Ñee naquiiñeʼ uxhuba donda ca xpinni Dios la?

Ndaaniʼ stale yuʼduʼ náparuʼ binni costumbre de cheʼ ra nuu ti cura para uxhuba dóndacaʼ ne zacá rusihuínnicaʼ runi adorarcaʼ Dios. Yanna riʼ nabáninu ti tiempu ra zeʼ dxi runi binni guiráʼ ni racalaʼdxiʼ. Pur nga, ñee caquiiñeruʼ uxhuba donda binni la?

GADXÉ gadxé modo ruuyaʼ binni ni bizéʼtenu ca. Lu periódicu National Post ni riree Canadá bizeeteʼ de ti hombre ni ruundaʼ periódicu ca. Hombre ca na raca nagana para laa gabi sti binni ca cosa malu ni biʼniʼ. Ne laaca guniʼbe: «Ora ganna tuuxa ni maʼ bíʼniluʼ, runi orarné lii ne rabi lii xi gúniluʼ, óraca runi sentirluʼ ratadxí ladxidoʼloʼ». Peru lu ti libru ni caníʼ de tema riʼ, zeeda ni guníʼ ti hombre: «Uxhuba donda binni nga tobi de ca cosa ni rucaa yuʼduʼ binni guni ne nabé runiná ni binni purtiʼ rucaani laacaʼ chuʼcaʼ xizaa dede guidxíbicaʼ» (Bless Me, Father, for I Have Sinned [Guluu ndaayaʼ naa, padre, purtiʼ maʼ bicheeʼ]). Peru xi cuzeeteʼ Biblia de laani yaʼ.

Xi riníʼ Biblia de laani

Dxi bidii Dios Ley stiʼ ca Israelita ni guyuu dxiqué, guniʼbe xipeʼ naquiiñeʼ guni ti binni ora guchee. Pa gucheené binni stobi o gucheené ca ley stiʼ Dios, naquiiñeʼ uxhuba dóndabe ra nuu ti ni ruzaaquiʼ guʼxhuʼ de tribu stiʼ Leví ne laa napa xidé guuti tuuxa maniʼ pur binni ni bichee ca ti gutiidilaʼdxiʼ Dios stonda (Levítico 5:1-6).

Gudiʼdiʼ si gayuaa iza, dxi bichee rey David gupa xidé gulidxe Natán, ti ni riguixhená laa. Xi biʼniʼ David óraque yaʼ. Oraqueca guníʼ: «Maʼ bicheeniáʼ Jiobá» (2 Samuel 12:13). Ne laaca gunábabe Dios guia laabe. Xi guleendube pur oración ni bíʼnibe que yaʼ. David bicaa: «Naa gudxeʼ lii ca donda stinneʼ, ne qué nucaachediaʼ cani. Gunieeʼ: “Zabeʼ Jiobá guiráʼ ra maʼ bichee”. Ne lii bitiidiláʼdxiluʼ ca donda stinneʼ» (Salmo 32:5; 51:1-4).

Ndaaniʼ ca neza binni ridagulisaa de primé siglu que, laaca gunabaʼ Dios uxhuba donda ca xpinni. Santiagu, biʼchiʼ Jesús neza jñaa ne tobi de cani zaniruʼ ndaaniʼ neza binni ridagulisaa ni nuu Jerusalén, gudixhená ca xpinni Cristu sicaríʼ: «Pa nuu tobi de laatu nanna ma bichee la? gabi ca xcaadxi hermanu xi biʼniʼ, ne cada tobi de laatu iníʼ né Dios pur ca xcaadxi, ti aca tu nazaaca de irá modo» (Santiago 5:16). Nga runi, xii nga cani naquiiñeʼ uxhuba donda ca xpinni Cristu ne tu naquiiñeʼ gábicabe ni.

Ñee naquiiñeʼ uxhuba dóndanu guiráʼ ni gucheʼnu la?

Guiráʼ xixenu nácanu binni ruchee, nga runi stale biaje rúninu xiixa sin guiníʼ íquenu o rininu xiixa ni cadi naquiiñeʼ guininu ne pur nga ruchéʼnenu binni guiráʼ dxi (Romanos 3:23). Ñee cusihuinni ca diidxaʼ ca caquiiñeʼ uxhuba dóndanu ra nuu tuuxa ni zaniruʼ ndaaniʼ ca religión ca la?

Dxandíʼ, neca guiráʼ pecadu nga malu para Dios, peru riabe binni ne nánnabe rúninu ni cadi jneza purtiʼ nácanu binni ruchee. Ne salmista que guníʼ sicaríʼ: «Pa ra cuchee si binni nga ñuuyaluʼ la? Jah, Jiobá, tuu nga nuzuhuaa nezaluluʼ yaʼ. Purtiʼ lii dxandíʼ rutiidiláʼdxiluʼ donda, ne zacá guidxíbicabe lii» (Salmo 130:3, 4). Nga runi, xi naquiiñeʼ gúninu ora guininu xiixa ni guniná sti binni sin gudiʼnu cuenta yaʼ. Lu oración bisiidiʼ Jesús ca discípulo stiʼ que gunábabe Dios ti cosa: «Bisiaanda ni ruchéʼ né du lii, casi rusiaʼnda du ni ruchee né cabe laadu» (Lucas 11:4). Ya, zutiidilaʼdxiʼ Dios stóndanu pa guinábanu ni laabe lu lá Jesús (Juan 14:13, 14).

Peru lu textu ca guníʼ Jesús para gutiidilaʼdxiʼ Dios stóndanu naquiiñeʼ gutiidiláʼdxinu «ni ruchee né cabe laa[n]u». Apóstol Pablu laaca bidii conseju riʼ ca xpinni Cristu: «Lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efesios 4:32). Dxandíʼ, ora rutiidiláʼdxinu stonda xcaadxi binni la? nanna dxíchinu laaca zutiidilaʼdxiʼ Dios stóndanu.

Peru xi naquiiñeʼ gaca ora guni tuuxa xiixa cosa malu casi cuanaʼ, laapeʼ guyubi gusiguii, chuʼné ni cadi xheelaʼ ne xhudxi yaʼ. Guiráʼ cani runi ca cosa malu ca cucheenecaʼ ca ley stiʼ Dios ne zaqueca cucheenecaʼ laabe. Xi caquiiñeʼ gaca óraca yaʼ.

Tu ra nuu naquiiñeʼ uxhuba dóndanu

Dios si nga ni zanda gutiidilaʼdxiʼ cani guchéʼnenu laa; guirutiʼ huadiibe derechu guni ni. Sicaríʼ na Biblia: «Peru pa uxhuba donda nu lú [Dios] nanna dxichi nu zuni be ni ma uníʼ be, zuxhá be stonda nu ne zusiá be ladxidóʼ no de irá ni nadxabaʼ, purti jneza ni runi be» (1 Juan 1:9). Peru tu ra nuu nga naquiiñeʼ uxhuba dóndanu yaʼ.

Cumu Dios nga rutiidilaʼdxiʼ stóndanu la? ra nuube nga naquiiñeʼ uxhuba dóndanu. Ne ngapeʼ nga ni biʼniʼ rey David. Yanna, ñee caquiiñeruʼ gúninu xiixa la? Stiidxaʼ Dios na: «Lainaba perdón Dios, laudxii lú jneza ti ixá stonda tu ne zacá zusieche be ladxidóʼ to» (Hechos 3:19). Cadi naquiiñeʼ gánnasinu dxandíʼ bicheʼnu ne uxhuba dóndanu, sínuque laaca naquiiñeʼ quixhe íquenu gúninu ni jneza. Neca nagana gaca para laanu gúninu ni la? nuu tu zanda gacané laanu. Tu laacabe yaʼ.

Casi maʼ bidúʼyanu ca, Santiagu gudixhená ca xpinni Cristu né ca diidxaʼ riʼ: «Pa nuu tobi de laatu nanna ma bichee la? gabi ca xcaadxi hermanu xi biʼniʼ, ne cada tobi de laatu iníʼ né Dios pur ca xcaadxi, ti aca tu nazaaca de irá modo». Ne laaca guniʼbe: «Ora riníʼ né ca xpinni Dios laa de idubi ladxidóʼ ca la? rugaanda stiidxa ca lú be» (Santiago 5:16). «Ca xpinni Dios» ni bieeteʼ lu textu ca zándaca laacabe nga ca «hermanu gola», o binnigola, ni cuzeeteʼ Santiagu lu versículo 14. Tu ca binni riʼ yaʼ. Lade ca neza binni ridagulisaa ca nuu hombre ni zuhuaa dxiichiʼ ndaaniʼ xquidxi Dios ne dxiiñaʼ sticaʼ nga gacanecaʼ cani racalaʼdxiʼ gutiidilaʼdxiʼ Dios stonda. Dxandíʼ, laacabe qué zanda diʼ guxhácabe stóndanu ora guchéʼnenu Dios, purtiʼ nin ti binni guidxilayú qué gapa derechu guni nga.a Peru ca binnigola ca zanda gacanecaʼ binni ni guchee ca guchaa modo nabani ne uguu jnézacabe laa. Ne rúnicabe ni para gacanécabe guʼyaʼ pabiáʼ naxoo ni biʼniʼ ne pabiáʼ risaca nga gaca arrepentir (Gálatas 6:1).

Xiñee naquiiñeʼ uxhuba dóndanu

Ora guchee tuuxa, casi pa guni xiixa cosa nabé malu o xiixa ni cadi málupeʼ la? maʼ qué riuu galán né binnilidxi ne zaqueca né Dios. Ne pur nga zándaca chuʼ xizaa o dede guiuubaʼ ladxidóʼ. Xiñee rizaaca binni zacá yaʼ. Purtiʼ Dios bizáʼ laanu ne guendabiaaniʼ (Romanos 2:14, 15). Xi zanda gúninu ora guchiiñaʼ xquendabiaaninu laanu yaʼ.

Guidúʼyanu sti biaje libru stiʼ Santiagu ra zeeda caadxi diidxaʼ ni zacané laanu: «Pa nuu tobi de laatu huará [nezalú Dios] la? useenda caa ca hermanu gola de lade cani runi cre, iníʼ né ca Dios pur laabe ne xhubi ca aceite ladi be laga canaba ca lu Señor acané laabe. Ne pa dxandí runi cre ca zuni Dios ni canaba ca la? zalá be, ne zandisa Señor laabe, ne pa huachee be la? zuxhá Señor stonda be» (Santiago 5:14, 15).

Ni cayeeteʼ raríʼ nga de dxiiñaʼ ni napa ca binnigola ca para gacanecaʼ ca xpinni Cristu ti chuʼcaʼ gaxha de Dios. Laacabe rucaadiágacabe ni gabi binni laacabe. Ne laaca nánnacabe nuuruʼ ni naquiiñeʼ gúnicabe para gusiándacabe binni huará ca, o binni ni cadi nuu galán ne Dios. Guidúʼyanu chupa cosa ni bizeeteʼ Santiagu.

Primeru naquiiñeʼ guidúʼyanu xi riníʼ ca diidxaʼ: «Xhubi ca aceite ladi be». Ni caniʼbe raríʼ nga zanda gusianda Biblia binni huará ca, o binni ni cuchee ca. Apóstol Pablu guníʼ: «Stiidxa Dios la? rudii enda nabani laanu, ne nandxóʼ ni. [...] Ribee irá ni nuu ndaani ladxidóʼ no, ne ni cá lu xquenda biaani nu, para ganna nu ximodo laanu» (Hebreos 4:12). Ora iquiiñe ca binnigola ca Stiidxaʼ Dios jneza, zanda gacanecaʼ cani huará o cani cadi nuu galán ne Dios. Ximodo rúnicabe ni yaʼ. Racanécabe laabe gúʼyabe xii nga cani cucaa laabe gucheebe ne rábicabe laabe xi zanda gúnibe para gusaanabe de gucheebe ti guibánibe modo na Dios.

Ne zaqueca cayeeteʼ ca diidxaʼ riʼ: «Pa dxandí runi cre ca zuni Dios ni canaba ca». Naquiiñeʼ gánnanu ora guinabaʼ ca binnigola ca gutiidilaʼdxiʼ Dios stonda binni ni bichee ca, qué zucaacani Dios guchaa modo runi ni jneza. Para Dios ni bizáʼ laanu la? nabé risaca nga ni runi ca binnigola ca, purtiʼ racaláʼdxibe gutiidiláʼdxibe stóndanu pur rini ni bixhii Cristu (1 Juan 2:2). Dios racané tutiica ni guiuubaʼ ladxidóʼ pur ni biʼniʼ ne «inaba ca perdón Dios, udxii lú ca jneza be ne ibani ca jneza» (Hechos 26:20).

Peru razón ni jma risaca nápanu para uxhuba dóndanu pur bichéʼnenu tuuxa binni o bichéʼnenu Dios nga purtiʼ racaláʼdxinu uguube ndaayaʼ laanu. Jesucristu guníʼ para gúninu ni na Dios sin guchiiñaʼ xquendabiaaninu laanu la? primeru caquiiñeʼ guyúbinu modo guni chaahuinu xiixa bichenda ni gapanenu tuuxa ti chúʼnenu laabe tobi si (Mateo 5:23, 24). Ne Proverbios 28:13 na: «Tu rucaachiʼ ca donda stiʼ la? qué zabeendú diʼ gastiʼ, peru tu guiníʼ cani ne gusaana cani la? ziubaláʼdxicabe laa». Nga runi, pa qué gudxíʼbanu laca laanu nezalú Jiobá ne guinábanu gutiidiláʼdxibe stóndanu la? ziuuláʼdxibe cani gúninu ne zaguube ndaayaʼ laanu (1 Pedro 5:6).

[Cani cá ñee yaza]

[Ni caníʼ yaza 23]

Zutiidilaʼdxiʼ Dios stóndanu ne zusiaandaʼ ni pa guinábanu ni laabe lu lá Jesús

[Dibuju/foto ni zeeda lu yaza 24]

Razón ni jma risaca nápanu para uxhuba dóndanu nga purtiʼ racaláʼdxinu uguu Dios ndaayaʼ laanu