你想得到邊個嘅認可？

 1．人類天生就有乜嘢需要？

如果你認識而且尊敬嘅人唔記得你嘅名，或者甚至完全唔認得你，噉你會有乜嘢感受呢？可能你會唔開心。點解？因為我哋每個人天生就希望受到關注，想得到其他人嘅認可。我哋唔單止希望其他人認得自己，仲希望對方知道我哋係點樣嘅人同埋做過啲乜嘢事。（民數記11:16；約伯記31:6）

2,3．人過度渴望得到賞識就可能會點做？（請睇吓課文開頭嘅圖片）

² 雖然每個人都希望受到其他人嘅認可同賞識，但由於我哋唔完美，喺呢方面可能會失去平衡。撒但嘅世界令好多人都想出名，渴望成為衆人關注嘅大人物。如果我哋有噉樣嘅態度，就唔會將天父耶和華配得嘅榮耀同崇拜歸於佢。（啟示錄4:11）

³ 喺耶穌嘅日子，有啲宗教領袖為咗博取大衆嘅讚賞就故意做一啲引人注目嘅事。耶穌提醒佢嘅門徒話：“要提防抄經士，佢哋鍾意着長袍遊嚟逛去，鍾意人喺市集廣場上向佢哋問好，鍾意會堂入面嘅前座［最好嘅座位］同筵席上嘅首位。”佢又話：“呢啲人要受更嚴厲嘅判決。”（路加福音20:46,47）而另一方面，似乎冇人睇得起一個窮寡婦捐出嘅兩文小錢，不過耶穌稱讚呢個寡婦。（路加福音21:1-4）好明顯，耶穌喺呢方面嘅睇法同其他人好唔一樣。呢篇課文會幫助我哋持有耶和華上帝嘅觀點。

 4．乜嘢係最高嘅認可？點解？

⁴ 乜嘢係最高嘅認可？雖然好多人想喺學術界、商業界同娛樂界出人頭地，得到世人嘅賞識，不過保羅講明咗乜嘢先至係最值得追求嘅。保羅話：“而家你哋既然認識上帝，或者話，已經係上帝所認識嘅，點解又返轉頭採納軟弱貧乏嘅膚淺觀念，甘願從頭做呢啲事嘅奴隸呢？”（加拉太書4:9）宇宙至高統治者耶和華上帝認識我哋，呢個係幾咁大嘅殊榮！耶和華好想同我哋有親密嘅關係。正如一位學者所講，我哋係“上帝關注嘅對象”。能够同耶和華做朋友，使我哋嘅人生充滿意義。（傳道書12:13,14）

 5．我哋點樣先可以成為耶和華嘅朋友？

⁵ 摩西係耶和華嘅朋友。有一次，佢懇求耶和華幫助佢更加全面噉“認識［耶和華］嘅道路”。耶和華就回答佢話：“你講嘅呢件事我亦應承你，因為你蒙我恩待，我了解你，認識你嘅名。”（出埃及記33:12-17）如果耶和華認識我哋，佢就會將我哋視為朋友，賜我哋豐盛嘅美福。不過，我哋點樣先可以成為耶和華嘅朋友呢？就係愛佢，將自己嘅一生獻俾佢。（請讀哥林多前書8:3）

6,7．乜嘢會破壞我哋同耶和華嘅關係？

⁶ 雖然我哋可以成為耶和華嘅朋友，但係都要繼續保持呢份珍貴嘅友誼。加拉太嘅弟兄姊妹已經認識耶和華，耶和華亦都認識佢哋。但係，佢哋“返轉頭”，再次追求空虛嘅事。保羅提醒佢哋唔好成為“軟弱貧乏嘅膚淺觀念”嘅奴隸。（加拉太書4:9）其實保羅嘅意思係：“點解你哋又再成為呢啲愚蠢、無益嘅事嘅奴隸呢？”如果我哋聽從呢個勸告，就唔會成日諗住追求呢個世界嘅名利。

⁷ 不過，我哋有冇可能好似加拉太嘅基督徒噉返轉頭追求無益嘅事？有可能。我哋認識真理之後，可能好似保羅噉，要放棄喺撒但世界嘅某啲成就同名利。（請讀腓立比書3:7,8）我哋可能要放棄接受高等教育、升職或者賺大錢嘅機會。如果我哋有音樂才華同運動天賦，亦都可能有機會名成利就。不過，我哋甘願放棄呢一切。（希伯來書11:24-27）我哋當初已經做咗明智嘅決定，但而家後悔嘅話，就真係太愚蠢嘞！噉樣嘅諗法可能會使我哋返轉頭去追求呢個世界“軟弱貧乏嘅膚淺觀念”。a

 8．乜嘢使我哋決心得到耶和華嘅認可？

⁸ 我哋可以點樣下定決心得到耶和華嘅認可，而唔係呢個世界嘅認可？要記住兩個要點。第一，耶和華一定會賞識忠心事奉佢嘅人。（請讀希伯來書6:10；11:6）喺耶和華眼中，每個忠僕都好寶貴。如果佢忘記自己嘅忠僕，噉佢就係“不義”嘅。耶和華一定“認識屬於佢嘅人”。（提摩太後書2:19）佢“認識義人嘅道路”，知道點樣將佢哋從考驗中拯救出嚟。（詩篇1:6；彼得後書2:9）

 9．乜嘢例子表明耶和華認識佢嘅子民？

⁹ 有時，耶和華會用奇妙嘅方式表明佢認識自己嘅子民。（歷代志下20:20,29）例如，耶和華喺紅海施行奇迹，拯救佢嘅子民脱離法老大軍嘅追捕。（出埃及記14:21-30；詩篇106:9-11）呢個事件喺發生四十年後依然被其他國族談論。（約書亞記2:9-11）瑪歌革地嘅歌革發動攻擊嘅時候，我哋謹記耶和華向佢子民顯示嘅愛心同力量，就能够使自己嘅信心大受强化！（以西結書38:8-12）到時，我哋會慶幸自己得到嘅係耶和華嘅認可，而唔係世界嘅認可。

10．我哋要謹記乜嘢？

¹⁰ 我哋都要謹記第二個要點：耶和華向我哋表示認可嘅方式，可能係我哋意想不到嘅。人如果為咗得到其他人嘅稱讚而行善，就得唔到耶和華嘅讚賞。點解？人俾佢哋嘅讚賞就係佢哋得到嘅全部獎賞嘞。（請讀馬太福音6:1-5）耶穌話，天父“暗中觀察”嗰啲冇特登喺人面前行善嘅人，留意佢哋嘅行為，並根據佢哋所做嘅獎賞佢哋。有時，耶和華會用我哋意想不到嘅方式嚟獎賞我哋。請睇以下嘅例子。

11．耶和華點樣向馬利亞表示賞識同認可？

¹¹ 耶和華揀選咗一個謙卑嘅年輕女子馬利亞做耶穌嘅母親。佢住喺一個叫拿撒勒嘅小鎮，離耶路撒冷同宏偉嘅聖殿有一段距離。（請讀路加福音1:26-33）點解馬利亞享有呢個殊榮？天使加百列將馬利亞稱為“蒙上帝眷顧”嘅人。馬利亞向親戚伊利莎白所講嘅話，表明佢係一個非常屬靈嘅人。（路加福音1:46-55）耶和華一直留意馬利亞，並且因為佢嘅忠貞而將呢個意想不到嘅殊榮賞賜俾佢。

12,13．耶穌啱啱出世嗰時同埋四十日之後點樣得到耶和華嘅認可？

¹² 後來，耶和華冇俾耶路撒冷同伯利恆嘅權貴或者統治者知道耶穌誕生，反而吩咐天使向一啲卑微嘅牧羊人宣布呢件事。（路加福音2:8-14）跟住，呢啲牧羊人就去探訪啱啱出世嘅耶穌。（路加福音2:15-17）馬利亞同約瑟見到耶穌以呢種方式受到尊榮，一定感到好驚喜。耶和華嘅做事方式同撒但嘅截然不同。當撒但引導占星術士去拜訪耶穌同佢父母嘅時候，耶路撒冷全城都由於耶穌嘅出世而激動不安。（馬太福音2:3）因為噉，後來好多無辜嘅細路仔被殺害。（馬太福音2:16）

¹³ 耶穌出世四十日之後，馬利亞同約瑟就帶住耶穌去到距離伯利恆9公里（6英里）嘅耶路撒冷，按照律法喺聖殿向耶和華獻上祭牲。（路加福音2:22-24）喺路上，馬利亞可能會諗：“祭司會唔會用特别嘅方式嚟榮耀耶穌？”耶穌的確受到榮耀，但耶和華用嘅方式可能同馬利亞所想像嘅唔同。耶和華通過“又正義又虔誠”嘅西緬同埋84歲嘅女先知安娜宣告呢個嬰兒就係應許嘅彌賽亞，即係基督。（路加福音2:25-38）

14．耶和華點樣賜福俾馬利亞？

¹⁴ 噉馬利亞呢？佢悉心照顧同撫養耶穌，噉耶和華有冇繼續向佢表示認可？有。耶和華將馬利亞嘅言行記載喺聖經入面。喺耶穌傳道嘅三年半期間，馬利亞顯然冇同耶穌一齊。當時已經成為寡婦嘅馬利亞可能留喺拿撒勒。雖然佢錯過咗好多美好嘅經歷，不過喺耶穌犧牲之前，佢可以陪伴喺耶穌身邊。（約翰福音19:26）後來，公元33年五旬節，馬利亞同耶穌嘅門徒喺一齊。（使徒行傳1:13,14）睇嚟，上帝賜下聖靈嘅時候，馬利亞同在場嘅門徒一樣都受到聖靈膏立。如果係噉，佢就有機會永遠同耶穌喺天上。對忠心嘅馬利亞嚟講，呢個真係非常美好嘅獎賞！

15．耶穌喺地上嘅時候，耶和華點樣表明佢悦納耶穌？

¹⁵ 耶穌冇諗過要榮耀自己，更加唔想通過宗教或政治領袖使自己得榮耀。不過，耶和華三次從天上發出聲音，表明自己愛耶穌。耶穌一定大受鼓勵！耶穌喺約旦河一受完浸，耶和華就話：“呢個係我嘅兒子，係我所愛嘅，係我所悦納嘅。”（馬太福音3:17）施浸者約翰可能係唯一一個聽到呢番話嘅人。然後，大約喺耶穌犧牲前一年，佢嘅三個使徒聽到耶和華講：“呢個係我嘅兒子，係我所愛嘅，係我所悦納嘅。你哋要聽從佢。”（馬太福音17:5）最後，喺耶穌犧牲前幾日，耶和華再一次從天上同佢嘅愛子講話。（約翰福音12:28）

16,17．耶和華點樣以出人意料嘅方式榮耀耶穌？

¹⁶ 耶穌知道自己會受盡屈辱而死，甚至俾人誣告褻瀆上帝。不過，佢仲係祈求上帝嘅旨意實現，而唔係只注重個人嘅意願。（馬太福音26:39,42）耶穌想得到嘅係天父嘅認可，而唔係世人嘅認可，所以佢“輕視羞辱，喺苦刑柱上忍耐”。（希伯來書12:2）耶和華點樣表示佢認可耶穌呢？

¹⁷ 耶穌喺地上嘅時候，表明自己渴望再次得享喺天父身旁嘅榮耀。（約翰福音17:5）冇任何證據顯示，耶穌期望自己會比先前得到更多。佢冇認為自己喺地上實現耶和華嘅旨意就會得到特别嘅獎賞。耶和華點樣獎賞耶穌？佢以令人意想不到嘅方式榮耀耶穌。耶和華復活耶穌之後，使耶穌喺天上得到“更高嘅地位”，亦都賜俾耶穌一個當時從未有人得到過嘅恩賜——不死嘅生命！b（腓立比書2:9；提摩太前書6:16）耶和華以極為奇妙嘅方式對耶穌表示認可同讚賞！

18．乜嘢幫助我哋避免追求世界嘅認可？

¹⁸ 我哋唔應該追求呢個世界嘅認可。乜嘢可以幫助我哋努力追求耶和華嘅認可同讚賞？請記住，耶和華一定會獎賞佢嘅忠僕，而且好多時，佢會以出人意料嘅方式噉樣做。我哋可以諗吓未來會有乜嘢意想不到嘅福分等住我哋。而家我哋喺呢個邪惡嘅世界正面對好多難題同考驗，但係唔好忘記，呢個世界正喺度消逝。所以，任何嚟自呢個世界嘅認可最終都會變得毫無價值。（約翰一書2:17）仁愛嘅天父耶和華“係正義嘅，絶對唔會忘記［我哋］所做嘅工作同［我哋］為佢嘅名所顯嘅愛心”。（希伯來書6:10）佢一定會嘉許我哋，賞識我哋付出嘅努力，甚至以超乎我哋想像嘅方式獎賞我哋！