*，系深处*，定系任何其他受造物，都唔能够隔绝上帝对我哋嘅爱。呢种爱系通过我哋嘅主基督耶稣表现出嚟嘅。