Iquiiñenu Stiidxaʼ Dios, purtiʼ nabani ni

1, 2. Xi gudxi Jiobá Moisés guni, ne xi bidii stiidxabe laa.

XI ÑUNI sentirluʼ pa nuzuhuaaluʼ nezalú ti gobiernu ni jma risaca lu Guidxilayú ne niniʼluʼ pur xquidxi Jiobá yaʼ. Zándaca zuni sentirluʼ gastiʼ nga lii nezalube. Zándaca zadxíbiluʼ ne qué zadxélaluʼ xi guiniʼluʼ. Ximodo zanda chuʼluʼ listu yaʼ. Ñee zanda guininu sin guidxíbunu casi tobi ni biseendaʼ Dios guiníʼ pur laa la?

² Zacapeʼ nga bizaaca Moisés. Biblia na «jma nadóʼ guca Moisés lade guiráʼ ca hombre ni guyuu lu guidxilayú», ne Jiobá guníʼ zuseendaʼ laabe ra nuu faraón para cueebe xquidxi de esclavu ne de modo cayuniná ca binni de Egipto laacaʼ (Núm. 12:3). Faraón guca ti hombre qué iquiiñeʼ ne ruchá bi yanni. Neca zaqué, gudxi Jiobá Moisés gabi laabe gudiibe lugar guiree millón de esclavu de guidxi que (Éx. 5:1, 2). Qué ridxagayaanu gánnanu gunabadiidxaʼ Moisés Jiobá: «Tu nacaʼ para chaaʼ nezalú Faraón ne para cueeʼ ca xiiñiʼ Israel de Egipto yaʼ». Nagana guca para Moisés guni ni gunabaʼ Jiobá laa. Peru Dios gudxi laabe qué zusaana laabe stúbibe. Jiobá guníʼ: «Dxandipeʼ ziuaaniáʼ lii» (Éx. 3:9-12).

3, 4. 1) Xii nga ni bidxibi Moisés. 2) Cásica Moisés, xii nga ni zándaca guidxíbinu.

³ Xiñee bidxibi Moisés yaʼ. Purtiʼ guníʼ íquebe zándaca qué zuni cré faraón pa Jiobá biseendaʼ laabe. Ne laaca cadxíbibe purtiʼ guníʼ íquebe qué zuni cré ca israelita pa Jiobá gulí laabe para cueebe laacaʼ de Egipto. Ngue runi gúdxibe Jiobá: «Peru pa qué guni crécabe naa ne cadi gucaadiágacabe naa yaʼ, purtiʼ zándaca guiníʼcabe: “Cadi dxandíʼ biiyaluʼ Jiobá”» (Éx. 3:15-18; 4:1).

⁴ Zándaca qué ziuu dxi guzuhuaaluʼ nezalú ti gobiernu guizáʼ risaca. Peru, ñee huayuu dxi gaca nagana para lii guiniʼluʼ de Dios ne de Reinu stiʼ nezalú xcaadxi binni la? Ni bicabi Jiobá Moisés ne ni bizaaca despué rusiidiʼ ni laanu ti cosa nabé risaca.

 5. 1) Xi gudixhe Jiobá lu náʼ Moisés. (Biiyaʼ dibuju ni zeeda ra ruzulú tema riʼ.) 2) Ximodo gucané ngue Moisés para cadi nidxibi.

⁵ Ora gudxi Moisés Jiobá cadxibi purtiʼ guníʼ ique guirutiʼ tu zuni cré pa Dios biseendaʼ laa la? gucané Dios laabe para ganda gúnibe ni biʼniʼ mandar laabe jneza. Lu relatu stiʼ Éxodo ridúʼndanu sicaríʼ: «Óraque gudxi Jiobá laabe: “Xii nga naazeluʼ”, óraque guniʼbe: “Ti vara”. De raqué guníʼ Jiobá: “Bilaa ni layú ca”. Óraque bilaabe ni layú ne gúcani ti beendaʼ; ne bixooñeʼ Moisés de laame. De raqué gudxi Jiobá Moisés: “Bisigaanáʼ ne gudapi xcólame”. Óraque bisigaanabe ne gudápibe laame, ne beendaʼ que beeda gaca ti vara ndaaniʼ nabe. Laabe guniʼbe: “Ti guni crecaʼ biiyaluʼ Jiobá”» (Éx. 4:2-5). Pur poder stiʼ Dios, beeda gaca beendaʼ que ti vara ndaaniʼ náʼ Moisés. Ora biʼniʼ Moisés milagru riʼ, bisihuínnibe Jiobá ngue biseendaʼ laabe ne cayacané laabe. Jiobá guníʼ: «Ne zineluʼ vara riʼ lu naluʼ para gúniluʼ milagru» (Éx. 4:17). Né milagru riʼ maʼ qué nidxíbibe ne guniʼbe de Dios nezalú guidxi que ne nezalú faraón (Éx. 4:29-31; 7:8-13).

 6. 1) Xi naquiiñeʼ guinaazenu ora maʼ canagucheechenu diidxaʼ, ne xiñee. 2) Xiñee guníʼ Pablu «nabani» Stiidxaʼ Dios «ne nandxóʼ ni» yaʼ.

⁶ Ora rinínenu binni de Dios, zándaca chuʼ tu guinabadiidxaʼ laanu: «Xii nga naazeluʼ». Ni naazenu nga Biblia ne nuucanu listu para iquiiñenu ni. Neca nuu tu ruuyaʼ Biblia casi intiica si libru, peru laani nga Stiidxaʼ Jiobá ne riquiiñebe ni para guiníʼnebe laanu (2 Ped. 1:21). Luni ridúʼndanu ca ndaayaʼ ni chiguedané Reinu stiʼ Dios. Nga runi apóstol Pablu bicaa «nabani» Stiidxaʼ Dios «ne nandxóʼ ni» (biindaʼ Hebreos 4:12). Xiñee guniʼbe «nabani» Stiidxaʼ Dios yaʼ. Purtiʼ raca guiráʼ ni riníʼ Jiobá (Is. 46:10; 55:11). Ora ti binni guiziidiʼ runi Dios ni maʼ guníʼ la? rudii cuenta «nandxóʼ» Stiidxaʼ Dios ne rucaani laa guchaa modo nabani.

 7. Ximodo zanda iquiiñenu «stiidxa [Dios] jneza».

⁷ Jiobá maʼ bidii laanu Stiidxaʼ ni nabani, ne laani nga Biblia. Ne zanda iquiiñenu ni para guluinu binni dxandíʼ ni rusiidiʼ Biblia ne de Dios nga zeeda cani. Despué de bicaa Pablu carta ra nuu ca hebreu, laaca bicaa ra nuu Timoteu ne bidiibe laa conseju riʼ: «Bisiidi stiidxa [Dios] jneza» (2 Tim. 2:15). Ximodo zanda gúninu ni na ca diidxaʼ riʼ yaʼ. Zanda gúninu ni ora cuí chaahuinu xi textu stiʼ Biblia zanda guidúʼndanenu binni ti chindani ndaaniʼ ladxidoʼcaʼ. Ne para ngapeʼ nga guca ca tratadu ni bidiicabe laanu lu iza 2013.

 8. Xi guníʼ ti superintendente de serviciu de ca tratadu cubi ni nápanu.

⁸ Tobi si modo guiráʼ ca tratadu nacubi ni nápanu, nga runi ora guizíʼdinu ximodo iquiiñenu tobi de laacani la? zánnanu ximodo iquiiñenu guiráʼ cani. Ti superintendente de serviciu de Hawái (Estados Unidos) bicaa: «Qué lica niníʼ íquedu pabiáʼ zacané ca tratadu riʼ laadu ora gucheechedu diidxaʼ de yoo pur yoo ne ra nuu stale binni». Xiñee nabé racané cani laanu ne cadi nagana para iquiiñenu cani yaʼ. Superintendente riʼ maʼ biiyaʼ racané ca tratadu riʼ binni para guiníʼ xi nuu ndaaniʼ ladxidóʼ ne stale biaje rucaa ni laacaʼ guiniʼcaʼ de xiixa tema ni riuuláʼdxicaʼ. Laabe guniʼbe cadi nagana para iquiiñenu cani pur ca guendarinabadiidxaʼ ne pur cani ricabi cani lu primé yaza stícani.

9, 10. 1) Ximodo racané ca tratadu cubi ca laanu iquiiñenu Biblia. 2) Xi tratadu nga ni jma huayacané lii ora rucheecheluʼ diidxaʼ, ne xiñee.

⁹ Cada tobi de ca tratadu ca rucaacani laanu guidúʼndanu ti textu ni maʼ bibí chaahuiʼ. Guidúʼyanu ti ejemplu, casi tratadu Ñee ziuu dxi guiree guiráʼ yuubaʼ la? Pa guiníʼ binni «zaree cani», «qué zaree cani» o «zándaca», intiica guicábicabe, biluíʼ laacabe sti yaza ca ne gudxi laacabe: «Ndiʼ nga ni na Biblia». De racá biindané laacabe Apocalipsis 21:3, 4.

¹⁰ Laaca zacaca zanda gúninu ora iquiiñenu tratadu ni láʼ Xi riníʼ íqueluʼ de Biblia, intiica guicabi binni de ni zeeda lu primé yaza ca, gudxi laabe: «Riuuladxeʼ gulueeʼ lii ni na Biblia». Despué bixheleʼ tratadu ca ne biindaʼ textu ra na: «Irá Xquiʼchiʼ Dios, Espíritu Santu uníʼ xi icá [luni]». De racá gudxi laabe: «Lu textu riʼ zeeda xcaadxi diidxaʼ». Despué bixheleʼ Biblia stiluʼ ne biindaʼ 2 Timoteo 3:16, 17.

11, 12. 1) Ximodo zuni sentirluʼ pa iquiiñeluʼ ca tratadu ca jneza. 2) Ximodo zanda gacané ca tratadu ca lii para gánnaluʼ xi guiniʼluʼ ora chigánnaluʼ binni sti biaje.

¹¹ Pa gucaadiaga binni ni canínenu ca, zanda gúʼndanenu laa xcaadxi cosa ni zeeda lu tratadu ca. Ne pa qué gucaadiágabe laanu la? ziuʼnu nayecheʼ purtiʼ maʼ bíʼndanenu laabe neca ti versículo o chupa de lu Stiidxaʼ Dios. Zanda guibiguétanu sti biaje para guinínenu laabe de sti tema.

¹² Últimu yaza stiʼ cada tratadu zeeda caadxi letra ra na «Guníʼ ique». Ne xagueteʼ ca la? zeeda ti guendarinabadiidxaʼ ne chupa chonna textu stiʼ Biblia ni zanda gúʼndaneluʼ binni ca ora chigánnaluʼ laa sti biaje. Tratadu ni láʼ Ximodo zabani binni despué, guendarinabadiidxaʼ stini nga «Ximodo zuni Dios Guidxilayú riʼ ti lugar sicarú», ne ca textu ni zeeda luni nga Mateo 6:9, 10 ne Daniel 2:44. Ne sti tratadu ni láʼ Ñee zanda guibani ca binni ni maʼ guti sti biaje la?, guendarinabadiidxaʼ stini nga «Xiñee rióxhonu ne rátinu», ne ca textu ni zeeda luni nga Génesis 3:17-19 ne Romanos 5:12.

13. Ximodo zanda iquiiñenu ca tratadu ca para guzulú gúʼndanenu binni Biblia.

¹³ Biquiiñeʼ ca tratadu cubi ca para guzulú gúʼndaneluʼ binni Biblia. Últimu yaza stini zeeda códigu QR, laani nga ti códigu ni zuseendaʼ binni lu sitiu ni nápanu lu Internet.a Ne zineni laa ra nuu ti videu ra cayaca invitar binni guidúʼndanenu laa Biblia. Ca tratadu riʼ cuseendaʼ ni binni lu folletu Ca diidxaʼ sicarú ni zeeda de Dios ne riguu ni gana binni para guʼndaʼ tobi de ca tema ni zeeda lu folletu ca. Casi tratadu Tu cayuni mandar binni guidxilayú cayuni invitar ni binni guʼndaʼ ndaa 5 stiʼ folletu ca, ne tratadu ni láʼ Xi zacané binnilídxiluʼ guibani nayecheʼ zineni laanu lu ndaa 9 stiʼ folletu ca. Pa iquiiñenu ca tratadu riʼ jneza la? zanda iquiiñenu Biblia ora guinínenu binni primé biaje ne ora chigánnanu laa sti biaje. Ne zacané nga laanu guzulú gúʼndanenu binni Biblia. Xiruʼ zanda gúniluʼ para iquiiñeluʼ Stiidxaʼ Dios jneza yaʼ.

14, 15. Ximodo zanda gúniluʼ cásica biʼniʼ Pablu ora gucheecheluʼ diidxaʼ.

¹⁴ Ora bicheeche Pablu diidxaʼ, bíʼnibe stipa pur guiénebe modo nabani «stale binni» (biindaʼ 1 Corintios 9:19-23). Xi para yaʼ. Laca laabe guniʼbe para guni ganarbe «ca judíu, [...] cani nabani xaʼna ley, [...] cani nabani sin ley [...,] cani huaxiéʼ riene». Gucaláʼdxibe niníʼnebe guiráʼ clase binni para ñanda nulabe chupa chonna de laacaʼ (Hech. 20:21). Ximodo zanda gúninu cásica biʼniʼ Pablu ora gúʼndanu dede ante para chinenu stiidxaʼ Dios ra nuu guiráʼ clase binni yaʼ (1 Tim. 2:3, 4).

¹⁵ Guiráʼ beeu riree lu Xhiiñaʼ Reinu ni Rúninu chupa chonna modo zanda guinínenu binni. Galán gúniluʼ iquiiñeluʼ cani. Yanna, xi zanda gúniluʼ pa binni ni caníʼneluʼ ca riuulaʼdxiʼ ganna de sti tema yaʼ. Guníʼ ique xi zanda guiniʼluʼ para chuuláʼdxibe gánnabe jma de tema ca. Zanda guinabadiidxaluʼ: «Ximodo nabani ca binni ni chiguinieniáʼ riʼ yaʼ. Xii nga ni jma naguu xizaa laacabe». De racá guníʼ ique xi textu de lu Biblia zanda gacané laabe. Ti superintendente de circuito guníʼ xi runi laa ne xheelaʼ para iquiiñecaʼ Biblia: «Jma nga stale binni riná gúʼndanedu laa ti versículo stiʼ Biblia ora qué rutáledu diidxaʼ. Despué de ugapadiúxidu laacaʼ galán, cumu maʼ naazedu Biblia lu nadu la? ridúʼndanedu laacaʼ ti textu stini». Guidúʼyanu chupa chonna tema, ca guendarinabadiidxaʼ ne textu ni huayacané ca xpinni Cristu. Galán gúniluʼ pa iquiiñeluʼ cani.

16. Ximodo zanda iquiiñeluʼ Isaías 14:7 ora maʼ cucheecheluʼ diidxaʼ.

¹⁶ Pa nabézaluʼ ti lugar ra nabé ridinde binni ne ra nabé raca cosa malu, zanda guinabadiidxaluʼ binni: «Ñee riníʼ íqueluʼ zadxiña dxi guiníʼ ca periódicu ca maʼ nuudxí binni lu guidubi naca Guidxilayú, maʼ gastiʼ ni guchiiñaʼ laacaʼ, ne guiráʼ binni nuu nayecheʼ la? Ngapeʼ nga ni na Biblia lu Isaías 14:7. Lu stale textu de lu Biblia rieeteʼ maʼ cadi candaa zabani binni né guendariuudxí». De racá, biindané laabe tobi de ca textu ca.

17. Ximodo zanda iquiiñeluʼ Mateo 5:3 para guiníʼneluʼ binni.

¹⁷ Ñee nagana raca para guidxela binni ni guibaniné neza ra nabézaluʼ la? Pa zacá ni, zanda guinabadiidxaluʼ binni: «Pagala rábiluʼ naquiiñeʼ guni ganar binni para guibaniné binnilidxi galán yaʼ». Despué de guicabi binni ca la? gudxi laabe: «Nuu tu laa runi ganar jma que nga, peru cadi nabaniné binnilidxi nayecheʼ. Nga runi, xipeʼ nga ni caquiiñeʼ binni para guibani nayecheʼ yaʼ». De racá biindané laabe Mateo 5:3 ne gudxi laabe pa zuundaneluʼ laabe de Biblia.

18. Ximodo zanda iquiiñeluʼ Jeremías 29:11 para quixhedxiluʼ ladxidóʼ binni.

¹⁸ Ñee cayuubaʼ ladxidóʼ ca binni ni nabeza neza ra rucheecheluʼ diidxaʼ pur xiixa desgracia ni bizaaca cadi xadxí la? Zanda guiniluʼ sicaríʼ: «Bixhidxenayaʼ ra puertaʼ lídxiluʼ para guundaniáʼ lii caadxi diidxaʼ ni zanda quixhedxí ladxidoʼloʼ». Óraque biindané laabe Jeremías 29:11 ra na: «Purtiʼ nanna dxiicheʼ xi naguixhe iqueʼ guneʼ né laatu —na Jiobá—, naguixhe iqueʼ chuʼdxitu, ne cadi gacanatu, para gudieeʼ laatu xiixa galán ni zanda cuézatu». De racá zanda guiniʼluʼ: «Ñee bidiiluʼ cuenta gunáʼ nga guiropaʼ cosa ni racalaʼdxiʼ Dios gápanu la? Laacani nga “chuʼdxi[nu]” ne cuézanu “xiixa [ni] galán”. ¡Ratadxí ladxidoʼno gánnanu racaláʼdxibe guibáninu nayecheʼ! Peru, dxandíʼ zaca nga la?». Yanna bixheleʼ folletu Ca diidxaʼ sicarú ni zeeda de Dios ne gulí ti tema ra cayeeteʼ de ni caniʼtu ca.

19. Ximodo zanda iquiiñeluʼ Apocalipsis 14:6, 7 ora guiníʼneluʼ tuuxa ni napa religión stiʼ.

¹⁹ Ñee napa ca binni ni nabeza neza ra rucheecheluʼ diidxaʼ religión sticaʼ la? Pa zacá ni, zanda gábiluʼ laabe: «Pa ñete ti ángel ne niniʼné lii, ñee nucaadiágaluʼ laabe la?» (Biindaʼ Apocalipsis 14:6, 7.) Óraque zanda guiniʼluʼ: «Ángel riʼ na: “Laidxibi Dios”, ne laguni adorar “ni bizáʼ ibáʼ ne guidxilayú”. Yanna, Ñee nánnaluʼ tu láʼ ni Bizáʼ guibáʼ ne Guidxilayú la? De racá, biindané binni ca Salmo 124:8, ra na: «Ni racané laanu nuuni lu lá Jiobá, ni Bizáʼ guibáʼ ne guidxilayú». Ne despué gudxi laabe riuuláʼdxiluʼ gusiéneluʼ laabe xcaadxi cosa de Jiobá.

20. 1) Ximodo zanda iquiiñeluʼ Proverbios 30:4 para gusiidiluʼ tuuxa tu láʼ Dios. 2) Ñee nuu ti versículo stiʼ Biblia ni huayacané lii ora rucheecheluʼ diidxaʼ la?

²⁰ Sicaríʼ zanda guzulú guiníʼneluʼ ti hombrehuiiniʼ o ti dxaapahuiiniʼ: «Riuuladxeʼ guundaniáʼ lii ti textu stiʼ Biblia ra cayeeteʼ de xiixa nabé risaca». Nani sicaríʼ: «Tu laa huayé guibáʼ para ganda guiete yaʼ. Tu laa huagapi bi ndaaniʼ guiropaʼ chu náʼ. Tu huachenda ti lari nisadóʼ. Tu laa huaguixhe dede paraa guiluxe guidxilayú. Tu labe ne tu láʼ xiiñibe, pa nánnaluʼ ni» (Proverbios 30:4). Tudé cayeeteʼ raríʼ. Nin ti binni guidxilayú qué zanda guni guiráʼ ni rieeteʼ lu textu riʼ, nga runi, nanna dxíchinu caniʼni de Dios ni Bizáʼ laanu. Ndiʼ rucaa laanu guinabadiidxanu: ximodo zanda gánnanu tu labe. Ñuuladxeʼ nuluéʼ ni lii ndaaniʼ Biblia».

21, 22. 1) Ximodo zanda guchaa binni xquendanabani ora guidúʼndanenu laa ti textu ni gulí chaahuinu. 2) Xi caníʼ íqueluʼ gúniluʼ ora gucheecheluʼ diidxaʼ yaʼ.

²¹ Qué zanda gánnanu ximodo zacané ti textu ni gulí chaahuinu tuuxa binni. Guzéʼtenu ti ejemplu. Chupa Testigu de Australia bixhidxinacaʼ ra puertaʼ lidxi ti baʼdudxaapaʼ. Tobi de laacaʼ gunabadiidxaʼ laabe: «Ñee nánnaluʼ tu láʼ Dios la?». De raqué biindanebe laa Salmo 83:18. Baʼdudxaapaʼ que guníʼ xi biʼniʼ sentir ora biindanécabe laa textu riʼ: «¡Qué guirá guidxagayaa! Zesícabe, gudxiʼbaʼ xcarruaʼ ne bisayaʼ ni 56 kilómetru dede yendayaʼ ra nuu ti librería ne biyubeʼ lá que ndaaniʼ xcaadxi Biblia para guuyaʼ pa zaqueca na cani. Ne laaca biyubeʼ ni lu ti diccionariu. Ra maʼ bieneʼ lá Dios nga Jiobá la? guníʼ iqueʼ “xiruʼ qué gannaʼ de laabe”». Qué nindaa de ngue, laabe ne hombre ni chichaganabe bizulú biindacabe Biblia, ne despué guyuunísacabe.

²² Dxandipeʼ ruchaa Stiidxaʼ Dios xquendanabani binni. Ca binni ni ruundaʼ Biblia nápacaʼ confianza zuni Jiobá guiráʼ ni maʼ bizabiruaa (biindaʼ 1 Tesalonicenses 2:13). Jma zindá ca diidxaʼ ni zeeda lu Biblia ndaaniʼ ladxidóʼ binni que intiica cosa ni gábinu laacaʼ. Nabani Stiidxaʼ Dios ne nandxóʼ ni. Nga runi, cadi gusaana de iquiiñenu ni.