Ora mayaca guilaa ti guendaxheelaʼ

1, 2. Xi naquiiñeʼ guinabadiidxaʼ ti guendaxheelaʼ ora gápacaʼ guendanagana.

LU IZA 1988, ti gunaa de Italia ni láʼ Lucia nabé guyuu triste.a Despué de chii iza de bichaganabe maʼ biaʼ qué guibiá si xquendaxheelabe. Stale biaje gucaláʼdxibe ñuni chaahuibe guendanagana ni gupanebe xheelabe, peru gastiʼ nibeendube. Ngue runi, bisabixheelacabe purtiʼ qué ñanda ñenesaacabe, ne gupa xidé bisiniisibe guiropaʼ dxaapahuiiniʼ stibe stúbisibe. Sicaríʼ guníʼ Lucia de ni bizaaca que: «Guníʼ iqueʼ gastiʼ zacané naa gulayaʼ xquendaxheelaʼ».

² Pa cadíʼdiluʼ lu xiixa guendanagana né xheelaluʼ la? zanda guiéneluʼ ni bizaaca Lucia. Zándaca guiníʼ íqueluʼ pa zanda gúniluʼ xiixa ti cadi guilaa xquendaxheelaluʼ. Pa zacá ni, galán guinabadiidxaluʼ laca lii: Ñee rinandaʼ guiráʼ conseju sicarú ni cudii Dios lu Biblia para gacané ca guendaxheelaʼ ca cueenducaʼ ni galán la? (Salmo 119:105.)

 3. Neca stale binni cayaca divorciar, ximodo huayuni sentir stale de cani maʼ guca divorciar ne zaqueca binnilídxicaʼ yaʼ.

³ Ora naroʼbaʼ guendanagana napa cani maʼ bichaganáʼ, nuu biaje ruluíʼ jma nga jneza guilaa xquendaxheelacaʼ. Neca ndaaniʼ stale guidxi nabé calaa ca xquendaxheelaʼ ca, stale de cani guca divorciar, cásica hombre ne zaqueca gunaa, raca arrepentircaʼ pur bisaanacaʼ xheelacaʼ. Stale de laacabe maʼ qué riuucabe nazaaca ne riuucabe triste jma que ca binni ni qué raca divorciar. Ne xiiñicabe qué ridxélacaʼ xi gúnicaʼ ne ridiʼdiʼ stale iza para guibánicaʼ nayecheʼ. Laaca racaná bixhoze ne jñaa cani maʼ guca divorciar ca ne zaqueca racaná ca xhamígucaʼ. Yanna, ximodo ruuyaʼ Dios, ni gudixhestí guendaxheelaʼ, ni rúnicabe ca yaʼ.

 4. Ximodo zanda gudxiilú ca guendaxheelaʼ ca guendanagana ni gápacaʼ.

⁴ Casi maʼ bidúʼyanu lu xcaadxi capítulo ni maʼ gudiʼdiʼ ca, maca gudixhe Dios cadi lica guixeleʼ ca guendaxheelaʼ ca (Génesis 2:24). Yanna, xiñee nabé cayaca divorciar stale guendaxheelaʼ yaʼ. Naquiiñeʼ gánnanu cadi málasi riníʼ ique binni gaca divorciar, purtiʼ dede ante nuu xiixa ni rusihuinni nuu riesgu guilaa xquendaxheelacaʼ. Ca guendanagana ni rápacabe chaahuidugá zanda guiroobaʼ cani dede guni sentírcabe maʼ qué zanda gudxiilúcabe cani. Peru pa nagueendaca guyúbicabe gacané Biblia laacabe para guni chaahuicabe ca guendanagana stícabe la? maʼ qué ziuu riesgu guilaa xquendaxheelacabe.

 5. Xi naquiiñeʼ ganna guiráʼ guendaxheelaʼ.

⁵ Tobi de ca cosa ni rucaa ti guendaxheelaʼ gapa guendanagana nga guxuiʼlú xiixa ni qué zanda guizaaca. Lu ca libru ra rieeteʼ historia stiʼ ti hombre ne ti gunaa ni nadxiicaʼ ne lu ca revista ni nabé ruundaʼ binni, zaqueca cani ridiʼdiʼ lu televisión ne lu ca película ca rucaacani binni guiníʼ ique ne guxuiʼlú xiixa ni qué zanda guizaaca. Peru ora qué gaca cani bixuiʼlú tuuxa, zándaca guni sentir casi ora guyuu tu gudxite laa, ne pur nga maʼ qué guibani nayecheʼ dede guidxiichi stubi. Yanna, ximodo nga zanda guibani ti guendaxheelaʼ nayecheʼ pa guirópacaʼ binni ruchee laacaʼ yaʼ. Caquiiñeʼ gúnicabe stipa para ganda guibánicabe nayecheʼ.

 6. 1) Xi ruzeeteʼ Biblia rizaaca ca guendaxheelaʼ ca. 2) Gunáʼ nga caadxi cosa ni rucaa ca guendaxheelaʼ ca tíndecaʼ.

⁶ Zanda gacané Biblia cani maʼ bichaganáʼ. Laani ruzeeteni ribani binni nayecheʼ ora guichaganáʼ, peru laaca ruzeeteni «zaca ni nagana» para laacabe (1 Corintios 7:28). Casi maʼ bieeteʼ, guirópacabe binni ruchee laacabe nga runi jma nagueenda rúnicabe ni cadi jneza. Gadxé gadxé modo riníʼ íquecabe ne ni runi sentírcabe ne modo biniisicabe. Nuu biaje ridíndecabe pur bueltu, pur ca xiiñicabe ne pur binnilidxi xheelacabe. Ne laaca zanda guidxagalúcabe guendanagana pa qué cueecabe tiempu para gúnicabe xiixa juntu ne pa qué gatanécabe xheelacabe.b Zaquiiñeʼ stale tiempu para guni chaahuicabe cani maʼ bieeteʼ ca, peru cadi naquiiñeʼ guireecabe gana. Stale de ca guendaxheelaʼ ca zanda guidxélacaʼ xiixa ni gacané guirópacaʼ para guni chaahuicaʼ guendanagana sticaʼ.

7, 8. Pa tuuxa bininá ladxidóʼ xheelaʼ o gúpacaʼ xiixa bichenda, ximodo na Biblia zanda guni chaahuicabe cani.

⁷ Stale tu raca nagana para laa cadi guidxiichi ora guiníʼ modo bininácabe ladxidóʼ, de xiixa bichenda ni gupané xheelaʼ o de xiixa ni qué riuulaʼdxiʼ de xheelaʼ. Lugar de guiníʼ hombre ca o gunaa ca: «Zuluaʼsiaʼ qué riéneluʼ naa», laga ridxiichi ne runi guendanagana ni nápacaʼ jma naroʼbaʼ. Stale tu riníʼ: «Jma rizaaláʼdxiluʼ lii», o: «Cadi nadxiiluʼ naa». Zándaca cadi guicabi xheelaʼ laa para cadi tinde diidxacaʼ.

⁸ Ni jma jneza gúnicabe nga chinándacabe conseju zeeda lu Biblia riʼ: «Pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu» (Efesios 4:26). Ti guendaxheelaʼ ni maʼ ziné biaʼ sesenta iza de bichaganacaʼ gunabadiidxacabe laacaʼ xi gucané laacaʼ cueenducaʼ ni galán. Sicaríʼ guníʼ hombre que: «Bizíʼdidu guni chaahuidu ca guendanagana ni rápadu ante chigásidu, neca cadi naroʼbaʼ cani».

 9. 1) Xiná Stiidxaʼ Dios naquiiñeʼ guni ca guendaxheelaʼ ca ora güicaʼ diidxaʼ. 2) Xi naquiiñeʼ guni ca guendaxheelaʼ ca gatigá, neca naquiiñeʼ gácacaʼ nadxibalú ne cadi gudxiibacaʼ laca laacaʼ.

⁹ Ora gadxé gadxé ni riníʼ ique ti guendaxheelaʼ, cada tobi de laacaʼ naquiiñeʼ chinándacaʼ ni na conseju riʼ: «Lachuu [listu] para ucaa diaga tu, peru cadi nisi undaa ruaa si tu xiixa, ne cadi casi ze tu idxiichi tu» (Santiago 1:19). Ora maʼ biluxe bicaadiagasaacabe laacabe, zándaca guirópacabe guinábacabe gutiidilaʼdxisaacabe stóndacabe (Santiago 5:16). Naquiiñeʼ gácacabe nadxibalú ne cadi gudxiibacabe laca laacabe para guiníʼcabe: «Bitiidilaʼdxiʼ naa purtiʼ binenaʼyaʼ lii». Pa gúnicabe zacá, cadi zacané si nga laacabe guni chaahuicabe ca guendanagana ni gápacabe, sínuque laaca zacaneni laacabe gaca xhamígucabe ne gannaxhiisaacabe ti zacá chuuláʼdxicabe chúʼcabe juntu.

10. Xi gudxi Pablu ca xpinni Cristu de Corinto guni ne ni zanda guni ca xpinni Cristu yanna.

¹⁰ Ora bicaa apóstol Pablu ra nuu ca xpinni Cristu de Corinto, guniʼbe zanda guichaganacaʼ purtiʼ nabé cayapa «binni jnadxii» ndaaniʼ guidxi que (1 Corintios 7:2). Yanna riʼ nabáninu ndaaniʼ ti guidxilayú jma malu que ca dxi bibani ca binni de guidxi Corinto. Ca cosa dxabaʼ ni riníʼ binni sin guituilú, modo rácucaʼ lari ne cani zeeda lu revista, lu libru, lu ca película ne cani ridiʼdiʼ lu televisión ni cuzeeteʼ modo riuuné binni stobi la? rucaacani binni chuʼné ni cadi xheelaʼ. Cumu zacagá bibani ca xpinni Cristu de Corinto que la? ngue runi gudxi Pablu laacabe: «Jma galán ichaganá cabe pa qué ganda guni huantar cabe stubi cabe» (1 Corintios 7:9).

11, 12. 1) Xi naquiiñeʼ guni hombre né xheelaʼ ne zaqueca gunaa, ne ximodo naquiiñeʼ gúnicabe ni. 2) Pa caquiiñeʼ gucueezacabe de gatanécabe xheelacabe ti tiempu, xi zanda gúnicabe.

¹¹ Pur nga, Biblia cudii conseju riʼ ca xpinni Cristu ni maʼ bichaganáʼ: «Cada hombre naquiiñe ibani né xheela modo ma nexhe ibani binni ni ma bichaganáʼ, ne zaqueca guni gunaa ne xheelaʼ» (1 Corintios 7:3). Ca diidxaʼ riʼ culuíʼcani naquiiñeʼ gudii binni ne cadi guinabaʼ si guicaa. Nayecheʼ ziuu cani maʼ bichaganáʼ ora gatanecaʼ xheelacaʼ pa cada tobi de laacaʼ guizaaláʼdxicaʼ chuʼ xheelacaʼ galán. Biblia cayabi ca hombre ni maʼ bichaganáʼ ca diidxaʼ riʼ: «Lauyubi modo guiene tu xheela tu» (1 Pedro 3:7). Galán chinanda cada tobi de cani maʼ bichaganáʼ conseju ca ora gatanecaʼ xheelacaʼ. Ne pa qué gusihuinni hombre ca nadxii xheelaʼ ora gatané laabe la? zándaca zaca nagana para laabe guni sentirbe galán.

¹² Nuu tiru qué zanda gatané binni xheelaʼ. Casi pa nabé maʼ bidxaga ti gunaa o ca dxi cayete ndaaniʼc (zanda gúʼndaluʼ Levítico 18:19). O dxi napa hombre ca xiixa guendanagana ra dxiiñaʼ stiʼ ne nabé maʼ bidxaga pur xiixa ni naguu laa xizaa. Pa naquiiñeʼ gusaana cani maʼ bichaganáʼ de gatanecaʼ xheelacaʼ ti tiempu la? naquiiñeʼ güicaʼ diidxaʼ ti gúʼyacaʼ xii nga ni jma jneza para laacaʼ (1 Corintios 7:5). Zacá qué zaníʼ ique nin tobi de laacabe xiixa ni cadi jneza. Peru pa gunaa ca qué náʼ gatané xheelaʼ o xheelabe runi ni sin gusihuinni nadxii laabe la? zándaca gucaa nga laacaʼ gucheecaʼ. Ne pur nga nuu tu huayapa guendanagana lu xquendaxheelaʼ.

13. Xi zanda guni ca xpinni Cristu para gápacaʼ xquendabiaanicaʼ nayá.

¹³ Cásica guiráʼ ca xpinni Cristu, cani maʼ bichaganáʼ cadi naquiiñeʼ gúʼyacaʼ pornografía, purtiʼ zanda gucaani laacaʼ gúnicaʼ cosa malu, casi gatané ti hombre sti hombre o ti gunaa sti gunaa o gatanecaʼ tuuxa maniʼ (Colosenses 3:5). Laaca naquiiñeʼ gápacabe cuidadu xi riníʼ íquecabe ne xi rúnicabe ora güinécabe stobi ni cadi xheelacabe diidxaʼ. Jesús gudixhená laanu né ca diidxaʼ riʼ: «Neca chuʼlaʼdxi si tuuxa ti gunaa ni cadi xheelaʼ, ne icá ique chuʼ né laabe la? ma bichee, neca qué ñuu né pe laabe» (Mateo 5:28). Pa chinanda cani maʼ bichaganáʼ conseju ca zacaneni laacaʼ cadi guyúbicaʼ chúʼnecaʼ ni cadi xheelacaʼ. Ne laaca ziuucabe galán ora gatanécabe xheelacabe, zacá zeeda gácani ti cosa ni cusigaʼdeʼ Jiobá laacabe, purtiʼ laabe gudixhestibe guendaxheelaʼ (Proverbios 5:15-19).

14. Xi rizaaca nuu tiru, ne xiñee.

¹⁴ Galán nga zanda guni chaahuiʼ stale de ca xpinni Cristu guendanagana ni guidxaagalucaʼ lu xquendaxheelacaʼ. Peru nuu tiru qué randa runi chaahuicabe ca guendanagana stícabe. Cumu guiranu nácanu binni ruchee ne nabáninu ndaaniʼ ti guidxilayú ni nuu lu náʼ Binidxabaʼ la? nga runi rilaa caadxi guendaxheelaʼ (1 Juan 5:19). Ximodo naquiiñeʼ gudxiilú ca xpinni Cristu guendanagana riʼ yaʼ.

15. 1) Gunáʼ nga ti razón ni rudii Biblia para gaca divorciar tuuxa ne guibiguetaʼ guichaganáʼ. 2) Xiñee nuu caadxi qué riná gaca divorciar de xheelaʼ ora gucheené laa.

¹⁵ Lu capítulo 2 stiʼ libru riʼ bieeteʼ zanda gaca divorciar binni de xheelaʼ ne guichaganáʼ sti biaje pa gapa xheelaʼ jnadxii, ne nga si nga razón ni rudii Biblia para guni binni zacád (Mateo 19:9). Nabé nagana zaca para binni guʼyaʼ xi guni ora guihuinni dxandíʼ guyuuné xheelaʼ tuuxa. Ñee zutiidiláʼdxibe stonda xheelabe la? o zaca divorciarbe. Cadi néxhepeʼ xi guni binni ora guizaaca nga. Caadxi de ca xpinni Cristu huatiidiláʼdxicaʼ stonda xheelacaʼ ora dxandíʼ gaca arrepentir, ne ribánicaʼ casi ante. Xcaadxi qué rinacaʼ gaca divorciarcaʼ pur xiiñicaʼ.

16. 1) Xi huacaa binni gaca divorciar ora gucheené xheelaʼ laa. 2) Ora quixhe ique binni ni bicheené xheelaʼ laa gaca divorciar o qué gaca divorciar, xiñee cadi naquiiñeʼ guiníʼcabe cadi jneza ni cá íquebe gúnibe.

¹⁶ Nuu stale cosa ni naquiiñeʼ guʼyaʼ binni ante quixhe ique xi guni. Guidúʼyanu chonna ejemplu. Ora gapa xheelaʼ tuuxa jnadxii ne gueeda gapa ti xiiñiʼ o guicá xiixa guendahuará laa o guilaxoo ca xiiñibe. Peru pa tuuxa gatané xheelaʼ despué de ganna gupa xheelaʼ jnadxii la? zusihuinni maʼ bitiidilaʼdxiʼ stonda xheelaʼ ne racalaʼdxiʼ guibanineruʼ laabe. Maʼ gastiʼ ti razón ni cudii Biblia para ganda gaca divorciarbe ne guichaganabe sti biaje. Guirutiʼ naquiiñeʼ cuʼ ruaa o gabi laabe xi gúnibe, nin guiniʼcaʼ cadi jneza ni cá íquebe gúnibe. Laabe nga naquiiñeʼ gudxiilube cani gueeda luguiabe pur ni quixhe íquebe gúnibe. Stiidxaʼ Dios na: «Cada tobi zuaʼ donda stiʼ» (Gálatas 6:5).

17. Xi riníʼ Biblia qué zanda guni binni ni gusaana xheelaʼ o ni guca divorciar pa qué ñapa xheelaʼ jnadxii.

¹⁷ Ñee nuu xiixa razón para gusaana binni xheelaʼ o gaca divorciar neca qué ñapa xheelaʼ jnadxii la? Nuu pue, peru ti xpinni Cristu qué zanda guichaganáʼ sti binni (Mateo 5:32). Biblia na zanda gusaana binni xheelaʼ, peru pa chuʼ tuuxa guni zacá «napa xidé guiaana stubi o pacaa la? ibigueta né xheelaʼ» (1 Corintios 7:11). Pora nga zanda gusaana binni xheelaʼ yaʼ.

18, 19. Xi zanda gucaa tuuxa guʼyaʼ pa zie nezalú ti juez para guixeleʼ de xheelaʼ o gaca divorciar, neca qué zanda guichaganáʼ sti biaje.

¹⁸ Ti familia zanda guiaana pobre ora nabé nachaabaʼ hombre ne napa xiixa viciu.e Zándaca quítebe bueltu ni naquiiñeʼ guicaa binnilídxibe lu apuesta, lu guendarixudxi o pur rigúʼbabe guixi. Biblia na: «Ti hermanu ni qué ulabi [...] ca binni lidxi, ma biree de ni runi cre, ne zeda aca jma nadxaba que ni qué runi cre» (1 Timoteo 5:8). Pa ti hombre qué náʼ guchaa modo laa ne guicaa bueltu ni runi ganar xheelaʼ para quite ni lu ca viciu stiʼ la? xheelabe zanda quixhe ique gusaana laabe, peru naquiiñeʼ guni ni nezalú ti juez para guibani galán ne zaqueca ca xiiñiʼ.

¹⁹ Laaca zanda gusaana tuuxa xheelaʼ pa xheelabe nabé nandáʼ ique ne riguiñe laabe dede runiná laabe o dede cuʼ xquendanabánibe ra naxoo. Ne pa gatigá gucaa laabe gucheenebe ca mandamientu stiʼ Dios, zanda gúʼyabe pa guixélebe de laa, jmaruʼ si pa cuxooñeʼ riesgu guxheleʼ laabe de Dios. Xpinni Cristu ni cazaaca zacá zanda guiníʼ ique jma jneza guixeleʼ de xheelaʼ nezalú ti juez ti ganda «uzuʼba [...] stiidxa Dios que stiidxa binni» (Hechos 5:29).

20. 1) Ora guilaa ti guendaxheelaʼ, ximodo zanda gacané ca xpinni Cristu ne ca binnigola laacabe, ne xi cadi naquiiñeʼ gúnicaʼ. 2) Neca nanna cani maʼ bichaganáʼ ca razón ni rudii Biblia para guixeleʼ ca guendaxheelaʼ ca o gaca divorciarcaʼ, xiñee cadi jneza guyúbicabe intiica si cosa para gúnicabe nga yaʼ.

²⁰ Ora guniná xhaataʼ tuuxa xheelaʼ, guirutiʼ napa xidé gucaa laabe guixélebe de xheelabe o guiaananebe laa. Neca ca xpinni Cristu ni zuhuaa dxiichiʼ lu stiidxaʼ Dios ne ca binnigola zanda gacanecaʼ ne gudiicaʼ conseju ni zeeda lu Biblia laabe, qué zanda ganna chaahuicaʼ xipeʼ cazaaca lu xquendaxheelabe. Jiobá si nga nanna xi cazaaca lu xquendaxheelabe. Ne pa ti gunaa xpinni Cristu iquiiñeʼ intiica si cosa para guixeleʼ de xheelaʼ, cadi cusisaca Jiobá, Dios ni gudixhestí guendaxheelaʼ. Peru pa nuu xquendanabánibe ra naxoo pur runiná xhaataʼ xheelabe laabe guirutiʼ naquiiñeʼ guiníʼ mal de laabe pa quixhe íquebe guixélebe de laa. Zacaca zanda guni ti hombre pa racalaʼdxiʼ guixeleʼ de xheelaʼ. Xi si la? naquiiñeʼ gánnacabe guiráʼ binni zuni juzgar Dios (Romanos 14:10).

21. Xi ejemplu cusihuinni racané ca conseju stiʼ Biblia ca guendaxheelaʼ ca.

²¹ Chonna beeu de bixeleʼ Lucia de xheelaʼ, gunaa ni bizéʼtenu ra bizulú tema riʼ, guniʼné ca testigu stiʼ Jiobá laabe ne bizulú biindanecaʼ laabe Biblia. Laabe guniʼbe: «Nabé bidxagayaaʼ modo gucané Biblia naa para gannaʼ modo guneʼ chaahueʼ guendanagana stinneʼ. Gudiʼdiʼ si ti semana de cayuundanécabe naa Biblia biyúbecaʼ guibiguetaniáʼ xheelaʼ. Yanna riʼ zanda guiniéʼ nanna Jiobá ximodo gacané ca guendaxheelaʼ ca ora cadíʼdicaʼ lu guendanagana, purtiʼ cani rusiidibe racanécani gusisacasaacaʼ laacaʼ. Cadi dxandíʼ diʼ nga na binni ruxheleʼ ca testigu stiʼ Jiobá ca familia ca, purtiʼ naa gadxé ni bizaacaʼ». Lucia biziidiʼ chinanda ca conseju stiʼ Biblia lu xquendanabani.

22. Xi zanda gacané guiráʼ cani maʼ bichaganáʼ.

²² Cadi Lucia si nga huazaaca zacá. Cani maʼ bichaganáʼ naquiiñeʼ gúʼyacaʼ xquendaxheelacaʼ casi ti ndaayaʼ ne cadi casi xiixa nanaa ni qué zanda guácabe. Nga runi, Jiobá riquiiñeʼ ca conseju ni zeeda lu Stiidxaʼ para gacané ca guendaxheelaʼ ca ne gástiruʼ stobi jma risaca que laani. Biblia racané chuʼ «xpiaaniʼ binni ni qué ganna» (Salmo 19:7-11). Ca conseju ni zeeda lu Biblia huayacanécani stale guendaxheelaʼ ni maʼ nuu para guilaa ne huayacanécani xcaadxi guni chaahuiʼ ca guendanagana ni ruluíʼ qué zanda gaca chaahuiʼ. Galán guni cré guiráʼ ca guendaxheelaʼ ca de guidubi ladxidoʼcaʼ zanda gacané ca conseju ni cudii Jiobá Dios laacaʼ. Pa chinándacabe ca conseju ca, ¡dxandipeʼ zabánicabe nayecheʼ!