Jiobá zaguu ndaayaʼ laanu neca guchaa modo nabáninu

ÑEE cadxaagaluluʼ xiixa cosa ni cuchaa modo nabániluʼ ne qué guirá guidxagayaaluʼ ni cazaacaluʼ ca la? Cadi guiaandaʼ lii zedandá ora zándaca guizaacaluʼ ni. Nga runi, guidúʼyanu chupa chonna relatu ni zeeda lu Biblia ni zacané laanu guidúʼyanu xi guenda nga zacané laanu para gudxíʼlunu cani.

Primeru guzéʼtenu de David ne guiráʼ ca cosa ni bidxaagalú. Dxi nahuiinibe rigápabe dendxuʼ ne ca dxi que nga biquiiñeʼ Jiobá Samuel para gulí laabe ti gueeda gácabe rey. Dxi maʼ nácabe ti hombrehuiiniʼ guniʼbe zadindenebe Goliat, ti gigante stiʼ ca filisteu (1 Sam. 17:26-32, 42). Nin qué nindaa biʼniʼ invitar rey Saúl laabe chindézabe ndaaniʼ palaciu stiʼ ne biʼniʼ laabe xaíque stiʼ ca binni ridinde stiʼ. Qué ñuu dxi niníʼ ique David pa nuchaa stale cosa lu xquendanabani, ne laaca qué niníʼ íquebe xi chiguizaacabe despué.

Despué de bidxaaga David Saúl beeda gápacaʼ stale guendanagana (1 Sam. 18:8, 9; 19:9, 10). Ne para cadi ñuuti Saúl laabe gupa xidé bixooñelube stale iza. Ne dxi maʼ nácabe rey stiʼ guidxi Israel, bichaa modo nabánibe despué de guyuunebe ti gunaa ni cadi xheelabe ne gucaláʼdxibe nucaachibe ni ra biitibe ti hombre. Pur cani bíʼnibe que deche ca deche beeda gápabe guendananá ndaaniʼ lídxibe. ¡Dede ne xiiñibe Absalón bicaalú laabe! (2 Sam. 12:10-12; 15:1-14.) Peru guca arrepentirbe de guiráʼ ca cosa malu bíʼnibe que, bitiidilaʼdxiʼ Jiobá stóndabe ne guluuruʼ ndaayaʼ laabe.

Ca dxi riʼ, laaca nagueenda ruchaa modo nabani binni, zándaca gácani pur guendahuará, pur gastiʼ bueltu, pur xiixa guendanagana gapa binni ndaaniʼ lidxi o pur cani gúninu laapenu. Xi guenda zanda gacané laanu para ganda gudxíʼlunu ca guendanagana ni gápanu yaʼ.

Cadi gudxíʼbanu laca laanu

Zusihuínninu qué rudxíʼbanu laca laanu pa guzúʼbanu diidxaʼ de guidubi ladxidoʼno. Ne laaca racaneni laanu guidúʼyanu ximodo laanu ne ximodo xcaadxi binni. Rusisácanu ca guenda stiʼ ca binni ni ridxaaganu ne guiráʼ ni ribeenducaʼ ne rúninu zacá pur modo laacaʼ ne pur ni rúnicaʼ. Ra gácanu binni ni qué rudxiibaʼ laca laa zacaneni laanu gánnanu xiñee rizaaca ca cosa ca ne ximodo gudxíʼlunu cani.

Nápanu ti ejemplu sicarú stiʼ Jonatán, xiiñiʼ Saúl. Laabe biiyabe ximodo bichaa xquendanabánibe neca qué ñanda ñúnibe xiixa para nucueezabe ni. Ora guyé Samuel ra nuu Saúl para gábibe laa zabee Jiobá laa de gaca rey, qué niniʼbe pa Jonatán nga chiguni mandar lugar stibe (1 Sam. 15:28; 16:1, 12, 13). Dxi gulícabe David para gaca rey stiʼ guidxi Israel, bihuinni maʼ cadi Jonatán diʼ chigaca rey, neca qué ñápabe donda gudíxebe ni biʼniʼ bixhózebe ne binítibe derechu de guni mandarbe (1 Sam. 20:30, 31). Xi biʼniʼ Jonatán ora gunna ngue yaʼ. Ñee bidaabe xiana ne gúpabe envidia la? Coʼ. Neca jma huaniisibe que David ne jma nánnabe que laa, qué nusaana de ñacanebe laa (1 Sam. 23:16-18). Pur qué nudxiibabe laca laabe gunda biénebe tuu nga napa ndaayaʼ stiʼ Dios. Ne qué nicá íquebe laabe jma qué biaʼ naquiiñeʼ (Rom. 12:3). Biénebe xi canabaʼ Jiobá de laabe ne gunabe bíʼnibe ni na.

Dxandíʼ, ora guchaa stale cosa lu xquendanabani binni ridxaagalú guendanagana. Nabé nagana guca para Jonatán cadi gusaana de gusihuinni pabiáʼ gunnaxhii chupa binni: bixhoze ne David xhamigu. Ne napa xidé gúnibe ni sin gusaana de gúnibe ni riuulaʼdxiʼ Dios. Xiñee yaʼ. Tobi la? nuu xhamígube David, binni ni gulí Jiobá para gueeda gaca rey, ne stobi la? nuuca bixhózebe, neca maʼ bidxiideche Dios laa peru caʼruʼ gusaana de guni mandar. Ca dxi nabáninu riʼ laaca nuu stale cosa ni ruchaa modo nabáninu ni zándaca gucaa laanu chuʼnu xizaa o guidxíbinu. Peru pa gúninu stipa pur guidúʼyanu ca cosa ca casi ruuyaʼ Jiobá cani la? qué zusaana de gúninu ni nabe ne zánnanu ximodo gudxíʼlunu guiráʼ ni guidxaagalunu.

Cadi guni crenu laanu

Binni ni qué runi cré laca laa nanna dxichi nuu xi zanda guni ne nuu xi qué zanda guni. Cadi guiaandaʼ laanu gadxé nga gusihuínninu qué rudxíʼbanu laca laanu ne gadxé nga cadi guni crenu laca laanu, purtiʼ zándaca chuʼ tuuxa gusihuinni qué rudxiibaʼ laca laa peru guiaandaʼ laa nuu xiixa ni qué zanda guni.

Guzéʼtenu ejemplu stiʼ David. Neca Jiobá nga gulí laabe para gácabe rey, gudiʼdiʼ iza para bizulú biʼniʼ mandarbe. Ne ni nánnanu nga guirutiʼ nusiene laabe xiñee gulézabe. Peru qué nudiibe lugar nuchiiñaʼ ca cosa que laabe neca cadi ngue cabézabe guizaaca. Nánnabe nuu cosa ni qué zanda gúnibe, laaca biénebe Jiobá ngue cudii lugar gaca ca cosa que ne laa nanna ximodo cueecani. Ngue runi, neca nánnabe zándaca guuti Saúl laabe, qué ninabe ñuutibe laa dede bicueezabe xcompañérube Abisai ñúnini (1 Sam. 26:6-9).

Zándaca gaca xiixa ndaaniʼ neza binni ridagulisaa ra riuunu ni qué guiene chaahuinu o para laanu cadi cayaca cani casi modo naquiiñeʼ gaca. Xi zúninu yaʼ. Pa qué runi crenu laanu, zusihuínninu Jesús nga naca xaíque stiʼ neza binni ridagulisaa ne riquiiñebe guiráʼ ca binnigola ca para guʼyaʼ gaca dxiiñaʼ ndaaniʼ ni. Ne nin ñácani jma nagana, zabézanu iquiiñeʼ Jiobá Xiiñiʼ para guni chaahuiʼ cani cayaca ndaaniʼ ni. Ne ra qué guni crenu laanu zacané nga cadi gusaana de cuʼ ndaayaʼ Jiobá laanu (Pro. 11:2).

Gácanu binni nadóʼ zacaneni laanu cadi guireʼnu gana

Ra gácanu binni nadóʼ zacaneni laanu guni huantarnu intiica ni gúnicabe laanu sin guireʼnu gana, sin guidxiichinu, sin guidaʼnu xiana ne qué zuyúbinu guquíxenu ni gúnicabe laanu. Cumu cadi casi zeʼ binni zanda gaca nadóʼ la? nga runi riénenu xiñee na Biblia «dichoso ni nadóʼ purti zudii Dios laaca guidxilayú» (Mat. 5:5). Guenda riʼ ne xcaadxi de laani casi cadi guni crenu laanu, cadi gudxíʼbanu laca laanu, gácanu nachaʼhuiʼ, caquiiñenu cani para guiniisinu lu stiidxaʼ Dios, purtiʼ racanécani laanu para guzúʼbanu diidxaʼ ne gudiʼnu lugar gusiidicabe laanu.

Ra gácanu binni nadóʼ, ximodo zacané nga laanu ora chuʼ xiixa ni guchaa modo nabáninu. Neca stale binni ridxiichi ora guchaa modo nabánicaʼ, peru cani nadóʼ ruuyaʼ ca cosa ca casi xiixa ni riquiiñeʼ Jiobá para gusiidiʼ laacaʼ. Lu xquendanabani Moisés bihuinni zacá ni.

Dxi bisaa Moisés 40 iza maʼ nácabe ti hombre ni napa stale guenda sicarú. Bisaanabe guiráʼ ni riuuláʼdxibe gúnibe ne bisihuínnibe rizaaláʼdxibe gacanebe xquidxi Dios (Heb. 11:24-26). Peru ante gabi Jiobá laabe cueebe guidxi Israel de Egipto biziidibe gácabe binni nadóʼ. Gupa xidé bisaanabe Egipto ne yendézabe cuarenta iza ndaaniʼ guidxi Madián, ra yegápabe dendxuʼ, ti dxiiñaʼ ni huaxiéʼ risaca. Guiráʼ ni bichaa lu xquendanabánibe que gucanécani laabe gácabe ti binni nadóʼ (Núm. 12:3). Biziidibe primeru naquiiñeʼ gúnibe ni na Jiobá que xcaadxi cosa.

Ti ejemplu ni nápanu ra bihuinni maʼ nácabe binni nadóʼ nga ni bíʼnibe dxi gudxi Jiobá laabe zabí ca xiiñibe para gueeda gácacaʼ ti guidxi nadipaʼ lugar stiʼ ca binni de Israel ni qué nuzuubaʼ diidxaʼ (Núm. 14:11-20). Lugar de niníʼ íquebe pur laabe laga guniʼbe pur ca israelita que. Ne ca diidxaʼ ni guniʼbe que bisihuínnibe jma rizaaláʼdxibe guisaca Dios ne cadi guizaaca ca bíʼchibe gastiʼ. Caquiiñeʼ chuʼ ti binni nadóʼ para ganda guiníʼ pur Jiobá ne gaca xaíque stiʼ Israel. Ca dxi que guníʼ Míriam ne Aarón mal de Moisés peru Biblia na: «Jma nadóʼ guca Moisés lade guiráʼ ca hombre» ni bibani dxiqué (Núm. 12:1-3, 9-15). Ngue runi, ruluíʼ si gúnnabe ximodo bidxiilube guiráʼ ni guníʼcabe de laabe que. Peru xi nizaaca pa qué ñácabe ti binni nadóʼ yaʼ.

Despué bizaaca sti cosa: chupa hombre gucuaacaʼ espíritu santu ne bizulú gudixhenacaʼ. Josué, hombre ni racané Moisés que, guníʼ ique cadi jneza ni cayuni ca binni que. Peru Moisés bisihuinni riníʼ ique casi riníʼ ique Dios ne qué ñuu xizaa pa málasi nusaana de ñuni mandar (Núm. 11:26-29). Ñee rábiluʼ ñúnibe ni gudxi Jiobá laabe que de guidubi ladxidoʼbe pa qué ñácabe binni nadóʼ la?

Pur guca Moisés nadóʼ gunda biʼniʼ guiráʼ dxiiñaʼ bidii Dios laa. Dxi gunabaʼ Jiobá laabe quíbabe lu dani Horeb para guiniʼbe pur guidxi que, biquiiñeʼ Jiobá ti ángel para guniʼné laabe ne biquiiñeʼ laabe para biʼniʼ ti pactu ne ca israelita. Cumu nabé nadoʼbe la? gunda bíʼnibe guiráʼ ni gudxi Jiobá laabe jneza ne guluu ndaayaʼ laabe.

Yanna laanu yaʼ. Caquiiñeʼ gácanu binni nadóʼ para ganda guiniisinu lu stiidxaʼ Dios. Guiráʼ cani gapa xiixa guenda o xiixa dxiiñaʼ ndaaniʼ ca neza binni ridagulisaa ca naquiiñeʼ gusihuínnicaʼ nácacaʼ binni nadóʼ. Gácanu nadóʼ ca racaneni laanu cadi guchanu bi yánninu ora chuʼ xiixa ni guchaa xquendanabáninu ne racaneni laanu guiníʼ íquenu jneza ora guidxaagalunu ca guendanagana ca. Casi maʼ bidúʼyanu ca, nabé risaca nga gánnanu modo guidxaagalunu cani guizaacanu. Ñee zadúʼyanu guiráʼ ni guchaa lu xquendanabáninu casi xiixa ni zacané laanu gácanu jma nadóʼ la? Cani guidxaagalunu ca nga zacané laanu gusihuínninu nácanu binni nadóʼ.

Lu xquendanabáninu ridxaagalunu stale cosa ni ruchaa modo nabáninu ne cadi guiráʼ diʼ biaje ziénenu xiñee rizaaca cani. Zándaca gaca nagana para laanu guiníʼ íquenu casi riníʼ ique Dios, purtiʼ nuu xiixa ni qué zanda gúninu o purtiʼ maʼ qué guidxélanu ximodo guni chaahuinu guendanagana stinu. Peru ra qué gudxíʼbanu laca laanu, qué guni crenu laanu, gácanu nadóʼ ne gápanu xcaadxi guenda ni rapa ti xpinni Cristu, zacané cani laanu gudxíʼlunu guiráʼ ni guidxaa lu xquendanabáninu ne zacá guicaanu ndaayaʼ stiʼ Dios.

[Ni caníʼ yaza 4]

Ni zanda gacané gánnanu ximodo laanu nga cadi gudxíʼbanu laca laanu

[Ni caníʼ yaza 5]

Zánnanu ximodo

guidxaagalunu guendanagana pa gácanu nadóʼ

[Dibuju/foto ni zeeda lu yaza 5]

Ca guendanagana ni bidxaagalú Moisés que gucaneni laabe gácabe binni nadóʼ