Efesios

5 Maʼ xiiñiʼ Dios laatu ne nadxii laatu, nga runi lachinanda ejemplu stiʼ. 2 Cadi gusaana de gannaxhiisaatu cásica gunnaxhii Cristu laanu* ne bidii xpida casi ti ofrenda ne ti sacrificiu* pur laanu,* ni zeeda gaca casi ti xhoʼ rindáʼ naxhi para Dios.

3 Maʼ cadi lica guiete de pecadu sexual* ládetu, nin sti clase cosa yuudxuʼ,* nin guicá íquetu gápatu jma,* purtiʼ cadi jneza diʼ guni ca xpinni Dios* zacá. 4 Cadi gusituitu lú xcaadxi pur conducta stitu, nin guiniʼtu diidxaʼ huati ne cadi guiniʼtu chiste de diidxaʼ guidxa,* sínuque lagudii xquixe peʼ Dios. 5 Purtiʼ maʼ nánnatu ne riénetu nin tobi de ca ni runi practicar pecadu sexual,* nin ca binni ni runi cosa yuudxuʼ,* nin ca ni rucaa ique gapa jma* —laca laani nga guni adorar binni bidóʼ— qué zacaacaʼ herencia lu Reinu stiʼ Cristu ne stiʼ Dios.*

6 Cadi gudiitu lugar chuʼ tu quiteʼ laatu né diidxaʼ huati, purtiʼ pur ca cosa riʼ zeeda xiana stiʼ Dios luguiáʼ ca ni qué ruzuubaʼ stiidxaʼ. 7 Nga runi, cadi gúnitu ni rúnicabe, 8 purtiʼ guyuu ti tiempu gúcatu casi guelacahui, peru yanna maʼ nácatu casi biaaniʼ purtiʼ nuunetu Señor tobi si. Laguibani casi nabani ca xpinni Dios,* 9 purtiʼ zanda gacané biaaniʼ ca laanu lu guiráʼ cosa para gácanu nacha’hui’, gúninu ni jneza ne guininu ni dxandíʼ. 10 Laguuyaʼ chaahuiʼ xii nga ni riuulaʼdxiʼ Señor 11 ne cadi chuʼtu lu ca cosa qué iquiiñeʼ ni raca lu guelacahui. Zacá zusihuínnitu cadi jneza guiráʼ ni. 12 Purtiʼ dede nudii vergüenza naa nuzeeteʼ guiráʼ ca cosa rúnicabe ra nagaʼchiʼ. 13 Purtiʼ ruzaaniʼ biaaniʼ lu ca cosa ni cadi jneza, zacá maʼ rihuinni gunáʼ nga ca cosa ni cadi jneza ca. 14 Purtiʼ cá lu Stiidxaʼ Dios: «Bibani, binni ni nisiaasiʼ, biasa de lade gueʼtuʼ, ne zuzaaniʼ Cristu lii».

15 Nga runi, lachuu cuidadu cadi gácatu casi binni huati, sínuque lagaca casi binni nuu xpiaaniʼ. 16 Laiquiiñeʼ tiempu stitu jneza* purtiʼ nabé maʼ nagana ca dxi nabáninu riʼ. 17 Nga runi, maʼ cadi gácatu casi binni ni qué riene, sínuque laguuyaʼ chaahuiʼ xii nga racalaʼdxiʼ Jehová* gúnitu. 18 Ne cadi xhúdxitu,* purtiʼ rucaani binni guni ni ná ique, sínuque lagapa stale espíritu santu. 19 Ora maʼ cayuiʼtu diidxaʼ la? laguzeeteʼ ni cá lu salmo, lagusisaca Dios ne laguundaʼ para guni adorartu laa. Laguundaʼ né música de ndaaniʼ ladxidoʼto para Jehová,* 20 lagudii xquixe peʼ Dios stinu ne Bixhózenu pur guiráʼ ni rudii laanu ne laguni ni lu lá Jesucristu Señor stinu.

21 Lagusihuinni runi respetartu Cristu ora gúnitu ni gabi stobi laatu. 22 Ne laatu ca gunaa, laguzuubaʼ stiidxaʼ xheelatu cásica ruzuubatu stiidxaʼ Señor, 23 purtiʼ xheelatu nga xaíque* stitu, cásica naca Cristu xaíque stiʼ ca xpinni.* Laa bilá laacabe, ne yanna maʼ nácacabe cuerpu stiʼ.* 24 Ne cásica ruzuubaʼ ca xpinni Cristu stiidxaʼ la? zaqueca naquiiñeʼ guzuubaʼ gunaa stiidxaʼ xheelaʼ lu guiráʼ cosa. 25 Ne laatu, ca hombre ni maʼ bichaganáʼ, lagannaxhii xheelatu cásica gunnaxhii Cristu ca xpinni* dede bidii xpida pur laacabe. 26 Bisiá* laacabe ne casi ora niguiibi laacabe né Stiidxaʼ Dios, ni zeeda gaca casi nisa. 27 Ne zadxiña dxi guchiña laacabe ra nuu ne zusisaca laacabe, ne maʼ qué zápacabe nin ti mancha nin ra nacuuxhuʼ nin tobi de ca cosa riʼ, sínuque zahuínnicabe nayá* ne qué zápacabe nin ti defectu.

28 Naquiiñeʼ gannaxhii hombre xheelaʼ cásica nadxii cuerpu stiʼ. Ti hombre ni nadxii xheelaʼ la? nadxii laca laa, 29 purtiʼ nin ti hombre qué huayuu dxi gaca nanalaʼdxiʼ cuerpu stiʼ,* sínuque ruyaanaʼ ni ne rannaxhii ni, cásica runi Cristu né ca xpinni,* 30 ca ni zeeda gaca casi cuerpu stibe, ne cada tobi de laanu nácanu parte de cuerpu ca. 31 «Nga runi, zusaana hombre bixhoze ne jñaa ne ziaanané xheelaʼ, ne zaca guirópacaʼ tobi si».* 32 Nabé risaca secretu sagradu riʼ.* Ni canieeʼ nga de Cristu ne de congregación. 33 Peru cada hombre naquiiñeʼ gannaxhii xheelaʼ cásica nadxii laca laa. Ne naquiiñeʼ gapa gunaa stale respetu xheelaʼ.