腓立比书

2 如果你哋因为大家都属于基督而互相鼓励，怀住爱心彼此安慰，共享基督徒嘅情谊*，亦都有温情同埋怜恤， 2 你哋就要思想一致，爱心一致，谂法*一致，完全团结。你哋噉做会令我非常喜乐。 3 无论你哋做乜嘢都唔好有竞争嘅心态，唔好以自我为中心*，要谦卑，睇其他人比自己优秀*。 4 唔好净系关心*自己，亦都要关心其他人。

5 基督耶稣有点样嘅思想态度，你哋都要有点样嘅思想态度。 6 佢本来以上帝嘅形态存在，但系从来都冇谂过要同上帝有同等嘅地位*。 7 佢放弃咗一切，接受咗奴隶嘅形态，成为一个人*。 8 唔单止噉，佢成为人*之后，亦都行事谦卑，服从至死，甚至死喺苦刑柱*。 9 所以，上帝将佢提升到更高嘅地位，将超越所有名嘅名仁慈噉赐俾佢。 10 噉样，所有喺天上嘅、地上嘅、地下嘅*，都要奉耶稣嘅名屈膝下跪， 11 众生都要开口承认耶稣基督系主，将荣耀归于上帝我哋嘅爸爸。

12 我亲爱嘅朋友，你哋一直表现服从。我喺你哋嗰度嘅时候，你哋有噉做，而家我唔喺度，你哋仲更加服从。既然系噉，你哋应该敬畏上帝，不断努力，令自己最终得救。 13 上帝一定会激励你哋，令你哋唔单止有意愿，亦都有力量采取行动，因为噉做令佢非常喜悦。 14 无论你哋做乜嘢，都唔好埋怨，亦都唔好争论。 15 噉样，你哋就能够成为上帝无可指责，清白无邪嘅仔女。你哋要喺呢个邪恶腐败嘅世代当中毫无瑕疵，好似明光一样照耀， 16 紧握生命嘅话语。如果你哋噉做，我喺基督嘅日子就可以欢乐，因为知道自己即使奔波劳碌，都唔系白费心机嘅。 17 就算我而家好似浇祭*一样，倒喺你哋因为信心而献出嘅祭物同埋神圣服务*之上，我仍然好快乐，而且同你哋所有人一齐欢乐。 18 所以，你哋都要快乐，同我一齐欢乐。

19 如果系主耶稣嘅意思，我希望快啲派提摩太去你哋嗰度，噉我就可以知道你哋嘅近况，得到鼓励。 20 我揾唔到第二个人好似佢咁真挚关心你哋。 21 其他人只系关心自己嘅利益*，而唔系耶稣基督嘅利益。 22 但系你哋都知道，提摩太并唔系噉嘅人*。佢同我一齐辛勤努力*宣扬好消息，就好似爸爸同个仔一齐工作噉。 23 所以，我希望一知道自己之后嘅情况，就派佢去见你哋。 24 其实我深信，主嘅意思系，我好快就可以去你哋嗰度。

25 不过，而家我要派以巴弗提去你哋嗰度。佢系我嘅弟兄，我嘅战友，一齐工作嘅同伴。佢亦都系你哋派嚟照顾我嘅使者。 26 我派佢去，系因为佢一直好想见你哋。佢知道你哋听讲佢病咗，就好难过。 27 佢真系病得好严重，几乎死呀。不过上帝怜悯佢，其实唔系净系怜悯佢，亦都系怜悯我，等我唔使更加悲伤*。 28 所以，我好想快啲派佢返去。噉你哋见到佢，就一定会好开心，我亦都唔使咁担心嘞。 29 你哋要开开心心噉欢迎佢，就好似你哋平时欢迎主嘅信徒一样。要继续珍视好似佢一样嘅弟兄， 30 佢为咗基督嘅工作*几乎连命都冇埋。佢愿意冒生命危险，代替你哋照顾我，因为你哋唔喺我身边。