¿Xi naquiiñeʼ gúninu para jma guiénenu Biblia?

 1. ¿Xi rusihuinni nabé bisisaca Jesús Stiidxaʼ Dios?

¿ÑEE huaníʼ íquenu ximodo bisiidiʼ Jesús la? Gúpabe costumbre guiniʼbe de memoria xiixa relatu ni zeeda lu Stiidxaʼ Dios. Ne rihuinni zacá ni pur ca diidxaʼ ni guniʼbe despué de guyuunísabe, ne ca diidxaʼ ni guniʼbe ante gátibe (Deut. 8:3; Sal. 31:5; Luc. 4:4; 23:46).b Ne tiempu biʼniʼ Jesús xhiiñaʼ Dios, chonna iza arondaʼ, gatigá biindabe Stiidxaʼ Dios, bizeetebe de laani ne bisiénebe ni zeeda luni (Mat. 5:17, 18, 21, 22, 27, 28; Luc. 4:17-21).

 2. Laga ziniisi Jesús, ¿xi gucané laa gunibiáʼ chaahuiʼ Stiidxaʼ Dios? (Biiyaʼ dibuju stiʼ portada).

² Ne dede ante guzulú Jesús guni xhiiñaʼ Dios, maca gúpabe costumbre gúʼndabe Stiidxaʼ Dios ne gunadiagabe ora guʼndaʼ xcaadxi ni ne guiniʼcaʼ de laani. Ne nánnanu laaca binadiágabe guiníʼ María ne José de lu Stiidxaʼ Dios ra lídxicabe (Deut. 6:6, 7).c Nánnanu guiráʼ sábadu guyé Jesús ne familia stiʼ ndaaniʼ sinagoga ne rucaadiaga chaahuibe ora guiuundaʼ Stiidxaʼ Dios (Luc. 4:16). Ne ra gudiʼdiʼ tiempu maʼ bizulú biindabe Stiidxaʼ Dios stúbibe. Ne pur ngue qué ñanna si Jesús ni zeeda luni, sínuque gunnaxhiibe ni ne yenándabe ni lu xquendanabánibe. Guietenaláʼdxinu xi bizaaca ndaaniʼ templu dxi napa Jesús doce iza. Ca maestru ni nanna stale de Ley stiʼ Moisés, «nabé cadxagayaacaʼ pabiáʼ riénebe ne modo ricábibe» (Luc. 2:46, 47, 52).

 3. ¿Xi zadúʼyanu lu artículo riʼ?

³ Laanu laaca zanda gunibiaʼnu ne gannaxhiinu Stiidxaʼ Dios pa guidúʼndanu ni guiráʼ dxi. Peru ¿xi zanda gúninu para cueendunu ni galán ora guidúʼndanu Biblia yaʼ? Para gánnanu ni, guidúʼyanu xi gudxi Jesús ca hombre ni binibiáʼ chaahuiʼ Ley que, casi ca escriba, ca fariseu ne ca saduceu. Neca gupa ca líder stiʼ ca religión riʼ costumbre gúʼndacaʼ Biblia, peru qué ñanda nibeendúcabe gastiʼ de laani. Bizeeteʼ Jesús chonna cosa ni ñanda ñúnicabe para nibeendúcabe ni galán. Ni guníʼ Jesús zacaneni laanu gúninu chonna cosa riʼ, primé, guiene chaahuinu ni cadúʼndanu, guiropa, guidxélanu jma conseju ni zacané laanu ne guionna, gudiʼnu lugar guchaa Stiidxaʼ Dios xquendanabáninu.

 4. ¿Xi rusiidiʼ Lucas 10:25-29 laanu de modo guidúʼndanu Biblia?

⁴ Racaláʼdxinu guiénenu ni cadúʼndanu lu Biblia, purtiʼ pa qué gúninu ni la? qué zabeendunu cosa ni galán. Guiníʼ íquenu ora guniʼné Jesús «ti maestru de Ley» (biindaʼ Lucas 10:25-29). Racalaʼdxiʼ hombre que ganna xi naquiiñeʼ guni para guicaa guendanabani ni qué zaluxe, ne para bicabi Jesús laabe la? bicaa laabe guiníʼ íquebe ni ná Stiidxaʼ Dios. Ne gúdxibe laa: «¿Xi cá lu Ley? ¿Xi ruundaluʼ luni?». Biaʼsi bicabi hombre que. Bizeetebe ni cá lu Stiidxaʼ Dios ora guniʼbe naquiiñeʼ gannaxhii binni Dios ne prójimo stiʼ (Lev. 19:18; Deut. 6:5). Peru despué gunabadiidxabe Jesús: «¿Tu peʼ nga prójimo stinneʼ yaʼ?». Né ni bicábibe riʼ, bisihuínnibe caʼruʼ guiene chaahuibe ni ná Stiidxaʼ Dios. Ne pur nga qué gánnabe ximodo chinándabe ni lu xquendanabánibe.

 5. Pa guni orarnu ne guidúʼndanu chaahuiʼ Biblia, ¿ximodo jma zacaneni laanu?

⁵ Nuu caadxi cosa ni naquiiñeʼ gúninu primeru para guiene chaahuinu ni ná Stiidxaʼ Dios. Naquiiñeʼ guni orarnu ante gúʼndanu Biblia. Qué zanda guiénenu Biblia pa qué gacané Jehová laanu, nga runi guinábanu laabe gudiibe espíritu santu stibe laanu para cadi gaca distraernu. Despué, maʼ guzulunu guidúʼndanu, peru cadi gúninu ni naguenda, sínuque guidúʼndanu chaahuiʼ purtiʼ nga zacané laanu guiénenu ni cadúʼndanu. Sti cosa ni zacané laanu nga, guidúʼndanu en voz alta o gucaʼdiáganu grabación stiʼ Biblia ora maʼ cadúʼndanu. Ndiʼ zacané laanu guiénenu relatu ca, purtiʼ zindá ni ndaaniʼ ladxidoʼno ne ndaaniʼ xquendabiaaninu (Jos. 1:8). Ora guiluxe guidúʼndanu, guni orarnu Jehová sti biaje para gudiʼnu xquixe peʼ laa pur bidii laanu Biblia ne guinábanu laa gácané laanu chinándanu ni bidúʼndanu.

 6. ¿Xi zabeendunu pa gúninu pregunta ne gucaʼnu nota nachucu ora guidúʼndanu Biblia? (Biiyaʼ ca imagen ca).

⁶ ¿Xiruʼ zacané laanu guiene chaahuinu ora maʼ cadúʼndanu Biblia yaʼ? Zanda guiníʼ íquenu ca pregunta riʼ, ¿tuu nga ca binni ni riete lu relatu riʼ?, ¿tu caníʼ?, ¿tu caníʼnebe ne xiñee?, ¿paraa ne padxí bizaaca relatu ca? Zacané ca pregunta riʼ laanu guiníʼ íquenu ne guidúʼyanu ca idea risaca stiʼ relatu ca. Sti cosa zanda gúninu nga gucaʼnu nota nachucu. Ora gucaʼnu xiixa ni bidúʼndanu racaneni laanu guiníʼ íquenu ni ne guiénenu ni jma nagueenda. ¿Xi zanda gucaʼnu lu nota ca yaʼ? Zanda gucaʼnu ca pregunta ni bíninu que, ni biʼniʼ investigarnu, ca idea risaca bidxélanu, ximodo zanda gacané ni bidúʼndanu ca laanu o ximodo biʼniʼ sentirnu ora bidúʼndanu relatu ca. Pa gúninu ni bizéʼtenu riʼ, zuni sentirnu casi ora Jehová peʼ caniʼné laanu.

 7. ¿Xi caquiiñeʼ gúninu ora guidúʼndanu Biblia, ne xiñee? (Mateo 24:15).

⁷ Laaca guníʼ Jesús pa racaláʼdxinu guiénenu Biblia, naquiiñeʼ guiene chaahuinu relatu ni cadúʼndanu (biindaʼ Mateo 24:15). ¿Ximodo zanda gúninu nga yaʼ? Naquiiñeʼ cueenu tiempu para guiníʼ ique chaahuinu gunáʼ nga ca idea ni naca tobi si ne gunáʼ nga ca ni naca maʼ gadxé. Laaca racaneni laanu guizíʼdinu gánnanu gunáʼ nga ca cosa ni naquiiñeʼ chinándanu. Laaca guníʼ Jesús, pa gúninu stipa guiene chaahuinu ni cadúʼndanu, zacaneni laanu guidúʼyanu cazaaca cosa ni cusihuinni cayaca cumplir caadxi profecía ni zeeda lu Biblia. Pa guiene chaahuinu ni cadúʼndanu lu Biblia, zabeendunu stale cosa ni galán ne zazíʼdinu stale.

 8. ¿Xi zanda gúninu para guiene chaahuinu ni cadúʼndanu?

⁸ Jehová nga racané laanu guiene chaahuinu ni cadúʼndanu lu Biblia. Nga runi naquiiñeʼ guni orarnu ne guinábanu laabe gácanebe laanu (Prov. 2:6). Peru caquiiñeʼ gunirunu xcaadxi cosa. Caquiiñeʼ cueenu tiempu guni estudiarnu ni cadúʼndanu ne guiníʼ íquenu xiruʼ zanda guizíʼdinu de laacani. Nápanu stale publicación ni riree de lu Stiidxaʼ Dios ni zanda gácané laanu para gúninu ni, casi Ca tema ni huabee ca testigu stiʼ Jiobá. Pa iquiiñenu ca ni, zanda gánnanu xi rusiidiʼ ca relatu ca laanu ne zadúʼyanu ximodo chinándanu ni cazíʼdinu lu xquendanabáninu (Heb. 5:14). Racá ridúʼyanu nabé risaca guidúʼndanu Biblia ne guiene chaahuinu ni.

 9. ¿Xii nga ni qué ñuni cré ca saduceu?

⁹ Neca binibiáʼ chaahuiʼ ca saduceu ca primé gaayuʼ libru stiʼ Escrituras Hebreas, peru qué ninándacabe ca ni, neca Dios ndaʼ nga guníʼ xi guicá lu ca libru ca. Guiníʼ íquenu xi gudxi Jesús ca saduceu dxi gucaláʼdxicaʼ nutiidicaʼ laabe prueba ora gunabadiidxacaʼ laabe pa zabani ca ni maʼ guti. Ndiʼ nga ni gunabadiidxaʼ Jesús laacabe: «¿Qué ñuundatu lu libru stiʼ Moisés, lu relatu stiʼ xa yagahuiiniʼ que, ra guníʼ Dios: “Naa nga Dios stiʼ Abrahán, ne Dios stiʼ Isaac ne Dios stiʼ Jacob” la?» (Mar. 12:18, 26). Nánnanu zándaca stale biaje maʼ biindacabe relatu ca, peru ni gunabadiidxaʼ Jesús laacabe bisihuinni ni qué runi crécabe ti cosa ni rusiidiʼ Biblia ne laani nga ziasa ca binni ni maʼ guti (Mar. 12:27; Luc. 20:38).d

10. ¿Xi naquiiñeʼ gúninu ora guidúʼndanu Biblia?

¹⁰ ¿Xi rizíʼdinu de ora guniʼné Jesús ca saduceu? Rizíʼdinu ora guidúʼndanu Biblia naquiiñeʼ guidúʼyanu xi zanda gusiidiʼ ti versículo o ti relatu laanu. Qué racaláʼdxinu guizíʼdisinu cosa ni cadi nagana, sínuque laaca naquiiñeʼ guyúbinu guizíʼdinu xcaadxi cosa ni rusiidiʼ Biblia ne guidxélanu principiu ni zacané laanu purtiʼ zeeda gácacani casi tesoro ni gaʼchiʼ.

11. Casi ná 2 Timoteo 3:16, 17, ¿ximodo zanda guidxélanu ca tesoro ni gaʼchiʼ ni zeeda lu Biblia?

¹¹ ¿Ximodo zanda guidxélanu ca tesoro ni gaʼchiʼ ni zeeda lu Biblia yaʼ? Guidúʼyanu xi ná 2 Timoteo 3:16, 17 (biindaʼ ni). Racá ná «guiráʼ ni cá lu Stiidxaʼ Dios» nuu ni para gusiidini, para gábini laanu paraa cucheʼnu, guni corregirni guiráʼ cosa ne para gusiidini binni. Dede ca libru ni zeeda lu Biblia ni huaxiéʼ riete zanda gacané ca ni laanu lu guidapaʼ cosa ca. Guyúbinu gánnanu xi rusiidiʼ ni cadúʼndanu ca laanu de Jehová, ni maʼ gudixhe guni o ca principiu ni zacané laanu. Yanna, ¿ximodo zanda gabi Biblia laanu paraa cucheʼnu yaʼ? Ora maʼ cadúʼndanu ca versículo ca, naquiiñeʼ guidúʼyanu pa nuu cosa ni cadi jneza cayúninu ne guchaʼnu purtiʼ zacanécani laanu cadi guixélenu de Jehová. Guiníʼ íquenu ximodo zacané relatu ca laanu guni corregirni xiixa cosa ni cadi jneza, zándaca ni gúdxicabe laanu lu predicación. Ne, ¿xi naquiiñeʼ gúninu para gusiidiʼ Biblia laanu yaʼ? Guyúbinu gánnanu xi riníʼ ique Jehová. Pa qué guiaandaʼ ca cosa riʼ laanu, zacanécani laanu guidxélanu jma tesoro ne cueendunu ni galán ora guidúʼndanu Biblia.

12. ¿Xiñee gunabadiidxaʼ Jesús ca fariseu pa qué huayuundacaʼ ni ná Stiidxaʼ Dios?

¹² Biindaʼ ca fariseu Stiidxaʼ Dios, peru cadi para guiziidicaʼ de Jehová. Ne bisihuinni Jesús zacá ni ora gunabadiidxaʼ laacabe pa qué huayuundacabe ni ná Stiidxaʼ Dios (Mat. 12:1-7).e Dxi que guníʼ ca fariseu cucheené ca discípulo stiʼ Jesús ley stiʼ sábadu. Para bicabi Jesús laacabe ne biquiiñeʼ chupa ejemplu ni zeeda lu Stiidxaʼ Dios ne bizeeteʼ ni ná ti versículo stiʼ libru stiʼ Oseas. Zaqué bihuinni qué riene ca fariseu xi para gudixhe Dios ley que ne qué riacaʼ binni. Biindaʼ ca hombre que Stiidxaʼ Dios, peru qué nudiicaʼ lugar ñacaneni laacaʼ. ¿Xiñee yaʼ? Purtiʼ gúcacabe binni orgulloso ne biindacabe ni para si gúʼyacabe paraa cuchee binni. Pur modo laacabe, qué ñénecabe xi peʼ riníʼ ni cayuundacabe lu Stiidxaʼ Dios (Mat. 23:23; Juan 5:39, 40).

13. ¿Ximodo naquiiñeʼ guidúʼndanu Biblia, ne xiñee?

¹³ Ni guníʼ Jesús que rusiidini laanu ora guidúʼndanu Biblia, naquiiñeʼ gúninu stipa guizíʼdinu de Jehová. Cadi gúninu casi biʼniʼ ca fariseu, sínuque gácanu humilde ne gudiʼnu lugar gusiidiʼ Jehová laanu. Casi ná Santiago 1:21, «lagaca nadóʼ ora guicaatu stiidxaʼ Dios ne lagudii lugar guicaa xcu ni ndaaniʼ ladxidoʼto». Pa nácanu binni nadóʼ, zudiʼnu lugar chindá Stiidxaʼ Dios ndaaniʼ ladxidoʼno. Ora guidúʼndanu Biblia cadi gácanu binni orgulloso ne cadi guiníʼ íquenu sti binni nga naquiiñeʼ chinanda conseju stini. Pa gácanu humilde ora guidúʼndanu Biblia, zacaneni laanu guizíʼdinu pabiáʼ risaca gápanu misericordia, guianu binni ne gannaxhiinu.

14. ¿Ximodo zanda gánnanu pa cudiʼnu lugar guchaa Biblia xquendanabáninu? (Biiyaʼ ca imagen ca).

¹⁴ Modo guni tratarnu binni zusihuinni ni pa cudiʼnu lugar guchaa Biblia xquendanabáninu. Cumu qué nudii ca fariseu lugar nuchaa Stiidxaʼ Dios laacaʼ, biʼniʼ condenarcaʼ ca ni qué gapa donda (Mat. 12:7). Nga runi guiníʼ íquenu ximodo ridúʼyanu xcaadxi ne ximodo runi tratarnu laacaʼ. Guzéʼtenu ti ejemplu, ¿ñee nápanu costumbre guininu de ca cualidad galán ni napa xcaadxi la? o nisi maʼ caninu paraa cucheecaʼ? ¿Ñee runi perdonarnu la? o runi criticarnu laacaʼ ne ridaʼnu xiana pur xiixa cosa ni gúnicaʼ laanu? Zacané ca pregunta riʼ laanu gánnanu pa cudiʼnu lugar guchaa Biblia modo riníʼ íquenu, ni runi sentirnu ne ni rúninu (1 Tim. 4:12, 15; Heb. 4:12).

15. ¿Ximodo biiyaʼ Jesús Stiidxaʼ Dios?

¹⁵ Nadxii Jesús Stiidxaʼ Dios. Ne maca biete lu Salmo 40:8 pabiáʼ zusisácabe ni: «Riecheʼ guneʼ ni naluʼ, Dios stinneʼ, ne nuu ley stiluʼ de ndaaniʼ ladxiduáʼ». Cumu nadxiibe Stiidxaʼ Dios la? gucaneni laabe chuʼbe nayecheʼ ne cadi gusaana de gúnibe ni ná Jehová. Laanu laaca zanda chuʼnu nayecheʼ pa gúninu stipa guidúʼndanu Stiidxaʼ Dios ne gannaxhiinu ni (Sal. 1:1-3).

16. ¿Xi zanda gúniluʼ para cueenduluʼ cosa galán ora gúʼndaluʼ Biblia? (Biiyaʼ cuadru ni láʼ «Racané ca stiidxaʼ Jesús laanu guiénenu ni cadúʼndanu»).

¹⁶ Ca diidxaʼ ni guníʼ Jesús ne ejemplu stiʼ, racanecani laanu guni estudiar chaahuinu Biblia. Para guiénenu ni cadúʼndanu la? guni orarnu Jehová, cadi guidúʼndanu nagueenda, gúninu pregunta ne guicaanu nota. Para guiene chaahuinu ora cadúʼndanu, cueenu tiempu para guni estudiarnu relatu ca ne guni investigarnu lu ca publicación stinu. Para guidúʼndanu Biblia jma jneza, guyúbinu cosa ni zacané laanu ni zeeda gaca casi tesoro ni gaʼchiʼ, ne zanda gúninu ndiʼ dede lu ca relatu ni huaxiéʼ runibiaʼnu. Ne para gudiʼnu lugar guchaa Biblia xquendanabáninu la? naquiiñeʼ gúninu stipa guizíʼdinu de Jehová. Pa gúninu guiráʼ ndiʼ, jma ziénenu Biblia ne jma ziuʼnu gaxha de Jehová (Sal. 119:17, 18; Sant. 4:8).