¿Ñee maʼ nuuluʼ listu para ora gueeda gran tribulación la?

 1. ¿Xiñee caquiiñeʼ chuʼnu listu ante guizaaca xiixa desastre?

RILÁ binni ni riuu listu dede ante. Casi ora guizaaca xiixa desastre la? ca binni ni maca nuu listu dede ante jma zanda guilacaʼ ne gacanecaʼ xcaadxi. Cásica guníʼ ti organización stiʼ guidxi Europa ni racané para guʼyaʼ gapa binni ni caquiiñeʼ, «maʼ gadxé si ni rizaaca ora riuu binni listu dede ante».

 2. ¿Xiñee caquiiñeʼ chuʼnu listu? (Mateo 24:44).

² Málasi zedandá «gran tribulación» (Mat. 24:21). Maʼ gadxé si ni de ora rizaaca xiixa desastre, purtiʼ laani zanna binni ora guedandani. Raca biaʼ 2.000 iza, gudxi Jesús ca xpinni chuʼcaʼ listu para ora guedandá dxi riʼ (biindaʼ Mateo 24:44). Pa nuunu listu la? qué zaca nagana para laanu gudxíʼlunu ca dxi ca ne gacanenu xcaadxi binni para chuʼcaʼ listu (Luc. 21:36).

 3. Guni huantarnu, guianu binni ne gápanu guendarannaxhii, ¿ximodo zacané ca ni laanu ora gueeda gran tribulación?

³ Caquiiñeʼ gápanu chonna cualidad ti ganda chuʼnu listu ora gueeda gran tribulación. ¿Xi gúninu ora guedandá dxi gudiʼnu ti mensaje nadipaʼ de juiciu ne pur nga gucaalúcabe laanu yaʼ? (Apoc. 16:21). Raca nga caquiiñeʼ guni huantarnu ti ganda guzúʼbanu stiidxaʼ Jehová ne gápanu confianza zápabe laanu. ¿Xi zúninu pa málasi guniti ca hermanu stinu ca cosa ni nápacaʼ yaʼ? (Hab. 3:17, 18). Raca nga caquiiñeʼ guianu binni para gacanenu ne gudiʼnu ni caquiiñecabe. Yanna, ¿xi zúninu ora gucaalú ti grupu de guidxi roʼ laanu ne caquiiñeʼ chindézanu ti lugar nahuiiniʼ né ca hermanu stinu yaʼ? (Ezeq. 38:10-12). Raca nga ra caquiiñeʼ guluinu dxandíʼ peʼ nadxiinu ca hermanu stinu.

 4. ¿Ximodo rusiidiʼ Biblia naquiiñeʼ guni huantarnu, guianu binni ne gannaxhiinu?

⁴ Riguu Stiidxaʼ Dios gana laanu guni huantarnu, guianu binni ne gannaxhiinu. Lucas 21:19 ná: «Pa guni huantartu zulatu xpídatu». Colosenses 3:12 ná: «Lagusihuinni nadxiitu binni ne riatu laacaʼ». Ne 1 Tesalonicenses 4:9, 10 ná: «Dios peʼ nga cusiidiʼ laatu gannaxhiisaatu. […] Hermanu caʼ, canábadu laatu gannaxhiitu jma que biaʼ nadxiitu yanna». Ca diidxaʼ riʼ gucuá ca ni para ca hermanu ni cayuni huantar, ni riaʼ binni ne napa guendarannaxhii. Peru caquiiñeʼ cadi gusaana de gusihuínnicabe ca cualidad riʼ. Laanu laaca caquiiñeʼ gúninu ni. ¿Xi zanda gacané laanu yaʼ? Lu artículo riʼ zadúʼyanu ximodo bisihuinni ca primé xpinni Cristu ca cualidad riʼ ne ximodo zanda chinándanu ejemplu stícabe, ni zacané laanu chuʼnu listu ora gueeda gran tribulación.

 5. ¿Xi biʼniʼ ca primé xpinni Cristu para gunda biʼniʼ huantarcaʼ?

⁵ Caquiiñeʼ guni huantar ca primé xpinni Cristu que (Heb. 10:36). ¿Xiñee yaʼ? Purtiʼ laaca bidxaagalúcabe guendanagana pur fe stícabe. Stale de laacabe guzananda ca líder stiʼ religión stiʼ ca judíu ne ca autoridad stiʼ Roma laacabe ne cadi nga si, laaca bicaalú familia stícabe laacabe (Mat. 10:21). Ne laaca bidxaagalúcabe ca cosa ni cadi jneza bizulú bisiidiʼ ca apóstata ni rucaa cadi chuʼ congregación tobi si (Hech. 20:29, 30). Ne gunda biʼniʼ huantar ca primé xpinni Cristu neca gudíʼdicaʼ lu guiráʼ ndiʼ (Apoc. 2:3). ¿Ximodo gunda bíʼnicabe ni yaʼ? Ra guníʼ íquecabe ca ejemplu de dxiqué, casi stiʼ Job (Sant. 5:10, 11). Gunábacabe gudii Jehová stipa laacabe (Hech. 4:29-31). Ne qué ñaandaʼ laacabe zaguixe Jehová ni gúnicabe pur guni huantárcabe (Hech. 5:41).

 6. ¿Xi zanda guizíʼdinu de ni biʼniʼ Merita para gunda biʼniʼ huantar ora bicaalúcabe laa?

⁶ Laanu laaca zanda guni huantarnu pa guiníʼ íquenu lu ca ejemplu ni zeeda lu Stiidxaʼ Dios ne lu ca publicación stinu. Ne nga peʼ nga ni gucané ti hermana láʼ Merita de guidxi Albania, laa gunda biʼniʼ huantar ora bicaalú familia stiʼ laa. Laabe guniʼbe: «Ora biindaʼ relatu stiʼ Job, guizáʼ biniibi ni ladxiduáʼ. Nabé biʼniʼ sufrir Job ne qué ñanna tu cutiidiʼ laa lu prueba. Peru neca zaqué guniʼbe ca diidxaʼ ni zeeda lu Job 27:5, “¡Dede dxi gateʼ qué zucheeniáʼ Dios!” Ndiʼ bicaa ni naa guiníʼ iqueʼ gastiʼ nga ni cadideʼ de ni gudiʼdiʼ Job, peru naa maʼ nannaʼ tu cutiidiʼ naa ca prueba riʼ».

 7. Neca cadi cadídinu lu xiixa guendanagana peru, ¿xii caquiiñeʼ gúninu dede ca yanna?

⁷ Sti cosa ni zacané laanu guni huantarnu nga guxhélenu ladxidoʼno nezalú Jehová (Filip. 4:6; 1 Tes. 5:17). Zándaca cadi cadxaagaluluʼ xiixa guendanagana nagasi, peru galán guyúbiluʼ gacané Jehová lii ora chuʼ xiixa ni guchiichi lii, ora qué guidxélaluʼ xi gúniluʼ o nuuluʼ xizaa. Pa ruyúbiluʼ gacané Jehová lii gudxiiluluʼ ca guendanagana ni redané cada dxi la? zacané ni lii gudxiiluluʼ ca guendanagana ni gueeda despué. Ne zanna dxiichiluʼ Jehová peʼ nanna pora ne ximodo gacané lii (Sal. 27:1, 3).

 8. ¿Ximodo racané ejemplu stiʼ Mira laanu gánnanu pa guni huantarnu yanna zanda guni huantarnu despué? (Santiago 1:2-4; biiyaʼ imagen ca).

⁸ Pa guni huantarnu ca guendanagana gápanu yanna zacané ni laanu guni huantarnu ora gueeda gran tribulación (Rom. 5:3). ¿Xiñee caninu ndiʼ yaʼ? Stale hermanu ni maʼ huadxaagalú xiixa guendanagana runi sentircaʼ zanda gudxiilucaʼ intiica guendanagana ni gueeda despué. Ora ruuyacabe racané Jehová laacabe guni huantárcabe la? jma riroobaʼ fe stícabe. Ne fe ca racané laacabe gudxiilúcabe xcaadxi guendanagana (biindaʼ Santiago 1:2-4). Ne zacá nga riníʼ ique Mira ti precursora de guidxi Albania. Hermana riʼ ná nuu biaje runi sentir laa si nga napa stale guendanagana. Ora guizaaca nga, riníʼ íquebe modo maʼ gucané Jehová laabe lu ca últimu gande iza de xquendanabánibe ne rábibe laca laabe: «Cadi gusaanaluʼ Jehová guca fiel. Cadi gudiiluʼ lugar guiníʼ íqueluʼ qué risaca guiráʼ ca iza ni maʼ gucané Jehová lii». Lii laaca galán guiníʼ íqueluʼ guiráʼ ni maʼ biʼniʼ Jehová pur lii ra gucanebe lii guni huantarluʼ. Gupa confianza ruuyabe stipa rúniluʼ cada biaje guni huantarluʼ xiixa guendanagana ne zudiibe lii stale ndaayaʼ (Mat. 5:10-12). Nga runi, ora guzulú gran tribulación maʼ zanda guni huantarluʼ ne ziuuluʼ listu para cadi gusaana de gúniluʼ ni.

 9. ¿Ximodo bisihuinni congregación de Antioquía de Siria riá binni?

⁹ Guidúʼyanu ni bizaaca ca hermanu de Judea tiempu biaadxaʼ guendaró ra nuucaʼ. Ora gunna ca hermanu de Antioquía de Siria ni la? guizáʼ biacaʼ laacabe ne pur ni bíʼnicaʼ bisihuínnicaʼ xi cayuni sentircaʼ. Biblia ná: Gucuaacaʼ «decisión para guseendacaʼ ti ayuda, cada tobi gudii biaʼ zanda gudii, para ca hermanu nabeza Judea» (Hech. 11:27-30). Neca situ nabeza ca hermanu ni cadiʼdiʼ ca guendanagana riʼ, peru guná ca hermanu de Antioquía chigacanecaʼ (1 Juan 3:17, 18).

10. Ora guizaaca xiixa desastre, ¿ximodo zanda guluinu rianu ca hermanu stinu? (Biiyaʼ imagen ca).

¹⁰ Laanu laaca zanda guluinu rianu ca hermanu stinu ora gánnanu gucanácabe pur xiixa desastre. Guidúʼyanu ximodo zanda gacanenu laacabe. Zanda guinabadiidxanu ca ancianu pa zanda gacanenu, gúninu ca donación stinu ne guni orarnu pur ca hermanu (Prov. 17:17).b Lu iza 2020, guyuu jma de gaʼ gayuaa cincuenta Comité de Socorro lu guidubi Guidxilayú para gacané ca ni gucaná pur pandemia stiʼ COVID-19. Rudiʼdu xquixe peʼ guiráʼ ca ni racané lu ca dxiiñaʼ riʼ. Cumu biá ca hermanu riʼ ca hermanu ni cadiʼdiʼ lu guendanagana la? ngue bicaa laacabe guseendacabe despensa, gacanécabe, quixhedxícabe ladxidóʼ ca hermanu riʼ ne dede guyuucabe dispuestu chécabe para gacanécabe gaca chaʼhuiʼ o cuiʼ lídxicaʼ ne ca Yoo stiʼ Reinu (bichaaga ni né 2 Corintios 8:1-4).

11. ¿Ximodo rusihuínninu rusisácanu Jehová ora rianu binni?

¹¹ Guizáʼ ridxagayaa binni ora ruuyaʼ rusihuínninu rianu binni despué de guizaaca xiixa desastre. Casi ni bizaaca lu iza 2019, nabé bininá huracán Dorian ti Yoo stiʼ Reinu ni nuu las Bahamas. Laga cayuni chaahuiʼ ca hermanu Yoo stiʼ Reinu que, gunábacabe ti contratista ni cadi naca testigu stiʼ Jehová guni ti presupuestu para caadxi dxiiñaʼ ni caquiiñeʼ gaca. Laa guníʼ: «Racalaʼdxeʼ guneʼ xiixa pur organización stitu. Gudieeʼ maquinaria, mano de obra ne ca material ni caquiiñetu. Nabé ridxagayaaʼ modo riuutu gaxha de ca xhamígutu». Stale binni qué runibiáʼ Jehová peru stale de laacaʼ ruuyaʼ ni rúninu, ca testigu stiʼ Jehová, para gacanenu xcaadxi. Ti ndaayaʼ naroʼbaʼ nga nápanu purtiʼ ra guuyaʼ binni rianu xcaadxi racané ni laacaʼ gunibiaʼcaʼ «Dios ni nabé riaʼ» (Efes. 2:4).

12. Ra gusihuínninu rianu binni, ¿ximodo racané ni laanu chuʼnu listu para ora gueeda gran tribulación? (Apocalipsis 13:16, 17).

¹² ¿Xiñee caquiiñeʼ gusihuínninu rianu binni ora tídinu lu gran tribulación? Biblia rusiidiʼ ca binni ni qué guni apoyar ca gobiernu ca zápacaʼ guendanagana yanna ne lu gran tribulación (biindaʼ Apocalipsis 13:16, 17). Zándaca caquiiñeʼ ca hermanu stinu gacanécabe laacaʼ para ganda gápacaʼ ni caquiiñecaʼ. Racaláʼdxinu ora gueeda Jesucristu Rey stinu, para guni juzgar gúʼyabe rianu binni ne gábibe laanu: «Laguicaa Reinu» (Mat. 25:34-40).

13. ¿Xi biʼniʼ ca primé xpinni Cristu para gusihuínnicaʼ guizáʼ nadxiicaʼ? (Romanos 15:7).

¹³ Lu primé siglu que guiráʼ binni bidii cuenta nabé nadxiisaa ca xpinni Cristu. Peru, ¿ñee guca nagana para laacabe guluíʼcabe guendarannaxhii la? Guidúʼyanu ni bizaaca ndaaniʼ congregación stiʼ Roma. Ndaaniʼ congregación riʼ nuu judíu ni biniisi casi ná Ley stiʼ Moisés ne nuu hermanu de gadxé gadxé guidxi ne maʼ gadxé modo biniisi, zándaca nuu de laacaʼ nácacaʼ esclavu ne xcaadxi libre ne zándaca nuu de laacaʼ nácacaʼ xpixuaanaʼ esclavu. ¿Ximodo gusihuinni congregación riʼ tobi si laacaʼ ne nadxiisaacaʼ yaʼ? Bidii apóstol Pablo conseju riʼ laacabe: «Lachuu nayecheʼ ora guidxaagalutu stobi» (biindaʼ Romanos 15:7). ¿Xi gucalaʼdxiʼ Pablo niníʼ raríʼ yaʼ? Diidxaʼ ni guca traducir «lachuu nayecheʼ ora guidxaagalutu stobi» riníʼ ni gácanu nachaʼhuiʼ ora guidxaagalunu binni ra lídxinu ne gúninu ni cásica ora ridxaagalunu ti familia stinu o ti xhamígunu. Guzéʼtenu ti ejemplu, cásica ora gudxi apóstol Pablo Filemón guidxaagaluʼ Onésimo ti esclavu ni bixooñelú. Gúdxibe laa: «Guca nachaʼhuiʼ ora guidxaagaluluʼ laabe» (Filem. 17). Yanna guidúʼyanu ejemplu stiʼ Priscila ne Áquila neca jma nánnacabe de ca cosa ni bisiidiʼ Jesús que Apolos la? peru bidxaagalúcabe laabe galán ne yenécabe laabe ra lídxicabe (Hech. 18:26). Neca gadxé gadxé modo biniisicabe peru nayecheʼ bidxaagalúcabe laabe ne guyuucabe tobi si.

14. ¿Ximodo bisihuinni Anna ne xheelaʼ nadxiicaʼ ca hermanu?

¹⁴ Laanu laaca galán gusihuínninu nadxiinu ca hermanu stinu. ¿Ximodo yaʼ? Ra guidxaagalunu laacabe né guendanayecheʼ ne gaca xhamígunu laacabe, nga zucaa laacabe guluíʼcabe nácacabe xhamígunu (2 Cor. 6:11-13). Guidúʼyanu ni bizaaca ti guendaxheelaʼ de misioneru ndaaniʼ guidxi África Occidental, Anna ne xheelaʼ. Cadi tan xadxí de yendácabe guidxi que bizulú pandemia stiʼ COVID-19 ne maʼ qué ñanda ñaca reunirnécabe ca hermanu de congregación que. ¿Xi biʼniʼ guendaxheelaʼ riʼ para gusihuínnicaʼ nadxiicaʼ ca hermanu riʼ yaʼ? Guniʼnécabe ca hermanu riʼ pur videollamada para gábicabe laacaʼ guizáʼ maʼ nuucabe gúʼyacabe ne gunibiáʼ chaahuicabe laacaʼ. Ni bíʼnicabe riʼ yendani ndaaniʼ ladxidóʼ ca hermanu que ne bizulú guníʼnecaʼ Anna ne xheelaʼ pur teléfono ne laaca biseendacaʼ mensaje ra nuucabe. ¿Xiñee biʼniʼ Anna ne xheelaʼ stipa para gunibiaʼcaʼ ca hermanu de congregación yaʼ? Anna guníʼ: «Qué ziaandaʼ naa modo bisihuinni ca hermanu nadxiicaʼ naa ne familia stinneʼ ne bíʼnicabe ni ora tiica si. Ra guiníʼ iqueʼ ndiʼ rucaa ni naa gannaxhieeʼ ca hermanu jma».

15. ¿Xi rusiidiʼ ejemplu stiʼ Vanessa laanu? (Biiyaʼ imagen ca).

¹⁵ Ndaaniʼ stale congregación nuu hermanu ne hermana ni gadxé gadxé modo biniisicaʼ ne modo laacaʼ. Yanna, ¿xi zacané laanu gannaxhiinu ca hermanu stinu yaʼ? Ni zacané laanu nga guidúʼyanu ca cualidad galán nápacabe. Ti hermana de guidxi Nueva Zelanda láʼ Vanessa, nabé guca nagana para laabe guidxaagabe caadxi hermanu purtiʼ ruchiichi modo naca ca hermanu que laabe. Peru ¿xi bíʼnibe yaʼ? Qué nucaanabe ca hermanu que, sínuque biyúbibe gunibiaʼbe laacaʼ jma ne zaqué biiyabe ca cosa galán ni ruuyaʼ Jehová de ca hermanu riʼ. Laabe guniʼbe: «Cumu gucuaa xheelaʼ privilegiu de gaca superintendente de circuito la? nabé bidxaagadu stale hermanu, ne bidieeʼ cuenta gadxé gadxé modo naca cada tobi de laacaʼ. Ne nga gucané naa chuulaʼdxeʼ guidxaaga ca hermanu ca. Yanna guizáʼ riuuladxeʼ guidxaaga ca hermana ne hermanu de gadxé gadxé lugar neca maʼ gadxé cada tobi de laacaʼ. Ne nannadxicheʼ nga peʼ nga ni riuulaʼdxiʼ Jehová, purtiʼ laabe ruchíñabe binni de gadxé gadxé cultura ndaaniʼ xquídxibe». Yanna, ¿ximodo guluinu dxandíʼ nadxiinu ca hermanu stinu yaʼ? Ra gúninu stipa guidúʼyanu laacabe casi ruuyaʼ Jehová laacabe (2 Cor. 8:24).

16. ¿Xiñee caquiiñeʼ gannaxhiisaanu lu gran tribulación? (Biiyaʼ imagen ca).

¹⁶ Lu gran tribulación, caquiiñeʼ gusihuínninu dxandíʼ nadxiinu ca hermanu stinu. ¿Ximodo zapa Jehová laanu ora guzulú gran tribulación yaʼ? Guiníʼ íquenu ca instrucción bidii Jehová xquidxi para ganda guilá ora gucaalú Babilonia laacaʼ. Laabe guniʼbe: «Binni xquidxeʼ caʼ, lachuu ndaaniʼ ca cuartu stitu ne laguseeguʼ puertaʼ stícani. Lagucaachilú ti ratu dede ora maʼ gudiʼdiʼ xiana ca» (Is. 26:20). Zándaca laanu laacaʼ caquiiñeʼ chinándanu ca instrucción riʼ lu gran tribulación. Ca diidxaʼ «ca cuartu stitu» zándaca caníʼ ni de ca congregación ca. Pa qué gusaana de guninenu ca hermanu stinu xhiiñaʼ Jehová ca dxi nagana ca la? zápabe laanu casi maʼ biʼniʼ prometerbe ni. Nga runi cadi caquiiñeʼ si guni huantarnu ca hermanu stinu, sínuque gúninu stipa gusihuínninu dxandíʼ nadxiinu laacabe. Ne risaca gúninu ni para guilanu.

17. Pa chuʼnu listu dede ca yanna, ¿xi zanda gúninu lu gran tribulación?

¹⁷ Zaca «dxi roʼ stiʼ Jehová» ca dxi jma nagana para binni guidxilayú (Sof. 1:14, 15). Laaca zápanu guendanagana laanu ca xpinni Jehová. Peru pa chuʼnu listu dede ca yanna la? zanda gatadxí ladxidoʼno ne zanda gacanenu xcaadxi. Guni huantarnu, zacané ni laanu gudxíʼlunu intiica guendanagana gueeda. Pa guianu xcaadxi, zucaa ni laanu gúninu guiráʼ ni nuu lu nanu, gacanenu ca hermanu stinu ora peʼ caquiiñeʼ ca ni ne gudiʼnu laacaʼ ni caquiiñecaʼ. Ne guendarannaxhii ni maʼ nápanu ca hermanu stinu, zacané ni laanu chuʼnu tobi si. Ne zaguu Jehová ndaayaʼ laanu ra gudii laanu guendanabani ni qué zaluxe ndaaniʼ ti guidxilayú ra maʼ qué ziuu desastre ne maʼ guirutiʼ zietenalaʼdxiʼ ca yuubaʼ gudiʼdiʼ (Is. 65:17).