遵行耶和华嘅旨意会带嚟祝福

1923年，我喺英国约克郡嘅一个小镇赫姆斯沃思出世。我有个哥哥，佢叫鲍勃。我九岁嗰时，爸爸唔钟意伪善嘅宗教，佢得到一啲揭露错误宗教嘅书，嗰啲书令佢留低深刻嘅印象。几年之后，鲍勃·阿特金森嚟拜访我哋，同埋用留声机播放一个卢述福弟兄嘅演讲俾我哋听。我哋发觉呢个演讲同嗰啲书系嚟自同一个组织嘅！于是，爸爸妈妈邀请阿特金森弟兄每晚都留低食饭，解答我哋好多嘅圣经问题。之后，我哋受邀请去一个弟兄屋企参加聚会，嗰度离我哋屋企几英里。我哋好快就接受真理，一群好细嘅会众亦都喺赫姆斯沃思成立。冇几耐我哋有机会接待周游监督（而家叫分区监督），仲邀请附近嘅先驱一齐食饭。同佢哋一齐交往真系令我受到好大嘅鼓励。

嗰阵我哋一家人开始做生意，但系爸爸同哥哥讲：“如果你想做先驱，我哋就要放弃呢啲嘢嘞。”鲍勃觉得爸爸讲得好啱，所以佢21岁就离开屋企做先驱。两年之后，我16岁嗰时都被委派做先驱。我除咗周末同其他人传道之外，平时都系一个人用见证卡同留声机传道。但系耶和华祝福我，帮我揾到一个进步得好快嘅圣经学生，而且佢好多家人后来都接受真理。跟住第二年，我同玛丽·亨歇尔被派到柴郡做特别先驱，嗰度系一个未分配俾任何会众嘅地区。

到咗第二次世界大战中期，妇女都要参加支持战争嘅活动。我哋作为特别先驱，做全时传道员，以为可以同其他宗教嘅传教士一样得到豁免权。但系法庭唔同意，我被判坐监31日。第二年，我19岁嗰阵登记自己因良心缘故拒绝参加支持战争嘅活动。后来我两次被控告要上法庭，但系我嘅案件竟然被撤销咗，无罪释放。呢啲经历帮助我睇出耶和华通过圣灵帮助我，佢嘅手一直扶持我，使我坚定刚强。（以赛亚书41:10,13）

1946年我认识阿瑟·马修斯。佢因良心缘故拒服兵役而被判入狱三个月，佢一坐完监，就搬去赫姆斯沃思，同佢弟弟丹尼斯一齐，佢弟弟系个特别先驱。阿瑟嘅爸爸自细就教佢哋认识耶和华，佢哋十几岁就受咗浸。好快丹尼斯被委派去爱尔兰，所以阿瑟冇同伴。阿瑟系个年轻又热心嘅先驱，我嘅父母对佢印象好好，就邀请阿瑟同佢哋一齐住。我去探父母嗰阵，食完饭之后都会同阿瑟帮手洗碗。后来我哋开始通过写信保持联系。1948年期间，阿瑟再次被判监三个月。我哋1949年1月结婚，大家都有同样嘅目标，就系想一直留喺全时服务嘅岗位上。所以我哋做好计划，利用假期去农场工作赚啲钱，同埋有耶和华嘅祝福，我哋就可以继续做先驱。

一年之后，我哋被派去北爱尔兰。首先去阿马，之后去纽利，呢啲主要系天主教嘅城镇。当地嘅宗教偏见好强烈，所以我哋要好小心噉向人传道。我哋喺一对见证人夫妇屋企举行聚会，大概有八个人参加，嗰度离我哋屋企16公里（10英里）。有时我哋会留喺佢哋屋企过夜，我哋会打地铺同埋第二日会享受丰富嘅早餐。今日，我哋真系好开心见到嗰度嘅地区有好多耶和华见证人。

我哥哥同佢太太洛蒂喺北爱尔兰做特别先驱，1952年，我哋四个人一齐参加喺贝尔法斯特嘅区域大会。当时有个弟兄好慷慨噉提供地方俾我哋同普赖斯·休斯一齐住，佢系英国嘅分部仆人。有一晚，我哋讨论啱啱发行嘅册子《上帝嘅道就系爱》（英语），呢本册子专门系为咗爱尔兰人出版嘅。普赖斯弟兄话俾我哋知，爱尔兰共和国嘅天主教徒好难接受真理。嗰度好多弟兄俾人赶走，冇地方住，而且当地嘅神父仲煽动群众用暴力对待佢哋。普赖斯弟兄话：“为咗参加一个好特别嘅活动，我哋需要有车嘅夫妇，将呢本册子分发到全国各地。”a我哋即刻话：“我哋去！”就系故事开头讲嘅嗰句话嘞。

去都柏林嘅先驱，通常都可以住喺亲切嘅拉特兰姊妹屋企，佢系一个忠贞事奉耶和华多年嘅姊妹。我哋喺佢屋企逗留咗一段时间，跟住卖咗啲私人物品，之后四个人逼上鲍勃嗰架有边车嘅三轮摩托车，打算去揾一架汽车。我哋终于揾到一架好适合嘅二手车，由于我哋冇人识得揸车，所以问卖主可唔可以揸过嚟。当日阿瑟成晚都坐喺张床度，模仿点样揸车换挡嘅动作。第二日朝早佢试吓将架车从车库揸出嚟嗰阵，特派传道员米尔德丽·威利特（佢之后同约翰·巴尔结婚）就嚟到。原来米尔德丽识得揸车！阿瑟跟佢学咗少少之后，而家我哋可以出发嘞！

下一步我哋需要揾一个住宿嘅地方。弟兄提醒我哋唔好住喺活动房屋车，因为反对我哋嘅人可能会放火烧车，所以我哋要揾一间屋，不过揾唔到。嗰晚我哋四个人就瞓喺架车入面。第二日，我哋净系揾到一架简陋嘅活动房屋车，入面得张好细嘅碌架床。嗰度就成为我哋嘅屋企嘞。传道探访嗰阵，有啲比较友善嘅农民容许我哋将架车停喺佢哋度，真系冇谂到，我哋一次都冇遇到袭击。我哋传道嘅地区有16至24公里（10至15英里）咁大。之后我哋去到下一个地区传道，都会返去探访嗰啲曾经俾我哋停车嘅住户。

我哋探访晒爱尔兰共和国东南部嘅所有住户，基本上冇咩大问题发生。我哋分发咗超过两万本册子，同埋将感兴趣人士嘅资料交俾英国分部办事处。而家嗰度已经有数以百计嘅见证人，真系好大嘅祝福啊！

后来，我哋派咗去伦敦南部。过咗几个星期之后，英国分部办事处打电话俾阿瑟，叫佢第二日就开始做探访工作！参加完一个星期嘅培训之后，我哋就派去苏格兰探访会众。虽然阿瑟冇咩时间准备演讲，但系佢好积极接受新委派，真系好鼓励我。我哋真系好钟意探访工作。我哋曾经喺一啲未分配俾任何会众嘅地区服务咗几年，而家可以经常见到咁多弟兄姊妹，真系一个好大嘅福分。

1962年，阿瑟受到邀请参加基列学校为期10个月嘅课程，由于我唔可以同佢一齐去，所以我哋要做一个重要嘅决定。虽然我哋难免要分开一段日子，我哋都认为阿瑟接受呢个特别嘅邀请系啱嘅。因为我冇咗传道同伴，所以就被派返去赫姆斯沃思做特别先驱。一年之后阿瑟返嚟，我哋就受委派去做区域探访嘅工作，地区包括苏格兰、英国北部同爱尔兰北部。

1964年，阿瑟收到一个新委派，成为爱尔兰共和国嘅分部仆人。一开始我好担心接受呢个新改变，因为我哋好钟意从事探访工作。而家谂翻转头，我真系好开心有机会喺伯特利服务。如果一个委派系你唔钟意嘅，但系你都愿意接受嘅话，我相信耶和华都会祝福你。我喺伯特利嘅委派包括办公室文职、打包书刊、厨师同埋清洁。有一段时间，我哋亦都做探访工作，有机会认识全国各地嘅弟兄姊妹，同埋见到圣经学生成为我哋嘅弟兄姊妹，使爱尔兰成为一个团结嘅属灵大家庭，真系一个好大嘅祝福啊！

1965年，第一个爱尔兰嘅国际大会喺都柏林举行。b即使受到各方面嘅反对，呢个大会依然顺利举行。一共有3948人参加，65人受浸。有份提供住宿俾3500位国际代表嘅人都收到一封嚟自爱尔兰分部办事处嘅感谢信，而呢啲提供住宿嘅人对国际代表嘅好行为都好赞赏。对爱尔兰嚟讲，呢次大会的确系一个属灵嘅里程碑。

1966年，南爱尔兰同北爱尔兰都一同属于都柏林分部办事处督导。呢种团结同当地分裂嘅政治同宗教形成强烈对比。能够见到咁多天主教徒接受真理，同曾经系基督新教徒嘅弟兄一齐并肩事奉上帝，我哋真系好感动啊！

2011年，当英国分部同爱尔兰分部合并嗰阵，我哋嘅生活完全改变。我哋被派去伦敦伯特利，收到呢个消息嘅同时，阿瑟被确诊患有柏金逊症，我好担心佢嘅健康。2015年5月20日，我66年嘅同伴离世。

最近呢几年，我感到心碎、灰心同痛苦。过去咁多年来阿瑟都喺我身边，我真系好挂住佢啊！但系经历过呢啲事，会使你更加亲近耶和华。我发觉好多人都好爱阿瑟，令我得到好大嘅安慰。我收到爱尔兰、英国，甚至美国朋友嘅来信。除咗呢啲信之外，阿瑟嘅弟弟丹尼斯，仲有佢嘅太太梅维斯，同埋我两个侄女露丝同朱迪，佢哋嘅帮助真系难以用言语嚟表达。

以赛亚书30:18嘅经文真系好鼓励我，经文话：“耶和华必然等候，要恩待你哋，佢要起嚟向你哋发慈悲。因为耶和华系主持公正嘅上帝。等候佢嘅人都系有福嘅。”我觉得最大嘅安慰，就系知道耶和华都喺度耐心等候，佢会喺新世界解决我哋所有嘅难题，同埋会俾我哋振奋人心嘅委派。

回顾我哋嘅一生，我睇到耶和华点样指引同祝福爱尔兰嘅传道工作。我好荣幸可以喺当地属灵发展出一分力。毫无疑问，如果我哋遵行耶和华嘅旨意就一定会得到祝福！