Biʼniʼ ni na Dios sin guchiiñaʼ xquendabiaaniluʼ lii

1-3. 1) Pora ndiʼ ruchiiñaʼ xquendabiaaniʼ binni laa, peru xi cadi naquiiñeʼ guni binni. 2) Xi rusiidiʼ ejemplu stiʼ apóstol Pablu laanu.

GUIDÚʼYANU xi bicaa poeta John G. Whittier: «Lade ca diidxaʼ jma triste riníʼ binni o ni rucaa binni, ca ndiʼ nga cani jma runiná laa: “Pa ñannaʼ qué ñuneʼ ni”». Bizeetebe riquiiñenu ca diidxaʼ riʼ ora cadi jneza biree xiixa ni gudixhe íquenu ne ñuuláʼdxinu ñácani sti modo. Nuu binni nabé riuubaʼ ladxidóʼ o ruchiiñaʼ xquendabiaaniʼ laa pur xiixa ni biʼniʼ o pur xiixa ni qué ñanda ñuni. Ne guiranu maʼ bíninu xiixa ni ruchiiñaʼ laanu nuu tiru. Ñee biʼnuʼ xiixa ni cuchiiñaʼ xquendabiaaniluʼ la?

² Nuu binni nabé naroʼbaʼ ca pecadu ni huayuni. Xcaadxi la? neca cadi malu peʼ ni bíʼnicaʼ, peru riníʼ íquecaʼ pa biaʼsi ngue caadxi de cani gudixhe íquecaʼ gúnicaʼ. Ora rizaaca xiixa zacá, nuu tu qué rizaalaʼdxiʼ guiráʼ ni bizaaca, sínuque riníʼ ique xiruʼ zanda guni. Peru xcaadxi qué rusaana de chuʼ triste ne runiná laca laa ora riníʼ ique sicaríʼ: «Pa ñannaʼ qué ñuneʼ ni» (Sal. 51:3). Yanna lii yaʼ. Ñuuláʼdxiluʼ ñúniluʼ ni na Dios sin nuchiiñaʼ xquendabiaaniluʼ lii la? Biblia ruzeeteʼ ejemplu stiʼ tobi hombre ni gunda biʼniʼ ni. Laabe nga apóstol Pablu. Guidúʼyanu ximodo zanda gacané ejemplu stibe laanu.

³ Laaca nabé naroʼbaʼ ca pecadu biʼniʼ Pablu biaʼ dxi bibani, peru laaca bíʼnibe stale cosa jneza. Dxandíʼ bichiiñaʼ xquendabiaanibe laabe pur cani bíʼnibe, peru chaahuiʼ chaahuiʼ biziidibe chuʼbe nayecheʼ, ne zaqué guyuube biaʼ tiempu bíʼnibe ni na Dios. Guidúʼyanu ejemplu stibe.

 4. Xi biʼniʼ apóstol Pablu ante gaca xpinni Cristu.

⁴ Ti fariseu nga guca Pablu dxi nahuiiniʼ ne bíʼnibe stale cosa ni bichiiñaʼ xquendabiaanibe despué. Tobi de cani bíʼnibe nga guzanándabe ca discípulo stiʼ Cristu. Guidúʼyanu xi biʼniʼ Saulo, guti si Esteban. Biblia na gucalaʼdxiʼ Saulo «nunduuxe irá ca xpinni Cristu. Uzá yoo pur yoo ulee laacabe, hombre ne gunaa, ne biseguyoo laacabe» (Hech. 8:3). Alber Barnes nga ti hombre ni rusiene stale diidxaʼ zeeda lu Biblia. Guidúʼyanu ximodo cusiénebe ca diidxaʼ griegu ni biquiiñeʼ ora guníʼcabe gucalaʼdxiʼ Saulo «nunduuxe irá ca xpinni Cristu». Na hombre riʼ biquiiñeʼ binni ca diidxaʼ ca ora maʼ caniʼcaʼ ximodo ruxuuxe ti maniʼ guiʼxhiʼ tuuxa. Pur guiráʼ ni bisiidiʼ ca judíu Saulo, bicaani laa guiníʼ ique Dios ngue cuseendaʼ laa para guniná ca xpinni Cristu. Ngue runi gucaláʼdxibe nunitilube «ca xpinni Cristu», guzanándabe laacaʼ, cásica «hombre ne gunaa» (Hech. 9:1, 2; 22:4).a

 5. Bisiene ximodo bisaana Saulo de sananda ca xpinni Cristu ne ximodo bizulú bicheeche diidxaʼ.

⁵ Cá ique Saulo cheʼ Damasco, chindee ca discípulo stiʼ Cristu ralídxicaʼ ne xhubiyube laacaʼ para chinebe laacaʼ Jerusalén ti gusabanáʼ Sanedrín que guiracaʼ. Peru qué niná Jesús, Xaíque stiʼ ca xpinni Cristu, ñúnibe ni (Efes. 5:23). Ora zebe Damasco, biree Jesús lube ne dede guibáʼ bindaa ti biaaniʼ laabe, ne pur ngue bicheepaʼ lube. De raqué biseendaʼ laabe ndaaniʼ guidxi que ne gudxi laabe cuézabe raqué para gábicabe laabe xi gúnibe. Ne lu Biblia ridúʼndanu ximodo biluxe historia cuzéʼtenu riʼ (Hech. 9:3-22).

6, 7. Xiñee nánnanu guyuu Pablu triste pur guiráʼ ni biʼniʼ.

⁶ Bichaa Pablu modo laa dxi maʼ guca ti xpinni Cristu. Ngue runi, maʼ qué nizanándabe ca xpinni Cristu casi bíʼnibe dxiqué, sínuque gúcabe tobi de cani guyuu pur laacaʼ. Neca zaqué, qué ñaandaʼ laabe guiráʼ ni bíʼnibe. Guidúʼyanu xi bicaabe despué: «Ma nanna tu modo uzaya dxi yenanda ni runi cre ca judíu. Uzaya nanda ca xpinni Cristu, cani ulí Dios. Qué lica ñaʼya laacaʼ, dede ucaladxe nuniteluáʼ laacaʼ» (Gál. 1:13). Ne laaca bizeetebe xi guiráʼ bíʼnibe dxiqué ora bicaabe carta ra nuu ca xpinni Cristu de Corinto ne Filipos, ne ra nuu Timoteu (biindaʼ 1 Corintios 15:9; Filip. 3:6; 1 Tim. 1:13). Neca bituí lú Pablu ora bicaa guiráʼ ni biʼniʼ, peru qué nibánibe casi tuuxa ni ruluíʼ qué ñuni gastiʼ. Qué ñaandaʼ diʼ laabe nabé naroʼbaʼ ca pecadu bíʼnibe (Hech. 26:9-11).

⁷ Guzéʼtenu xi guníʼ Frederic W. Farrar, ti hombre ni rusiene stale diidxaʼ zeeda lu Biblia, ora caníʼ modo guzananda Saulo ca xpinni Cristu. Hombre riʼ na: Ora si maʼ nánnanu pabiáʼ bininá Saulo ca xpinni Cristu zanda «guiénenu pabiáʼ bichiiñaʼ xquendabiaanibe laabe ne xiñee guníʼ ca xhenemígube mal de laabe». Zándaca ora yeganna apóstol riʼ ca binni ridagulisaa bidxaaga tuuxa ni qué runibiáʼ ni gudxi laa ca diidxaʼ riʼ: «Lii nga Pablu, ni guzananda laadu que la?» (Hech. 9:21).

 8. Xi biʼniʼ Pablu pur bilaselaʼdxiʼ ne gunnaxhii Jiobá ne Jesús laa, ne xi rusiidini laanu.

⁸ Gunda bicheeche Pablu stiidxaʼ Cristu purtiʼ nanna guca Dios nachaʼhuiʼ né laa. Lu catorce carta ni bicaabe bizeetebe biaʼ noventa biaje pabiáʼ guca Dios nachaʼhuiʼ né laabe, ne laasibe nga jma bizeetebe de laani lu Biblia (biindaʼ 1 Corintios 15:10). Bidiibe xquixe Dios pur bilaselaʼdxiʼ laabe ne biyúbibe ximodo gusihuínnibe dxandíʼ ni. Ne laasibe nga jma stale dxiiñaʼ bíʼnibe que xcaadxi apóstol. Xi rusiidiʼ ejemplu stiʼ Pablu laanu yaʼ. Ximodo racané ejemplu stibe cani riníʼ ique qué zutiidilaʼdxiʼ Dios ca donda sticaʼ yaʼ. Pa gápanu fe lu guendaguti stiʼ Jesús, guininu paraa bicheʼnu ne guchaʼnu modo laanu, zuxhiá Jiobá ca donda stinu, neca naroʼbaʼ cani (biindaʼ 1 Timoteo 1:15, 16). Neca nabé guzananda Pablu ca xpinni Cristu, bicaa ca diidxaʼ riʼ: Nadxii «Xiiñi Dios [...] naa ne bidii xpida pur naa» (Gál. 2:20; Hech. 9:5). Racá ridúʼyanu biziidibe gúnibe ni na Dios sin guchiiñaʼ xquendabiaanibe laabe. Yanna lii yaʼ.

9, 10. 1) Xiñee ruchiiñaʼ xquendabiaaniʼ caadxi xpinni Cristu laa. 2) Xiñee cadi jneza guninanu laca laanu pur cani bíninu dxiqué.

⁹ Zándaca bíʼniluʼ xiixa dxiqué ne despué guniʼluʼ xiñee bíʼniluʼ ni. Zándaca binítiluʼ tiempu ne stipa ora gucuá íqueluʼ caadxi cosa ni qué risaca. O zándaca bininaluʼ tuuxa pur xiixa ni guniʼluʼ o cuchiiñaʼ xquendabiaaniluʼ lii pur sti cosa ni bíʼniluʼ. Xi zanda guʼnuʼ pa zacá nuuluʼ yaʼ.

¹⁰ Stale binni qué rusaana de chuʼ xizaa pur xiixa ni biʼniʼ. Runinácabe laca laacabe, purtiʼ nisi maʼ caníʼ íquecabe xi bíʼnicabe dede riuucabe triste. Peru ñee zaca chaahuiʼ guendanagana stícabe zacá la? Coʼ xa. Zuniti si binni tiempu ne stipa pa chuʼ zacá. Nga runi, lugar de gunítiluʼ tiempu pur caníʼ íqueluʼ xiixa ni qué ñaca jneza la? jma galán gúʼyaluʼ ximodo gaca chaahuiʼ ni. Casi pa bicheeneluʼ tuuxa, galán guinábaluʼ gutiidiláʼdxibe donda stiluʼ ti ganda chuʼtu tobi si sti biaje. Ne pa nuuluʼ naná yanna riʼ purtiʼ bicheeluʼ la? biʼniʼ stipa para guixéleluʼ de ni bicaa lii gucheeluʼ ti cadi guʼnuʼ ni sti biaje. O zándaca ni naquiiñeʼ si guʼnuʼ nga guni huantarluʼ yuubaʼ cadíʼdiluʼ. Pa gudiʼnu lugar guninácani laanu la? qué zabeendunu gastiʼ, zabeesícani gana laanu ne qué zudiicani lugar gúninu biaʼ gándatiʼ lu xhiiñaʼ Jiobá.

11. 1) Xi naquiiñeʼ gúninu para guilaselaʼdxiʼ ne gannaxhii Jiobá laanu. 2) Xi naquiiñeʼ gúninu para cadi guchiiñaʼ xquendabiaaninu laanu.

¹¹ Nuu xpinni Cristu rudii lugar guniná ca donda stiʼ laa ne riníʼ ique maʼ qué zanda gannaxhii Dios laa. Nuu tiru dede runi sentir maʼ qué zanda guilaselaʼdxiʼ Dios laa purtiʼ nabé naroʼbaʼ ca pecadu biʼniʼ o purtiʼ maʼ bichee stale biaje. Peru neca naroʼbaʼ ca pecadu bíʼnicabe, zanda gaca arrepentírcabe, guchaacabe modo laacabe ne guinábacabe gutiidilaʼdxiʼ Dios stóndacabe (Hech. 3:19). Zanda guilaselaʼdxiʼ Jiobá laacabe ne gannaxhii laacabe, cásica huayúnibe né stale binni. Rácabe nachaʼhuiʼ né cani raca arrepentir de guidubi ladxidóʼ ne qué rudxiibaʼ laca laa, casi Job, hombre guníʼ ca diidxaʼ riʼ: «Dxandipeʼ cayacaʼ arrepentir [ne zubaʼ] lu yu dé ne [cuchayaʼ] dé ludé» iqueʼ (Job 42:6). Maʼ guníʼ Dios xi naquiiñeʼ gúninu para cadi guchiiñaʼ xquendabiaaninu laanu: «Tu rucaachiʼ ca donda stiʼ la? qué zabeendú diʼ gastiʼ, peru tu guiníʼ cani ne gusaana cani la? zalaseláʼdxicabe laa» (Prov. 28:13; Sant. 5:14-16). Nga runi, zanda gábinu Dios paraa bicheʼnu, guinábanu gutiidiláʼdxibe donda stinu ne quixhe íquenu gúninu ni jneza para cadi gucheʼnu sti biaje (2 Cor. 7:10, 11). Pa gúninu zacá, zalaselaʼdxiʼ Dios laanu «purtiʼ laa zutiidilaʼdxiʼ guiráʼ donda» stinu (Is. 55:7).

12. 1) Cásica biʼniʼ David, xi naquiiñeʼ gúninu para cadi guchiiñaʼ xquendabiaaninu laanu. 2) Ximodo nga ruchaa Jiobá ni cá ique guni, ne xi ribeendunu ora guiénenu ni. (Biiyaʼ cuadru zeeda lu yaza riʼ.)

¹² Jma zanda gacané Jiobá laanu pa guni orarnu laa. Lu ti salmo sicarú guníʼ David guiráʼ ni nuu ndaaniʼ ladxidóʼ ne bicabi Jiobá oración stibe. Biblia na: «Nayecheʼ nga ribani hombre ni qué ugaaniʼ Jiobá donda ique, ne nayecheʼ riuu hombre ni qué rusiguii. Birá stipa stinneʼ dxi qué nibeeruaaʼ diidxaʼ, purtiʼ guidubi dxi maʼ cayuunaʼ. Naa gudxeʼ lii ca donda stinneʼ, ne qué nucaachediaʼ cani. Gunieeʼ: “Zabeʼ Jiobá guiráʼ ra maʼ bicheeʼ”. Ne lii bitiidiláʼdxiluʼ ca donda stinneʼ» (Salmo 32:2, 3, 5). Biene David cuchiiñaʼ xquendabiaaniʼ laa, purtiʼ racalaʼdxiʼ gucaachiʼ ca donda stiʼ. Cumu caʼruʼ cueeruaabe diidxaʼ la? qué ganda chuʼbe nayecheʼ ne cayuni huarani laabe. Yanna, xi bíʼnibe para bitiidilaʼdxiʼ Dios donda stibe ne gutadxí ladxidoʼbe yaʼ. Biʼniʼ orarbe Dios de gúdxibe laa guiráʼ ni bíʼnibe. Bicabi Jiobá oración stibe ne bidii laabe stipa para cadi gusaana de gúnibe ni jneza. Ngaca nga ni naquiiñeʼ guʼnuʼ. Pa gábiluʼ Jiobá guiráʼ ni nuu ndaaniʼ ladxidoʼloʼ la? naquiiñeʼ guni creluʼ dxandíʼ zucaadiágabe ca oración stiluʼ. Pa bicheeluʼ dxiqué ne dede yanna cayuniná ca donda stiluʼ lii la? biʼniʼ guiráʼ ni caquiiñeʼ guʼnuʼ para ganda gaca chaahuiʼ cani. Ora maʼ bíʼniluʼ guiráʼ nga la? naquiiñeʼ gannuʼ maʼ bicaadiaga Jiobá oración stiluʼ ne maʼ bitiidilaʼdxiʼ ca donda stiluʼ.

13, 14. 1) Xii nga ni jma naquiiñeʼ guicá íquenu gúninu yanna. 2) Xi guendarinabadiidxaʼ zanda gacané laanu guidúʼyanu xi cayúninu yanna.

¹³ Dxandíʼ zanda guiziidiʼ binni de guiráʼ ni bizaaca dxiqué, peru qué zanda cueendú binni ni galán pa puru si laani maʼ cá ique. Nga runi, lugar de chuʼnu xizaa pur ni guca dxiqué la? jma galán guicá íquenu xi cayúninu yanna ne xiruʼ zanda gúninu. Gunabadiidxaʼ laca lii: «Ñee zacaʼ arrepentir despué pur cani quixheʼ iqueʼ guneʼ yanna la? Ora maʼ gudiʼdiʼ tiempu, ñee zaníʼ iqueʼ jma galán nidxelaʼ sti modo ñuneʼ ca dxiiñaʼ stinneʼ la? Ñee cayuneʼ ni na Jiobá sin gucheeniáʼ laa yanna ti cadi gacaʼ arrepentir despué la?».

¹⁴ Cumu maʼ huaxiéʼ tiempu cayaadxaʼ para gueeda ca dxi jma nagana ca la? qué racaláʼdxinu guninanu laca laanu ora guiníʼ íquenu sicaríʼ: «Ñanda ñuneʼ jma lu xhiiñaʼ Jiobá la? Xiñee qué ñacaʼ precursor dxi ñanda ñuneʼ ni. Xiñee qué ñanda ñuneʼ stipa para ñacaʼ siervu ministerial. Ñee bineʼ stipa para gapaʼ ca guenda ni naquiiñeʼ gapa ti xpinni Cristu la? Ñee naa nga tobi de ca binni ni racalaʼdxiʼ Dios chuʼ lu guidxilayú cubi stiʼ la?». Cani gunabadiidxanu riʼ zanda gacanécani laanu guidúʼyanu pa dxandíʼ cayúninu biaʼ gándatiʼ lu xhiiñaʼ Jiobá. Pa qué gúninu ni yanna la? zándaca quixhe íquenu gúninu xiixa ni gucaa laanu gaca arrepentirnu despué (2 Tim. 2:15).

15, 16. 1) Xi huayuni stale xpinni Cristu para ganda gúnicaʼ jma lu xhiiñaʼ Jiobá. 2) Xiñee cadi naquiiñeʼ gaca arrepentirluʼ pur bisaanuʼ xiixa ni riuulaʼdxuʼ para guʼnuʼ jma lu xhiiñaʼ Reinu.

¹⁵ Ñee bisaanaluʼ xiixa ni riuuláʼdxiluʼ purtiʼ gucuá íqueluʼ gúniluʼ jma lu xhiiñaʼ Jiobá la? Zándaca maʼ qué nizaluʼ scuela roʼ o bisaanaluʼ ti negocio ra runi ganarluʼ stale para ganda gápaluʼ tiempu ti gúniluʼ jma lu xhiiñaʼ Dios. Zándaca qué nichaganaluʼ o qué ñápaluʼ xiiñiluʼ purtiʼ gucuá íqueluʼ gúniluʼ dxiiñaʼ Betel, gácaluʼ binnigola ni riganna ca neza binni ridagulisaa o misioneru, o chigacaneluʼ sti guidxi roʼ ra cabí yoo ni riquiiñeʼ para gaca adorar Jiobá. Yanna, pa maʼ gudiʼdiʼ stale iza de cayúniluʼ xhiiñaʼ Jiobá, ñee zaca arrepentirluʼ pur gudixhe íqueluʼ gúniluʼ ni la? Ñee zaníʼ íqueluʼ pur gana si guiráʼ stipa bíʼniluʼ o cadi biaʼsi ngue tiempu bizululuʼ la? Cadi dxandíʼ qué ziuu dxi guiniʼluʼ zacá la?

¹⁶ Gudixhe íqueluʼ gúniluʼ ni na Jiobá de guidubi ladxidoʼloʼ purtiʼ nadxiiluʼ laa ne racaláʼdxiluʼ gacaneluʼ xcaadxi binni guni adorar laabe. Cadi guiníʼ íqueluʼ ñeni lii jma galán pa niguixhe íqueluʼ sti cosa. Zanda chuʼluʼ nayecheʼ purtiʼ jneza nga ni gudixhe íqueluʼ gúniluʼ, iquiiñeluʼ xquendanabániluʼ para guni adorarluʼ Jiobá. Laabe qué ziuu dxi gusiaandabe guiráʼ stipa bíʼniluʼ. Ora maʼ guicaaluʼ «enda nabani ni qué zaluxe», zudiibe lii stale ndaayaʼ jma que biaʼ guníʼ íqueluʼ (Sal. 145:16; 1 Tim. 6:19).

17, 18. 1) Xiruʼ biʼniʼ Pablu para cadi guchiiñaʼ xquendabiaaniʼ laa. 2) Ximodo zanda chinándaluʼ ejemplu stiʼ Pablu.

¹⁷ Xiruʼ biʼniʼ Pablu para cadi guchiiñaʼ xquendabiaaniʼ laa yaʼ. Stiidxaʼ Dios cayabi laanu xi guniʼbe: «Rusiaanda irá ni ma udiʼdiʼ, ne rudxiee luaʼ ni cabeza naa neza ziaaʼ, ti ganda chindaya icaa premiu ni naguixhe Dios» (biindaʼ Filipenses 3:13, 14). Qué niníʼ ique Pablu lu guiráʼ ca cosa malu ni biʼniʼ dxi guyuu lu religión stiʼ ca judíu, sínuque biquiiñebe tiempu ne stipa stibe para guzuubabe stiidxaʼ Dios ti ganda guicaabe guendanabani ni qué zaluxe.

¹⁸ Xi rusiidiʼ ca diidxaʼ guníʼ Pablu riʼ laanu yaʼ. Rusiidicani laanu cadi chúʼpenu xizaa pur cani bíninu, purtiʼ ni maʼ guca la? maʼ guca. Naquiiñeʼ gucáʼ íquenu ni cabeza laanu. Dxandíʼ qué ziuu dxi guiaandaʼ laanu guiráʼ ra bicheʼnu, peru laaca cadi caquiiñeʼ ugáʼninu donda íquenu guiráʼ ora. Cadi galán chuʼnu xizaa pur guiráʼ ni maʼ guca, sínuque gúninu ni na Jiobá né guiráʼ stipa stinu ne guiníʼ íquenu lu ca cosa sicarú ni chigudiibe laanu.