Ñee nannuʼ ni la?

Xiñee biaana apóstol Pedru ralidxi ti curtidor ante chiganna Corneliu

▪ Lu libru stiʼ Hechos rieeteʼ «biaana ru Pedru ndaani guidxi Jope ralidxi ti curtidor lá Simón», hombre riʼ naca lidxi «uriá nisadóʼ» (Hechos 9:43; 10:6). Ca judíu biiyacaʼ dxiiñaʼ ni runi ca curtidor que casi ti dxiiñaʼ ni nabiidiʼ ne rindéteni binni; ne Talmud na jma huaxiéʼ risácani qué dxiiñaʼ runi binni ni rutopa xquiʼ biʼcuʼ. Cumu ngue nga xhiiñaʼ Simón la? guiráʼ dxi rigáʼnabe maniʼ ni maʼ guti ne pur ngue cadi naquiiñeʼ chuʼbe lade binni (Levítico 5:2; 11:39). Stale libru cusiene, zándaca biquiiñecabe nisadóʼ para guni curtírcabe guidi ne cumu rindáʼ yuudxuʼ ni ora maʼ cayúnicabe ni dxiiñaʼ la? ngue runi gúpacabe negocio stícabe fuera de guidxi.

Neca zaqué guná Pedru guiaana ralidxi Simón. Ni biʼniʼ Pedru ca rusihuínnini biziidibe stale de Jesús ra qué ninabe ñácabe casi ca judíu que, purtiʼ laacaʼ qué ninacaʼ nidxaagacaʼ ca binni ni ruuyacaʼ nabiidiʼ (Mateo 9:11; Lucas 7:36-50).

Xi gucalaʼdxiʼ Jesús niníʼ né ca diidxaʼ «Laca lii guniʼluʼ ni»

▪ Ora gunabaʼ Caifás, xaíque stiʼ ca sacerdote judíu guiníʼ Jesús nezalú ca binni que pa laa nga Cristu, Xiiñiʼ Dios, laa bicabi: «Laca lii guniʼluʼ ni» (Mateo 26:63, 64, NM). Xi gucalaʼdxiʼ Jesús niníʼ né ca diidxaʼ riʼ.

Jesús cadi cuyubi diʼ modo guiree cueʼ de ni gunabadiidxaʼ Caifás laa. Ruluíʼ si nabé biquiiñeʼ ca judíu diidxaʼ riʼ para gusihuínnicaʼ dxandíʼ xiixa ni guinabadiidxacabe laacaʼ. Lu Talmud stiʼ Jerusalén —ti libru ni caníʼ de religión stiʼ ca judíu ni gucuá lu siglu IV despué de ca dxi stiʼ Jesús— rieeteʼ de dxi gunabadiidxacabe ti judíu pa dxandíʼ guti ti rabinu, hombre que bicabi: «Laca laatu guniʼtu ni». Pur modo bicabi hombre riʼ bisihuínnibe dxandíʼ guti rabinu que.

Jesús nanna napa xaíque stiʼ ca sacerdote que derechu de guinabaʼ laabe guicábibe ni canabadiidxaʼ laabe que. Pa ñaca qué ninabe niniʼbe la? nusihuínnibe cadi dxandíʼ diʼ laabe nga Cristu. Ngue runi, ora guníʼ Jesús «Laca lii guniʼluʼ ni», bisihuínnibe dxandíʼ ni gunabadiidxaʼ xaíque stiʼ ca sacerdote que laabe. Lu relatu stiʼ Marcos laaca cayeeteʼ ora gunabaʼ Caifás Jesús guiníʼ pa laa nga Mesías la? bicábibe né stale guendanadxibalú: «Naa pue» (Marcos 14:62; laaca zanda gúʼyaluʼ Mateo 26:25 ne Marcos 15:2).

[Dibuju/foto ni zeeda lu yaza 31]

RA RACA CURTIR GUIDI NDAANIʼ GUIDXI FEZ (MARRUECOS)