Stiidxaʼ Jiobá nabani
Cani naquiiñeʼ gánnanu de ca carta ni gucuá ra nuu ca xpinni Cristu de Corinto (Corintios)
PABLU guyé guionna biaje stiʼ casi misioneru Éfeso, biaʼ lu iza 55 despué de ca dxi stiʼ Cristu. Laabe naguu xaíquebe ni cayaca ca xpinni Cristu de Corinto nezalú Dios, purtiʼ gúnnabe nabé ridinde diidxacaʼ ne cudiicaʼ lugar nuu tu cayapa jnadxii ládecaʼ. Ne ca binni ridagulisaa de guidxi ca bicaacaʼ ti carta ra nuube para guinabadiidxacaʼ laabe de xcaadxi cosa. Guiráʼ nga bicaa laabe gucaabe primé carta stibe ra nuu ca de Corinto.
Ruluíʼ si gudiʼdiʼ chupa chonna beeu para bicaabe sti carta ra nuucaʼ. Nabé risaca nga guʼndaʼ ca xpinni Cristu cani bicaabe lu guiropaʼ carta ca, purtiʼ yanna riʼ nuunu casigá guyuu ca binni ridagulisaa de Corinto ne ca binni de guidxi que (Heb. 4:12).
«LAGATANÁ», «LAUZUHUAA CHAAHUI» NE «LAUDXII LÚ»
Sicaríʼ bicaa Pablu: «Hermanu caʼ, [...] rinaba laatu chuʼ tu tobi si» (1 Cor. 1:10). Ne bisiene Pablu laacabe naquiiñeʼ gápacabe ca guenda ni gupa Jesucristu, purtiʼ «cimientu que nga Jesucristu» (1 Cor. 3:11-13). Laabe bizeetebe lu carta ca nuu tobi de ca binni ridagulisaa napa jnadxii ne gúdxibe laacaʼ: «Lacuee ni cuchee ca lade tu» (1 Cor. 5:13). Ne guniʼbe: «Ne cuerpu stinu la? napa nu ni cadi para quite nu luguiá gunaa, sínuque sti Señor ni» (1 Cor. 6:13).
Apóstol Pablu bidii conseju ni gacané cani maʼ bichaganáʼ ne cani caʼruʼ guichaganáʼ, ne bidiibe ca conseju ca purtiʼ gunabadiidxacabe cani laabe lu carta bicaacaʼ ra nuube (1 Cor. 7:1). De racá gúdxibe laacaʼ tuu nga xaíque sticaʼ casi xpinni Cristu, ximodo gaca ca guendaridagulisaa ca ne biluiʼbe laacaʼ dxandíʼ ziasa cani maʼ guti. Ne ra maʼ zilúxebe gúdxibe laacaʼ: «Lagataná ne lauzuhuaa chaahui lu ni runi cre tu. Lagaca hombre ne laudxii lú» (1 Cor. 16:13).
Chigusiénenu caadxi textu zeeda lu Biblia:
1:21. Ñee dxandíʼ nga riquiiñeʼ Jiobá «enda huati» ca para gulá cani guni cré laa la? Coʼ, peru nga nga ni riníʼ ique cani «qué niná ñunibiáʼ [Dios] pur enda biaani» sticaʼ. Para laacabe guendahuati nga cani riquiiñeʼ Dios para gulá binni (Juan 17:25).
5:5, NM. Xii nga guníʼ Pablu ne ca diidxaʼ riʼ: «Lagusaana hombre ca lu naʼ Binidxabaʼ para guinitilú beela ca ti guilá espíritu ca». Ora guni binni xiixa ni nabé malu ne qué gaca arrepentir la? ribeecabe laa de ndaaniʼ xquidxi Dios. Cumu maʼ nuube lade ca xpinni Binidxabaʼ sti biaje la? zanda guininu maʼ nuube lu naʼ Binidxabaʼ (1 Juan 5:19). Ne ora maʼ bireebe lade ca binni ridagulisaa la? maʼ qué zucaabe stobi guni ni cadi jneza, zacá nga rinitilú beela ca, ne rilá espíritu ca purtiʼ maʼ que zusaana ca binni ridagulisaa de guiníʼ íquecaʼ jneza (2 Tim. 4:22).
7:33, 34. Xii nga cani «nuu ndaani guidxilayú», cani jma cá ique ca xpinni Cristu ni maʼ bichaganáʼ. Ni jma cá íquecabe nga ni gócabe, ni gácucabe ne ra cuézacabe, cadi caníʼdini de ca cosa malu ni runi binni guidxilayú de cani naquiiñeʼ guixélenu de laacaʼ (1 Juan 2:15-17).
11:26. Dxi guníʼ Pablu «cada» guietenaláʼdxicabe guendaguti stiʼ Jesús que, cada pabiáʼ tiempu ngue rúnicabe ni ne «dede» padxí. Versículo riʼ cadi caníʼ diʼ ni guietenaláʼdxinu guendaguti stiʼ Jesús guiráʼ ora. Lu griegu diidxaʼ «cada» ca laaca riniʼni «ora» gúnicabe ni. Nga runi, ni caníʼ Pablu racá nga cada gó ca xpinni Cristu ni bibí ca pan ne guecaʼ vinu la? «culu[iʼcaʼ] binni guti Cristu pur laa[caʼ]». Laacabe rúnicabe ni ti biaje lu ti iza, 14 stiʼ nisán. Ne zacá zúnicabe ni «dede dxi ibigueta» Cristu ti guidxaagalú laacabe guibáʼ guiasasícabe lade gueʼtuʼ (1 Tes. 4:14-17).
13:13. Xiñee jma risaca «enda ranaxhii» ca que fe ne cueza binni ni chigudii Dios laa. Ora gueeda ca cosa ni «cabeza nu udii [Dios] laanu» ne gaca guiráʼ ni biʼniʼ crenu que la? zusihuínninu gúpanu fe ne maʼ gastiʼ zabézanu óraque (Heb. 11:1). Peru, qué ziuu dxi gusaananu de gannaxhiinu binni, nga runi, jma risácani que fe ne cueza binni ni chigudii Dios laa.
15:29. Ñee dxandíʼ nga zanda chúʼnisanu «xcuenta cani ma guti» ne qué ñuunisa la? Pablu qué niníʼ diʼ zanda chúʼnisanu pur ca gueʼtuʼ ni qué ñuunisa. Ni nabe nga modo nabani ca xpinni Cristu ni bibí ca zeeda gácani casi ñaca ñuunísacabe. Naquiiñeʼ chúʼcabe galán ne Dios dede gáticabe de racá maʼ espíritu laacabe nga guiásacabe.
Xi rusiidiʼ cani laanu:
1:26-31; 3:3-9; 4:7. Cadi naquiiñeʼ gudxíʼbanu laca laanu ne cadi guchanu naróʼ stinu, purtiʼ Jiobá si nga naquiiñeʼ uguʼnu naróʼ stiʼ. Zacá zacanenu ca binni ridagulisaa chuʼcaʼ tobi si.
2:3-5. Dxi yegucheeche Pablu diidxaʼ ra nuu ca de Corinto la? zándaca guníʼ íquebe pa zanda gucuudxibe tuuxa binni de raqué, purtiʼ ndaaniʼ guidxi que rinándacabe ni bisiidiʼ ca binni ni nácabe jma nuu xpiaaniʼ de Grecia ne ca costumbre ni nuu raqué. Peru neca bidxíbibe, qué nudiidibe lugar nucueeza nga laabe, sínuque bíʼnibe dxiiñaʼ ni bidii Dios laabe. Laanu laaca cadi naquiiñeʼ guireʼnu gana ora chuʼ xiixa ni gaca nagana para laanu gúninu. Ne guinábanu gacané Jiobá laanu ne cadi gusaanadinu de gucheechenu stiidxaʼ Reinu stiʼ Dios cásica biʼniʼ Pablu que.
2:16 NM. Ca diidxaʼ «nápanu xquendabiaaniʼ Cristu» ca la? riníʼ cani nánnanu ximodo riníʼ íquebe ne riníʼ íquenu casi laabe, laaca riníʼ nga nánnanu ximodo laabe ne rinándanu ejemplu stibe (1 Ped. 2:21; 4:1). Para ganda gúninu ca nga la? naquiiñeʼ guiduʼndaʼ chaahuinu ximodo bibánibe ne ximodo bíʼnibe xhiiñaʼ Dios.
3:10-15; 4:17. Naquiiñeʼ guiduʼyaʼ chaahuinu ximodo rusíʼdinu ne ximodo racanenu binni chinanda Cristu, ne gúninu stipa pur gusíʼdinu jneza (Mat. 28:19, 20). Pa qué gusíʼdinu jneza la? qué zanda diʼ gudxiilú binni ni cayuundanenu ca xiixa guendanagana para gusihuinni napa fe. Ne pa guilanu la? zeeda gácani «casi rilá binni ora riaʼqui irá xixé stiʼ», purtiʼ naná ziuu ladxidoʼno pur qué nilá binni ca.
6:18. Para guixeleʼ binni de «enda rapa jnadxii» la? naquiiñeʼ gusaana de guni guiráʼ ni runi ti hombre ne ti gunaa ora maʼ nuucaʼ guirópasicaʼ casi riníʼ diidxaʼ griegu pornéia que. Peru laaca naquiiñeʼ gucaanacaʼ intiica ni gucaa laacaʼ gápacaʼ jnadxiicaʼ, casi ra rihuinni binni xieeladi, ne ra caguiidxicaʼ (Mat. 5:28; Sant. 3:17).
7:29. Cani maʼ bichaganáʼ ca cadi naquiiñeʼ diʼ gusaana de gusisácacaʼ xhiiñaʼ Reinu purtiʼ si jma riuuláʼdxicaʼ chuʼcaʼ ne xheelacaʼ.
10:8-11. Ora guníʼ ca israelita que mal de Moisés ne de Aarón la? bininácabe ladxidóʼ Jiobá. Nga runi, pa laanu guiaʼnu guininu mal de binni la? qué zusihuínnidinu nuu xpiaaninu.
16:2. Qué zusaananu de gudiʼnu bueltu para gacanenu gaca xhiiñaʼ Reinu pa maʼ gudíxhenu cada padxí gudiʼnu ni ne pabiáʼ gudiʼnu.
«LAUYUBI GUNI TU JNEZA»
Ora gunna Pablu bilabi hombre ni bichee lade ca binni ridagulisaa nuu Corinto que ca conseju gucuaa ne guca arrepentir la? gúdxibe ca binni ridagulisaa gusiaandacaʼ ni bíʼnibe que, ne gacanecaʼ laabe ti chuʼbe nayecheʼ sti biaje. Neca lu primé carta biseendaʼ Pablu ra nuucabe que bicaani laacabe chúʼcabe triste la? nayecheʼ guyuu Pablu purtiʼ pur carta bicaa que guca arrepentírcabe (2 Cor. 2:6, 7; 7:8, 9).
Cumu biiyaʼ Pablu maʼ stale cosa cayúnicabe jneza la? gudxi laacabe laaca guiziidicabe gacanécabe xcaadxi. De racá bicábibe ca xhenemígube ni cucaalú laabe ne bidiibe sti conseju: «Lauyubi guni tu jneza ne guieche tu, ne lauyubi chuʼ tu tobi si sin chuʼ dinde tu» (2 Cor. 8:7; 13:11).
Chigusiénenu caadxi textu zeeda lu Biblia:
2:15, 16. Ximodo nga nácanu «ti xhoʼ naxhi ra cayuí nu stiidxa Cristu». Laanu, ca xpinni Cristu, rúninu ni na Biblia ne rusíʼdinu binni ni cá luni. Ne nga nga ni zeeda gaca ti «xhoʼ» guizáʼ sicarú para Jiobá ne para ca binni ni nachaʼhuiʼ, peru para ca binni malu ca la? rindáʼ yuudxuni.
5:16. Xiñee guníʼ Pablu: «Ma qué rulabi du tu naca binni». Guniʼbe zacá purtiʼ maʼ qué ruuyacabe xi raza binni, o xi guidxi laa, pa napa bueltu o pa coʼ. Ne ni jma risaca para laacabe nga nuucabe tobi si casi xpinni Cristu.
11:1, 16; 12:11. Ñee dxandíʼ guca Pablu nahuati ne bidxiibaʼ laca laa la? Coʼ, peru zándaca guyuu tu guníʼ ique zacá ora bicaadiaga cani guniʼbe para biluiʼbe derechu ni nápabe casi apóstol.
12:1-4. Tuu nga yenécabe «ibáʼ» [o, paraísu, NM]. Jneza guiníʼ íquenu Pablu nga yenécabe guibáʼ, purtiʼ guniʼbe ca diidxaʼ ca biluxe guníʼsibe de derechu ni nápabe casi apóstol que, ne qué rieeteruʼ ndaaniʼ Biblia pa guyuu sti binni biiyaʼ bacaandaʼ ca o visión ca. Zándaca ni biiyaʼ Pablu ni zeeda gaca paraísu que nga pabiáʼ sicarú ziuu ca xpinni Cristu lu ca dxi mayaca gueeda fin ca (Dan. 12:4).
Xi rusiidiʼ cani laanu:
3:5. Versículo ca rusiidiʼ laanu Jiobá nga ni rusiene laanu para gúninu xhiiñaʼ Cristu. Ne para nga riquiiñebe Biblia, espíritu santu stibe ne xquídxibe ni nuu lu Guidxilayú riʼ (Juan 16:7; 2 Tim. 3:16, 17). Nga runi, naquiiñeʼ guiduʼndaʼ chaahuinu Biblia ne ca guiʼchiʼ ni cusiene cani cá luni. Ne guiráʼ ora guinábanu Jiobá gudii laanu espíritu stiʼ, ne chuunu ca guendaridagulisaa ca, ne cadi guiaandaʼ laanu guicábinu lúcani (Sal. 1:1-3; Luc. 11:10-13; Heb. 10:24, 25).
4:16. Zeʼ dxi «jma rusi ziyapa [ladxidoʼno] stipa» purtiʼ Jiobá nga cudii stipa laanu. Nga runi, guicaanu guiráʼ ni cudii Jiobá para gacané laanu ne cadi gudiʼnu lugar tiidiʼ ti dxi sin gúninu xiixa ni gacané laanu guidxíñanu laabe.
4:17, 18. Pa guiníʼ íquenu «cadi naroʼba enda naná ni nuu lugui[anu] riʼ, [ne] tobi zidiʼdi si ni» la? zacané nga laanu guni huantarnu ni.
5:1-5. Ca diidxaʼ guníʼ Pablu ca cusihuínnicani pabiáʼ racalaʼdxiʼ ca xpinni Cristu ni bibí ca guibánicaʼ guibáʼ.
10:13. Stale biaje ni naquiiñeʼ gúninu nga gucheechenu diidxaʼ ra maca nexheʼ cheʼ ca binni ridagulisaa ra riuunu, peru zanda chuunu sti lugar ra caquiiñeʼ gucheechecabe diidxaʼ ora guinabaʼ sti neza binni ridagulisaa ni laanu.
13:5. Apóstol Pablu na naquiiñeʼ guʼyaʼ chaahuiʼ ca xpinni Cristu «ximodo nuu[caʼ], pa zuhuaa chaahui[caʼ] lu ni runi cre[caʼ]», ne ni riníʼ ca diidxaʼ ca nga naquiiñeʼ gúʼyacabe pa nabánicabe modo na Biblia. Laaca naquiiñeʼ guʼyaʼ chaahuicabe ximodo nuucabe nezalú Dios, pa nánnacabe xii nga jneza ne ni cadi jneza ne gúʼyacabe pa rusihuínnicabe fe lu cani rúnicabe (Heb. 5:14; Sant. 1:22-25). Nanna dxíchinu zacané ca conseju stiʼ Pablu laanu para cadi guireecuenu lu neza stiʼ Dios.
[Dibuju/foto ni zeeda lu yaza 26]
Xii nga riníʼ ca diidxaʼ «cada go to pan ne gue tu ruaa copa» ca (1 Cor. 11:26)