Chupa cosa ni zacané para cadi guixeleʼ ti guendaxheelaʼ

1, 2. 1) Pabiáʼ tiempu naquiiñeʼ guibani ca guendaxheelaʼ ca juntu. 2) Xi zacané laacabe guibánicabe zacá.

DXI bicheelaʼ Dios primé hombre ne primé gunaa, cadi bicheelabe laacaʼ para guibánicaʼ juntu chupa chonna gubidxa si. Adán ne Eva naquiiñeʼ nibánicaʼ sin qué ñuu dxi ñáticaʼ (Génesis 2:24). Gudixhe Dios guichaganáʼ ti hombre ti gunaa si, purtiʼ nga nga ni jneza para laabe. Stiidxaʼ Dios na zanda gaca divorciárcabe ne guichaganácabe sti biaje pa tobi de laacabe chuʼné ni cadi xheelaʼ (Mateo 5:32).

² Ñee zanda guibani chupa binni sin qué chuʼ dxi gusaana de chuʼcaʼ nayecheʼ la? Zanda pue, ne Biblia na nuu chupa cosa ni nabé risaca gúnicabe para guibánicabe nayecheʼ. Pa guni cada tobi de laacabe cani la? ziuucabe nayecheʼ ne zacaacabe stale ndaayaʼ. Gunáʼ nga guiropaʼ cosa riʼ yaʼ.

 3. Xi chonna modo naquiiñeʼ gannaxhiisaa cani maʼ bichaganáʼ.

³ Primé cosa ni zacané ca guendaxheelaʼ ca nga gannaxhiisaacaʼ. Biblia ruzeeteʼ nuu gadxé gadxé clase de guendarannaxhii. Tobi de laacani nga guendarannaxhii ni nápanu ca xhamígunu (Juan 11:3). Stobi de laacani nga guendarannaxhii ni nápanu ca binnilídxinu (Romanos 12:10). Ne guionna nga guendarannaxhii ni runi sentir ti hombre ne ti gunaa ora chuuláʼdxisaacaʼ (Proverbios 5:15-20). Ca guendaxheelaʼ ca naquiiñeʼ gannaxhiisaacaʼ guionnaʼ modo bizéʼtenu ca. Peru  nuu sti clase guendarannaxhii ni jma risaca que cani maʼ guninu ca.

 4. Xi sti clase guendarannaxhii nuu.

⁴ Lu Stiidxaʼ Dios ni gucuá lu diidxaʼ griegu biquiiñecabe diidxaʼ agápe para guníʼcabe de últimu clase guendarannaxhii ni chiguzéʼtenu riʼ. Laani nga diidxaʼ ni riquiiñeʼ lu 1 Juan 4:8, ra na: «De Dios nga reeda enda ranaxhii». Dxandíʼ, rannaxhiinu purtiʼ gunnaxhii Dios laanu primé (1 Juan 4:19). Ca xpinni Cristu naquiiñeʼ gannaxhiicaʼ Jiobá Dios primé ne despué maʼ gannaxhiicaʼ binni (Marcos 12:29-31). Laaca diidxaʼ agápe nga ni biquiiñeʼ lu Efesios 5:2, ra na: «Lausihuinni nadxii saa tu casi nadxii Cristu laanu. Gunaxhii be laanu dede uná be bisigaʼde be xpida be Dios para biaxa stonda nu». Guendarannaxhii ca nga na Jesús zusihuinni tuu nga cani dxandíʼ xpinni ora guníʼ: «Pa ganaxhii saa tu [agápe] zacá la? zanna binni xpinne laatu» (Juan 13:35). Guidúʼyanu ximodo riquiiñeʼ diidxaʼ agápe lu 1 Corintios 13:13: «Ziaana chonna cosa ni jma risaca: guni cre nu Dios, ne icá lú nu laa, ne ganaxhii saa nu. Peru ni jma risaca lade guionna nga la? nga enda ranaxhii [agápe]».

5, 6. 1) Xiñee jma risaca guendarannaxhii que guni crenu Dios ne guicálunu laa. 2) Xiñee qué zaxeleʼ ca guendaxheelaʼ pa nadxiisaacaʼ.

⁵ Xiñee jma risaca guendarannaxhii agápe que guni crenu Dios ne guicálunu laa yaʼ. Purtiʼ para gusihuínninu ni naquiiñeʼ chinándanu ca conseju ni rudii Stiidxaʼ Dios laanu (Salmo 119:105). Rusihuínninu ni ora jma rizaaláʼdxinu binni ne rácanu nachaʼhuiʼ né laacaʼ casi riuulaʼdxiʼ Dios, neca nuu tiru qué rácacaʼ nachaʼhuiʼ né laanu. Clase guendarannaxhii ca racaneni ca guendaxheelaʼ para chinándacaʼ conseju ni zeeda lu Biblia riʼ: «Cadi ixhacalaʼdxi saa tu [o cadi guireetu gana laatu], ne laguni perdonar ni guni stobi laatu. Casi bini perdonar [Jiobá] laatu, zacaca laguni» (Colosenses 3:13). Ca guendaxheelaʼ ni nadxiisaacaʼ ruyúbicaʼ chinándacaʼ ni na ca diidxaʼ riʼ: «Ne ni jma naquiiñe la? ganaxhii saa tu [agápe], purti pa nadxii tu stobi la? neca uchee né laatu qué zuquixe tu ni laa» (1 Pedro 4:8). Textu ca na zutiidiláʼdxinu ni guni binni laanu pa nadxiinu laacaʼ, peru qué riníʼ diʼ nga maʼ qué lica zucheenecaʼ laanu, purtiʼ guiranu rucheʼnu (Salmo 130:3, 4; Santiago 3:2).

⁶ Ora gannaxhii ca guendaxheelaʼ ca Dios ne gannaxhiisaacaʼ la? qué ziuu dxi guixélecaʼ ne zabánicaʼ nayecheʼ, purtiʼ «qué ziuu dxi initilú enda ranaxhii» (1 Corintios 13:8). Riuu binni tobi si ora rannaxhiisaacaʼ (Colosenses 3:14). Ximodo zanda gannaxhiisaa cani maʼ bichaganáʼ casi maʼ guninu ca yaʼ. Zanda gúnicabe ni ora gúʼndacabe Stiidxaʼ Dios guirópacabe ne guiníʼcabe xi caziidicabe luni; ne ora gúʼndacabe ra caníʼ modo gunnaxhii Jesús, ne ora gúnicabe stipa pur guiníʼ íquecabe casi riníʼ íquebe ne casi bíʼnibe. Laaca caquiiñeʼ chécabe guendaridagulisaa, purtiʼ racá zaziidicabe de Stiidxaʼ Dios, ne zanda guinábacabe Dios gacané laacabe gannaxhiicabe binni, purtiʼ nga nga tobi de ca guenda ni racané espíritu santu binni gapa (Proverbios 3:5, 6; Juan 17:3; Gálatas 5:22; Hebreos 10:24, 25).

 7. Tuu nga ni naquiiñeʼ gusihuinni respetu lu xquendaxheelaʼ.

⁷ Pa dxandíʼ nadxiisaa guiropaʼ binni ni maʼ bichaganáʼ, laaca zapasaacaʼ respetu ne nga nga guiropa cosa ni zacané laacabe guibánicabe nayecheʼ lu xquendaxheelacabe. Stiidxaʼ Dios cudii conseju riʼ guiráʼ ca xpinni Cristu, dede né ca hombre ne gunaa ni maʼ bichaganáʼ: «Cada tobi usisaca stobi ne cadi laca laa» (Romanos 12:10). Sicaríʼ bicaa apóstol Pedru: «Zacaca laatu, hermanu caʼ, lauyubi modo guiene tu xheela tu. Lagaca nachaʼhui ne laacabe, [...] purti [...] jma nadá cabe que laatu» (1 Pedro 3:7). Ne ndiʼ nga conseju para ca gunaa ni maʼ bichaganáʼ: «Irá gunaa guni ni na xheelaʼ» (Efesios 5:33). Pa racaláʼdxinu gusisácanu tuuxa la? ziénenu ne zuni respetarnu laa, zucaadiáganu laa ora guiníʼ ne zúninu ni riuulaʼdxiʼ dede ra gándatiʼ.

8-10. Ora napasaa ca guendaxheelaʼ ca respetu, ximodo racané nga laacabe cadi guixélecabe ne chúʼcabe nayecheʼ.

⁸ Cani racalaʼdxiʼ guibani nayecheʼ lu xquendaxheelaʼ, rapasaacaʼ respetu ne rúnicaʼ ni na ca diidxaʼ riʼ: «Cadi sti si tu ma cá ique tu, sínuque laucaa ique ni caquiiñe [xheelatu]» (Filipenses 2:4). Qué riníʼ íquecabe ni riuulaʼdxisícabe pacaa zusihuínnicabe ruyúbicabe puru para laasicabe. Ni rúnicabe nga ruyúbicabe gúnicabe ni jma galán para xheelacabe. Ne dede jma rúnicabe ni riuulaʼdxiʼ xheelacabe que ni riuuláʼdxicabe.

⁹ Ora rapasaa cani maʼ bichaganáʼ respetu, racaneni laacaʼ gucaadiágacaʼ ni riníʼ ique xheelacaʼ, neca cadi ngueca modo guiníʼ íquecaʼ. Cadi galán cuézanu tobi si modo guiníʼ ique chupa binni. Zándaca ni risaca para hombre qué risaca ni para gunaa, ne ni riuulaʼdxiʼ gunaa zándaca qué riuulaʼdxiʼ hombre. Peru cada tobi naquiiñeʼ guni respetar ni riníʼ ique ne ni riuulaʼdxiʼ xheelaʼ pa cadi cucheené xheelabe ley ne conseju stiʼ Jiobá (1 Pedro 2:16; zanda gúʼndaluʼ Filemón 14). Cada tobi naquiiñeʼ guni respetar xheelaʼ ne cadi guiníʼ o guni xiixa ni guniná laabe nezalú binni nin ora maʼ nuucabe stúbicabe.

¹⁰ Casi maʼ bidúʼyanu, ca cosa risaca ni zacané cani maʼ bichaganáʼ para guibánicaʼ galán nga gannaxhiicaʼ Dios ne gannaxhiisaacaʼ ne gapasaacaʼ respetu. Ximodo zanda gusihuinni binni ca guenda ca lu xcaadxi cosa ni jma risaca lu xquendaxheelacaʼ yaʼ.

11. Tuu nga na Biblia naca xaíque lu ti guendaxheelaʼ.

¹¹ Biblia na ora bizáʼ Dios hombre bidiibe laa ca guenda ni caquiiñeʼ para gaca xaíque ndaaniʼ ti familia. Nga runi, ribeza Jiobá gusiidibe binnilídxibe de laa ne gudiibe ni iquiiñeʼ xheelabe ne ca xiiñibe. Naquiiñeʼ gúnibe cani quixhe íquebe ne guibánibe modo riuulaʼdxiʼ Jiobá para ganda gudiibe ti ejemplu galán laacaʼ. «Ne laatu, ca gunaa ni ma bichaganáʼ, lauzuuba stiidxa xheela tu casi ruzuuba tu stiidxa Señor. Purti xheela tu nga xaíque stitu, casi naca Cristu xaíque sti ca xpinni.» (Efesios 5:22, 23.) Peru lu Biblia na laaca napa hombre ti xaíque ni runi mandar laa. Apóstol Pablu bicaa sicaríʼ: «Racaladxe ganna tu, Cristu nga xaíque sti irá hombre, ne hombre nga xaíque sti gunaa, ne Dios nga xaíque sti Cristu» (1 Corintios 11:3). Para guni ti hombre ni jneza casi xaíque naquiiñeʼ guʼyaʼ modo guca Cristu xaíque ti chinanda ejemplu stibe.

12. Xi ejemplu sicarú bidii Jesús pur modo bizuubaʼ diidxaʼ ne modo guca xaíque.

¹² Jesús laaca napa ti xaíque, nga nga Jiobá, ne ruzuubabe stiidxaʼ casi naquiiñeʼ gúnibe ni. Jesús guníʼ: «Qué rune ni racaladxe sínuque rune ni na Bixhoze ni biseenda naa» (Juan 5:30). ¡Guizáʼ galán ejemplu bidii Jesús! Laabe «maca nuu[be] ante cha irá xixé ni nuu», ne despué beeda gácabe Mesías (Colosenses 1:15). Jesús nga beeda gaca Xaíque stiʼ cani bibí pur espíritu santu ne gulí Dios laabe para gácabe Rey guibáʼ ne bisisaca laabe jma que guiráʼ ángel (Filipenses 2:9-11; Hebreos 1:4). Neca risaca puestu napa Jesús ne zaqueca risaca guiráʼ dxiiñaʼ ni chigúnibe la? qué ñácabe naduxhuʼ né binni, qué ninábabe ñaca ni násibe ne qué ninábabe binni ñuni jma de ni qué zanda guni. Qué ñábibe ca discípulo stibe naquiiñeʼ guzuubacaʼ stiidxabe guiráʼ ora. Jesús gunnaxhii binni ne biabe laacaʼ, jmaruʼ si gúcabe zacá né ca binni ni cuquiichinácabe laacaʼ. Laabe guniʼbe: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mateo 11:28-30). Nabé guyuulaʼdxiʼ binni chuʼ gaxha de laabe.

13, 14. Ximodo zanda chinanda ca hombre ni naca xaíque ejemplu stiʼ Jesús.

¹³ Hombre ni racalaʼdxiʼ guibaniné binnilidxi nayecheʼ naquiiñeʼ gapa ca guenda sicarú ni napa Jesús. Ti hombre ni maʼ bichaganáʼ ne nachaʼhuiʼ la? qué zaca naduxhuʼ né xheelaʼ ne qué zuchibi laabe purtiʼ si laa nga xaíque. Ni rúnibe nga rannaxhiibe ne rusisácabe xheelabe. Jesús guca nachaʼhuiʼ né binni ne qué nidíndenebe laacaʼ. Yanna, ti hombre ni maʼ bichaganáʼ jmaruʼ si naquiiñeʼ guni casi biʼniʼ Jesús purtiʼ laa ruchee ne ora gúnibe xiixa ni cadi jneza zabézabe guiene xheelabe laabe. Nga runi, ti hombre ni qué rudxiibaʼ laca laa zaníʼ dxandíʼ bichee, neca nagana gaca para laa guiníʼ: «Bitiidilaʼdxiʼ stondaʼ, napuʼ razón». Ne qué zaca nagana para gunaa ca guni respetar xheelaʼ casi xaíque stiʼ pa hombre ca qué rudxiibaʼ laca laa, pa qué ricá tema gaca puru si ni na ne pa ganna zaquiiñeʼ de stobi. Yanna, ti gunaa ni runi respetar xheelaʼ laaca rinabaʼ gutiidilaʼdxiʼ xheelaʼ stonda ora guchee.

¹⁴ Dxi bizáʼ Dios gunaa, bidiibe laa caadxi guenda nabé sicarú ni zacané laa guibaniné xheelaʼ nayecheʼ. Ti hombre ni nuu xpiaaniʼ rudii cuenta dxandíʼ ni ne rusisaca xheelaʼ. Ti gunaa jma riá ne nadá ladxidóʼ, ne ca guenda ca racanécani laabe gápabe binnilídxibe ne gacanebe laacaʼ gánnacaʼ modo guidxaagacaʼ sti binni. Stale gunaa riuulaʼdxiʼ guni chaahuiʼ ra lidxi para guihuinni ni galán ti guni sentir binnilidxi nayecheʼ. Gunaa nuu xpiaaniʼ ni cayeeteʼ lu Proverbios capítulo 31, gupa stale guenda ne biʼniʼ stale cosa. Nga runi xheelabe gulaʼquiʼ ladxidóʼ lu nabe. Xi guleendúcabe pur nga yaʼ. Bibani binnilídxicabe galán (Proverbios 31:10, 11).

15. Ximodo zanda gannaxhii ti hombre xheelaʼ ne gapa respetu laabe casi biʼniʼ Cristu.

¹⁵ Ndaaniʼ caadxi guidxi nabé risaca para binni derechu ni napa hombre para guni mandar ndaaniʼ lidxi, ne pa guinabadiidxacabe laabe xiixa cusihuínnicabe qué gápacabe respetu laabe. Ndaaniʼ ca guidxi ca rudiicabe lugar guʼyaʼ hombre xheelaʼ casi ti esclava. Ora runi ti hombre zacá, maʼ qué riuu galán né xheelaʼ ne laaca qué riuu galán né Dios (zanda gúʼndaluʼ 1 Juan 4:20, 21). Ne nuu hombre qué rizaalaʼdxiʼ guni xhiiñaʼ casi xaíque, sínuque rudii lugar guiníʼ xheelaʼ xi gaca ndaaniʼ lidxi. Ti hombre ni napa Cristu casi xaíque stiʼ la? qué ruquiichináʼ xheelaʼ ne qué runi xiixa ni gusihuinni qué gapa respetu laabe. Lugar de nga, rannaxhii xheelaʼ casi rannaxhii Cristu ne rinanda conseju bidii Pablu riʼ: «Ne laatu, ca hombre ni ma bichaganáʼ, laganaxhii xheela tu cásica gunaxhii Cristu ca xpinni, dede bidii xpida pur laacaʼ» (Efesios 5:25). Cristu Jesús nabé gunnaxhii ca xpinni dede guti pur laacabe. Ti hombre ni maʼ bichaganáʼ naquiiñeʼ guni casi biʼniʼ Cristu, guizaalaʼdxiʼ xheelaʼ ne cadi guinabaʼ laabe xiixa ni qué zanda gúnibe. Ora hombre napa Cristu casi xaíque stiʼ ne rannaxhii ne rapa respetu xheelaʼ la? gunaa ca ruzuubaʼ stiidxabe de guidubi ladxidóʼ (Efesios 5:28, 29, 33).

16. Gunáʼ nga ca guenda naquiiñeʼ gusihuinni ti gunaa lu xquendaxheelaʼ.

¹⁶ Gudiʼdiʼ si ti tiempu de guyáʼ Adán «guníʼ Jiobá Dios: “Cadi galán diʼ chuʼ hombre stubi si. Chiguneʼ tobi ni gacané laabe, biáʼsipeʼ para laabe”» (Génesis 2:18). Dios bizáʼ Eva para gacané lu xquendaxheelaʼ ne cadi para guni mandar xheelaʼ. Cásica cadi naquiiñeʼ chuʼ chupa capitán lu ti barcu, zacaca cadi naquiiñeʼ chuʼ chupa tu guni mandar lu ti guendaxheelaʼ. Naquiiñeʼ gusihuinni ti hombre nadxii xheelaʼ ora guni dxiiñaʼ stiʼ casi xaíque, ne gunaa ca naquiiñeʼ gannaxhii xheelaʼ, guni respetar laabe ne guiale de ndaaniʼ ladxidóʼ guzuubaʼ stiidxabe.

17, 18. Ximodo zanda gacané ti gunaa xheelaʼ.

¹⁷ Peru ti gunaa cadi naquiiñeʼ guzuubaʼ si stiidxaʼ xheelaʼ, sínuque laaca runi stipa pur gacané xheelaʼ lu cani quixhe ique guni. Ne qué zaca nagana para laabe gúnibe ni pa jneza ruuyabe ni quixhe ique xheelabe. Neca cadi jneza gúʼyabe ni la? galán gacanebe xheelabe lu cani quixhe ique guni ne zacá zabeendúcabe ni galán.

¹⁸ Nuu xcaadxi cosa ni zanda guni ti gunaa para gacané xheelaʼ guni xhiiñaʼ jneza casi xaíque. Gunaa ca naquiiñeʼ gudii xquíxepeʼ xheelaʼ pur modo cayuni dxiiñaʼ stiʼ, lugar de guiníʼ cadi jneza cayúnibe ni o gusihuinni cadi nayecheʼ nuu né cani rúnibe. Ora gacané gunaa ca xheelaʼ naquiiñeʼ guietenalaʼdxiʼ ni na ca diidxaʼ riʼ: «Laucaa ique gaca tu nachaʼhui ne binni, ne gaca tu nadóʼ, purti nga nga enda sicarú ni risaca nezalú Dios», ne cadi nezalú si xheelabe (1 Pedro 3:3, 4; Colosenses 3:12). Yanna, pa cadi xpinni Cristu xheelaʼ gunaa ca yaʼ. Stiidxaʼ Dios na «ganaxhii ca [gunaa ca] xheela ca ne ca xiiñi caʼ, cuʼ xpiaani caʼ ne guiaana ca para si xheela caʼ, guni ca xhiiña ca jneza, gaca ca nachaʼhui ne binni, ne uzuuba ca stiidxa xheela caʼ, ti qué gapa binni xi pur iníʼ stiidxa Dios» (Tito 2:4, 5). Pa xheelaʼ gunaa ca guinabaʼ laa guni xiixa ni zuchiiñaʼ xquendabiaaniʼ la? zándaca zuni respetar xheelabe modo riníʼ íquebe pa gusiénebe ni laa «ne diidxa nadóʼ ne respetu». Nuu hombre ni «qué runi cre stiidxa Cristu [...] zándaca iguudxi ra guʼya runi xheela jneza ne runi respetar laa». Zacá qué zaquiiñepeʼ guiniʼcaʼ para gucuudxicaʼ laacabe (1 Pedro 3:1, 2, 15; 1 Corintios 7:13-16).

19. Xi naquiiñeʼ guni ti gunaa pa guinabaʼ xheelaʼ laa guni xiixa ni na Dios cadi jneza.

¹⁹ Pa xheelaʼ gunaa ca guinabaʼ laa guni xiixa ni na Dios cadi jneza, xi naquiiñeʼ gúnibe óraca yaʼ. Óraca naquiiñeʼ guietenaláʼdxibe Dios nga Xaíque ni jma risaca nápabe ne gúnibe casi biʼniʼ ca apóstol que dxi gunábacabe laacaʼ cadi gúnicaʼ ni na ley stiʼ Dios. Hechos 5:29 cusiene: «Oraque na Pedru ne ca xcaadxi apóstol que: “Jma naquiiñe uzuʼba du stiidxa Dios que stiidxa binni”».

20. Pora ndiʼ naquiiñeʼ gusihuinni cani maʼ bichaganáʼ nadxiisaacaʼ ne napasaacaʼ respetu.

²⁰ Nabé risaca gusihuinni ca guendaxheelaʼ ca nadxiisaacaʼ ne napasaacaʼ respetu ora güicaʼ diidxaʼ. Rusihuinni hombre nadxii xheelaʼ ora ruiʼné laabe diidxaʼ de cani rúnibe, de ca guendanagana ni rápabe, de ni riníʼ íquebe ne de xcaadxi cosa. Ne nga nga ni caquiiñeʼ gunaa ca guni xheelaʼ. Hombre ni ribee tiempu para güiné xheelaʼ diidxaʼ ne gucaadiaga ni gábibe laa, rusihuinni nadxii ne runi respetar laabe (Santiago 1:19). Peru nuu caadxi gunaa ni maʼ bichaganáʼ riniʼcaʼ huaxiéʼ ruiʼné xheelacaʼ laacaʼ diidxaʼ. Dxandíʼ, tiempu nabáninu riʼ nabé nuu xhiiñaʼ binni, nga runi zándaca riree ca hombre ca stale hora de ra lídxicaʼ para chigúnicaʼ dxiiñaʼ, ne pur qué rugaanda xpuéltucabe dede nuu gunaa laaca riguni dxiiñaʼ. Peru cani maʼ bichaganáʼ caquiiñeʼ cueecaʼ tiempu para laacaʼ. Pa qué gúnicabe zacá la? zándaca cada tobi de laacabe zabani casi ñaca qué gapa xheelaʼ, ne zándaca gápacabe guendanagana pa tobi de laacabe guyubi stobi ni guiene laa lugar de xheelaʼ.

21. Xiñee ziuu ti guendaxheelaʼ nayecheʼ pa guiniʼcaʼ né diidxaʼ nadóʼ.

²¹ Laaca risaca nga modo güiʼ ca guendaxheelaʼ ca diidxaʼ. Biblia na: «Ca diidxaʼ sicarú ca [...] nanaxhi cani para xhialma binni ne zeeda gácacani casi ti remediu para dxita ladi binni» (Proverbios 16:24). Pa xpinni Cristu xheelaluʼ o coʼ, naquiiñeʼ chinándaluʼ conseju ni zeeda lu Biblia riʼ: «Lagüíʼ diidxa jneza, ni guiaba binni. Lauyubi ganna tu modo icabi tu laacaʼ» (Colosenses 4:6). Pa huaxiéʼ galán guyé ni tobi de laatu ti dxi, ne xheelaluʼ gabi lii caadxi diidxaʼ sicarú ne guiene lii la? nabé nayecheʼ ziuuluʼ. «Casi manzana de oro ni nuu ndaaniʼ xiixa de plata nga ti diidxaʼ ni guiníʼcabe ora caquiiñeʼ.» (Proverbios 25:11.) Nabé risaca ca diidxaʼ guiníʼ binni ne modo guiníʼ cani. Zándaca tuuxa guiníʼ naduxhuʼ casi ñaca cayuni mandar: «¡Bitaaguʼ puertaʼ ca!». Peru pa lugar de nga guiniʼbe né diidxaʼ nadóʼ: «Ñee zanda gutaaguluʼ puertaʼ ca la?», jma ziuulaʼdxiʼ xheelabe guiniʼbe zacá.

22. Xi zanda gacané ti guendaxheelaʼ para cadi gusaana de güicaʼ diidxaʼ.

²² Ni zacané ca guendaxheelaʼ ca güicaʼ diidxaʼ galán nga iquiiñecaʼ diidxaʼ sicarú, guuyasaacaʼ laacaʼ galán, guxidxinecaʼ xheelacaʼ, gácacaʼ nachaʼhuiʼ, guienesaacaʼ ne gusihuínnicaʼ nadxiicaʼ. Pa guni hombre ne gunaa stipa pur cadi gusaana de güicaʼ diidxaʼ, qué zaca nagana para laacaʼ guiniʼcaʼ xi caquiiñecaʼ, ne zanda gacanésaacaʼ ora qué guiree xiixa cásipeʼ guníʼ íquecaʼ ne ora gápacaʼ guendanagana. Stiidxaʼ Dios na: «Lagacané cani cadxibi», o cani nuu triste (1 Tesalonicenses 5:14). Ziuu biaje zuni sentir hombre triste ne zaqueca xheelaʼ. Xi naquiiñeʼ gúnicabe óraca yaʼ. Naquiiñeʼ uguucabe gana laacabe ora güícabe diidxaʼ (Romanos 15:2).

23, 24. Ximodo zanda gacané guendarannaxhii ne respetu ti guendaxheelaʼ ora gadxé gadxé modo ruuyacaʼ xiixa cosa. Bizeeteʼ ti ejemplu.

²³ Ti guendaxheelaʼ ni rusihuinni nadxiisaa ne napasaa respetu la? qué zuuyaʼ cucaalú xheelaʼ laa pa gadxé modo riníʼ íquebe. Rúnicabe stipa pur cadi gácacabe «naduxhuʼ» né xheelacabe (Colosenses 3:19). Guirópacabe naquiiñeʼ gánnacabe «ora [ricabi binni] né diidxaʼ nadóʼ la? rindeteʼ ni xiana» (Proverbios 15:1). Qué chuʼ dxi gúninu menu xheelanu nin guininu cadi jneza cani guiniʼbe ora gábibe laanu xi nuu ndaaniʼ ladxidoʼbe. Lugar de gúninu nga la? gucaadiáganu ni gábibe laanu ti guiénenu laabe. Laanu ne xheelanu naquiiñeʼ gúninu stipa pur guidúʼyanu gunáʼ nga ni jma jneza gúninu ora gadxé modo ridúʼyanu xiixa ne gadxé modo ruuyaʼ xheelanu ni.

²⁴ Guietenaláʼdxinu dxi gudxi Sara xheelaʼ ximodo zanda gaca chaahuiʼ ti guendanagana neca qué ñuulaʼdxiʼ Abrahán ni gúdxibe laa. Peru Dios gudxi Abrahán: «Bicaadiaga laabe» (Génesis 21:9-12). Abrahán biʼniʼ ni gudxi Dios laa ne pur ngue guluu Dios ndaayaʼ laa. Zacaca naquiiñeʼ guni hombre. Pa xheelabe guiníʼ gadxé de ni riníʼ íquebe la? galán gucaadiágabe laa. Ne gunaa ca naquiiñeʼ gucaadiaga ni guiníʼ xheelaʼ ne cadi gucueeza laabe ora guiniʼbe (Proverbios 25:24). Pa tobi de laacabe riuulaʼdxiʼ gaca ca cosa ca modo na guiráʼ ora la? qué zusihuinni nadxii xheelaʼ ne qué zusihuinni napa respetu laabe.

25. Ora güiʼ cani maʼ bichaganáʼ diidxaʼ de ora ratanecaʼ xheelacaʼ, ximodo zacané nga laacabe chúʼcabe nayecheʼ.

²⁵ Laaca galán güiʼ ca guendaxheelaʼ ca diidxaʼ de ora ratanecaʼ xheelacaʼ. Pa tobi de laacabe racalaʼdxiʼ gaca puru si ni na ne qué ganna gucueeza laa la? zanda gapanebe xheelabe guendanagana ora gatanebe laa. Nabé risaca nga guiníʼcabe ni runi sentírcabe, ne cadi guidxiichinécabe xheelacabe. Ora cada tobi de cani maʼ bichaganáʼ guizaalaʼdxiʼ xheelaʼ, qué zápacaʼ guendanagana ora gátacaʼ. Lu cani maʼ guninu riʼ ne lu xcaadxi cosa, galán chinanda cani maʼ bichaganáʼ conseju riʼ: «Naquiiñe uyubi nu acané nu stobi ne cadi uyubi nu para laasi nu» (1 Corintios 7:3-5; 10:24).

26. Neca nuu ora cadi galán riuu ca guendaxheelaʼ ca, ximodo zanda gacané conseju ni zeeda lu Stiidxaʼ Dios laacabe chúʼcabe nayecheʼ.

²⁶ Stiidxaʼ Dios rudii laanu ca conseju ni jma galán. Dxandíʼ, nuu ora riuu ca guendaxheelaʼ ca galán ne nuu ora coʼ. Peru ora rúnicabe ni na Jiobá, ora nadxiisaacabe ne ora gapasaacabe respetu casi na Biblia la? qué ziuu dxi guixélecabe ne ziuucabe nayecheʼ. Zacá zusisácacabe laacabe ne zaqueca zusisácacabe Jiobá, Dios ni gudixhestí guendaxheelaʼ.