Filipenses

3 Ne últimu la? hermanu caʼ, siempre lachuu nayecheʼ purtiʼ nuunetu Señor tobi si. Qué rireeʼ gana de gucaaʼ ni maca bicaa ra nuutu purtiʼ nannaʼ zápani laatu.

2 Lagapa laatu de ca biʼcuʼ; lagapa laatu de ca ni runi cosa malu, lagapa laatu de ca ni ná naquiiñeʼ gaca circuncidar binni.* 3 Purtiʼ laanu nga ca ni dxandíʼ maʼ guca circuncidar,* laanu nga cayúninu xhiiñaʼ Dios pur espíritu stiʼ,* riuʼnu nayecheʼ* pur ni biʼniʼ Cristu Jesús ne qué rininu zalanu pur xiixa ni gúninu, 4 peru pa nuu tuuxa napa razón para guiníʼ zalá pur xiixa ni maʼ biʼniʼ la? naa jmaruʼ si ñanda ninieeʼ ni.

Ne pa nuu stobi riníʼ ique napa razón para guilá purtiʼ si maʼ guca circuncidar la? naa jma napaʼ razón: 5 biʼniʼ circuncidárcabe naa lu xhono gubidxa de guleʼ, de guidxi Israel naa, de tribu stiʼ Benjamín, hebreu naa dede dxi guleʼ ne xiiñiʼ binni hebreu naa; gucaʼ ti fariseu* ni rinanda ley; 6 nabé guyuuladxeʼ sayanandaʼ* ca xpinni Cristu,* bibaneʼ jneza casi ná ley ne guirutiʼ niguu xquejaʼ. 7 Ca cosa risaca para naa dxiqué la? maʼ qué risaca ni para naa yanna ra maʼ binebiaʼyaʼ Cristu. 8 Ne cadi nga si, laaca riníʼ iqueʼ maʼ qué iquiiñeʼ guiráʼ cosa ora guchaagaʼ ni né guiráʼ ni maʼ nannaʼ de Cristu Jesús* Señor stinneʼ ne qué zanda quixheʼ pabiáʼ risaca ni. Pur laabe nga biale de naa gusaanaʼ guiráʼ cosa ne ruuyaʼ ca cosa riʼ casi ti montón guixi, para ganda chuaaʼ gaxha de Cristu* 9 ne gánnacabe nacaʼ xpínnibe, peru cadi canieeʼ diaʼ nacaʼ ti binni nachaʼhuiʼ* purtiʼ zinandaʼ Ley, sínuque nacaʼ ti binni nachaʼhuiʼ purtiʼ napaʼ fe Cristu. Ne ca ni napa fe Cristu la? ruuyaʼ Dios laacaʼ casi ti binni nachaʼhuiʼ. 10 Ni racalaʼdxeʼ nga gunebiaʼyaʼ laabe ne gannaʼ xii nga poder ni bisibani laabe.* Racalaʼdxeʼ tideʼ guiráʼ yuubaʼ ni gudíʼdibe ne gateʼ casi gútibe, 11 ti guuyaʼ pa ganda gacaʼ de ca primé binni ni guibani.*

12 Cadi canieeʼ diaʼ maʼ gucuaaʼ premiu riʼ o maʼ bigaandaʼ ni, sínuque cayúneruaʼ dxiiñaʼ para guuyaʼ pa ganda ugaandaʼ premiu ca, purtiʼ gulí Cristu Jesús naa para guicaaʼ ni. 13 Hermanu caʼ, cadi canieeʼ diaʼ maʼ gucuaaʼ ni. Peru ti cosa si ni nannaʼ nga rusiaandaʼ guiráʼ ni maʼ bisaanaʼ ne runeʼ stipa para ugaandaʼ guiráʼ ni nuu neza ra ziaaʼ. 14 Cuxooñeʼ para ganda chindayaʼ lu meta ne guicaaʼ premiu, laani nga ti guendanabani ni cudii Dios naa guibáʼ pur Cristu Jesús. 15 Ngaca nga naquiiñeʼ gucaa ique guiráʼ ni maʼ naguidxi fe stiʼ. Ne pa nuu tuuxa guiníʼ ique cadi zacá ni, zacané Dios laa guiníʼ ique jneza. 16 Nga runi, dede biaʼ ra biʼniʼ progresarnu, cadi gusaana de gúninu ni.

17 Hermanu caʼ, lachuu tobi si ne lachinanda ejemplu stinneʼ ne laguuyaʼ modo nabani ca ni zinanda ejemplu stidu. 18 Maca huayabeʼ ndiʼ laatu ne dede cayuunaʼ chitidxeʼ ni laatu sti biaje: nuu stale lade ca xpinni Cristu ni qué risaca para laacaʼ guti Cristu lu ti yaga.* 19 Zanitilúcabe, purtiʼ maʼ bíʼnicabe guiráʼ ca deseu stícabe casi ti dios para laacabe, ne riechenécabe* ni runi deber nusituí lúcabe, ne nisi ricá íquecabe ni nuu ndaaniʼ guidxilayú. 20 Peru laanu la? de guibáʼ laanu,* ne cabézanu guiuba gueeda tobi de raqué ni gulá laanu, laa nga Señor Jesucristu. 21 Zuchaabe cuerpu stinu ne zúnibe ni casi cuerpu stibe.* Zúnibe ni né poder ni gucuaabe para guni mandarbe guiráʼ cosa.