Ni rinabadiidxaʼ cani ruundaʼ

Xiñee gunda gudxi Jesús ti gunaa canazá si maʼ bitiidiláʼdxibe stonda (Luc. 7:37, 48).

Dxi zuba Jesús ruaa mexaʼ ralidxi ti fariseu ni láʼ Simón, gurí ti gunaa xañeebe ne bizulú bigadxe ñeebe ne nisa ni cayete lú purtiʼ cayuunaʼ ne bicuiidxiʼ cani ne guicha ique. De raqué bidiibe bixiduʼ ñee Jesús ne guluube cani ti aceite ni rindáʼ naxhi. Lu relatu ca cayeeteʼ runibiáʼcabe laabe ndaaniʼ guidxi que casi «ti gunaa canazá si». Dxandíʼ, guiranu gulenenu donda ne rucheʼnu, peru ora Stiidxaʼ Dios caníʼ de tuuxa ni nabé ruchee ruzeeteni de tuuxa ni runi guendaquéiquiiñeʼ o ni nabé runibiáʼcabe laa purtiʼ rucheené ley stiʼ Dios. Lu textu riʼ cayeeteʼ de «ti gunaa canazá si», o ni nabé ruchee. Tutiica guca gunaa riʼ, peru laabe nga gudxi Jesús: «Ma bine perdonar lii» (Luc. 7:36-38, 48). Xi gucaláʼdxibe niniʼbe ne ca diidxaʼ que yaʼ. Xiñee gunda bitiidilaʼdxiʼ Jesús stonda gunaa que pa caʼruʼ gátibe para quíxebe stonda binni yaʼ.

Bigadxe si gunaa que ñee Jesús ne ante gutiidiláʼdxibe stonda la? biquiiñebe ti ejemplu para bisiénebe Simón, hombre ni biʼniʼ invitar laabe ralidxi que, ti cosa nabé risaca. Bichaagabe donda stiʼ binni ne guiráʼ bueltu ni nuzaabiʼ chupa hombre ni maʼ qué ganda quíxecaʼ ni nuzaabicaʼ. Laabe gúdxibe Simón: «Uyuu chupa hombre bizaabi ni ruquixe vueltu. Tobi que bizaabi gaayu gayuaa denariu, stobi que cincuenta si. Peru qué gapa cabe ni quixe cabe ni, para bixhá hombre que lá cabe ti ihuinni ma cadi naquiiñe quixe cabe ni. Yanna gudxi naa uná de laacabe jma nadxii laabe. Para na Simón: Para naa la? ruluíʼ ni jma bizaabi stale que. Jneza, rabi be laa» (Luc. 7:41-43). Guiranu naquiiñeʼ guzúʼbanu stiidxaʼ Dios. Nga runi, ora qué guzúʼbanu stiidxabe ne gucheʼnu la? zeeda gácani casi ora cadi caguíxenu Dios ni nuzáʼbinu laa. Ne zacá casi ñaca jma zidale ni nuzáʼbinu laabe. Peru Bixhózenu zeeda gaca casi ti binni ni ruquixe bueltu ni nuu listu para gusiaandaʼ cani nuzáʼbinu laa. Ngue runi gudxi Jesús ca discípulo stiʼ guiníʼnecaʼ Dios sicaríʼ: «Bisiaanda [ni nuzáʼbidu lii, NM] ni ruchéʼ né du lii, casi rusiáʼnda du ni ruchee né cabe laadu» (Mat. 6:12). Lucas 11:4 cusiene chaahuiʼ xii nga nuzáʼbinu Dios, laani nga ca donda stinu.

Xi biquiiñeʼ Dios para bitiidilaʼdxiʼ donda stiʼ binni dxiqué yaʼ. Cadi guiaandaʼ laanu Jiobá runi ni jneza, nga runi ora guchee ti binni rinábabe gati. Ngue runi gupa xidé bidii Adán xquendanabani pur qué nuzuubaʼ diidxaʼ. Peru dxi bidii Jiobá Ley guidxi Israel, gúdxibe laacaʼ zutiidiláʼdxibe stóndacaʼ pa guzaaquicaʼ ti maniʼ para laabe. Cásica bizeeteʼ apóstol Pablu, «pur ni cá lu ley nanna nu irá ni guia naquiiñe guia ne rini, ne pa qué ixii rini la? qué zanda guiaxa xpecadu cabe» (Heb. 9:22). Ca judíu de dxiqué qué ñánnacaʼ pa nuu sti modo zanda gutiidilaʼdxiʼ Dios stóndacaʼ. Ngue runi, riénenu xiñee guníʼ ca binni ni nuu ralidxi Simón que cadi jneza ni gudxi Jesús gunaa que. Peru cani zubanebe ruaa mexaʼ que guníʼ íquecaʼ: «Tu hombre riʼ zanda guni perdonar binni» (Luc. 7:49). Yanna, xi biquiiñeʼ Jesús para bitiidilaʼdxiʼ guiráʼ ca donda stiʼ gunaa que yaʼ.

Primé diidxaʼ riguixhená ni bieeteʼ despué de bicaalú Adán ne Eva Jiobá, bizeeteni naguixhe ique Jiobá guindisaʼ ti binni ni gueeda de ti gunaa ne laabe zuniná Binidxabaʼ ne cani za de laa xatini ñeebe (Gén. 3:15). Dxi biiti ca xhenemigu Dios que Jesús, dxiqué nga casi ñaca ñuniná Binidxabaʼ xatini ñee ni beeda de gunaa que (Gál. 3:13, 16). Rini ni bixhii Cristu que nga ni biaxa para guiree binni guidxilayú de lu náʼ donda ne guendaguti. Cumu gastiʼ zanda gucueeza Jiobá de guni ni naguixhe ique la? para laabe mápeca biaxa pur donda stiʼ binni dede ora bieeteʼ ca diidxaʼ ni zeeda lu Génesis 3:15, ne maʼ zanda gutiidiláʼdxibe donda stiʼ binni ni gusihuinni napa fe lu cani bizabiruaabe.

Ante gueeda Cristu lu Guidxilayú riʼ, maca guyuu binni ni biiyaʼ Jiobá runi ni jneza. Chupa chonna de laacabe nga Enoc, Noé, Abrahán, Rahab ne Job, laacaʼ gúpacaʼ fe zaca cani bizabiruaa Dios. Ne pur nga discípulo Santiago bicaa: «Bini cre Abraham Dios, ne nga runi uníʼ Dios ma qué uzaabi be gastiʼ». Ne guníʼrube: «Zacaca bizaaca lú Rahab, [...] ti gunaa dxabaʼ [...]. Ñee, cadi pur ni biʼni be que bixhá Dios stonda be la?» (Sant. 2:21-25).

Ndaaniʼ guidxi Israel de dxiqué, rey David biʼniʼ stale cosa nabé malu, peru lu guiráʼ ni bíʼnibe que bisihuínnibe nápabe fe Dios ni dxandíʼ ne guca arrepentirbe de guidubi ladxidoʼbe. Ne sicaríʼ ruzeeteʼ Biblia de modo rutiidilaʼdxiʼ Dios stonda binni: «Gulaʼqui Dios gati be para quixe be irá ni huachee binni, ne tu guni cre bixhii be rini stibe pur laa la? zaca perdonar. Zacá biʼni Dios ti ihuinni jneza biʼni dxi caʼru gueeda Cristu, ra qué nixhacalaʼdxi be binni, qué nuquixe be laacaʼ ni bichee caʼ, ne laca ti ihuinni jneza cayuni be yanna, purti yáquexa ma gudixe Cristu irá pecadu la? jneza runi be, ruxhá be stonda tutiica guni cre laa» (Rom. 3:25, 26). Ngue runi gunda bitiidilaʼdxiʼ Jiobá stonda David sin nusaana de ñuni ni jneza, purtiʼ para laa maʼ gudixe Jesús pur donda stiʼ binni neca despué ngue chigati Jesús.

Casi gunaa ni bigadxe ñee Jesús que, ruluíʼ laaca zacaca nga bizaaca né laabe. Neca dxiqué guyuunebe binni ni cadi xheelabe, guca arrepentirbe. Biénebe naquiiñeʼ guiabe de ca donda stibe ne bisihuínnibe pur cani bíʼnibe rusisácabe hombre biseendaʼ Jiobá para guxhá stonda binni. Neca caʼruʼ gudii Cristu xquendanabani pur binni dxiqué la? dxandíʼ zácani, pur ngue gunda bixá stonda binni casi gunaa que. Ngue runi gudxi Jesús gunaa que ca diidxaʼ riʼ: «Ma bine perdonar lii».

Casi ridúʼyanu lu relatu riʼ, Jesús qué nucaanáʼ ca binni ni napa donda que, sínuque qué nusaanabe de ñácabe nachaʼhuiʼ né laacaʼ. Ne ni jma galán nga maʼ bizabiruaa Jiobá zutiidilaʼdxiʼ donda stiʼ guiráʼ cani gaca arrepentir. ¡Nabé riguixhedxí nga ladxidoʼno ne rusiecheʼ ni laanu, purtiʼ nácanu binni ruchee!

[Dibuju/foto ni zeeda lu yaza 7]

Guníʼ Dios maʼ qué guzaabicabe gastiʼ