提摩太后书

2 所以，我嘅仔啊，你要不断从基督耶稣嘅分外恩典获得力量。 2 我传讲嘅事有好多人作证，你要将听到嘅呢啲事交托俾忠信嘅人，等佢哋都可以胜任教导人嘅工作。 3 你身为基督耶稣嘅精兵，要准备好忍受逆境。 4 当兵嘅人为咗赢得征召佢嘅人嘅认可，唔会挂住赚钱*。 5 参加体育竞赛嘅人如果唔遵守规则，就得唔到冠冕。 6 勤力嘅农夫最先享用收成系好合理㗎。 7 你要不断思考我嘅说话，主会令你喺一切事上都有理解力*。

8 你要记住，耶稣基督已经死而复生，佢系大卫嘅后代。呢个就系我传讲嘅好消息。 9 为咗呢个好消息，我忍受紧逆境，甚至俾人当成罪犯囚禁。不过，上帝嘅话语系冇人可以囚禁㗎。 10 所以，为咗上帝拣选嘅人，我事事忍耐，等佢哋都可以得到拯救同埋永恒嘅荣耀。呢种拯救系通过基督耶稣而嚟嘅。 11 有一句说话真实可信：如果我哋同死，就一定会同活； 12 如果我哋忍耐落去，就一定会一齐做君王；如果我哋唔认佢，佢都一定唔认我哋； 13 就算我哋唔忠信，佢都系忠信嘅，因为佢冇可能否定自己*。

14 你要不断提醒大家呢啲事，喺上帝面前教导佢哋*唔好为字眼争辩，因为噉样做一啲用都冇，而且对听嘅人有害*。 15 要竭尽全力成为上帝认可嘅人，做个无愧嘅工人，正确噉运用真理嘅话语。 16 你要避开亵渎神圣事物嘅空洞言论，因为呢啲言论*会令人越嚟越藐视上帝。 17 呢啲说话会好似坏疽一样扩散。许米乃同腓理徒就系有份讲呢啲说话嘅人。 18 佢哋偏离真理，话复活已经系过去嘅事，破坏某啲人嘅信心。 19 虽然系噉，上帝奠定嘅坚固根基仍然屹立，根基上有噉样嘅印记：“耶和华*认识属于佢嘅人。”“所有呼求耶和华*圣名嘅人，都应该离弃不义。”

20 大户人家嘅器皿*，有金嘅银嘅，亦都有木嘅瓦嘅，有啲用喺体面嘅事，有啲用喺冇咁体面嘅事。 21 人如果避开后一类器皿，就会成为用嚟做体面嘅事嘅器皿*。佢会成圣*，对主人有用，准备好做各种美善嘅工作。 22 所以，你要远避*年轻人嘅欲望，同嗰啲本住洁净嘅心呼求主嘅人，一齐努力做正义嘅事，表现信心、爱心，亦都追求安宁*。

23 另外，要拒绝参与愚蠢无知嘅辩论，因为你知道呢种行为会引起争拗。 24 主嘅奴隶唔应该同人争拗，而系应该对所有人都和和气气*，具备教导嘅能力，俾人恶待嗰阵保持克制， 25 温和噉教导对抗嘅人。或者上帝会容许佢哋悔改*，可以确切认识真理。 26 噉样，虽然佢哋俾魔鬼活捉，按照佢嘅意思去做，但系都有可能醒悟，逃出魔鬼嘅陷阱*。