將目光集中喺重要嘅事上

1,2．（甲）全人類都面對緊乜嘢重大問題？（乙）感激之心有幾重要？

今日，對好多人嚟講，錢係最重要嘅。佢哋將注意力放喺積存財富上面。有啲人就覺得家庭、健康或者個人成就係最重要嘅。

² 但係對我哋嚟講，擁護耶和華嘅至高統治權先至係非常重要嘅。我哋要小心，千祈唔好忽視呢個至關重要嘅問題。點解噉講呢？我哋會因為太過專注於一日又一日嘅瑣碎事，或者顧住應付個人考驗，就忘記咗擁護上帝至高統治權嘅重要性。相反，如果我哋滿懷感激之心擁護耶和華嘅至高統治權，就可以更好噉裝備自己，迎接日常生活當中嘅挑戰。呢種感激之心仲可以拉近我哋同耶和華嘅關係。

 3．撒但點樣質疑耶和華嘅至高統治權？

³ 魔鬼撒但質疑耶和華嘅至高統治權。佢聲稱耶和華嘅統治唔公正，仲將最好嘅嘢收埋唔俾受造物。撒但嘅意思係，由人類嚟統治自己，先至係最好最開心嘅。（創世記3:1-5）撒但亦都暗示冇人會發自内心忠於上帝，一旦面對巨大嘅壓力，任何人都會離棄上帝嘅統治。（約伯記2:4,5）對於呢個爭議，耶和華俾人類足够嘅時間去證明，人冇咗耶和華嘅正義統治，係幾咁悲慘！

 4．點解至高統治權呢個爭議需要解決？

⁴ 耶和華當然好清楚撒但喺度講大話。噉點解耶和華俾機會撒但證明自己嘅主張呢？因為呢個牽涉到天使同全人類。（請讀詩篇83:18）自從第一對夫婦離棄耶和華嘅統治之後，有好多人都步佢哋後塵。有啲人可能會諗，撒但講嘅係咪啱嘅呢？只要呢個問題一日未解決，國族、部族、民族、家人之間都仲會有紛爭。耶和華嘅至高統治權得以彰顯之後，所有受造物都會永遠服從佢嘅正義統治，宇宙亦會恢復和平。（以弗所書1:9,10）

 5．喺擁護上帝嘅至高統治權方面，你可以點做？

⁵ 事實將會表明上帝嘅至高統治權係正當嘅，而撒但同人類嘅統治一敗塗地，要被徹底鏟除。上帝通過彌賽亞王國嘅統治一定會成功，對上帝保持忠貞嘅人亦會證明人類可以擁護上帝嘅統治。（以賽亞書45:23,24）喺擁護上帝嘅至高統治權方面，從古至今有好多忠貞嘅榜樣，你想唔想效法佢哋呢？你一定都好想。我哋將目光集中喺至高統治權嘅爭議之上，明白呢件事有幾咁重要，就可以幫助我哋保持忠貞。

 6．擁護耶和華嘅至高統治權有幾重要？

⁶ 就好似之前所講嘅一樣，對於全人類嚟講，擁護耶和華嘅至高統治權係極其重要嘅，甚至比個人嘅快樂更加重要。噉係咪我哋嘅得救唔重要呢？抑或，耶和華唔係咁關心我哋呢？絶對唔係。點解呢？

7,8．點解耶和華實現佢嘅應許，係彰顯至高統治權嘅一部分？

⁷ 耶和華深愛同珍視人類。佢樂意通過佢愛子嘅血，使我哋有機會得到永遠嘅拯救。（約翰福音3:16；約翰一書4:9）如果耶和華冇實現佢嘅應許，魔鬼就有藉口話耶和華講大話，仲收埋啲好嘅嘢唔俾人類，所以佢嘅統治係唔公正嘅。亦都俾反對者有機會羞辱上帝，話：“佢應許要臨在，邊有實現呢？其實，自從我哋列祖長眠以來，一切始終同創世開始嗰時一模一樣。”（彼得後書3:3,4）因為噉，耶和華一定會拯救嗰啲順服佢嘅人，呢個係彰顯佢嘅至高統治權嘅一部分。（請讀以賽亞書55:10,11）另外，耶和華嘅統治係以愛心為基礎嘅。所以我哋可以確信佢會永遠關愛、珍視同賞識佢忠貞嘅僕人。（出埃及記34:6）

⁸ 雖然我哋承認耶和華嘅至高統治權非常重要，但係都唔應該覺得我哋得救嘅希望唔重要，或者我哋喺耶和華眼中冇咩價值。對統治權同得救嘅希望有正確嘅觀點係好重要嘅。如果我哋想將目光集中喺至高統治權嘅重大爭議上，擁護耶和華嘅正義統治，就好需要有正確嘅觀點。

 9．撒但對約伯提出乜嘢質疑？（請睇吓課文開頭嘅圖片）

⁹ 約伯記係聖經入面最早寫成嘅書卷之一，裏面清楚提到我哋需要有正確嘅觀點。撒但質疑話，約伯一旦遭受猛烈嘅打擊，就會離棄上帝。撒但建議耶和華親自折磨約伯。耶和華冇噉做，但佢容許撒但去試探約伯，佢話：“［約伯］嘅一切都交喺你手上。”（請讀約伯記1:7-12）之後，約伯喺短時間之内喪失咗佢嘅僕人、收入來源同埋十個心愛嘅仔女。撒但所用嘅方式令人以為約伯嘅難題係上帝造成嘅。（約伯記1:13-19）撒但跟住用痛苦嘅惡疾去折磨約伯。（約伯記2:7）約伯嘅妻子同三個所謂嘅朋友仲講埋晒啲令人灰心沮喪嘅話，搞到佢更加絶望。（約伯記2:9；3:11；16:2）

10．（甲）約伯點做，表明佢忠於上帝？（乙）佢一時産生乜嘢錯誤嘅觀點？

¹⁰ 結果點呢？事實證明撒但嘅質疑大錯特錯，因為約伯並冇背叛上帝。（約伯記27:5）不過，約伯一時産生咗錯誤嘅觀點，佢變得過分正義，甚至仲要求上帝解釋佢受苦嘅原因。（約伯記7:20；13:24）可能我哋都會覺得，約伯經歷咗咁多嘅苦難之後有噉嘅諗法，係情有可原嘅。不過，耶和華睇出需要糾正佢嘅諗法。耶和華幫助佢明白啲乜嘢？

11,12．耶和華幫助約伯明白咗乜嘢？約伯點樣回應呢？

¹¹ 約伯記38-41章都係上帝對約伯講嘅話，入面冇一句提到約伯受苦嘅真正原因係乜嘢。耶和華主要想講嘅唔係約伯點解要受苦，佢亦都唔需要為自己辯護啲乜嘢。相反，佢係想幫助約伯意識到，相對於耶和華嘅偉大作為嚟講，人類嘅問題係幾咁渺小。上帝仲幫助約伯睇出，佢需要關心更加重要嘅問題。（請讀約伯記38:18-21）耶和華所講嘅話，使約伯恢復翻正確嘅觀點。

¹² 約伯遭受咁猛烈嘅打擊之後，耶和華提出咁直接嘅勸告係唔係太無情呢？唔係，而且約伯都冇噉諗。雖然經歷咁多苦難，但後來約伯改變態度，開始講出感激嘅話。佢仲講到：“我收翻自己講過嘅話，喺塵土同灰燼中懊悔。”雖然耶和華嘅勸告好直接，但係就可以令約伯重新振作起嚟。（約伯記42:1-6）而之前，以利户亦都俾咗一啲勸告幫助約伯調整自己嘅觀點。（約伯記32:5-10）由於約伯對耶和華嘅糾正作出回應，佢調整咗自己嘅觀點，結果耶和華好賞識佢所表現嘅信心。（約伯記42:7,8）

13．耶和華點樣祝福約伯？考驗結束之後，約伯點樣繼續保持正確嘅觀點？

¹³ 即使約伯嘅考驗結束咗，耶和華俾佢嘅勸告依然繼續使佢得益。約伯點樣從中得益呢？聖經話：“後來耶和華賜福俾約伯，比之前更多。”毫無疑問，恢復翻以前嘅生活同埋復原身心嘅創傷係需要時間嘅。一段時間過後，佢“又有七個仔、三個女。”（約伯記42:12-14）約伯肯定好掛住之前俾撒但害死咗嘅仔女，可能佢不時都仲會回憶起一啲慘痛嘅經歷。雖然佢之後更加明白自己受考驗嘅原因，但係佢都可能會諗，自己受嘅苦係咪真係要到噉嘅程度呢！無論佢點諗都好，佢都可以回想翻上帝俾佢嘅勸告嚟幫助自己保持正確嘅觀點，得到安慰。（詩篇94:19）

14．我哋從約伯嘅經歷學到乜嘢？

¹⁴ 我哋沉思約伯嘅記載，都可以培養正確嘅觀點，得到安慰。而耶和華將呢啲記載保存落嚟，就係“為咗教導我哋……等我哋靠住忍耐，靠住聖經所帶嚟嘅安慰，可以懷有希望。”（羅馬書15:4）我哋學到乜嘢呢？主要係：我哋唔好過度關注自己嘅生活，要將目光集中喺擁護耶和華嘅至高統治權呢件重要嘅事上。另外，喺至高統治權嘅問題上，我哋係可以發揮重要作用嘅。就算喺好艱難嘅環境之下，我哋都可以好似約伯噉，繼續保持忠義。

15．我哋喺考驗之下保持忠貞可以達成乜嘢目的？

¹⁵ 沉思保持忠貞嘅價值，點解可以令人得到安慰呢？千祈唔好以為受考驗就代表上帝唔鍾意我哋，其實呢啲考驗係可以達成一個目的嘅，就係使我哋有機會去表明自己支持上帝嘅至高統治權。（箴言27:11）我哋保持忍耐就可以得蒙“悦納”，而且對未來嘅希望更有信心。（請讀羅馬書5:3-5）約伯嘅事例表明耶和華係“充滿温情，慈悲為懷”嘅上帝。（雅各書5:11）所以我哋好肯定，佢會獎賞所有擁護佢至高統治權嘅人。知道呢一點，可以幫助我哋“凡事忍耐，懷住喜樂而堅忍”。（歌羅西書1:11）

16．點解我哋需要提醒自己，擁護耶和華至高統治權嘅重要性？

¹⁶ 當然，要專注於擁護耶和華嘅至高統治權，對我哋嚟講，都可以係一種挑戰。有時，我哋會覺得難題大到自己根本應付唔嚟。就算係一啲小問題，如果我哋成日諗嚟諗去，都會俾我哋諗成係大問題。所以，面對困難嗰時，我哋要經常提醒翻自己，支持上帝至高統治權嘅重要性。

17．經常做耶和華嘅工作，點樣幫助我哋將目光集中喺重要嘅事上？

¹⁷ 經常做耶和華嘅工作，可以幫助我哋將目光集中喺重要嘅事上。例如，一位名叫勒妮嘅姊妹中咗風，同時又患有癌症，長期都受到病痛嘅折磨。喺唔同嘅地方接受治療嗰陣，佢同醫護人員、患者同埋嚟探病嘅人作見證。喺某一間醫院，佢喺短短兩個半星期裏面，就用咗80個鐘嚟傳道。直到臨死之前，勒妮姊妹都依然專注於耶和華嘅至高統治權，噉樣做減輕咗佢嘅痛苦。

18．一位姊妹嘅經歷點樣表明擁護耶和華嘅至高統治權係大有益處嘅？

¹⁸ 冇錯，我哋每一日都會面對好多壓力同瑣碎事，但係我哋都要將目光集中喺耶和華嘅至高統治權上。由於航班接二連三噉被取消，珍妮弗姊妹返唔到屋企，惟有喺機場等咗三日。喺噉嘅情況之下，一般人好容易會變得淨係關注自己嘅困境。雖然珍妮弗覺得又攰又孤獨，但佢仲係向耶和華禱告，想睇吓自己可以點樣用聖經知識嚟鼓勵其他人。結果點呢？佢同好多人傳道，分發咗好多聖經資料。佢話：“即使喺咁艱難嘅情況下，我依然感受到耶和華幫助我，俾我足够嘅力量，有效噉宣揚佢嘅名。”珍妮弗姊妹確實將目光集中喺耶和華嘅旨意之上。

19．上帝嘅子民應該點樣擁護上帝嘅至高統治權？

¹⁹ 我哋可以點樣分辨正確同錯誤嘅宗教？關鍵就係，睇吓呢個宗教有冇重視耶和華嘅至高統治權。上帝嘅子民一直以來都擁護耶和華嘅統治。如果想支持純真崇拜，我哋每一個人就要盡力保持同聖經一致嘅觀點。

20．耶和華點睇你為擁護佢嘅至高統治權所作嘅努力？

²⁰ 為咗擁護耶和華嘅至高統治權，你一直忠心服務，喺考驗下亦都保持堅忍。要緊記，耶和華非常珍視你所付出嘅呢一切努力。（詩篇18:25）下一篇課文會進一步分析，點解耶和華嘅統治值得我哋全心支持，同埋我哋可以點樣擁護佢嘅至高統治權。