提摩太前书
5 唔好严厉噉批评年长嘅男人。相反，要好似劝爸爸噉劝佢，好似劝兄弟噉劝年轻嘅男人， 2 好似劝妈妈噉劝年长嘅女人，好似劝家姐细妹噉劝年轻嘅女人，举止态度要完全贞洁。
3 要关心*真正需要帮助嘅寡妇*。 4 不过，寡妇如果有儿孙，儿孙就应该先喺屋企学习实践虔诚*之道，亦都要报答父母同祖父母，因为噉样做系上帝喜悦嘅。 5 真正无依无靠嘅寡妇寄望于上帝，不断恳切祈求，日夜祷告。 6 净系挂住寻欢作乐嘅寡妇，虽然有生命，但系喺崇拜方面系死嘅。 7 你要向大家再三复述呢啲指示*，噉佢哋就可以无可指责。 8 边个唔照顾亲人*，特别系自己嘅屋企人，就等于否认信仰，仲差过唔系信徒嘅人。
9 列喺名单上嘅寡妇，起码要有60岁，忠于丈夫*， 10 因为良好嘅行为而有好名声，例如养育儿女，慷慨好客，为圣民洗脚*，帮助受苦嘅人，努力做各种美善嘅工作。
11 至于年轻嘅寡妇，就唔好列喺名单上面，因为佢哋一旦受性欲影响，唔再专心为基督服务，就会想结婚。 12 佢哋违背当初嘅承诺*，就会被定罪。 13 同时，佢哋惯咗无所事事，周围游荡*，唔单止无所事事，仲钟意讲闲话，多管闲事，讲啲唔应该讲嘅嘢。 14 所以，我希望年轻嘅寡妇结婚，生儿育女，打理家务，唔好俾反对嘅人有机会批评我哋。 15 其实，有啲人已经离弃真理，跟随撒但嘞。 16 如果一个女信徒有亲人系寡妇，就应该自己帮助佢哋，唔应该加重会众嘅负担，等会众可以帮嗰啲真正需要帮助嘅寡妇*。
17 长老好好督导会众，应该深受尊重。如果佢哋辛勤噉传讲上帝嘅信息同埋教导人，就更应该得到尊重。 18 圣经话，“牛踩谷嘅时候，唔可以套住佢嘅嘴”，亦都话，“工人得到报酬系应该嘅”。 19 如果有人指控长老，冇两三个人嘅证词，就唔好受理嘞。 20 另外，你要当住所有在场嘅人，责备嗰啲经常犯罪嘅人，等其余嘅人引以为戒*。 21 我喺上帝、基督耶稣，仲有上帝拣选嘅天使面前郑重吩咐你，要遵守呢啲指示，唔好有成见，亦都唔好偏心。
22 千祈唔好匆匆忙忙噉委任人*，唔好分担人哋嘅罪。你自己要保持贞洁。
24 有啲人嘅罪系众所周知嘅，好快就被定罪，但系有啲人嘅罪系之后先显露出嚟嘅。 25 同样，良好嘅行为都系众所周知嘅，就算唔系，都唔会一直隐藏。