Ximodo chuʼnu nayecheʼ

GUIRANU riuláʼdxinu chuʼnu nayecheʼ, cadi dxandíʼ la?... Peru cadi guiráʼ diʼ binni nga dxandíʼ riuucaʼ nayecheʼ. Nannuʼ xiñee la?... Purtiʼ qué huaziidicabe ximodo nga chúʼcabe nayecheʼ. Riníʼ íquecabe riquiiñeʼ gápacabe stale cosa ti chúʼcabe zacá. Peru, ora maʼ nuucabe nayecheʼ qué rindaa diʼ ni.

Maestru Ni Jma Nanna Gusiidiʼ que bisiénebe xii nga caquiiñeʼ gúninu ti chuʼnu nayecheʼ, nabe: «Jma nayeche ni rudii que ni ricaa» (Hechos 20:35). Yanna pue, ximodo zanda chuʼnu nayecheʼ.... Ziuʼnu nayecheʼ ora gudiʼnu xiixa stuudxi binni ne ora gacanenu laacabe. Ñee nannuʼ nga la?...

Guiníʼ íquenu tuudxihuiiniʼ xi riníʼ ndiʼ. Ñee guníʼ Jesús qué ziuu binni ni gusigáʼdecabe laa xiixa ca nayecheʼ la?... Coʼ, cadi nga diʼ guniʼbe. Ñee riuláʼdxiluʼ gusigáʼdecabe lii xiixa la?... Guiráʼ binni riulaʼdxiʼ. Riéchenu ora gudiicabe laanu xiixa ni galán.

Peru Jesús guníʼ jma nayecheʼ riuʼnu ora laanu nga gudiʼnu. Tu binni nga raʼbuʼ jma huasigaʼdeʼ laanu que stuudxi yaʼ.... Ya, laabe nga Jiobá Dios.

Biblia na «rudii be laanu enda nabani ne irá ni caquiʼñe nu». Rudiibe laanu nisaguié ne biaaniʼ stiʼ gubidxa para igaa ca yagahuiiniʼ ca ne zacá gápanu ni guidoʼno (Hechos 14:17; 17:25). Nga runi qué ridxagayaadinu ora guiníʼ Biblia Jiobá nga ti Dios ni nayecheʼ (1 Timoteo 1:11). Gudiʼnu xiixa stuudxi binni la? nga nga tobi de cani rusiecheʼ Dios, ne laaca zanda gusiecheʼ ni laanu.

Peru, xi zanda gudiʼnu xcaadxi binni yaʼ. Lii xi raʼbuʼ.... Nuu tiru ni riuláʼdxinu gusigáʼdenu ca nabé caru ni. Pa ridoo ni ndaaniʼ ti tienda la? riquiiñeʼ quíxenu saca ni. Nga runi, pa caníʼ íqueluʼ siluʼ xiixa racá napuʼ xi gutopaluluʼ bueltu para siluʼ ni.

Peru cadi guiráʼ diʼ ni gusigáʼdeluʼ ca riquiiñeʼ guidxela ni ra tienda, casi ti xiga nisa nagaʼndaʼ nabé nanixe ni ora nandáʼ. Pa gusigáʼdeluʼ ni tuuxa binni cayati nisa la? zannuʼ ximodo nga riecheʼ binni ora gudii.

Zándaca ti dxi gunineluʼ jñaaluʼ dxiña de almendra. Ñee ziuuluʼ jma nayecheʼ pa goloʼ guiráʼ ni lii si la?... Galán nga gusigáʼdeluʼ caadxi ca xhamíguluʼ o xhamígaluʼ. Ñuláʼdxiluʼ ñúniluʼ nga la?...

Cásica Maestru Ni Jma Nanna Gusiidiʼ que ne ca apóstol stiʼ gúnnacabe ximodo nga riecheʼ binni ora gudii. Nannuʼ xi bidiicabe stuudxi binni la?... Ti cosa jma galán que guiráʼ ni nuu. Laacabe runibiáʼcabe ca diidxaʼ nacubi ne galán ni biziidicabe de Dios, ne guyuuláʼdxicabe guiníʼcabe de laani ne qué ninádicabe nicaacabe bueltu pur bisiidicabe ni.

Ti dxi apóstol Pablu ne xhamigu, discípulo Lucas, binibiáʼcabe ti gunaa ni laaca guyuulaʼdxiʼ ganna ximodo nga riecheʼ binni ora gudii. Bidxaagacabe laabe gaxha de ti guiiguʼ ra guyécabe purtiʼ binadiágacabe runi orar binni Dios raqué. Ne dxandíʼ; ora yendácabe raqué biiyacabe stale gunaa cayuni orarcaʼ.

Apóstol Pablu bizulú guniʼné ca gunaa que ca diidxaʼ nacubi ne galán stiʼ Jiobá Dios ne Gobiernu stiʼ. Tobi de laacabe láʼ Lidia, gunaa riʼ nabé bicaadiágabe stale. Despué, Lidia nuube gusihuínnibe pabiáʼ riuláʼdxibe ca diidxaʼ nacubi ne galán ni deruʼ binadiágabe que. Ngue runi gúdxibe Pablu ne Lucas: «Pa na tu dxandí ma bine cre Señor la? latáʼ guiaana tu ralidxeʼ». Ne zaqué bíʼnibe para biaanacaʼ ralídxibe (Hechos 16:13-15).

Lidia biecheʼ stale purtiʼ gúpabe ca xpinni Dios ralídxibe. Gunnaxhiibe laacaʼ purtiʼ gucanecaʼ laabe guiziidibe de Jiobá ne de Jesús, ne ximodo gápabe guendanabani ni qué zaluxe. Biéchebe purtiʼ gunda bidiibe Pablu ne Lucas ni gocaʼ ne ra guiziiláʼdxicaʼ. Lidia guyuu nayecheʼ ora bidii purtiʼ bíʼnibe ni de guidubi ladxidoʼbe. Nga nga ni naquiiñeʼ guietenaláʼdxinu guiranu. Zándaca chuʼ tuuxa gabi laanu naquiiñeʼ gusigáʼdenu xiixa. Peru pa qué gudiʼnu ni de guidubi ladxidoʼno la? qué ziúʼdinu nayecheʼ.

Casi pa ñápaluʼ tuudxi dxiñahuiiniʼ ni chitoloʼ ne naa ñabeʼ lii nudiiluʼ tuudxi de laani sti baʼduʼ, ñécheluʼ nudiiluʼ ni laabe la?... Peru pa ñácabe ti xhamíguluʼ ni guizáʼ nadxiiluʼ yaʼ. Ne pa liipeʼ nga raʼbuʼ gudiiluʼ ni laabe, cadi ñécheluʼ la?...

Nuu tiru nadxiinu stálepeʼ tuuxa binni, ngue runi riuláʼdxinu gudiʼnu laabe guiráʼ ni nápanu neca cadi guiaananenu xiixa. Ora jma gannaxhiinu Dios la? jma riuláʼdxinu gudiʼnu laabe guiráʼ ni nápanu.

Maestru Ni Jma Nanna Gusiidiʼ que biiyabe ti gunaa pobre ni nadxii Dios casi modo guninu ca, ndaaniʼ yuʼduʼ stiʼ Jerusalén. Neca chupa monedahuiiniʼ si nga guiráʼ ni nápabe, peru guluube cani ndaaniʼ caja ra riaba bueltu para gusigáʼdebe ni yuʼduʼ que. Guirutiʼ tu nucaa laabe nuguube ni, ne stale de cani nuu raqué qué ñuuyadícabe laabe. Bíʼnibe ni purtiʼ biáleni de laabe ne purtiʼ nadxiibe Jiobá stálepeʼ. Nabé guyuube nayecheʼ purtiʼ gunda bidiibe (Lucas 21:1-4).

Nuu stale modo zanda gudiʼnu. Zanda gaʼbuʼ naa caadxi de laani la?... Pa gudiʼnu purtiʼ dxandíʼ nápanu gana gúninu ni la? ziuʼnu nayecheʼ. Pur nga, Maestru Ni Jma Nanna Gusiidiʼ que cayabi laanu laaca naquiiñeʼ gudiʼnu (Lucas 6:38). Pa guzúʼbanu stiidxabe la? zusiéchenu xcaadxi binni. Ne laanu laaca ziuʼnu jma nayecheʼ.