Cani bisiidiʼ Jesús

Xi zanda gúninu para chuʼnu nayecheʼ

Xi caquiiñenu para guibáninu nayecheʼ

▪ Ora bizulú Jesús libana ni bidii lu dani que guníʼ xi naquiiñeʼ guni binni para chuʼ nayecheʼ. Laabe guniʼbe: «Dichoso ni nanna gasti nga laa nezalú Dios», o cani nanna caquiiñeʼ guluíʼ Dios laacaʼ ximodo guibánicaʼ (Mateo 5:3). Xi cusiidiʼ Jesús ora guníʼ ca diidxaʼ riʼ yaʼ.

Para ganda guibáninu caquiiñeʼ guicaanu bi, guidoʼno ne guideʼnu nisa. ¡Dede ca maniʼ ca laaca riquiiñecaʼ ca cosa ca! Peru laanu caquiiñenu sti cosa para chuʼnu nayecheʼ. Xi laani yaʼ. Guiénenu xi pur nabáninu. Ne Dios si ni bizáʼ laanu nga zanda gusiéneni laanu. Nga runi guníʼ Jesús: «Cadi pan si nga ibani né binni sínuque irá ca diidxa ni iree de ruaa Dios» (Mateo 4:4). Dxandíʼ, ziuʼnu nayecheʼ pa gudiʼnu lugar gusiidiʼ Dios laanu xi naquiiñeʼ gúninu, ne para nga naquiiñeʼ chuʼnu gaxha de Jiobá, purtiʼ laa naca ti «Dios nayecheʼ» (1 Timoteo 1:11, NM). Ne laaca cayábibe laanu zadxiña dxi zaca chaahuiʼ ca cosa ca, nga nga ni racané laanu chuʼnu nayecheʼ ca dxi riʼ.

Xi biʼniʼ Jesús para bisihuinni zaca chaahuiʼ ca cosa ca

▪ Jesús laaca guníʼ: «Dichoso ni nadóʼ purti zudii Dios laaca guidxilayú» (Mateo 5:5). Ora bisianda Jesús binni huará ne ora bisibani gueʼtuʼ, bisihuinni zadxiña dxi gaca stale cosa galán para binni guidxilayú. Cani bisiidibe laaca rucaa cani binni guiníʼ ique nuu xiixa ni galán cabeza laacaʼ. Jesús bisiidiʼ: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Nga runi, para ganda guibáninu ndaaniʼ Guidxilayú riʼ sin gátinu la? naquiiñeʼ gápanu fe ne guzúʼbanu stiidxaʼ Dios. Ñee ruxuíʼ luluʼ pabiáʼ galán guibániluʼ sin guióʼxoluʼ lade binni ni qué ridinde la? Nga runi na Biblia: «Laguieche né ni cabeza tu udii Dios laatu» (Romanos 12:12). Peru laaca guníʼ Jesús caadxi cosa ni zanda guni binni para chuʼ nayecheʼ yanna.

Xi conseju bidii Jesús para chuʼ binni nayecheʼ

▪ Jesús bisiidiʼ ximodo zanda guidxaaganu sti binni, ximodo guibani ti guendaxheelaʼ nayecheʼ, ximodo guʼyaʼ binni guendarapa bidxichi. Laaca bisiidibe galán nga cadi gudxiibaʼ binni laca laa ne bisiidirube xcaadxi cosa (Mateo 5:21-32; 6:1-5, 19-34). Pa chinándanu ca conseju stibe la? zacaneni laanu para chuʼnu nayecheʼ.

Jesús bisiene riuu binni nayecheʼ ora rudii de ni napa (Hechos 20:35). Ti biaje guniʼbe: «Ora guʼnu endaró la? guridxi cani qué gapa gastiʼ, cani nachangu náʼ, cani nachangu ñee, cani nacheepa lú. Ne nabé zieche luʼ, ti laacabe qué gapa cabe ni quixe cabe lii» (Lucas 14:13, 14). Racá rizíʼdinu ti cosa: riuu binni nayecheʼ ora guni xiixa para gusiecheʼ xcaadxi binni, ne cadi ora ruyubi para laasi.

Xi zacané laanu para chuʼnu jma nayecheʼ

▪ Dxandíʼ nga riuu binni nayecheʼ ora guni xiixa pur xcaadxi binni. Peru, gastiʼ nin sti cosa ni gusiecheʼ binni jma que guni ni na Dios. Dede guníʼ Jesús qué zanda diʼ guchaaganu ni né guendanayecheʼ ni runi sentir binni pur guiráʼ ca cosa galán ni ribeendú ca xiiñiʼ. Ti biaje, dxi cusiidiʼ Jesús caadxi binni, biree ti gunaa ládecabe ne guníʼ: «Dichosa de ni uxana lii ne bigadxi lii. Peru rabi be laa: Jma dichoso cani ucaa diaga stiidxa Dios ne guni ni na ni» (Lucas 11:27, 28).

Ne guizáʼ nayecheʼ guyuu Jesús purtiʼ biʼniʼ guiráʼ ni na Bixhoze. Tobi de cani bíʼnibe nga bisiidibe binni zadxiña dxi guibánicaʼ sin gáticaʼ. Ngue runi, bisiénesibe ti gunaa xi chiguni Dios, guniʼbe: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:13, 14, 34). Laanu laaca ziuʼnu nayecheʼ cásica laabe pa gúninu ni riuulaʼdxiʼ Dios: gusíʼdinu binni ni cá lu Biblia.

[Textu ni zeeda lu yaza 17]

Pa riuuláʼdxiluʼ gánnaluʼ jma de laani la? biiyaʼ capítulo 1 stiʼ libru riʼ, ni biʼniʼ ca testigu stiʼ Jiobá.

[Textu ni zeeda lu yaza 17]

Xipeʼ ndiʼ CUSIIDIʼ BIBLIA

[Dibuju/foto ni zeeda lu yaza 16]

Para ganda chuʼnu nayecheʼ la? naquiiñeʼ gánnanu xi pur nabáninu