向人問好嘅力量

“你好！今日點呀？”

你肯定經常會噉樣向人問好，可能同時仲會同對方握手或者擁抱。每個地方嘅習俗同用語可能唔一樣，但係打招呼嘅基本方式都差唔多。如果我哋冇同人打招呼，或者冇回應其他人嘅問好，噉人哋就可能會覺得我哋冇愛心或者冇禮貌。

不過，唔係所有人都會主動向人問好。有啲人因為怕醜或者自卑就唔敢同人打招呼，有啲人就覺得好難向唔同種族或者唔同文化背景嘅人打招呼。不過，即使係簡短嘅問候都可以帶嚟美好嘅結果。

請諗吓：“向人問好嘅目的係乜嘢？關於打招呼，上帝嘅話語教導我哋乜嘢？”

哥尼流係第一個歸信嘅外邦人。使徒彼得歡迎佢加入基督徒會衆嘅時候話：“上帝係唔偏心嘅”。（使徒行傳10:34）後來，彼得寫信話，上帝“願人人最終都悔改”。（彼得後書3:9）我哋可能覺得，呢啲經文主要係同學習緊聖經嘅人有關，但係彼得亦都勸勉基督徒“要尊重各種各樣嘅人，愛整個弟兄團體”。（彼得前書2:17）經文鼓勵我哋要向唔同種族、唔同文化背景嘅人問好。我哋噉樣做，就表明自己尊重同愛佢哋。

使徒保羅鼓勵會衆嘅人話：“你哋要彼此樂意接納，就好似基督樂意接納咗我哋一樣”。（羅馬書15:7）保羅特别提到一啲幫助佢“堅强起嚟”嘅弟兄姊妹。作為上帝嘅子民，我哋今日遭受撒但猛烈攻擊，所以弟兄姊妹更加需要受到强化。（歌羅西書4:11；啟示錄12:12,17）

聖經嘅例子表明，向人問好除咗使人覺得受到歡迎，仲可以帶嚟更多益處。

耶和華準備將愛子嘅生命轉到馬利亞腹中嘅時候，差派天使同馬利亞講話。天使一開始就話：“蒙大恩嘅人，你好！耶和華與你同在嘞。”馬利亞“非常不安”，唔明白點解天使噉樣同佢講。天使睇出呢點，就話：“馬利亞，唔使驚，你蒙上帝眷顧嘞。”天使向馬利亞解釋，上帝會使佢生下彌賽亞。馬利亞唔再感到不安，謙卑噉回答話：“我係耶和華嘅婢女！願你所講嘅事喺我身上實現。”（路加福音1:26-38）

對呢個天使嚟講，可以受耶和華差遣係一個殊榮，不過佢並冇覺得同一個唔完美嘅人講話就有失身份。佢傳達信息之前，先向馬利亞問好。我哋可以點樣學習天使嘅榜樣？我哋應該樂意向其他人問好，隨時鼓勵佢哋。哪怕只係講幾句話，我哋都可以使弟兄姊妹感受到佢哋的確係耶和華大家庭嘅一分子。

保羅認識好多小亞細亞同歐洲會衆嘅人，佢喺書信入面個别噉問候佢哋。我哋從羅馬書16章可以睇出呢點。保羅向好多基督徒同工問好。保羅提到“我哋嘅姊妹”菲比，並促請弟兄姊妹“要因為主而接待佢，給予聖民應得嘅禮遇，喺佢需要［佢哋］協助嘅事上協助佢”。保羅向百基拉同亞居拉問好，話：“唔單止我感謝佢哋，連所有外邦人嘅會衆亦都感謝佢哋。”佢亦都向一啲今日好少人知道嘅人問好，例如“［佢］所愛嘅以拜尼杜”、為主辛勞嘅“杜菲拿同杜富莎”。冇錯，保羅好樂意問候佢嘅弟兄姊妹。（羅馬書16:1-16）

請想像吓，呢啲弟兄姊妹知道保羅記得自己，佢哋會感到幾咁温暖。佢哋對保羅嘅愛，對同工嘅愛，一定因此大大加深！呢啲充滿愛心嘅問候亦都會使其他基督徒受到鼓勵，幫助佢哋保持堅定嘅信心。冇錯，通過問候嚟表現個人關注並且真心稱讚人，可以加深弟兄姊妹嘅友誼，使上帝嘅忠僕團結一致。

保羅喺部提奧利嘅港口上岸，準備出發去羅馬嘅時候，當地嘅基督徒嚟迎接佢。保羅遠遠睇見佢哋，“就感謝上帝，壯起膽嚟”。（使徒行傳28:13-15）有時，我哋只係向人微笑或者揮手打個招呼。不過，呢啲簡單嘅舉動都可能會使一個抑鬱或悲傷嘅人得到强化。

使徒雅各覺得有必要嚴厲譴責一啲基督徒，因為佢哋同世俗友好、喺屬靈上通姦。（雅各書4:4）不過請留意佢喺信嘅開頭點樣寫：

“上帝同主耶穌基督嘅奴隸雅各，寫信俾分散各地嘅十二部族。你哋好！”（雅各書1:1）雅各先表明自己同佢哋都係上帝嘅僕人，呢種問好嘅方式肯定使讀到呢封信嘅人更容易接受勸告。冇錯，一個謙卑嘅問候能够打開話題，甚至可以進一步討論一啲嚴肅嘅問題。

我哋同人打招呼，即使只係簡短嘅問候，都需要態度誠懇，表達出真摯嘅愛。就算對方冇作出回應，我哋都應該噉樣做。（馬太福音22:39）愛爾蘭嘅一個姊妹，有一次喺聚會差唔多要開始嗰陣先到達王國聚會所。佢匆匆忙忙入去嘅時候，一個弟兄轉身，面帶微笑向佢打招呼：“你好，好高興見到你呀。”姊妹咩都冇講就坐低。

幾個星期之後，姊妹同呢個弟兄講，最近屋企發生咗一啲令佢煩惱嘅事。佢話：“嗰晚我情緒好低落，幾乎唔想嚟參加聚會。我唔記得聚會嘅内容，只係記得你嘅問候。你嘅問候的確令我覺得自己受到歡迎。多謝你！”

呢個弟兄唔知道自己簡短嘅問候有咁大嘅力量，佢話：“姊妹話俾我知，嗰短短幾個字對佢有幾咁大嘅意義。我好慶幸同佢打咗招呼，感覺真係好！”

所羅門話：“要將食物撒喺水面上，多日之後就有回報。”（傳道書11:1）既然向人問好可以産生咁大嘅力量，噉我哋對基督徒同工就更應該噉樣做。無論其他人定係我哋自己都會因此而喜樂大增，所以千祈唔好低估向人問好嘅力量。