帖撒羅尼迦前書

5 各位弟兄，關於時候同時期，你哋唔需要我哋寫乜嘢俾你哋。 2 因為你哋自己清楚知道，耶和華*嘅日子嚟到，就好似賊喺夜晚嚟到一樣。 3 啲人話「和平安全嘞！」嘅時候，佢哋就會即刻面臨突如其來嘅毀滅，就好似孕婦面臨產痛噉。佢哋一定走唔甩。 4 但係各位弟兄，你哋唔喺黑暗之中，所以嗰個日子突然嚟到嗰陣，你哋唔會措手不及，好似日頭嚟到嗰陣，賊措手不及一樣， 5 因為你哋全部都係光明之子，白晝之子。我哋唔屬於黑夜，亦都唔屬於黑暗。

6 所以，我哋唔應該好似其他人噉繼續沉睡，反而幾時都應該警醒，保持清醒。 7 因為瞓覺嘅人係喺夜晚瞓覺，飲醉嘅人係喺夜晚飲醉。 8 但係我哋既然屬於白晝，就應該保持清醒，將信心同愛心當做胸甲著上身，將得救嘅希望當做頭盔， 9 因為上帝揀選我哋，唔係要懲罰我哋*，而係要我哋通過我哋嘅主耶穌基督得救。 10 基督為我哋而死，等我哋無論係生係死*，都能夠同佢一齊活著。 11 所以，你哋要不斷互相安慰*，互相鼓勵，就好似你哋而家做緊嘅噉。

12 各位弟兄，我哋請求你哋，要尊重嗰啲喺你哋當中辛勤工作嘅人，即係喺主嘅工作上督導、勸誡你哋嘅人， 13 亦都要因為佢哋嘅工作而特別敬重佢哋，愛佢哋。你哋要促進大家之間嘅和睦。 14 另外，各位弟兄，我哋勸你哋，要警告*唔守規矩*嘅人，安慰情緒低落嘅人*，支持軟弱嘅人，對所有人都要有耐心。 15 你哋要小心，唔好以惡報惡，幾時都要努力互相善待，亦都要善待其他人。

16 幾時都要喜樂， 17 不斷禱告， 18 事事感謝。呢個就係上帝對你哋跟隨基督耶穌嘅人定嘅旨意。 19 唔好令神聖力量嘅火熄滅。 20 唔好藐視上帝啟示嘅信息*。 21 事事都要驗證，美好嘅就要謹守。 22 各種各樣嘅惡事，都要禁戒。

23 願賜人安寧*嘅上帝令你哋完全聖潔。喺我哋嘅主耶穌基督返到我哋呢度嘅時候*，願你哋共同嘅精神*、生命*、身體，喺各方面都健全，得到保全，無可指責。 24 呼召你哋嗰位係信實可靠嘅，佢一定會噉樣幫助你哋。

25 各位弟兄，請不斷為我哋禱告。

26 請親切噉*問候所有弟兄。

27 我奉主嘅名鄭重吩咐你哋，要向所有弟兄讀出呢封信。

28 願我哋嘅主耶穌基督賜分外恩典俾你哋。