Ximodo chuʼnu gaxha de Dios «Ni rucaadiaga oración»

«Lii, ni rucaadiaga oración, ra nuuluʼ zie guiráʼ xixé binni.» (SALMO 65:2.)

1. Xi rusihuinni maʼ gadxé laanu de guiráʼ ni nabani nuu ndaaniʼ guidxilayú riʼ, ne xi zanda gúninu.

STALE cosa ni nabani nga bizáʼ Dios ndaaniʼ guidxilayú riʼ, peru lade guiráʼ cani la? binni si nga zanda guni adorar laabe. Laasinu nga nánnanu naquiiñeʼ guluíʼ Dios laanu neza chuunu ne laasinu nga rudiʼnu cuenta naquiiñeʼ gúninu ni. Nga runi, zanda guidxíñanu gaxha de Bixhózenu ni nuu guibáʼ.

2. Bichee si Adán ne Eva, xiñee maʼ qué ñanda nidxiiña binni Dios casi modo riuuláʼdxibe.

² Pur modo bizáʼ Dios binni zanda guiníʼnecaʼ laabe. Cumu dxi guyáʼ Adán ne Eva qué gápacaʼ donda la? gunda bidxíñacabe laabe cásica runi binni ne bixhoze. Peru, ra bicheecabe que la? maʼ qué ñanda diʼ niniʼnécabe laabe casi modo guniʼnécabe laabe dxiqué (Génesis 3:8-13, 17-24). Yanna, ñee purtiʼ si bichee Adán ne ralené ca xhiiñibe donda nga maʼ qué zanda guiníʼnecaʼ Dios la? Coʼ, purtiʼ Jiobá rudiiruʼ lugar guidxíñanu laa peru pa gúninu caadxi cosa canábabe laanu. Xi laacani yaʼ.

Ni naquiiñeʼ gúninu para guidxíñanu Dios

3. Xi naquiiñeʼ guni binni ruchee ti ganda guidxiña Dios. Ne xi bizaaca ni cusihuinni zacá ni.

³ Ni bizaaca chupa de ca xiiñiʼ Adán racané gánnanu xi rinabaʼ Dios de ca binni ruchee ti ganda guidxíñacaʼ laabe. Caín ne Abel gucaláʼdxicabe nidxíñacabe Dios ora bisigáʼdecabe laabe xiixa. Ni bisigaʼdeʼ si Abel gucuaabe , peru qué nicaabe ni bisigaʼdeʼ Caín (Génesis 4:3-5). Xiñee yaʼ. Hebreos 11:4 na: «Purti bini cre Abel Dios, nga runi jma uyuulaʼdxi Dios ni bisigaʼde be laa, que ni bisigaʼde Caín. Ne pur nga runi uníʼ Dios ma nayá ladxidóʼ be». Nga rusihuinni riquiiñeʼ gápanu fe pa racaláʼdxinu gucaadiaga Dios laanu. Sti cosa ni naquiiñeʼ gúninu rihuínnini lu ni gudxi Jiobá Caín: «Ñee cadi laaca zasaca ni cudiiluʼ, pa gúniluʼ ni jneza la?». Pa ñuni Caín ni jneza la? ñuulaʼdxiʼ Dios ni cusigáʼdebe laa que. Peru Caín qué nucaadiaga diʼ conseju stiʼ Dios, biitibe Abel ngue runi bixooñebe de ra guyuube (Génesis 4:7-12). Nga runi, de dxiqué bihuinni naquiiñeʼ gapa binni fe ne guni ni jneza para ganda guidxiña Dios.

4. Xi naquiiñeʼ gánnanu pa racaláʼdxinu guidxíñanu Dios.

⁴ Sti cosa ni naquiiñepeʼ gánnanu para ganda guidxíñanu Dios nga gudiʼnu cuenta nácanu binni ruchee. Guendaruchee ca ruxhéleni laanu de Dios, casi guníʼ Jeremías ora bicaabe ca diidxaʼ riʼ de modo guyuu guidxi Israel que: «Laaca laadu bichéʼnedu lii [...]. Ne maʼ bichiiluʼ ne ti za ngola ra nuuluʼ para cadi chindá oración stidu» (Lamentaciones 3:42, 44). Neca zacá, dede yanna rucaadiagaruʼ Dios oración sti ca binni ni napa fe, ni riníʼ ique jneza ne ni runi ni na ca mandamientu stibe (Salmo 119:145). Xi ejemplu ndiʼ nápanu, ne xi zanda guizíʼdinu de ca oración bíʼnicabe yaʼ.

5, 6. Xi rizíʼdinu pur modo gunda bidxiña Abrahán Dios.

⁵ Ti ejemplu de laacani nga Abrahán. Bidii Dios lugar guidxíñabe laa ne dede gudxi laabe «xhamiguaʼ» (Isaías 41:8). Laabe qué nusaanaʼ de nuzuubabe stiidxaʼ Dios, yanna, xi zanda guizíʼdinu pur modo bidxíñabe Dios yaʼ. Ti biaje gunabadiidxabe Jiobá tu laa nga guiaanané guiráʼ stibe, nabe: «Xi gudiiluʼ naa pue. Maʼ chigateʼ ne caʼruʼ gapa xiiñeʼ» (Génesis 15:2, 3, La Casa de la Biblia, 1969; 17:18). Sti biaje, dxi chigunitilú Dios guidxi Sodoma ne Gomorra purtiʼ nabé malu ca binni que la? Abrahán guyuu xizaa pur ca binni ni ñándaca nilá (Génesis 18:23-33). Ne dede guyuu ora guniʼbe pur xcaadxi binni (Génesis 20:7, 17). Cásica biʼniʼ Abel, laabe laaca bidxíñabe Dios ora bidiibe xiixa ofrenda laa (Génesis 22:9-14).

⁶ Guiráʼ biaje guniʼné Abrahán Jiobá la? gúdxibe laa guiráʼ ni gucaláʼdxibe ne ora tiica si gunda guníʼnebe laa. Peru cadi guníʼsibe guiráʼ ni gucaláʼdxibe, sínuque laaca bidiibe cuenta cadi biaʼca diʼ Dios laabe. Guidúʼyanu modo guníʼnebe Jiobá ne stale respetu pur ni na Génesis 18:27: «Jiobá maʼ bizuluáʼ canieniáʼ lii naca ndaʼ de yu ne dé ludé». ¡Guizáʼ galán gúninu casi modo bíʼnibe!

7. Xi gunabaʼ guiráʼ bixhoze gola ca israelita que ora biʼniʼ orarcaʼ.

⁷ Guiráʼ bixhoze gola ca israelita que laaca gunábacaʼ gadxé gadxé cosa ora biʼniʼ orarcaʼ, ne bicaadiaga Jiobá laacabe ne stale guendanayecheʼ. Casi Jacob, gunábasibe Jiobá gacané laabe gúdxibe laa ca diidxaʼ riʼ: «De guiráʼ ni gudiiluʼ naa la? zúneni chii ndaa ne zudiéʼ lii ti ndaa de laacani» (Génesis 28:20-22). Qué nindaa de ngue, dxi zebe para gúʼyabe bíʼchibe, gunábabe Jiobá gapa laabe: «Rinabaʼ lii gulaluʼ naa de lu naʼ Esaú bicheʼ, purtiʼ cadxibeʼ laabe» (Génesis 32:9-12). Job laaca gunabaʼ pur ca binnilidxi ora bisigáʼdebe Jiobá xiixa, ne ora biʼniʼ orarbe pur ca hombre ni yeganna laabe, cani bichee pur ni guniʼcaʼ la? bicaadiaga Jiobá guiráʼ ni guniʼbe (Job 1:5; 42:7-9). Cani bidúʼyanu riʼ racané cani laanu gánnanu xii nga zanda guinábanu ora guni orarnu. Laaca rizíʼdinu nuu Jiobá para gucaadiaga oración stiʼ cani guidxiña laabe modo racaláʼdxibe.

Modo na pactu stiʼ ley guidxíñacabe Dios

8. Tuu nga cani guníʼ pur guidxi Israel dxi gúpacabe pactu stiʼ ley que.

⁸ Gulee si Jiobá ca israelita que de Egipto la? bidiibe laacaʼ ti pactu stiʼ ley. Ley que na naquiiñeʼ chuʼ binni ni ruzaaquiʼ guʼxhuʼ para ganda guidxiña binni ra nuu Dios. Laaca gulí Dios caadxi levita para gaca ni ruzaaquiʼ guʼxhuʼ ti gacanecaʼ guidxi que guidxiña laabe. Ora guidxi que chiguni xiixa dxiiñaʼ jma naroʼbaʼ la? guyuu tobi ni guiníʼ pur laacabe, nuu tiru rey stiʼ guidxi que o tobi de cani riguixhená que nga gábini Dios (1 Samuel 8:21, 22; 14:36-41; Jeremías 42:1-3). Casi rey Salomón, laa biʼniʼ orar de guidubi ladxidóʼ dxi biluxe yuʼduʼ que. Bisihuinni Jiobá cayuulaʼdxiʼ guiráʼ ni guniʼbe purtiʼ bichatipa santuariu que de guendanandxóʼ stiʼ ne guníʼ: «Zucaadiaʼgaʼ guiráʼ oración ni gacaʼ raríʼ» (2 Crónicas 6:12–7:3, 15).

9. Xi biʼniʼ ca israelita para gunda bidxíñacaʼ ra nuu Jiobá ndaaniʼ santuariu que.

⁹ Lu ley ni bidii Jiobá guidxi Israel que zeeda ti cosa ni naquiiñeʼ gúnicabe ti ganda guidxíñacabe laabe ndaaniʼ santuariu que. Xi laani yaʼ. Guiráʼ siadóʼ ne huadxí la? xaíque stiʼ cani ruzaaquiʼ guʼxhuʼ que biitibe maniʼ para gusigáʼdebe Dios, ne laaca bizaaquibe guʼxhuʼ rindáʼ naxhi nezalú Jiobá. Gudiʼdiʼ si dxi la? laaca biʼniʼ cani ruzaaquiʼ guʼxhuʼ que dxiiñaʼ riʼ, dxi si qué ñúnicabe ni nga dxi guiá xhiálmacabe. Laacabe bíʼnicabe nga para guyuulaʼdxiʼ Jiobá xhiiñacabe (Éxodo 30:7, 8; 2 Crónicas 13:11).

10, 11. Xi rusihuinni rucaadiga Jiobá oración ni guni binni laasi.

¹⁰ Ñee pur ca binni si ni gulí Dios que nga gunda bidxiña ca israelita que ra nuube la? Coʼ. Stiidxaʼ Dios cayabi laanu bicaadiaga Jiobá ne stale guendanayecheʼ oración ni biʼniʼ ca israelita que laasicaʼ. Lu oración ni biʼniʼ Salomón ora biluxe yuʼduʼ que gunábabe Jiobá: «Intiica oración ni gaca, intiica si cosa guinabaʼ tuuxa hombre ndaaniʼ yuʼduʼ riʼ o guinabaʼ guidubi guidxi Israel [...]; ora laabe gusigaanabe neza ra nuu yoo riʼ, bicaadiaga laabe dede guibáʼ ra nuuluʼ» (2 Crónicas 6:29, 30). Dxi cuzaaquiʼ Zacarías bixhoze Juan ni Riguunisa que guʼxhuʼ ndaaniʼ santuariu la? libru stiʼ Lucas na «rí jma binni fuera, caníʼ né Dios» óraque. Ruluíʼ si dede maʼ biaacabe guidegulisaacabe fuera de santuariu que para guni orárcabe ora maʼ nuu tu cuzaaquiʼ guʼxhuʼ para Jiobá lu altar de oro que (Lucas 1:8-10).

¹¹ Ngue runi, ora guidxi que guni orar o tuuxa ni riníʼ pur guidxi que gúnini pur laacabe la? Jiobá bicaadiaga ca oración que ne stale guendanayecheʼ, purtiʼ bíʼnicabe ni modo riuuláʼdxibe. Yanna riʼ, neca maʼ cadi zinándanu ni na pactu stiʼ ley que la? modo biʼniʼ ca israelita que para bidxíñacaʼ Jiobá rusiidiʼ ni laanu stale cosa galán de modo naquiiñeʼ guni orarnu.

Modo guidxíñanu Jiobá pur Cristu

12. Xi racané ca xpinni Cristu ti ganda guidxíñacaʼ Jiobá yanna.

¹² Laanu, ca xpinni Cristu maʼ cadi caquiiñedinu tuuxa ni ruzaaquiʼ guʼxhuʼ para guiniʼné Dios pur laanu nin guyadxinu ti yuʼduʼ para guni orarnu. Peru Jiobá náparuʼ xiixa ni racané laanu para ganda guidxíñanu laabe. Xi laani yaʼ. Laani nga ti yuʼduʼ cubi ni qué rihuinni. Yuʼduʼ riʼ bizulú cayacaneni ca xpinni Dios dede iza 29, dxi beeda gaca Jesús Cristu ne bibibe para gueeda gácabe xaíque stiʼ cani ruzaaquiʼ guʼxhuʼ.a Yuʼduʼ cubi riʼ nga ni riquiiñeʼ Jiobá para guni adorarnu laabe pur guendaguti stiʼ Cristu ni ruxiá donda stinu (Hebreos 9:11, 12).

13. Ora guininu de oración, ximodo zanda guchaaganu ni guca ndaaniʼ yuʼduʼ guyuu Jerusalén que ne ni raca ndaaniʼ yuʼduʼ stiʼ Jiobá yanna riʼ.

¹³ Ndaaniʼ yuʼduʼ ni riquiiñeʼ Dios yanna para guni adorarnu laa la? laaca raca caadxi cosa ni zeeda gaca casi cani guca ndaaniʼ yuʼduʼ ni guyuu Jerusalén que, chupa chonna de laacani zeeda gaca cani casi ca oración runi binni ne xcaadxi cosa ni caquiiñeʼ para guiniʼné binni Dios (Hebreos 9:1-10). Xi zanda guininu de guʼxhuʼ ni bizaaquicabe siadóʼ ne huadxí lu altar ni guyuu lugar ra rábicabe Santu que yaʼ. Libru stiʼ Apocalipsis na «zeda aca guʼxhu que stiidxa ca xpinni Dios ra uníʼ né ca laa» (Apocalipsis 5:8; 8:3, 4). David guníʼ: «Gacaʼ oración stinneʼ casi guʼxhuʼ nezaluluʼ» (Salmo 141:2). Nga runi, ndaaniʼ xquidxi Dios ni nuu yanna riʼ la? guʼxhuʼ ca zeeda gácani casi ca oración ni rucaadiaga Jiobá ne modo riuuláʼdxibe gusisácacabe laabe (1 Tesalonicenses 3:10).

14, 15. Ximodo zanda guidxiña ca binni ni bibí para cheʼ guibáʼ ne «xcaadxi dendxuʼ» ra nuu Jiobá.

¹⁴ Tuu nga cani zanda guidxiña Dios ndaaniʼ yuʼduʼ ni caquiiñebe yanna riʼ yaʼ. Ndaaniʼ yuʼduʼ ni guyuu dxiqué la? cani ruzaaquiʼ si guʼxhuʼ ne ca levita que nga gunda bíʼnicaʼ dxiiñaʼ lu patiu ni guyuu ndaaniʼ ni, peru cani ruzaaquiʼ si guʼxhuʼ que nga gunda biuucaʼ ndaaniʼ lugar ni láʼ Santu que. Patiu ni guyuu ndaaniʼ yuʼduʼ ne lugar ni láʼ Santu qué la? zeeda gácani modo ruuyaʼ Jiobá ca xpinni Cristu ni bibí ne cabézacaʼ checaʼ guibáʼ. Pur modo ruuyaʼ Jiobá laacabe ca zanda guni orárcabe ne gusisácacabe laabe.

¹⁵ Yanna, ximodo ruuyaʼ Dios «xcaadxi dendxuʼ» ni chiguibani ndaaniʼ Guidxilayú riʼ yaʼ (Juan 10:16). Isaías ni riguixhená que guníʼ zadxiña binni de stale guidxi roʼ para guni adorar Jiobá ra maʼ ziluxe ca últimu dxi (Isaías 2:2, 3). Laaca guniʼbe zadeʼguʼ binni de stale guidxi para guni adorarcaʼ Jiobá. Dios bisihuinni racalaʼdxiʼ chúʼcabe gaxha de laa ora guníʼ ca diidxaʼ riʼ: «Zuneʼ xiixa para chuʼtu nayecheʼ ndaaniʼ lidxeʼ ra raca orar» (Isaías 56:6, 7). Apocalipsis 7:9-15 cusiéneruʼ jma de laani ora na ziuu «jma binni [...] de irá guidxi» ni zadaagucaʼ para guni adorarcaʼ Dios, ne guni orarcaʼ laabe «ridxí ne huaxhinni» lu patiu ni nuu fuera de yuʼduʼ ni napa Dios yanna riʼ. Cumu xpinni Dios laanu la? guizáʼ ratadxí ladxidoʼno gánnanu zanda guidxíñanu laabe ne zucaadiágabe laanu ora tiisi guni orarnu.

Xi oración rucaadiaga Dios

16. Xi zanda guizíʼdinu pur modo biʼniʼ orar ca primé xpinni Cristu.

¹⁶ Ca hombre ne ca gunaa bibani dxiqué nabé biʼniʼ orarcaʼ. Xi gunábacabe ora biʼniʼ orárcabe yaʼ. Ca binnigola sti ca neza binni ridagulisaa que la? gunábacabe gacané Jiobá laacabe ora chindícabe tuuxa hombre para guni xiixa dxiiñaʼ ndaaniʼ xquidxi Dios (Hechos 1:24, 25; 6:5, 6). Epafras gunabaʼ pur ca biʼchiʼ ne ca bizaʼnaʼ ni zinanda Cristu (Colosenses 4:12). Ora biteguyoocabe Pedru la? guiráʼ ca binni ridagulisaa de Jerusalén biʼniʼ orarcaʼ pur laabe (Hechos 12:5). Sicaríʼ guníʼ ca primé xpinni Cristu ora gunábacaʼ gacané Dios laacaʼ gácacaʼ nadxibalú para gudxiilucaʼ cani cucaalú laacaʼ: «Yanna, Señor [Jiobá], biiya modo racalaʼdxi cabe uchibi cabe laadu para guiaana dxí du, ne ucané laadu, cani cayuni xhiiña luʼ, para güi du stiidxa lu sin idxibi du» (Hechos 4:23-30). Discípulo Santiago gúdxibe ca xpinni Cristu guinábacaʼ Dios guendabiaaniʼ ora tiidicaʼ lu guendanagana (Santiago 1:5). Ñee rinábanu xiixa casi ca nga ora runi orarnu Jiobá la?

17. Xi oración rucaadiaga Jiobá.

¹⁷ Peru Dios qué rucaadiaga diʼ guiráʼ oración ni runi binni. Yanna, ximodo gánnanu zucaadiagabe oración stinu yaʼ. Dios bicaadiaga ca hombre ni bizuubaʼ stiidxabe dxiqué purtiʼ bidxíñacabe laabe de guidubi ladxidóʼcabe ne guníʼ íquecabe jneza; gúpacabe fe ne bisihuínnicabe ni lu guiráʼ ni bíʼnicabe. Pa gúninu zacaca ora guidxíñanu Jiobá la? zucaadiágabe laanu.

18. Xiruʼ zanda guni ca xpinni Cristu para gucaadiaga Dios laacaʼ.

¹⁸ Nuuruʼ sti cosa ni naquiiñeʼ gúninu. Apóstol Pablu bisiene ni ora guníʼ: «Yanna pur ni biʼni be, ma irá xixé nu randa ridxiña nu ra nuu Dios, [...] purti tobi si Espíritu Santu napa nu». Tuu nga caníʼ Pablu ora bizeeteʼ «pur ni biʼni be» yaʼ. Caniʼbe de Jesucristu (Efesios 2:13, 18). Pur Jesús si nga zanda guidxíñanu bixhózenu Jiobá ne gábinu laa intiica si gacaláʼdxinu (Juan 14:6; 15:16; 16:23, 24).

19. 1) Padxí maʼ bibixhilaʼdxiʼ Jiobá ofrenda ni bisigaʼdeʼ ca israelita que laabe. 2) Xi naquiiñeʼ gúninu para gaca ca oración stinu casi ti xhoʼ ni rindá naxhi para Jiobá.

¹⁹ Casi maʼ guninu, guʼxhuʼ ni bizaaquiʼ ca israelita dxiqué la? zeeda gácani casi ca oración ni rucaadiaga Dios stiʼ ca xpínnibe ni ruzuubaʼ stiidxabe. Peru guyuu tiru bibixhilaʼdxiʼ Jiobá ca ofrenda ni bisigaʼdeʼ ca israelita que laabe. Ti ejemplu de laani nga dxi bizaaquicabe guʼxhuʼ ndaaniʼ yuʼduʼ que ne bizuxíbicabe xañee stale bidóʼ (Ezequiel 8:10, 11). Zacaca nga yanna riʼ, oración ni runi ca binni ni na cayuni ni na Jiobá peru qué rúnicaʼ ni na ca ley stibe la? reeda gaca cani casi ti xhoʼ ni rindaʼ yuudxuʼ para laabe (Proverbios 15:8). Nga runi, pa racaláʼdxinu gaca oración stinu casi ti xhoʼ ni rindáʼ naxhi para Dios la? naquiiñeʼ gusihuínninu rúninu ni jneza lu guiráʼ ni gúninu. Jiobá riuulaʼdxiʼ gucaadiaga ca oración stiʼ ca binni runi ni nabe (Juan 9:31). Peru nuuruʼ xcaadxi cosa ni naquiiñeʼ gánnanu: Ximodo naquiiñeʼ guni orarnu. Xi guinábanu ora guni orarnu. Ximodo ricabi Dios ca oración stinu. Stiʼ tema ca cusiene ca ndiʼ ne xcaadxi guendarinabadiidxaʼ casi laacani.

[Cani cá ñee yaza]

Xi guicábiluʼ

• Ximodo zanda guidxiña ca binni ni napa donda ra nuu Dios.

• Ximodo zanda guni orarnu casi biʼniʼ orar ca binni bibani dxiqué.

• Xi rusiidiʼ ca oración biʼniʼ ca primé xpinni Cristu laanu.

• Pora nga reeda gaca ca oración stinu casi xhoʼ ni rindáʼ naxhi para Dios.