Gudixhe ique modo ganda gúniluʼ xhiiñaʼ Jiobá nayecheʼ

«¡STI biaje ca qué niree ni gudixheʼ guneʼ que!». Panda biaje maʼ huaninu sicaríʼ purtiʼ qué ñanda ñúninu ni gudixhe íquenu. Zándaca ti dxaapaʼ Testigu guidxaga pur runi tender baʼduʼ riʼniʼ stiʼ ne pur nga maʼ guiree gana guni jma lu xhiiñaʼ Dios. O sti xpinni Cristu zándaca pur modo biniisi ralidxi guni sentir cadi cayuni gastiʼ lade ca binni ridagulisaa, ne pur nga guiníʼ ique qué liica racané. O zándaca ti gunaa Testigu, ni maʼ nagola, nabé chuʼ triste purtiʼ maʼ qué ganda guni xhiiñaʼ Dios biaʼ biʼniʼ ni dxiqué, dxi gupa stale stipa ne biʼniʼ ni sin tu ñacané laa. Christiane, ti xpinni Cristu, ni qué randa runi xhiiñaʼ Jiobá biaʼ racalaʼdxiʼ pur guendanagana ni napa binnilidxi, guníʼ: «Nuu tiru ruunaʼ ora gunadiagaʼ libana ra caguucabe gana laadu gácadu precursor».

Xi zanda gúninu ora guni sentirnu zacá yaʼ. Xi huayuni caadxi xpinni Cristu para gudiicaʼ cuenta nuu cosa ni maʼ qué zanda gúnicaʼ yaʼ. Xi zabeendunu pa gúninu xhiiñaʼ Jiobá biaʼ ganda si yaʼ.

Naquiiñeʼ gánnanu nuu cosa ni qué zanda gúninu

Apóstol Pablu bidii conseju riʼ: «Laguieche irá dxi purti xpinni Señor laatu. Ne sti tiru rabe laatu, laguiecheʼ». De raqué gúdxibe laacaʼ ximodo chuʼcaʼ zacá: «Lagaca nachaʼhui [o «binni riene», NM] dede izaabi stiidxa tu» o ganna binni zacá laatu (Fili. 4:4, 5). Zacá ni, para chuʼnu nayecheʼ ora gúninu xhiiñaʼ Dios la? naquiiñeʼ guiénenu nuu ni maʼ qué zanda gúninu pur xiixa ni bizaacanu. Pa gacaláʼdxipenu ugaandanu xiixa ni qué zanda gúninu la? zusidxáganu laanu. Peru laaca cadi jneza diʼ nga guiníʼ íquenu pur xiixa ni cazaacanu maʼ qué zanda gúninu jma lu xhiiñaʼ Dios neca nánnanu zanda gúninu ni.

Intiica ni cazaacanu, Jiobá ribeza gúninu xhiiñaʼ jneza, o de guidubi ladxidoʼno (Col. 3:23, 24). Pa qué gúninu ni zacá la? qué zusihuínninu dxandíʼ ni gúdxinu Dios ora bidiʼnu laanu laabe (Rom. 12:1). Laaca qué ziuʼnu nayecheʼ biaʼ racaláʼdxinu pa qué gúninu xhiiñaʼ Jiobá de guidubi xhiálmanu, cásica runi xcaadxi xpínnibe ni. Ne qué zacaanu xcaadxi ndaayaʼ ni ricaacabe (Pro. 10:22).

Diidxaʼ ni biquiiñecabe dxi gucuá Biblia primé que riniʼni de tuuxa ni «[r]iuu razón», ne diidxaʼ riʼ laaca zanda gábicabe ni ti binni ni riene o ni ruzuubaʼ diidxaʼ (Sant. 3:17). Diidxaʼ ca laaca zanda gábicabe ni ti binni ni qué ricá tema guni xiixa ni maʼ qué zanda guni. Nga runi, ti binni ni riuu razón o riene la? zuuyaʼ xi zanda guni ne xi qué zanda. Ñee nagana gúnicabe nga la? Nuu caadxi xpinni Cristu qué rucaadicaʼ stiʼ binni guni xiixa ni qué zanda guni, peru laacaʼ riniʼcaʼ zanda gúnicaʼ xiixa neca qué zanda gúnicaʼ ni. Guiníʼ íquenu ndiʼ: pa nudiʼnu cuenta nabé maʼ cadxaga ti xhamígunu pur dxiiñaʼ stiʼ, ñee cadi ñábinu laabe nuchaabe ni cayúnibe que para cadi nusidxágabe laabe la? Zacaca nga laanu, naquiiñeʼ gudiʼnu cuenta xii nga cani maʼ qué zanda gúninu (Pro. 11:17).

Cani jma racalaʼdxiʼ guni stale cosa neca qué zanda gúnicaʼ ni nga cani bicaa bixhózecaʼ laacaʼ gúnicaʼ jma que biaʼ naquiiñeʼ ñúnicaʼ. Chupa chonna de cani nahuiiniʼ ca guníʼ íquecaʼ pa gúnicaʼ guiráʼ ni gudxi bixhózecaʼ ne jñaacaʼ laacaʼ jnézapeʼ la? zannaxhiicabe laacaʼ. Pa zacaca nga bisiniisicabe laanu la? zándaca riníʼ íquenu zacaca nga Jiobá. Peru naquiiñeʼ gánnanu nadxii Jiobá laanu purtiʼ cayúninu xhiiñabe de guidubi xhiálmanu. Biblia cayabi laanu nanna dxichi Jiobá «ximodo guyanu, ne rietenaláʼdxibe de yú laanu» (Sal. 103:14). Laabe nánnabe xi zanda gúninu ne xi qué zanda, ne nadxiibe laanu purtiʼ neca zacá laanu la? cayúninu ni nabe ne stale gana. Pa guietenaláʼdxinu cadi naduxhuʼ Jiobá ne laanu la? jma nagueenda zudiʼnu cuenta caquiiñenu gacanebe laanu ne qué zucaa íquenu gúninu ni qué zanda gúninu (Miq. 6:8).

Neca nuu tu nanna ndiʼ la? raca nagana laacaʼ gúnicaʼ biaʼ ni zanda si. Pa zacá nuuluʼ la? xiñee qué guinábaluʼ conseju ti xhamíguluʼ ni maʼ huaniisi ne runibiáʼ chaahuiʼ lii yaʼ (Pro. 27:9). Zándaca racaláʼdxiluʼ gácaluʼ precursor regular. Pa zacá ni la? galán nga ni naguixhe íqueluʼ ca. Peru zándaca nagana cayaca para lii gácaluʼ ni. Xhamíguluʼ ca zanda gacané lii para gúʼyaluʼ xi naquiiñeʼ gúniluʼ ti ganda gácaluʼ ni. O laaca zanda gábibe lii gúʼyaluʼ pa zanda gácaluʼ precursor dxi rápaluʼ gana purtiʼ laaca naquiiñeʼ gudiiluʼ ni caquiiñeʼ binnilídxiluʼ. Laabe zanda gacanebe lii gúʼyaluʼ pa zanda gucheecheluʼ diidxaʼ jma o pa caquiiñeʼ gúniluʼ xcaadxi cosa para gácaluʼ precursor. Lu ti guendaxheelaʼ la? hombre ca nga ni jma zanda gacané gunaa ca ti gudii tiempu laa guni ni naguixhe ique. Pa gunaa ca quixhe ique jma gucheeche diidxaʼ lu xiixa beeu la? laabe zanda gábibe laa guiziilaʼdxiʼ chaahuiʼ ante guzulú guni ni. Zacá zapa xheelabe stipa ne ziuu nayecheʼ ora gucheeche diidxaʼ.

Bicaa ique ugaandaluʼ ni zanda gúniluʼ

Zándaca pur guendayooxhoʼ o guendahuará maʼ cadi guʼnuʼ biaʼ ñuuláʼdxiluʼ lu xhiiñaʼ Jiobá. O pa nahuiiniruʼ ca xiiñiluʼ, zándaca guiníʼ íqueluʼ maʼ qué zanda guʼndaʼ chaahuiluʼ Stiidxaʼ Dios ne gucaadiaga chaahuiluʼ ca guendaridagulisaa ca purtiʼ naquiiñeʼ gápaluʼ laacabe. Peru zándaca pur guicá íqueluʼ guiráʼ nga maʼ qué gudiiluʼ cuenta xi zándaruʼ gúniluʼ.

Raca stale iza guyuu ti levita ni bizaaca zacagá ndaaniʼ guidxi Israel. Neca bíʼnibe dxiiñaʼ ndaaniʼ yuʼduʼ que chupa semana lu ti iza la? gucaláʼdxibe ñúnibe dxiiñaʼ ra nuu altar que sin nireebe de raqué. Nécaxa galán nga ni gucaláʼdxibe ca la? qué liica zanda ugaandabe ni (Sal. 84:1-3). Xi gucané levita que para cadi ñuu triste pur ngue yaʼ. Ni gucané laabe nga guiénebe maʼ ti ndaayaʼ nabé risaca ngue chuʼbe neca ti dxi lu patiu stiʼ yuʼduʼ que (Sal. 84:4, 5, 10). Zaqueca nga laanu, laaca naquiiñeʼ gusisácanu ca dxiiñaʼ ni zanda si gúninu ndaaniʼ xquidxi Dios, lugar de guiníʼ íquenu ni qué zanda gúninu.

Guiníʼ íquenu ni cadiʼdiʼ Nerlande, ti gunaa xpinni Cristu de Canadá. Laabe qué rizabe ne zúbabe lu silla de rueda. Nga runi, guníʼ íquebe qué zándapeʼ gucheechebe diidxaʼ. Peru bichaabe modo guníʼ íquebe ora bíʼyabe zanda gucheechebe diidxaʼ ra nuu caadxi tienda naroʼbaʼ ni riaana gaxha de ralídxibe. Nerlande guníʼ: «Riniáʼ silla de rueda stinneʼ gaxha de ti banguʼ ni nuu raqué. Guizáʼ riuuladxeʼ guinieniáʼ tutiica gueeda guiziilaʼdxiʼ raqué ti ratu de stiidxaʼ Dios». Modo rucheechebe diidxaʼ ca guizáʼ rusiecheʼ laabe.

Naquiiñeʼ guyúbinu modo gúninu xhiiñaʼ Dios

Guiníʼ íquenu ti barcu de cani napa vela que, barcu riʼ ziguxooñeni lu nisa dede zigucaanáʼ bi ni. Málasi biaba ti nisaguié roʼ ne ti bi yooxhoʼ, ne nga rucaa capitán que guindeteʼ ca vela stiʼ barcu que. Nécaxa qué zanda gucueezabe nisaguié que ne bi que la? zanda guyúbibe ximodo gucueezabe barcu que. Zaqueca nga laanu, nuu tiru qué zanda gucueezanu ca guendanagana ni gápanu, ni zeeda gaca nisaguié roʼ ne bi yooxhoʼ que. Peru zanda guiníʼ íquenu gúninu xhiiñaʼ Dios pa gánnanu iquiiñenu stipa stinu ne guiníʼ íquenu jneza. Pa gúninu zacá la? ziuʼnu nayecheʼ ne zuni sentirnu galán (Pro. 11:2).

Yanna, guidúʼyanu caadxi ejemplu. Pa nabé ridxágaluʼ lu xhiiñaluʼ la? biʼniʼ stipa pur cadi guidxágapeluʼ dxi nápaluʼ guendaridagulisaa ti gápaluʼ gana para cheluʼ ni ne para chúʼneluʼ ca bíʼchiluʼ ne ca bizáʼnaluʼ nayecheʼ. O pa tuuxa bizáʼnanu que ganda chigucheeche diidxaʼ de yoo pur yoo purtiʼ huará xiiñiʼ la? zanda guni invitarbe sti gunaa para gucheechecabe diidxaʼ pur teléfono ralídxibe laga nisiaasiʼ xiiñibe.

Yanna, pa pur ni cazaacaluʼ ca qué ganda gúʼndaluʼ cani chiguieeteʼ lu guendaridagulisaa ca yaʼ. Biindaʼ cani ganda si, peru biindaʼ chaahuiʼ cani. Dxandíʼ, ne caadxi si guchaʼnu ni maca gudixhe íquenu gúninu la? zándaruʼ gúninu xhiiñaʼ Dios ne ziéchenu ora gúninu ni.

Dxandíʼ, naquiiñeʼ gánnanu ziuu ora zápanu xidé guchaʼnu ni maʼ gudixhe íquenu ne zaquiiñenu stale stipa para ganda gúninu ni. Casi ejemplu stiʼ Serge ne Agnès, de Francia, laacaʼ gúpacaʼ xidé bichaacaʼ ni maca gudixhe íquecaʼ gúnicaʼ. Serge guníʼ: «Ora gúnnadu nacaxiiñiʼ Agnès, gulee xaíquecadu gácadu misioneru». Serge, maʼ napa chupa dxaapahuiiniʼ guizáʼ sicarú yanna, laabe guniʼbe xi bíʼnicabe despué laabe ne xheelabe, nabe: «Cumu maʼ qué ñanda ñuudu sti guidxi de misioneru la? gudixhe íquedu gácadu ni ndaaniʼ xquídxidu, ngue runi guyuudu lade ti grupu de xpinni Cristu ni riníʼ sti diidxaʼ». Xi huabeendúcabe yaʼ. Serge na: «Runi sentirdu cayacanedu lade ca binni ridagulisaa».

Ti gunaa Testigu ni napa jma de 70 iza ni láʼ Odile, laaca nabeza Francia. Laabe nápabe ti guendahuará ni láʼ artrosis lu xíbibe, pur nga qué randa ruzuhuaabe xadxí. Guizáʼ triste biʼniʼ sentir Odile purtiʼ maʼ qué ñanda nucheechebe diidxaʼ pur guendahuará que. Peru lugar de nireebe gana la? bizulube bicheechebe diidxaʼ pur teléfono. Laabe guniʼbe: «Nin cadi nagana guni binni ni ne guizáʼ bisiécheni naa jma que ni guníʼ iqueʼ». Ni bíʼnibe riʼ bicaani laabe chuʼbe nayecheʼ sti biaje purtiʼ qué nusaanabe de nucheechebe diidxaʼ.

Ora quixhe íquenu ni zanda gúninu ribeendunu ni galán

Para cadi chúʼpenu triste la? naquiiñeʼ gánnanu nuu cosa ni qué zanda gúninu. Pa quixhe íquenu xiixa ni zanda gúninu la? zanda ugaandanu cani neca chuʼ ni gucueeza laanu. Zacá ziuʼnu nayecheʼ ne cani zanda gúninu, neca guihuinni huaxiéʼ ni (Gál. 6:4).

Ne pa guiénenu nuu ni qué zanda gúninu la? laaca zanda guiénenu nuu ni qué zanda guni xcaadxi xpinni Cristu. Ndiʼ zacané laanu gudiʼnu xquíxepeʼ laacabe pur guiráʼ ni gúnicabe pur laanu, ne zacá zusihuínninu racaláʼdxinu gacanenu ne zusihuínninu riénenu binni (1 Ped. 3:8). Cadi guiaandaʼ lii, cadi canabaʼ diʼ Bixhózenu Jiobá laanu jma de ni qué zanda gudiʼnu laabe. Ne pa quixhe íqueluʼ gúniluʼ xhiiñaʼ Jiobá modo ganda la? ziuuluʼ nayecheʼ.

[Ni caníʼ yaza 29]

Para guiéchenu ora gúninu xhiiñaʼ Dios la? naquiiñeʼ gánnanu qué zanda gúninu guiráʼ ni racaláʼdxinu ne zuchaʼnu ni maʼ gudixhe íquenu gúninu

[Dibuju/foto ni zeeda lu yaza 30]

Nayecheʼ nuu Nerlande purtiʼ cayuni stipa pur gucheeche diidxaʼ biaʼ ganda

[Dibuju/foto ni zeeda lu yaza 31]

Ca guendanagana ni rápanu ca rucaacani laanu guchaʼnu ni maʼ gudixhe íquenu gúninu

[Ra gucuaacabe dibuju o foto]

© Wave Royalty Free/age footstock

[Dibuju/foto ni zeeda lu yaza 32]

Nabé nayecheʼ nuu Serge ne Agnès purtiʼ maʼ gudixhe íquecaʼ ugaandacaʼ xcaadxi guenda