RIETENALAʼDXUʼ LA?

Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Pórapeʼ nga biiticabe dendxuʼ ni gudócabe 14 stiʼ nisán que.

Caadxi Biblia na naquiiñeʼ gatiʼ dendxuhuiiniʼ que «lade guiropaʼ huadxí», ora maʼ zixhinni: ora maʼ biaaziʼ Gubidxa peru nayáʼniruʼ (Éx. 12:6) (15/12, yaza 18 ne 19).

Xi principiu stiʼ Biblia zacané cani nahuiiniʼ quixhe íquecaʼ gúnicaʼ ni jneza.

1) Guyúbicabe Reinu stiʼ Dios primé ne gúnicabe ni jneza (Mat. 6:19-34). 2) Chúʼcabe nayecheʼ ra gacanécabe xcaadxi binni (Hech. 20: 35). 3) Chúʼcabe nayecheʼ ra gúnicabe xhiiñaʼ Jiobá laga nahuiinicabe (Ecl. 12:1) (15/1, yaza 19 ne 20).

Guná nga guidapaʼ hombre ziguxooñené maniʼ dede lu iza 1914.

Jesús, hombre dxiʼbaʼ maniʼ quichiʼ, maʼ guladxi Binidxabaʼ ne ca demonio stiʼ de guibáʼ. Ni dxiʼbaʼ maniʼ xiñáʼ ca riniʼni ca guerra ni huayuniná binni. Ni dxiʼbaʼ maniʼ yaaseʼ ca riníʼ ziuu guendarindaana. Ne ni dxiʼbaʼ maniʼ naté ca cayuuti millón binni de guendahuará (Apoc. 6:2-8) (1/2, yaza 6 ne 7).

Padxí nga «ichaganá Dendxu huiini» (Apoc. 19:7).

Despué de quixhedxí Rey Jesucristu ca xhenemigu, o despué de gunitilube Babilonia guidxi roʼ ne despué de Armagedón (15/2, yaza 10).

Xiñee guleza ca judíu ni bibani lu primé siglu que dxi gueeda Mesías (Luc. 3:15).

Qué ganna chaahuinu pa gunna ca judíu ni bibani lu primé siglu profecía stiʼ Daniel ra cayeeteʼ zeeda Mesías (Dan. 9:24-27). Neca zacá, zándaca binadiágacabe ora gudxi ti ángel ni caadxi pastor o binadiágacabe ni guníʼ Ana, ti gunaa ni riguixhená, ora biiyaʼ Jesús ra yuʼduʼ que. Ne gúnnacabe guyé caadxi hombre nuu xpiaaniʼ ne riene de beleguí Jerusalén, ziyúbicaʼ «rey sti ca judíu» (Mat. 2:1, 2). Ne despué guníʼ Juan ni Riguunisa zahuinni Cristu (15/2, yaza 26 ne 27).

Ximodo zanda gúninu ni maʼ bidii stiidxanu (2 Cor. 1:18).

Ziuu biaje qué zanda gúninu xiixa ni maʼ guninu. Peru ti xpinni Cristu ni maʼ bidii stiidxaʼ guni xiixa o maʼ biʼniʼ ti compromisu la? naquiiñeʼ guni stipa pur guni ni maʼ bidii stiidxaʼ (15/3, yaza 32).

Xi zanda gúninu para gusaana de gúʼyanu pornografía.

Nuu chonna cosa ni naquiiñeʼ gúninu: 1) pa málasi gúʼyanu xiixa ni guquiinde laanu gúninu cosa malu, nagueendaca gutiixhilunu sti ladu; 2) gápanu laanu de cani riníʼ íquenu: guiníʼ íquenu cosa jneza ne guni orarnu, ne 3) gápanu laanu né cani rúninu: cadi gúʼyanu película ra ridiʼdiʼ cosa dxabaʼ o gúʼyanu ni lu Internet (1/4, yaza 10 dede 12).

Xi rizaaca ti xpinni Cristu ora rusaana familia stiʼ para chiguni dxiiñaʼ sti gudxi.

Pa cadi nabeza ti familia juntu la? riuu ca xiiñiʼ triste ne cadi jneza modo ribánicaʼ. Ridxiichinecaʼ jñaacaʼ o bixhózecaʼ. Ne cani maʼ bichaganáʼ ni nabeza zitu de xheelaʼ zándaca gucheenecaʼ xheelacaʼ (15/4, yaza 19 ne 20).

Xiñee gulúzacabe ñee ca binni malu bicaacabe lu yaga dxiqué.

Lu yaga nga biiti ca romanu chupa chonna binni malu. Ca judíu que gunabaʼ guiluuza ñee guiropaʼ hombre malu ni nanda cueʼ Jesús. Ora cúzacabe dxita ñee ca hombre ca maʼ qué randa ricaacaʼ bi ne jma nagueenda ráticaʼ. Zacá qué zándacabe lu yaga que guidubi gueelaʼ (Deut. 21:22, 23) (1/5, yaza 11).

Xi tapa guendarinabadiidxaʼ cadi naquiiñeʼ guiaandaʼ laanu ora gucheechenu diidxaʼ.

Tuu nga cani naquiiñeʼ guinínenu. Paraa guinínenu binni. Pora nga jma galán guinínenu binni. Ne ximodo guzulú guinínenu binni (15/5, yaza 12 dede 15).

Panda binni maʼ guti pur riguʼbaʼ gueza.

Siglu gudiʼdiʼ ca biitini ti gayuaa millón binni. Yanna, guiráʼ iza ruutini biaʼ xhoopaʼ millón binni (1/6, yaza 3).