犹大书
1 耶稣基督嘅奴隶，雅各嘅兄弟犹大，写信俾受上帝呼召嘅人。上帝我哋嘅天父爱你哋，亦都因为耶稣基督而保护你哋。
3 亲爱嘅朋友，本来我写信俾你哋，系想讲吓我哋都从上帝嘅拯救得益，但系我发觉有必要劝你哋为信仰奋斗，而呢个信仰只系一次传俾圣民，就永远长存。 4 我噉样讲系因为，有啲人偷偷混入你哋当中，佢哋系圣经一早预告会受到惩罚嘅。呢啲人完全唔尊重上帝*，恃住有上帝嘅分外恩典，就做埋啲无耻嘅行为*，背叛咗我哋独一嘅主人，即系我哋嘅主耶稣基督。
5 虽然我跟住想讲嘅，你哋都好熟悉，但系我都系想提醒你哋：耶和华*将佢嘅子民从埃及拯救出嚟，不过后嚟就毁灭咗佢哋当中冇表现信心嘅人。 6 有啲天使冇紧守岗位，离开咗佢哋应该住嘅地方，上帝就用永恒嘅锁链将佢哋韫喺极度黑暗之中，直到执行判决嘅大日子嚟到。 7 所多玛、蛾摩拉同埋周围嘅城镇都好似佢哋一样，沉溺于下流嘅淫乱行为*，尽情满足变态嘅欲望，结果佢哋受到火嘅刑罚而永远被毁灭*，成为咗前车之鉴。
8 唔单止噉，呢啲混入会众嘅人成日幻想啲唔好嘅嘢*，做出不洁嘅行为，藐视有领导权嘅人，仲侮辱嗰啲得到上帝荣耀嘅人*。 9 当天使长米迦勒因为摩西嘅遗体同魔鬼争辩嘅时候，佢都唔敢用侮辱嘅说话，定魔鬼嘅罪，净系话：“愿耶和华*严厉噉斥责你。” 10 不过，呢啲人对于唔明白嘅嘢就恶意批评*，佢哋好似啲动物噉，净系识得按照本能去做，完全冇理性，结果越嚟越堕落。
11 佢哋大祸临头嘞，因为佢哋拣咗行该隐嘅路，又学似巴兰噉为咗报酬而急住走上歧途，仲好似可拉噉讲啲大逆不道嘅说话，自取灭亡！ 12 呢啲人同你哋享用宴席*嘅时候，系隐藏喺海底嘅礁石；系厚颜无耻嘅牧人，净系挂住自肥；系唔会落雨嘅云，净系随住啲风飘嚟飘去；系到咗时候都结唔出果实嘅树，已经彻底枯萎*，俾人连根拔起； 13 系汹涌嘅海浪，卷起可耻嘅行为*；系冇固定轨道嘅星，留俾佢哋嘅，就只有无尽嘅漆黑幽暗。
14 关于呢啲人嘅下场，亚当嘅第七代子孙以诺，都曾经预告话：“睇吓！耶和华*带住千千万万圣洁嘅天使嚟， 15 对所有人执行判决，将所有藐视上帝嘅人定罪，因为佢哋用唔尊重嘅态度做尽邪恶嘅事*，仲用各种恶毒嘅说话*攻击上帝。”
16 呢啲人钟意发牢骚，唔满足于自己拥有嘅嘢*，佢哋钟意点做就点做，自吹自擂，为咗自己嘅利益讨好其他人。
17 亲爱嘅朋友，你哋要谂返我哋主耶稣基督嘅使徒*讲过嘅说话*。 18 佢哋经常话：“喺最后嘅时期，有啲人会因为你哋做啱嘅事而取笑你哋，佢哋藐视上帝，任意妄为。” 19 呢啲人制造分裂，唔接受上帝嘅思想指引*，好似动物噉样*。 20 亲爱嘅朋友，你哋要喺至圣嘅信仰*上成长*，按照神圣力量嘅指引祷告， 21 噉样你哋就可以继续留喺上帝嘅爱里面，期待我哋嘅主耶稣基督嘅怜悯，为你哋带嚟永远嘅生命。 22 对于嗰啲信心动摇嘅人，要继续怜悯佢哋， 23 将佢哋从火里面抢救出嚟*。另外，有啲人嘅行为受到罪嘅影响*，你哋都要继续怜悯佢哋，但系就要小心，要憎恨呢啲行为。
24 上帝可以守护你哋，等你哋唔会失足，可以清白噉企喺充满荣耀嘅上帝面前，满心欢喜。 25 佢系独一嘅上帝，通过我哋嘅主耶稣基督拯救咗我哋。愿荣耀、威严、大能、权力，由古至今，永永远远，都属于佢。阿们。