约翰一书

3 试谂吓，天父几咁爱我哋，俾我哋称为上帝嘅仔女！我哋亦都真系佢嘅仔女。世人之所以唔认识我哋，系因为佢哋仲未认识佢。 2 亲爱嘅弟兄姊妹，而家我哋已经系上帝嘅仔女，虽然将来嘅具体情况仲未显明出嚟，但系我哋清楚知道，当佢显现嘅时候，我哋都会好似佢一样，因为我哋将会见到佢系点样嘅。 3 凡系对佢有呢个希望嘅，都令自己洁净，正如佢系洁净嘅一样。

4 所有经常犯罪嘅，就系经常违反法律。罪即系违反法律*。 5 你哋知道，基督曾经嚟到*，目的系要除去我哋嘅罪。佢从来都冇犯罪。 6 凡系时刻同佢联合嘅，都唔会经常犯罪。经常犯罪嘅，冇对佢表现信心*，亦都唔认识佢。 7 我嘅仔女啊，唔好俾人误导你哋。经常行事正义嘅，就系正义嘅人，就好似基督系正义嘅一样。 8 经常犯罪嘅，就源自*魔鬼，因为魔鬼由最初就一直犯罪。上帝个仔曾经嚟到，目的系要消除*魔鬼所做嘅一切。

9 凡系从上帝而生嘅，都唔会经常犯罪，因为上帝嘅力量*留喺呢个人心入面。佢亦都唔能够继续犯罪，因为佢已经从上帝而生。 10 边个系上帝嘅仔女，边个系魔鬼嘅仔女，通过以下呢点就可以知道：冇经常行事正义嘅人，都唔系源自*上帝嘅；唔爱弟兄嘅人，亦都唔系源自上帝嘅。 11 你哋由一开始就听到嘅诫命系，我哋应该彼此相爱。 12 唔好好似该隐噉，佢系源自撒但*嘅，杀咗自己嘅细佬。佢点解杀死细佬呢？因为佢做嘅事邪恶，佢细佬做嘅事正义。

13 各位弟兄，世人憎恨你哋，你哋唔使惊讶。 14 我哋知道自己已经脱离死亡，归入生命，因为我哋爱弟兄。至于冇爱心嘅，就仍然留喺死亡之中*。 15 憎恨弟兄嘅，都系杀人嘅。你哋知道，杀人嘅，都唔会有永远嘅生命。 16 我哋认识爱，系因为基督为我哋牺牲生命。我哋都应该为弟兄牺牲生命。 17 边个拥有财物，见到弟兄贫困，但系硬起心肠唔理，噉佢又点可以话自己爱上帝呢？ 18 我嘅仔女啊，我哋嘅爱，唔应该得把口，要有真诚嘅行动。

19 凭住呢一点，我哋就知道自己拥有真理*，可以喺上帝面前放心*。 20 无论我哋嘅心喺乜嘢事上定我哋有罪，我哋都可以放心，因为上帝比我哋嘅心大*，知道一切。 21 亲爱嘅弟兄姊妹，如果我哋嘅心冇定我哋有罪，我哋就可以向上帝畅所欲言； 22 无论我哋求乜嘢，佢都赐俾我哋，因为我哋遵守佢嘅诫命，做佢喜悦嘅事。 23 佢嘅诫命就系，我哋要对佢嘅仔耶稣基督嘅名有信心，而且照佢*嘅诫命彼此相爱。 24 边个遵守上帝*嘅诫命，就时刻同上帝联合，上帝都时刻同嗰个人联合。佢赐神圣力量俾我哋，凭住呢一点，我哋就知道佢时刻同我哋联合嘞。