你會唔會解決紛爭同促進和睦呢？

耶和華上帝鼓勵基督徒珍視和平，將和平睇成係生活嘅一個重要部分。促進和睦會使真基督徒大享平安。對於嗰啲想遠離紛爭嘅人，基督徒會衆和睦嘅氣氛好吸引佢哋。

例如喺馬達加斯加，一個有名嘅巫醫睇到耶和華見證人和睦相處，就同自己講：“如果我要加入某個宗教嘅話，就要揀呢個！”後來，佢放棄咗通靈術，仲用咗一段時間去作出調整，使自己嘅婚姻關係符合聖經原則。最終，佢都開始崇拜和平嘅上帝耶和華。

好似呢個人噉，每年都有成千上萬嘅人喺基督徒會衆入面，揾到佢哋一直渴望得到嘅和平。不過，聖經好清楚噉指出，喺會衆裏面出現“苦毒嘅嫉妒同爭勝嘅精神”會破壞友誼，引起紛爭。（雅各書3:14-16）好在，聖經俾我哋實用嘅建議，可以幫助我哋避免呢類難題，而且增進會衆嘅和睦關係。而家等我哋嚟睇吓一啲真實事例。

“有個同我一齊做嘢嘅弟兄，我好難同佢相處。有一次，我哋嘈交嘈得好犀利，啱啱好有兩個人行入嚟，俾佢哋睇到晒。”——克理斯

“一個經常同我一齊傳道嘅姊妹突然間唔再同我去傳道，連計都唔同我傾。我一頭霧水，都唔知發生咗乜嘢事。”——珍妮特

“我哋三個人一齊傾電話。其中一個人講咗拜拜，我以為佢收咗線，就開始講佢嘅壞話，點知佢未收線嘅喎。”——米高

“喺我哋會衆，兩個先驅姊妹一直有啲詏撬，後來佢哋仲嘈咗起嚟，搞到其他人都好灰。”——加里

你或者覺得呢啲係小事。但係，呢啲小事都可以令當事人喺感情同屬靈上受到長期嘅傷害。不過，我哋好開心話俾你知，呢啲弟兄姊妹按照聖經嘅指引去做，已經恢復翻和睦嘅關係。你估吓佢哋成功噉運用咗邊啲聖經原則呢？

“喺路上大家唔好傷和氣。”（創世記45:24）約瑟喺佢嘅兄弟返屋企嗰時，俾咗佢哋呢個明智嘅勸告。如果一個人脾氣好暴躁，又唔控制自己，就好容易會激嬲其他人。克理斯留意到自己嘅弱點係高傲同埋唔想接受指引。佢想作出改變，於是向嗰個同佢嘈交嘅弟兄道歉，之後好努力去控制自己嘅脾氣。嗰個弟兄睇到克理斯咁努力改變自己，佢亦都作出調整。而家，佢哋好開心一齊事奉耶和華。

“唔先商議，計劃失敗”。（箴言15:22）珍妮特明白到，佢需要更加深入去體會呢個原則。佢決定同嗰個姊妹“商議”一下。珍妮特主動揾嗰個姊妹傾計，婉轉得體噉請佢將心裏面嘅不滿講出嚟。一開始，雙方都覺得難開口，不過當佢哋靜落心嚟討論彼此之間嘅問題，情況就有所好轉。嗰個姊妹發覺自己喺某件事上誤會咗珍妮特，其實根本唔關珍妮特事。姊妹道歉之後，佢哋再次並肩事奉耶和華。

“所以，你將禮物帶到祭壇嘅時候，如果喺嗰度諗起有弟兄對你不滿，就要將禮物留喺壇前，先去同弟兄講和，返嚟再將禮物獻上。”（馬太福音5:23,24）或者你仲記得耶穌喺登山寶訓講嘅呢個勸告。米高意識到自己講嘅話傷害咗弟兄，覺得好内疚。佢下定決心，盡力同嗰個弟兄恢復和睦嘅關係。佢表現謙卑，當面同弟兄道歉。結果點呢？米高話：“我嘅弟兄真心寬恕咗我。”佢哋再次和好如初。

“要繼續彼此包容，彼此甘心寬恕。耶和華點樣甘心寬恕咗你哋，你哋亦都要點樣甘心寬恕人。”（歌羅西書3:12-14）嗰兩個嘈交嘅先驅姊妹後來又點呢？一位仁慈嘅長老請佢哋諗吓以下嘅問題：“我哋有冇理由因為個人嘅詏撬而令到其他人難過呢？我哋係咪應該繼續彼此包容，團結和睦噉事奉耶和華呢？”接受同實踐長老嘅勸告之後，佢哋而家相處得好好，一齊傳講好消息。

喺你受到傷害嘅時候，如果將歌羅西書3:12-14嘅經文實踐出嚟，一定大有幫助。好多人都發覺，只要保持謙卑，佢哋就可以彼此寬恕，既往不咎。如果你經過一番努力，情況都仲係未有好轉，不如試吓將馬太福音18:15應用出嚟。雖然耶穌呢個勸告針對嘅係嚴重嘅罪，你都應該運用聖經原則，按照步驟去做。直接去見弟兄姊妹，用謙卑同仁慈嘅態度，努力同對方一齊解決問題。

當然，聖經都提供咗其他實用嘅建議。其實呢啲建議有冇作用，同你有冇表現“聖靈嘅果實”有關，即係“愛心、喜樂、和平、堅忍、仁慈、良善、信心、温和、自制”。（加拉太書5:22,23）呢啲嚟自耶和華嘅特質，就好似潤滑油噉，減少人同人之間嘅摩擦，使我哋有更好嘅人際關係。

每個人都有自己獨特嘅性格特質，對事情嘅睇法同表達方式都唔一樣。噉樣其實可以使我哋嘅友誼充滿樂趣。但係亦都因為性格唔同，人同人之間好容易發生摩擦。一個有經驗嘅長老舉咗個例，話：“一個怕醜嘅人，可能唔容易同一個活潑開朗嘅人相處。呢啲差異睇嚟係小事，但係可以導致嚴重嘅問題。”你認為，性格唔一樣嘅人係咪一定會發生矛盾呢？試諗吓兩位使徒嘅例子。彼得係點樣嘅人呢？可能你會覺得佢係一個率直、衝動嘅人。噉約翰呢？我哋可能認為佢係一個好有愛心，言行謹慎嘅人。冇錯，佢哋嘅性格真係好唔同，但佢哋合作得好好。（使徒行傳8:14；加拉太書2:9）所以，就算係性格差異好大嘅基督徒，都可以一齊開開心心噉工作。

可能某個弟兄講嘅嘢做嘅事令你好唔舒服。但係，你知道基督亦都為佢而死，你應該要表現愛心。（約翰福音13:34,35；羅馬書5:6-8）所以，與其唔同佢做朋友，或者避開佢，不如問吓自己：“呢個弟兄有冇做咗一啲違反聖經原則嘅嘢呢？佢係咪特登激嬲我呢？抑或只係我哋性格唔同？”最重要嘅問題係：“佢有乜嘢好嘅特質，我可以向佢學習呢？”

最後嘅問題特别值得我哋諗吓。如果一個人好鍾意講嘢，而你係一個比較靜嘅人，噉你可以諗吓，佢傳道嗰時肯定好容易同人打開話題。你可以主動約佢一齊傳道，向佢學習。如果你係一個知慳識儉嘅人，不妨留意吓大方嘅人點樣慷慨對待嗰啲年長、患病、貧窮嘅人，同埋佢哋噉做所帶嚟嘅喜樂。所以關鍵就係，就算性格唔一樣，你都可以努力留意弟兄姊妹嘅優點，從而拉近彼此之間嘅關係。噉樣做唔一定使你哋成為最好嘅朋友，但可以幫助你哋之間嘅關係更加親密，仲可以使會衆更加團結和睦。

友阿蝶同循都姬可能個性同做事方式都好唔一樣，但係使徒保羅鼓勵佢哋“要齊心一意為主服務。”（腓立比書4:2）同樣，我哋係咪都想同弟兄姊妹一齊崇拜耶和華，努力促進會衆嘅和睦呢？

就好似雜草好容易生滿晒成個花園噉，除非我哋將負面情緒斬草除根，唔係嘅話，問題就會擴大惡化。一旦怨恨喺一個人嘅心裏面扎根，有可能會影響整個會衆嘅氣氛。如果我哋愛耶和華同弟兄姊妹，就會盡己所能，唔會因為彼此間嘅差異而影響上帝子民嘅和睦。

我哋以追求和睦為目標，努力化解矛盾嘅話，就可能會有意想唔到嘅結果。睇吓一個姊妹嘅經驗，佢話：“有個姊妹成日都當我係細路女，我真係好唔鍾意佢噉。我越來越嬲佢，甚至同佢講多句都唔想。我諗，‘如果佢唔尊重我，我都唔使尊重佢吖。’”

呢位姊妹開始檢討自己嘅行為。“我留意到自己嘅性格弱點，對自己好失望。我意識到我要調整自己嘅諗法。我為呢件事向耶和華禱告之後，就買咗份小禮物送俾呢個姊妹，仲寫咗張卡向佢道歉。我哋互相擁抱，將呢啲唔愉快嘅事當粉筆字噉抹咗佢。之後，就咩事都冇喇！”

人與人之間好需要和睦嘅關係。不過，一旦地位同尊嚴受到威脅，人好容易就會做出一啲破壞和睦嘅事。對於嗰啲唔崇拜耶和華嘅人嚟講，噉樣做一啲都唔出奇。但對於上帝嘅子民嚟講，我哋應該盡力促進和平同團結。喺耶和華啟示之下，保羅寫到：“我……懇求你哋，行事要配得上你哋所受嘅呼召，要滿心謙卑、温和、堅忍，用愛心彼此包容，用和平維繫團結，竭力持守聖靈所賜嘅合一。”（以弗所書4:1-3）“用和平維繫［嘅］團結”係無價之寶，所以，我哋應該立定決心，盡力解決彼此之間嘅紛爭。