基督徒嘅生活

週中聚會資料嘅新特色

從2018年1月開始，週中聚會嘅資料將會涵蓋《聖經新世界譯本》精讀本（nwtsty）嘅注釋同埋多媒體資料。雖然目前網站上面仲未有漢語嘅《聖經新世界譯本》精讀本，但係你仍然可以從中得益。毫無疑問，呢啲資料會使你喺準備聚會内容嗰陣，有更豐富嘅收穫。更重要嘅係，呢啲資料可以幫你親近我哋仁愛嘅天父耶和華！

注釋

《新世》精讀本注釋嘅内容涉及文化、地理同語言方面嘅知識，幫助我哋對經文有更深入嘅了解。

馬太福音12:20

就快熄滅嘅麻芯：古時家用嘅油燈係個有繩圈把手、外表好似一個樽仔嘅細小陶器。燈通常注滿橄欖油。麻芯可以將燈油吸上嚟，點燃燈火。“餘煙將盡嘅麻芯”嘅希臘語可能指麻芯已經冒出餘煙，即使仲有餘燼，但係火花好快會熄滅。以賽亞書42:3預告耶穌向人表現憐憫。佢從來都唔會熄滅謙卑同受欺壓嘅人所懷有嘅希望之火。

馬太福音26:13

實在：希臘語a·menʹ係從希伯來語ʼa·menʹ音譯過嚟嘅，意思係“誠心希望係噉”或者“確實係噉”。耶穌喺地上傳道教人嗰陣，經常運用“實在”呢個詞，目的係要强調佢所講嘅事、承諾同預言，全部都係真實嘅，絶對可靠。譯做“實在”嘅希臘語就係a·menʹ“阿們”呢個詞，據講喺聖典當中，只有耶穌用“阿們”表示“實在”。喺整卷約翰福音當中，“阿們”（a·menʹ a·menʹ）每次都係連續噉反覆强調嘅。耶穌嘅表達被翻譯做“實實在在”。（約1:51）

多媒體資料

相片、插圖、動畫同無聲短片，可以幫助我哋從多方面細緻噉了解聖經嘅記載。

伯法其，橄欖山，耶路撒冷

呢段短片會帶大家睇吓一條路線，從靠近耶路撒冷東面嘅杜爾，去到橄欖山其中一個地勢較高嘅地方。杜爾係一個現代嘅村鎮，相信係聖經時代嘅伯法其。伯大尼位於橄欖山東面嘅山坡，喺伯法其嘅東面。耶穌同佢嘅門徒曾經按慣例，喺伯大尼過夜，今日喺呢個地方有一個小村莊，阿拉伯語嘅村名叫做阿宰里耶（艾宰里耶），意思係“拉撒路嘅地方”。毫無疑問，耶穌曾經喺馬大、馬利亞同拉撒路嘅屋企留宿。（太21:17；可11:11；路21:37；約11:1）耶穌好可能沿住影片顯示嘅路線，從佢哋嘅屋企走到耶路撒冷。公元33年尼散月九日，耶穌騎住驢越過橄欖山，進入耶路撒冷，睇嚟係從伯法其出發，沿住呢條路到達耶路撒冷。

從伯大尼到伯法其嘅路
伯法其
橄欖山
汲淪溪谷
聖殿山

人嘅腳後跟骨頭被釘穿

我哋可以從呢張相睇到一副人類骸骨嘅複製品，有一支長11.5厘米（4.5英寸）嘅鐵釘插喺骸骨嘅腳後跟。1968年，呢副骸骨嘅原形喺耶路撒冷北面被人發掘出嚟，推斷係屬於羅馬時期嘅。呢個考古學證據表明，當一個人掛喺木柱上被處決嗰陣，為咗加快佢嘅死亡，行刑嘅人會使用呢啲釘。呢根釘可能同羅馬士兵用嚟加快耶穌基督死亡嘅釘類似。呢副骸骨係放喺一個稱為骨灰甕嘅石器入面，當屍體嘅肉腐爛之後，死者枯乾嘅骨頭就會放入去。噉表明，喺苦刑柱上被處死嘅人，都有可能被埋葬。（太27:35）