“義人要因耶和華而歡喜”

迪安娜已經八十幾歲嘞。佢先生患咗阿爾茨海默症（腦退化症），去世前嘅幾年都住喺療養院。迪安娜亦都要承受兩個仔死去嘅悲痛，佢自己仲要同乳癌搏鬥。不過，會衆嘅弟兄姊妹都留意到，迪安娜參加聚會同傳道嗰時一直都保持喜樂。

約翰從事探訪會衆嘅工作超過43年。佢好鍾意自己所作嘅服務，甚至視之為自己嘅生命！不過，佢因為要照顧一個患病嘅親人，唔能够繼續做探訪工作，而家喺一個會衆服務。以前認識約翰嘅人喺大會堂見到佢嗰陣，覺得佢一啲都冇變，依然咁喜樂。

點解迪安娜同約翰能够保持喜樂呢？一個人身心飽受煎熬嘅時候，點樣先可以保持喜樂？一個人失去自己珍視嘅服務機會，可以點樣繼續保持快樂？我哋可以喺聖經入面揾到秘訣：“義人要因耶和華而歡喜”。（詩篇64:10）如果我哋分清楚邊啲事可以使我哋内心喜樂，邊啲唔可以，噉我哋就能够更全面噉理解呢個寶貴真理。

你肯定知道某啲事係能够為你帶嚟喜樂嘅。請諗吓，一對相愛嘅情侶準備結婚，BB出世，或者得到一個服務機會，呢啲嚟自耶和華嘅恩賜都可以帶俾人喜樂。耶和華創立咗婚姻，使人能够生兒育女，亦都通過基督徒會衆俾我哋工作委派。（創世記2:18,22；詩篇127:3；提摩太前書3:1）

不過，有啲事所帶嚟嘅喜樂可能只係暫時嘅，因為配偶有可能會不忠或者死去；（以西結書24:18；何西阿書3:1）兒女可能唔服從父母同耶和華，甚至被開除。撒母耳嘅仔行事不蒙耶和華悦納，大衛嘅行為令自己嘅家庭遭受災禍。（撒母耳記上8:1-3；撒母耳記下12:11）呢啲事帶嚟嘅只係悲傷同痛苦，唔會帶嚟喜樂。

同樣，因為健康狀況惡化、家庭嘅責任或者組織嘅調整，我哋為弟兄姊妹服務嘅機會都可能有一日會終止。好多經歷過呢種改變嘅人都承認，佢哋好懷念以前嘅工作為佢哋帶嚟嘅滿足感。

我哋好容易睇得出，呢啲喜樂喺某程度上只係相對或者暫時嘅。既然係噉，有冇一種喺逆境之下都唔會失去嘅喜樂呢？一定有，因為撒母耳、大衛同其他忠僕喺經歷患難嘅時候都能够保持喜樂。

耶穌知道乜嘢係真正嘅喜樂。佢降生為人之前住喺天上，“時時喺［耶和華］面前歡喜”。（箴言8:30）雖然耶穌喺地上有時要面對困難，不過佢仲係好開心噉執行天父嘅旨意。（約翰福音4:34）後來，佢遭受極大嘅痛苦嗰時又點樣呢？聖經話：“佢因為擺喺前頭嘅喜樂，就輕視羞辱，喺苦刑柱上忍耐”。（希伯來書12:2）所以，耶穌對真正嘅喜樂所作嘅兩個評論，的確值得我哋去討論。

有一次，70個門徒完成傳道委派之後返嚟見耶穌。佢哋因為自己所做嘅工作，甚至因為自己驅逐過邪靈，而感到喜樂。之後，耶穌同佢哋講：“唔好因邪靈順服你哋而歡喜，要因你哋嘅名已經記錄喺天上而歡喜。”（路加福音10:1-9,17,20）冇錯，得到耶和華嘅悦納比享有某種特别嘅服務機會更加重要。耶和華贊許並記住佢忠貞嘅子民，呢個係得到更大喜樂嘅原因。

喺另一個場合，耶穌同一大群人講話嘅時候，一個猶太婦人好欣賞耶穌出色嘅教導，就話耶穌嘅媽媽一定好有福。不過耶穌糾正佢話：“唔係。凡聽見上帝嘅話語又遵守嘅人，先至有真正嘅幸福！”（路加福音11:27,28）兒女做咗啲令父母感到自豪嘅事，父母當然會好開心。不過，如果父母服從耶和華，同佢有親密嘅關係，就會更加喜樂。

的確，我哋知道自己得蒙耶和華悦納，内心可以享有好大嘅喜樂。雖然遭遇患難嘅時候我哋會唔開心，但係患難唔能够使我哋失去呢種喜樂。事實上，我哋喺艱難時期繼續保持忠貞，得到嘅喜樂就更大。（羅馬書5:3-5）另外，耶和華會將聖靈賜俾嗰啲對佢有信心嘅人，而聖靈果實嘅其中一種特質就係喜樂。（加拉太書5:22）呢一點可以幫助我哋明白，點解詩篇64:10話“義人要因耶和華而歡喜”。

呢一點亦都解釋咗，文章開頭提到嘅迪安娜同約翰喺唔容易應付嘅情況下，點解可以享有持久嘅喜樂。迪安娜話：“我好似一個想得到父母保護嘅小朋友噉，向耶和華尋求庇護。”佢點知道自己得蒙上帝悦納呢？迪安娜又話：“我感受到佢俾我嘅祝福，使我能够經常面帶微笑噉傳道。”係乜嘢幫助約翰喺結束探訪會衆嘅工作之後繼續積極傳道呢？佢話：“自從1998年我被委派做組織事務訓練班嘅導師以來，我比以前更加勤力做個人研讀。”佢同太太都話：“咁多年來，無論耶和華叫我哋做乜嘢，我哋都願意去做。我哋一直都以呢種態度嚟事奉耶和華，所以比較容易作出調整。我哋從來都冇後悔過。”

另外，有好多人都親身體驗到詩篇64:10講得好啱。有一對夫婦喺美國伯特利服務咗超過30年，後來被委派到地區做特别先驅。佢哋話：“當你失去一啲自己好鍾意嘅嘢嗰時，傷心係好自然嘅。”佢哋又話：“但係你唔能够一直傷心。”佢哋馬上投入新委派，同會衆嘅弟兄姊妹一齊傳道。呢對夫婦亦都話：“我哋為一啲事好具體噉禱告，之後就睇到耶和華點樣回應我哋嘅禱告。我哋大受鼓勵，亦都感到好喜樂。我哋嚟到呢度之後冇幾耐，會衆有啲人就開始做先驅。耶和華亦都俾咗我哋兩個進步良好嘅聖經學生。”

當然，一直保持喜樂並唔容易，我哋都會有情緒起伏嘅時候。不過，耶和華通過詩篇64:10嘅經文安慰我哋。就算有時會灰心，不過我哋相信，只要喺任何情況下都保持忠貞，我哋就會“因耶和華而歡喜”。我哋仲可以期待耶和華“新天新地”嘅應許實現。到時，一切都會恢復完美。上帝嘅所有子民會因為耶和華所創造、所提供嘅而“永遠歡欣喜樂”。（以賽亞書65:17,18）

呢個意味住乜嘢？就係可以享有完美嘅健康，充滿活力噉開始每一日。無論人以往喺感情上受過幾大嘅創傷，痛苦嘅回憶都唔會再浮現喺眼前。我哋可以肯定，“從前嘅事唔再有人回想，亦都唔再湧上心頭”。好多人都復活過嚟，我哋可以同死去嘅親友團聚。耶穌曾經復活咗一個12歲嘅女仔，將來無數人都會好似呢個女仔嘅父母噉“興奮莫名，非常激動”。（馬可福音5:42）最終，地上每一個人都係真正嘅“義人”，永遠“因耶和華而歡喜”。