Zeeda gácatu «ti reinu ra ziuu ni ruzaaquiʼ guʼxhuʼ»

1, 2. Xiñee biquiiñeʼ chuʼ tu gapa ni za de gunaa que.

NABÉ risaca primé profecía ni rieeteʼ lu Biblia para gaca ni maʼ gudixhe ique Jiobá. Sicaríʼ guniʼbe ndaaniʼ jardín ni guyuu Edén que: «Ne zucaaʼ gacananaláʼdxisaatu, lii [Binidxabaʼ] ne gunaa ca, ne zaqueca ni za de lii ne ni za de laabe». Pabiáʼ nadipaʼ zaca nanaláʼdxisaacabe yaʼ. Jiobá guníʼ zuxhata ñee ni za de gunaa que ique Binidxabaʼ ne laa zuniná «xatini» ñee ni za de gunaa riʼ (Gén. 3:15). Nabé zaca nanalaʼdxiʼ Binidxabaʼ gunaa ca ne zuyubi modo gunitilú ni za de laabe.

² Cadi guendaridxagayaa diʼ nga gucaa salmista que ridxi Dios né ca diidxaʼ riʼ: «¡Biiyaʼ!, ca xhenemíguluʼ ni racananalaʼdxiʼ lii nuucaʼ gucaalucaʼ lii. Caníʼ stiidxacabe ximodo gucaalúcabe xquídxiluʼ; ne laaca caníʼ stiidxacabe para guninácabe cani cucaachiluʼ. Laacabe maʼ guníʼcabe: “Latáʼ gundúʼxenu laacabe para cadi gácacabe ti guidxi roʼ, ti cadi guietenaláʼdxicabe Israel”» (Sal. 83:2-4). Gudixhe ique Binidxabaʼ nunitilú ca bixhozegola ni za de gunaa riʼ ne nucaa laacabe nucheecabe. Ngue runi gudixhe Jiobá xcaadxi pactu.

3, 4. 1) Padxí bizulú guca ni na pactu stiʼ Ley que. 2) Xi guníʼ ca israelita zúnicaʼ. 3) Xiná pactu stiʼ Ley cadi naquiiñeʼ guni ca israelita.

³ Dxi bidale cani za de Abrahán, Isaac ne Jacob, biʼniʼ Jiobá laacabe ti guidxi naroʼbaʼ: guidxi Israel. Biquiiñeʼ Jiobá Moisés para biʼniʼ sti pactu né guidxi Israel, ni rábicabe Pactu stiʼ Ley. Bidiibe laacaʼ Ley stibe ne laacaʼ guniʼcaʼ zúnicaʼ ni nani. Biblia na: «Gucuaa Moisés [...] libru stiʼ pactu que ne biindaʼ ni nezalú guidxi que. Óraque guníʼcabe: “Maʼ gudixhe íquedu gúnidu guiráʼ ni maʼ guníʼ Jiobá ne guzúʼbadu diidxaʼ”. Nga runi gucuaa Moisés rini que ne bindaateʼ ni luguiáʼ guidxi que ne guníʼ: “Raríʼ nuu rini stiʼ pactu ni biʼniné Jiobá laatu pur guiráʼ diidxaʼ stiʼ”» (Éx. 24:3-8).

⁴ Guca ni na pactu stiʼ Ley lu dani Sinaí lu iza 1513 ante de ca dxi stiʼ Jesús. Pur pactu riʼ, guleechú Dios guidxi Israel para gaca guidxi stiʼ. Dxi que beeda gácabe Juez, ni riguixhe Ley ne Rey stícabe (Is. 33:22). Historia stiʼ Israel rusihuinni xi ribeendú binni ora rinanda ca Ley stiʼ Dios ne xi rizaaca ora qué ruzuubacaʼ diidxaʼ. Ley que na cadi naquiiñeʼ guichaganácabe tuuxa ni qué runi adorar Dios ne cadi naquiiñeʼ guni adorárcabe dios ni cadi dxandíʼ, guyuu Ley que para cadi guchee cani za de Abrahán que (Éx. 20:4-6; 34:12-16).

 5. 1) Xi bisihuinni pactu stiʼ Ley que. 2) Xiñee bidxiideche Dios guidxi Israel.

⁵ Pur pactu stiʼ Ley que guyuu sacerdote ndaaniʼ guidxi Israel, nga rusihuinni ziuu xcaadxi sacerdote jma risaca despué (Heb. 7:11; 10:1). Pa laacabe chinándacabe ca Ley stiʼ Jiobá zacané ni laacabe para gueeda gácacabe «ti reinu ra ziuu ni ruzaaquiʼ guʼxhuʼ». Biblia na: «[“]Yanna, pa gúnitu guiráʼ ni gabeʼ laatu ne dxandipeʼ gúnitu ni na pactu stinneʼ la? dxandipeʼ zeeda gácatu guidxi stinneʼ ni nabé risaca de lade guiráʼ ca guidxi ni nuu, purtiʼ guidubi naca guidxilayú riʼ stinneʼ laa. Ne laatu zeeda gácatu para naa ti reinu ra ziuu ni ruzaaquiʼ guʼxhuʼ ne ti guidxi nayá”. Ndiʼ nga ca diidxaʼ ni naquiiñeʼ gábiluʼ ca xiiñiʼ Israel» (Éxodo 19:5, 6). Peru qué nuzuubaʼ guidxi Israel diidxaʼ, lugar de nidxaagalúcabe Mesías —binni jma risaca ni za de Abrahán—, laga bidxiidéchecabe laa. Ngue runi bidxiideche Dios laacabe.

 6. Xi para guʼtaʼ Ley que.

⁶ Cumu bidxiideche guidxi que Dios la? qué ñanda nizaa biaʼ caquiiñeʼ chuʼ lu Reinu ra ziuu ni ruzaaquiʼ guʼxhuʼ. Ñee riníʼ nga maʼ qué ñaca ni na Ley que la? Coʼ. Purtiʼ Ley que guʼtaʼ ni para gápani ni za de gunaa que ne gacané ni binni gunibiáʼ Mesías. Ne guca nga dxi beeda Cristu ne gunna binni tu laabe. Nga runi Biblia na: «Dede beeda Cristu ma qué riquiiñe ley» (Rom. 10:4). Yanna, xi grupu nga zeeda gaca ti reinu ra ziuu ni ruzaaquiʼ guʼxhuʼ yaʼ. Biʼniʼ Jiobá sti pactu para guyáʼ ti guidxi nacubi.

 7. Xi gudxi Jiobá Jeremías.

⁷ Stale iza ante nuchiá Jiobá pactu stiʼ Ley gúdxibe profeta Jeremías zúnibe «ti pactu cubi» né guidxi Israel. Biblia na: «¡Biiyaʼ! Zeeda dxi, na Jiobá, ne dxandipeʼ zuneʼ ti pactu cubi ne ca binnilidxi Israel ne ca binnilidxi Judá; cadi casi pactu bineniáʼ ca bixhoze gólatu dxi gunaazeʼ nacaʼ para gulee laacaʼ Egipto, “pactu stinneʼ ni laacabe bichiácabe, neca naa beeda gacaʼ casi xheelacabe”, nga nga ni guníʼ Jiobá. “Purtiʼ ndiʼ nga pactu ni zuneniáʼ ca binnilidxi Israel tiidiʼ si ca dxi que, na Jiobá. Zudiéʼ laacabe ley stinneʼ ne zaguaani ndaaniʼ ladxidóʼcabe. Ne zeeda gacaʼ Dios stícabe, ne laacabe zeeda gácacabe xquidxeʼ”» (Jeremías 31:31-33). Pactu cubi riʼ zácani gadxé de pactu stiʼ Ley, purtiʼ laani zuxhá ni ca donda stiʼ binni sin guutiʼ ti maniʼ. Ximodo zaca nga yaʼ.

8, 9. 1) Xi bizaaca pur rini ni bixhii Jesús. 2) Xi bizaaca chupa chonna de ca discípulo stiʼ Jesús pur guyuucaʼ lu pactu cubi. (Biiyaʼ dibuju ni zeeda ra ruzulú tema riʼ.)

⁸ Gudiʼdiʼ si gayuaa iza, 14 stiʼ nisán iza 33, gudixhestí Jesús Guendaroxhi stiʼ Señor. Ora guniʼbe de copa ni daʼ vinu que, gúdxibe ca 11 apóstol stibe ca diidxaʼ riʼ: «Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si» (Luc. 22:20). Lu relatu stiʼ Jesús rieeteʼ de vinu que sicaríʼ: «Ndi nga rini stinne ni chi ixii para ixá stonda stale binni» (Mat. 26:27, 28).

⁹ Gunda guca pactu cubi riʼ pur rini ni bixhii Jesús. Pur rini stibe laaca zanda guixá donda stiʼ binni. Peru Jesús qué ñuu diʼ lu pactu riʼ. Cumu qué ñuu dxi nucheebe la? cadi caquiiñeʼ diʼ guixá stóndabe. Peru zanda iquiiñeʼ Dios guendaguti stiʼ Jesús para gacané guiráʼ cani za de Adán. Laaca zanda gápabe casi «xiiñi be» chupa chonna de ca binni guidxilayú ni guni ni nabe ne cuibe laacaʼ né espíritu santu (biindaʼ Romanos 8:14-17). Cumu maʼ nayá nuucabe nezalú Dios la? zanda guininu zeeda gácacabe casi Jesús, Xiiñiʼ Dios. Cani chiguni mandarné Cristu zacaacaʼ ni biniti guidxi Israel, dede gueeda gácacaʼ «ti reinu ra ziuu ni ruzaaquiʼ guʼxhuʼ». Sicaríʼ guníʼ apóstol Pedru de cani chiguni mandarné Cristu: «Gulí pe Dios laatu para gaca tu xpinni, ne naca tu casi sacerdote para guni tu xhiiña rey stinu ni nuu ibáʼ. Ma naca tu ti guidxi ni ulee chu be para laabe. Ma sti pe be laatu. Ne gudixhe be gaca ni zacá para gabi tu binni rihuinni pabiáʼ nandxóʼ be pur ni runi be, purti ulee be laatu de lu guelacahui ne uluu be laatu lu biaani sicarú stibe» (1 Ped. 2:9). ¡Nabé risaca pactu cubi riʼ! Pur laani gunda guca chupa chonna discípulo stiʼ Jesús de ca xcaadxi ni za de Abrahán.

10. 1) Padxí bizulú guca ni na pactu cubi que. 2) Xiñee qué ñaca ni na pactu cubi que ante.

¹⁰ Padxí guca ni na pactu cubi que. Qué ñaca diʼ ni dxi guníʼ Jesús de laani últimu gueelaʼ guyuu lu Guidxilayú. Para guca ni na pactu riʼ primé gupa xidé bixhii Jesús rini stiʼ, de raqué bisaca ni nezalú Jiobá guibáʼ. Ne laaca naquiiñeʼ cuí Jiobá né espíritu santu cani chiguni mandarné Cristu. Nga runi, zanda guininu bizulú guca ni na pactu cubi que lu Pentecostés iza 33, dxi bibí chupa chonna discípulo stiʼ Jesús né espíritu santu.

11. 1) Ximodo gucané pactu cubi que ca judíu ne cani cadi judíu para gácacaʼ de Israel stiʼ Dios. 2) Panda binni nga ziuu lu pactu cubi ca.

¹¹ Ora gudxi Jiobá Jeremías zaca ti pactu cubi né guidxi Israel la? guniʼbe ni purtiʼ pactu stiʼ Ley que maʼ qué zaquiiñeʼ ni. Ne biluxe Ley que dxi bizulú pactu cubi que (Heb. 8:13). Pur pactu cubi que cásica ca judíu ne zaqueca cani cadi judíu zuni mandárnecaʼ Cristu guibáʼ, purtiʼ circuncisión stícabe «ucuaa[cabe] ni de idubi ladxidóʼ[cabe], purti ucuaa[cabe] ni de Espíritu sti Dios ne cadi purti si cá ni lu ley» (Rom. 2:29). Pur pactu cubi ca zucaa Jiobá ca Ley stiʼ «lu xquenda biaani ca ne ndaani ladxidóʼ caʼ» (Heb. 8:10). Biaʼsi 144,000 binni nga guyuu lu pactu cubi riʼ. Laacabe nga zeeda gácacabe ti guidxi nacubi: Israel stiʼ Dios (Gál. 6:16; Apoc. 14:1, 4).

12. Xiñee zanda guininu cásica pactu stiʼ Ley que pactu cubi.

¹² Ximodo nga cásica pactu stiʼ Ley nga pactu cubi que yaʼ. Pactu stiʼ Ley que biʼniné Jiobá ni guidxi Israel, ne pactu cubi ca bíʼninebe ni Israel stiʼ Dios. Lu cada tobi de ca pactu riʼ nuu tobi ni riníʼ pur binni nezalú Dios: lu pactu stiʼ Ley Moisés nga guníʼ pur ca israelita, ne lu pactu cubi riʼ Jesús nga riníʼ pur binni. Biquiiñeʼ rini para bisaca guiropaʼ pactu riʼ: pactu stiʼ Ley que biquiiñeʼ rini stiʼ maniʼ, ne pactu cubi que biquiiñeʼ rini bixhii Jesús. Moisés nga guzaniruʼ nezalú ca israelita que lu pactu stiʼ Ley, ne pactu cubi riʼ, Jesús nga zaniruʼ o naca Xaíque stiʼ ca binni ridagulisaa (Efes. 1:22).

13, 14. 1) Ximodo reeda gaca pactu cubi que ne Reinu tobi si. 2) Xi caquiiñeʼ para ganda guni mandar Israel stiʼ Dios né Cristu guibáʼ.

¹³ Ximodo reeda gaca pactu cubi que ne Reinu tobi si. Purtiʼ pur pactu cubi riʼ guyáʼ ti guidxi nayá ra nuu xpinni Cristu ni zanda gueeda gaca rey ne sacerdote lu Reinu stiʼ Dios ni nuu guibáʼ. Ne guidxi riʼ nga zeeda gaca xcaadxi ni za de Abrahán (Gál. 3:29). Pactu cubi riʼ rusihuínnini dxandíʼ zaca pactu ni biʼniné Dios Abrahán.

¹⁴ Casi maʼ bidúʼyanu ca, pur pactu cubi riʼ beeda chuu Israel stiʼ Dios ne gucané ni cani naca de guidxi riʼ para guni mandárnecaʼ Cristu. Peru nuu sti cosa ni riaadxaʼ. Caquiiñeʼ sti pactu ni gacané laacabe chúʼcabe né Cristu tobi si lu Reinu ni nuu guibáʼ ti zacá ganda gácacabe rey ne sacerdote.

15. Xi pactu biʼniné Jesús ca apóstol stiʼ.

¹⁵ Despué de gudixhestí Jesús Guendaroxhi stiʼ Señor, biʼniné ca 11 apóstol stiʼ ti pactu. Laani nga pactu stiʼ Reinu (biindaʼ Lucas 22:28-30). Maʼ gadxé pactu riʼ de xcaadxi, purtiʼ cadi Jiobá diʼ biʼniʼ ni, sínuque Jesús nga biʼniné ni ca discípulo stiʼ ni bibí né espíritu santu. Ora guniʼbe «zudiee guni mandar tu casi bidii Bixhoze ni naa», ruluíʼ si caníʼ Jesús de pactu ni biʼniné Jiobá laabe para gácabe «sacerdote gola, ne qué ziuu dxi guiaana dxí de aca [be] ni, casi Melquisedec» (Heb. 5:5, 6).

16. Xi zuni ca xpinni Cristu ni bibí né espíritu santu pur pactu stiʼ Reinu.

¹⁶ Ca 11 apóstol stiʼ Jesús qué nusaanacaʼ laabe neca gúpabe stale guendanagana. Pactu stiʼ Reinu gucané ni laacabe gánnacabe ziuunécabe Jesús guibáʼ, raqué zabícabe lu trono para guni mandarnécabe laa ne gácacabe sacerdote. Peru cadi ca 11 apóstol que si nga chiguicaa ndaayaʼ que. Xiñee zanda guininu zacá yaʼ. Purtiʼ apóstol Juan biiyaʼ Jesucristu lu ti visión ne na rabi laabe: «Tu quixhe dxí irá ni uquiinde laa la? zuni mandar ne naa casi cayune man dar nia Bixhozeʼ, purti gudixhe dxie ni biquiinde naa» (Apoc. 3:21). Nga runi, lu pactu stiʼ Reinu riʼ nuu 144,000 xpinni Cristu ni bibí (Apoc. 5:9, 10; 7:4). Pur pactu riʼ nga zuni mandarnécabe Cristu guibáʼ. Zeeda gácani casi ora ti novia chiguichaganáʼ ti rey ne zuni mandarné laabe. Biblia na zeeda gaca ca xpinni Cristu ni bibí né espíritu santu casi «novia» stiʼ Cristu ne laaca na zeeda gácacabe casi «ti binni dxaapa» nayá para guichaganáʼ Cristu (Apoc. 19:7, 8; 21:9; 2 Cor. 11:2).

17, 18. 1) Bisiene né chupa chonna si diidxaʼ xhoopaʼ pactu ni caníʼ de Reinu. 2) Xiñee zanda gápanu fe Reinu stiʼ Dios.

¹⁷ Cada tobi de ca xhoopaʼ pactu ni maʼ bidúʼndanu lu guiropaʼ tema riʼ cusiénecani caadxi cosa risaca de Reinu stiʼ Dios. (Biiyaʼ cuadru ni láʼ «Ximodo zuni Dios ni maʼ gudixhe ique» lu tema gudídinu ca). Ndiʼ rusihuinni pur ca pactu ca zuni Reinu riʼ ni maʼ gudixhe ique Dios. Nga runi, naquiiñeʼ gápanu fe Reinu stiʼ Dios. Nanna dxíchinu laani nga ni caquiiñeʼ Dios para guni ni maʼ gudixhe ique para Guidxilayú ne para binni (Apoc. 11:15).

¹⁸ Nanna dxíchinu Reinu si stiʼ Dios nga ni chiguni chaahuiʼ guiráʼ guendanagana stinu ne zedané ni stale ndaayaʼ para binni. Nga runi, ¡gábinu binni xi chiguni Reinu riʼ! (Mat. 24:14.)