哥林多後書

11 我好希望你哋能夠容忍我有少少唔合理。其實你哋而家就要容忍我嘞！ 2 我非常關心你哋，就好似上帝關心你哋一樣*。我親自將你哋許配俾一個丈夫，就係基督，我想將你哋好似貞潔*嘅處女一樣獻俾佢。 3 不過，我驚你哋嘅思想俾人腐化，失去對基督應有嘅誠懇同貞潔，就好似夏娃俾蛇用詭計誘惑一樣。 4 我噉樣講係因為，如果有人嚟傳講另一個耶穌，唔係我哋傳講嘅，要你哋領受另一種精神*，唔係你哋已經領受嘅，叫你哋接受另一種好消息，唔係你哋已經接受嘅，你哋反而輕易容忍呢啲人喎。 5 我認為自己冇一樣嘢比唔上你哋嗰啲超等使徒。 6 就算我冇口才，都絕對唔係冇知識。我哋喺各方面，喺所有事上，都已經向你哋表明呢一點。

7 我委屈自己，令你哋受到顯揚，仲開開心心噉將上帝嘅好消息免費傳俾你哋，唔通我噉樣做係犯罪咩？ 8 我接受其他會眾嘅資助*，就好似搶咗佢哋嘅嘢嚟為你哋服務噉。 9 我喺你哋嗰度嘅時候無論缺少乜嘢，都冇成為你哋任何一個人嘅負擔，因為我需要嘅一切，馬其頓嚟嘅弟兄都充足噉供應俾我。喺各方面，我從來都冇成為你哋嘅負擔，將來亦都唔會。 10 只要我仲有基督嘅真理，我喺亞該亞一帶都會繼續噉樣誇耀。 11 點解呢？係咪因為我唔愛你哋呢？上帝知道我係好愛你哋㗎。

12 我而家做嘅，將來都會做，就係唔俾嗰啲人搵到任何借口去誇耀自己嘅地位。佢哋一直想證明*自己同我哋同等。 13 呢啲人係假使徒，行事詭詐，假扮基督嘅使徒。 14 噉唔出奇吖，因為撒但都一直假扮光明嘅天使。 15 所以佢嘅僕人一直假扮正義嘅僕人，我都唔覺得出奇。佢哋做咗乜嘢事，就會有乜嘢下場。

16 我再講多次，唔好認為我唔合理。就算你哋真係覺得我唔合理，都請你哋接納我，俾我稍為誇耀一下。 17 而家我噉樣講，唔係學習主嘅榜樣，而係好似一個唔合理嘅人，自以為是噉誇耀。 18 既然有好多人攞世俗嘅條件嚟誇耀*，我都要誇耀吓。 19 你哋咁「通情達理」，自然樂意容忍唔合理嘅人。 20 其實，就連嗰啲奴役你哋，侵佔你哋財產，搶你哋嘢，鄙視你哋，掌摑你哋嘅人，你哋都能夠容忍！

21 我噉樣講，我哋自己都覺得冇面，因為有啲人會以為我哋好軟弱。

不過我要講句唔合理嘅說話：如果有人夠膽誇耀，我都夠膽誇耀。 22 佢哋係希伯來人咩？我都係。佢哋係以色列人咩？我都係。佢哋係亞伯拉罕嘅後代咩？我都係。 23 佢哋係咪基督嘅僕人？我要狂妄噉講，我更加係。我做嘅工作比佢哋更多，坐監嘅次數比佢哋更多，俾人打過無數次，試過好多次幾乎冇命。 24 我俾猶太人打過五次，每次四十減一下； 25 我俾人用棍打過三次，有一次差啲俾人用石頭打死，遭遇船難三次，曾經一日一夜喺大海漂浮； 26 我經常遠行，經歷江河嘅危險、強盜嘅危險、同族嘅危險、外族*嘅危險、城入面嘅危險、曠野嘅危險、海上嘅危險、假弟兄嘅危險， 27 勞苦艱辛，不眠不休，又飢又渴，經常缺糧，唔夠衫著*，捱冷受凍。

28 除咗呢啲外在嘅事，我日日都為各群會眾憂慮*。 29 如果有人覺得軟弱，其實我都感同身受。*如果有人令人失足跌倒，我又點會唔嬲呢？

30 如果我一定要誇耀，我會誇耀自己軟弱嘅一面。 31 主耶穌嘅上帝，佢嘅爸爸，係應該永遠受到讚美嘅，佢知道我唔係講緊大話。 32 我喺大馬士革嘅時候，亞里達王手下嘅總督把守住大馬士革城，想逮捕我， 33 不過因為有人用一個籃*將我由城牆上嘅窗口放落去，所以我先可以逃過佢嘅毒手。