雅各书

4 你哋当中有战争同争斗，祸根系咩呢？唔系就系引起你哋内心*挣扎嘅有罪*欲望咩？ 2 呢个就系点解，你哋渴求，但系得唔到。你哋一直有仇恨*，一直有贪念，不过都系得唔到。你哋成日争斗作战。你哋得唔到，系因为冇祈求。 3 就算你哋祈求，都系唔会得到，因为你哋为咗错误嘅目的祈求，想用嚟满足你哋有罪嘅*欲望。

4 对上帝不忠*嘅人啊，唔通你哋唔知道同世俗友好，就系同上帝敌对咩？所以，边个想同世俗做朋友，边个就令自己成为上帝嘅敌人。 5 圣经话：“我哋嘅内心有妒忌嘅倾向，令我哋有各种贪念。”唔通你哋认为圣经噉样讲系无缘无故㗎咩？ 6 不过，上帝所赐嘅分外恩典，力量就更加强。所以圣经话：“上帝同高傲嘅人为敌，但系就赐分外恩典俾谦卑嘅人。”

7 所以你哋要顺服上帝，反抗魔鬼，魔鬼就会离开你哋逃跑嘞。 8 你哋要亲近上帝，上帝就会亲近你哋。有罪嘅人啊，要令你哋嘅手洁净；三心两意嘅人啊，要令你哋嘅心纯洁。 9 你哋应该觉得痛苦，要哀痛哭泣，欢笑应该变成哀痛，喜乐要化为沮丧。 10 要喺耶和华*面前谦卑，佢就会令你哋得到荣耀*。

11 各位弟兄，唔好再互相批评嘞。批评弟兄或者谴责*弟兄嘅，就系批评法律、谴责法律。如果你谴责法律，就唔系遵守法律，而系做咗审判官嘞。 12 赐下法律、施行审判嘅，只有一位，就系有能力拯救人同埋毁灭人嘅上帝。但系，你系边个，竟然够胆谴责其他人？

13 你哋有人话：“今日或者听日，我哋要去某座城，喺嗰度住一年，做生意赚钱。” 14 其实听日有咩事发生喺你哋身上*，你哋都唔知道。你哋只系一片雾气，出现一阵间就消失。 15 相反，你哋应该话：“如果系耶和华*嘅意思，我哋就可以继续有生命，可以做呢件事或者嗰件事。” 16 但系而家你哋竟然傲慢噉自夸，仲引以为荣。噉样嘅自夸都系邪恶㗎。 17 所以，人如果知道乜嘢系啱嘅*，但系唔去做，呢个就系佢嘅罪嘞。