希伯来书

10 摩西法典只系将来美好事物嘅影子，而唔系实体。所以，按照法典嘅吩咐*每年不断献上相同嘅祭牲，系永远都冇办法令嗰啲去到上帝面前嘅人变得完美嘅。 2 如果敬奉上帝嘅人只系献一次祭，就永远洁净，唔再觉得有罪，噉唔系一早就唔使再献祭嘞咩？ 3 不过，呢啲祭牲反而令人年年都谂起自己有罪， 4 因为公牛同山羊嘅血冇可能将罪除去。

5 所以，基督嚟到世人当中嘅时候话：“‘祭牲同其他祭物都唔系你想要嘅，但系你为我准备咗身体。 6 全烧祭同赎罪祭都唔系你钟意嘅*。’ 7 于是我话：‘上帝啊，你睇，我嚟系要照你嘅旨意去做。我嘅事就写咗喺书卷上面。’” 8 佢首先话：“祭牲、祭物、全烧祭、赎罪祭，都唔系你想要嘅，亦都唔系你钟意嘅。”（呢一切都系按照法典献嘅。） 9 然后佢话：“你睇，我嚟系要照你嘅旨意去做。”由此可见，佢废除咗以前嘅安排，系为咗设立之后嘅安排。 10 凭住呢个“旨意”，耶稣基督只系一次献上佢嘅身体，我哋就成圣嘞*。

11 另外，所有祭司每日都要侍立，履行神圣职务*，经常献上相同嘅祭牲，因为呢啲祭牲永远都唔能够完全除罪。 12 不过，基督只系献咗一次祭，就将罪永远除去，坐喺上帝右边， 13 由嗰阵时开始，等待上帝令佢嘅敌人成为佢嘅脚凳。 14 佢只系献咗一次祭，就令成圣嘅人永远完美。 15 神圣力量*亦都向我哋作证，首先话： 16 “耶和华*话：‘嗰段时期之后，我要同佢哋立噉样嘅约：我要将我嘅法律放喺佢哋心入面，写喺佢哋嘅脑海。’” 17 然后话：“我唔会再谂返佢哋嘅罪恶同埋不法嘅行为。” 18 既然呢啲罪都得到宽恕，就唔使再献祭赎罪嘞。

19 各位弟兄，我哋凭住耶稣嘅血，就可以放胆*踏上通往至圣所嘅路。 20 佢穿过帷幔，为我哋开拓*咗呢条通往生命嘅新路。帷幔象征佢嘅身体。 21 佢系我哋伟大嘅祭司，负责管理上帝嘅家。 22 既然系噉，我哋应该真心真意、信心十足噉嚟到上帝面前。我哋嘅心已经洁净*，良心唔再污秽*，身体亦都好似用清水洗干净。 23 要坚定不移噉宣讲我哋嘅希望，唔好动摇，因为作出承诺嘅上帝系信实可靠嘅。 24 要互相关心*，噉就可以激发爱心，促进善行*。 25 唔好放弃聚会，唔好好似有啲人噉经常*缺席，反而要彼此鼓励。你哋既然见到嗰个日子越嚟越近，就更加要噉样做。

26 我哋确切认识真理之后，如果仲经常蓄意犯罪，就再冇祭物可以赎罪嘞， 27 唯有战战兢兢噉等待判决。上帝嘅义愤会好似火一样燃烧，吞灭嗰啲敌对嘅人。 28 如果人无视摩西法典，有两三个人指证，都会被处死，唔会得到怜恤， 29 更何况人践踏上帝嘅仔，连令自己成圣嘅立约之血都视作等闲，仲侮辱带嚟分外恩典嘅神圣力量呢？你哋谂吓，呢种人唔系应该受到更加严厉嘅惩罚咩？ 30 我哋知道上帝讲过：“我会惩罚，我会治罪。”佢仲话：“耶和华*会审判佢嘅子民。” 31 落喺真神*嘅手，真系件得人惊嘅事！

32 要谂返以前嘅日子，你哋接受咗真理嘅亮光之后，喺激烈嘅搏斗之中忍耐，受咗好多苦， 33 有时当众*遭受侮辱同患难，有时同遭遇呢啲事嘅人共渡难关*。 34 你哋唔单止体恤嗰啲坐监嘅人，连自己嘅财物俾人抢走都冇失去喜乐*，因为你哋知道自己有更加美好而且长存嘅产业。

35 所以要勇敢*，唔好放弃，因为会有丰厚嘅奖赏。 36 你哋需要忍耐，噉样你哋遵行上帝嘅旨意之后，就可以得到佢承诺嘅福分。 37 过多“一阵间”，“要嚟嘅嗰位就会嚟到，唔会延迟”。 38 “我正义嘅仆人会因为有信心而活着”。“如果佢退缩，我就唔钟意佢”。 39 我哋唔系因为退缩而灭亡嘅人，而系因为有信心而保全生命嘅人。