以弗所书

6 做仔女嘅，你哋要服从父母，主希望你哋噉做，因为噉做系正义嘅。 2 第一条附带承诺嘅命令话：“要尊敬*父母， 3 噉你就会事事顺利，喺地上活得长久。” 4 做爸爸嘅，唔好令啲仔女激气，要按照耶和华*嘅意思管教同劝诫*佢哋，将佢哋抚养成人。

5 做奴隶嘅，你哋要畏惧战兢，衷心服从主人*，好似服从基督一样。 6 你哋服从主人，唔好只系做俾人睇，想讨好人。身为基督嘅奴隶，你哋要尽心竭力*执行上帝嘅旨意。 7 要乐意*为主人服务，就好似为耶和华*服务，而唔系为人服务， 8 因为你哋知道，无论系奴隶定系自由人，每个人都会因为各自嘅善行，而得到耶和华*嘅赏赐。 9 做主人嘅，你哋都要继续用同样嘅态度对待奴隶，唔好恐吓佢哋，因为你哋知道，佢哋同你哋有同一位主人喺天上，佢系唔偏心嘅。

10 最后，你哋要靠住主嘅大能大力，不断加强自己嘅力量。 11 要着上上帝所赐嘅全副盔甲，噉你哋就可以企稳，抵抗魔鬼嘅奸计。 12 因为我哋有一场搏斗*，唔系对抗血肉之躯，而系对抗嗰啲执政嘅*、当权嘅、统治呢个黑暗世界嘅，对抗天上嘅邪灵。 13 所以，要着上上帝所赐嘅全副盔甲，噉样你哋喺邪恶嘅日子就能够抵挡得住，做好一切准备之后能够企稳。

14 你哋要企稳。要将真理当做腰带束喺腰度，将正义当做胸甲着喺身上， 15 亦都要准备好宣扬关于和睦*嘅好消息，就好似将鞋着喺脚度。 16 另外，要将信心当做大盾牌，噉你哋就能够令撒但*所有燃烧嘅飞箭*熄灭， 17 亦都要将救恩当做头盔，仲要拎住神圣力量嘅剑，即系上帝嘅话语。 18 要随时随地靠住神圣力量祷告，献上各种形式嘅祷告同恳切祈求。要时刻警醒，为全体圣民坚持不懈噉恳求。 19 请你哋都为我祈求，令我开口嘅时候可以讲出合适嘅说话，放胆宣扬好消息嘅神圣秘密。 20 （我为咗呢个好消息成为俾锁链锁住嘅大使。）噉样，我就可以放胆讲论好消息，而我系应该噉做㗎。

21 推基古会将一切话俾你哋知，等你哋知道我嘅事，仲有我嘅情况。佢系我亲爱嘅弟兄，系主嘅忠心仆人。 22 我派佢去你哋嗰度，系想你哋知道我哋嘅事，可以得到安慰。

23 愿上帝我哋嘅爸爸，仲有主耶稣基督，赐安宁*、爱心、信心俾各位弟兄*。 24 愿所有对我哋主耶稣基督有永恒*嘅爱嘅人，享有分外恩典。