Stiidxaʼ Jiobá nabani
Cani naquiiñeʼ gánnanu de carta ni gucuá ra nuu ca xpinni Cristu de Galacia (Gálatas), de Éfeso (Efesios), de Filipos (Filipenses) ne de Colosas (Colosenses)
APÓSTOL Pablu gunna cabeechú ca judíu (cani rucaa binni guni ni na ca Ley gucuaa Moisés) que «ca xpinni Cristu» ni nuu Galacia para cadi guni adorarcaʼ Dios jneza. Nga runi, bicaabe ca carta ca ra nuu ca binni ridagulisaa ca (Gál. 1:2). Carta ni bicaabe biaʼ lu iza 50 ne 52 ca cudiicani stale conseju ne culídxecani ca xpinni Cristu.
Chii iza despué dxi deguyoo Pablu Roma pur guniʼné binni stiidxaʼ Cristu que la? bicaabe carta ra nuu ca binni ridagulisaa de Éfeso, de Filipos ne de Colosas para gudiibe conseju ca xpinni Cristu ne uguube gana laacaʼ (Efe. 3:1). Yanna riʼ laaca zanda guizíʼdinu stale de cani gucuá lu ca carta stiʼ ca de Galacia, de Éfeso, de Filipos ne de Colosas (Heb. 4:12).
XIMODO NGA MAʼ «BIXÁ STONDA» CA XPINNI CRISTU
Cumu ca judíu que gucaláʼdxicaʼ nusabayucaʼ apóstol Pablu la? nga runi gúdxibe laacaʼ chupa chonna cosa de cani bizaacabe para gunda biluiʼbe laacaʼ ximodo beeda gácabe apóstol (Gál. 1:11–2:14). Ne para gusihuinni Pablu cadi dxandíʼ ni rusiidicabe la? gúdxibe laacaʼ: «Iruti zuxhá Dios stonda purti si guni ni na ley sínuque ra guni cre Jesucristu» (Gál. 2:16).
Chigusiénenu caadxi textu zeeda lu Biblia:
3:16-18, 28, 29. Ñee dede yanna nuu pactu ni bininé Dios Abrahán que la? Dede yanna. Pactu stiʼ Ley que, qué ñuxhádiʼni pactu ni biʼniné Dios Abrahán. Nga runi, despué de bixá pactu stiʼ Ley que guyuuruʼ pactu ni biʼniné Dios Abrahán que (Efe. 2:15). Cani chiguicaa ni bizabiruaa Dios que nga cani zá de Abrahán: Jesucristu, ni jma risaca ni zá de Abrahán, ne ca «xpinni Cristu».
6:2. Xii nga «ni gudixhe Cristu guni nu». Nga nga guiráʼ ni bisiidibe ne ni biʼniʼ mandarbe gúninu, casi «ganaxhii saa[nu]» (Juan 13:34).
6:8. Ximodo nga ruyubi binni «ni na Espíritu Santu». Pa guibáninu jneza la? espíritu Santu zacané laanu, ne zacá nga ruyúbinu ni nani. Para guibáninu jneza naquiiñeʼ gúninu xhiiñaʼ Dios ndaaniʼ xquidxi.
Xi rusiidiʼ cani laanu:
1:6-9. Cani naca binnigola lade ca binni ridagulisaa naquiiñeʼ guyúbicaʼ nagueenda ximodo gaca chaahuiʼ xiixa guendanagana lade ca xpinni Dios. Pa iquiiñecabe Biblia ne guiníʼcabe xiixa ni gacané xcaadxi gudii cuenta cadi jneza ni caníʼ ique la? jma nagueenda zusihuínnicabe ni cadi jneza cayaca lade ca xpinni Cristu ca.
2:20. Ni gudixe Jesús pur laanu ca nga ni bisigaʼdeʼ Dios cada tóbinu. Zacá nga naquiiñeʼ guidúʼyanu ni (Juan 3:16).
5:7-9. Pur guidxaaganu binni ni qué runi ni jneza la? maʼ qué zuzúʼbanu diidxaʼ. Nga runi, cadi naquiiñeʼ guidxaaganu laacabe.
6:1, 2, 5. «Cani zinanda Espíritu Santu» zanda gacané laanu gudxíʼlunu ca guendanagana ni gápadu pur gucheʼnu. Peru cada tobi de laanu caquiiñeʼ guni ni canabaʼ Dios laa, purtiʼ xcaadxi binni qué zanda gúnicaʼ ni pur laanu.
CAYACA GUIRÁʼ NI NUU GUIBÁʼ NE NDAANIʼ GUIDXILAYÚ TOBI SI, NE XAÍQUE STIʼ GUIRÁʼ XIXÉ NI NGA CRISTU
Para ganda gusihuinni Pablu lu carta ni bicaa ra nuu ca Efesios que pabiáʼ nga risaca chuʼ ca xpinni Cristu tobi si la? guníʼ naquiiñeʼ «chuʼ irá ni nuu ibáʼ ne irá ni nuu ndaani guidxilayú tobi si, ne gaca Cristu xaíque sti irá xixé». Cristu bidii «gracia binni para guni xhiiña» ti guiranu «gaca nu tobi si lu ni runi cre nu» (Efe. 1:10; 4:8, 13).
Para ganda gusisaca ca xpinni Cristu Dios ne chuʼcaʼ tobi si la? naquiiñeʼ guibánicaʼ «modo naguixhe Dios» ne «guni[caʼ] ni chuʼlaʼdxi stobi, purti ridxibi[caʼ] Dios». Laaca zanda iquiiñecaʼ «irá ni ma bidii Dios» laacaʼ para cadi gusaba Binidxabaʼ laacaʼ (Efe. 4:24; 5:21; 6:11).
Chigusiénenu caadxi textu zeeda lu Biblia:
1:4-7. Ximodo nga maca gudixhe Dios ziuu caadxi xpinni Cristu ni bibí ne espíritu santu dede ante gálecaʼ. Dios maca gudixhe ziuu ti grupu ni bibí, peru qué niguíxhebe tupeʼ nga cani gueeda gaca de grupu ca. Bíʼnibe ni ante chuʼ guiráʼ binni ruchee ni nuu lu Guidxilayú riʼ. Zanda guininu ante gale primé binni ni ruchee. Ca diidxaʼ ni guníʼ Jiobá lu Génesis 3:15 ca maca biluíʼcani zuni mandarné caadxi xpinni Cristu laa guibáʼ (Gál. 3:16, 29).
2:2, NM. Xiñee ruchaagacabe espíritu stiʼ guidxilayú riʼ ne bi, ne xiñee rieeteʼ runi mandarni. Ruchaagacabe espíritu ca ne bi, purtiʼ bi ca nuu guiráʼ ladu. Ne espíritu ca nga xpiaʼ binni casi cani qué riuulaʼdxiʼ gaca mandar ne qué riná guzuubaʼ diidxaʼ, ne guiráʼ ladu nga nuu binni zacá (1 Cor. 2:12). Ne rieeteʼ runi mandarni purtiʼ sin gudii binni cuenta runi ni nani ne qué randa rucueeza ni.
2:6. Ximodo nga nuu ca xpinni Cristu ni bibí ca «ibáʼ» pa nuurucabe lu Guidxilayú riʼ yaʼ. «Ibáʼ» ni cayeeteʼ lu textu riʼ cadi laa diʼ ni nga guibáʼ ra maca guníʼ Dios chuʼ ca xpinni Cristu ca, sínuque laani nga puestu ni nápacabe nezalú Jiobá purtiʼ maʼ «uluu Dios Espíritu Santu ndaaniʼ ladxidóʼ[cabe] casi ti seña ma xpinni laa[cabe]» (Efe. 1:13, 14).
Xi rusiidiʼ cani laanu:
4:8, 11-15. Jesucristu nga gulee caadxi hombre de lu naʼ Binidxabaʼ, ne guluube laacaʼ lade ca binni ridagulisaa para gacanecaʼ ca xpinni Cristu. Pa guzúʼbanu stiidxaʼ cani zaniruʼ lade ca binni ridagulisaa ne gacanenu laacaʼ la? zusihuínninu «[nadxii]saa nu, ti jma rusi gaca né nu Cristu tobi si. Laa nga xaíque stinu» (Heb. 13:7, 17).
5:22-24, 33. Ca gunaa ni maʼ bichaganáʼ cadi naquiiñeʼ si guzuubacaʼ stiidxaʼ xheelacaʼ sínuque laaca naquiiñeʼ gápacaʼ respetu laacabe. Ne zahuinni ni ora gácacabe nachaʼhuiʼ ne nadóʼ ora guiníʼcabe galán de xheelacabe nezalú binni ne gacanécabe laacaʼ lu cani quixhe íquecaʼ gaca ti guiree cani jneza (1 Ped. 3:3, 4; Tito 2:3-5).
5:25, 28, 29. Cásica runi hombre dxiiñaʼ para gapa ni iquiiñeʼ la? zacaca naquiiñeʼ guni dxiiñaʼ para gudii ni caquiiñeʼ xheelaʼ, guʼyaʼ ximodo runi sentirbe ne gacané laabe chuʼbe galán ne Jiobá. Ora guiníʼnebe xheelabe laaca naquiiñeʼ gusihuínnibe nadxiibe laa ne cueebe biaʼ tiempu caquiiñeʼ para guni tenderbe laa.
6:10-13. Para cadi gusaba ca demonio ca laanu la? nápanu xidé iquiiñenu guiráʼ ni maʼ bidii Dios laanu.
NAQUIIÑEʼ «IBANI NU BIAʼ MA BIZIʼDI NU»
Lu carta ni bicaa Pablu ra nuu ca xpinni Cristu de Filipos que la? guniʼbe pabiáʼ risaca gannaxhii binni. Laabe guniʼbe: «Rinaba laabe acané be laatu jma rusi ganaxhii saa tu ne guiene chaahui tu xi racalaʼdxi be». Ne para cadi guiníʼ íquecaʼ maʼ nánnacaʼ xi gúnicaʼ la? bidiibe conseju riʼ laacaʼ: «Laucaalaʼdxi guni tu ni jneza, dede dxi ilá chaahui tu. Lagaca nadóʼ ne laidxibi» (Fili. 1:9; 2:12).
Pablu cayabi guiráʼ cani maʼ zuhuaa chaahuiʼ lu stiidxaʼ Dios gucá íquecaʼ guicaacaʼ «ni naguixhe Dios ibáʼ», ne laaca guniʼbe: «Naquiiñe guni nu ne ibani nu biaʼ ma biziʼdi nu» (Fili. 3:14-16).
Chigusiénenu caadxi textu zeeda lu Biblia:
1:23, NM. Xi chupa cosa bicaa Pablu guiníʼ ique xi naquiiñeʼ guni, ne xii nga gucaláʼdxibe. Pur modo nuube que la? qué guidxélabe xi gúnibe, chupa si cosa nexheʼ nezalube: o guibánibe o gátibe (Fili. 1:21). Neca qué niníʼ Pablu gunáʼ nga ni cuiʼ la? guniʼbe xipeʼ racaláʼdxibe: chuʼbe ra nuu Cristu (Fili. 3:20, 21; 1 Tes. 4:16). Guca nga dxi maʼ nuu Cristu lade binni, zacá gunda gucuaabe premiu ni napa Jiobá para laabe (Mat. 24:3).
2:12, 13. Ximodo nga racané Jiobá laanu «uluiʼlaʼdxi [n]u guni [n]u ni na, ne zaqueca ti ganda guni [n]u ni». Espíritu santu stiʼ Jiobá racané laanu guiníʼ íquenu ne gacaláʼdxinu gúninu jma lu xhiiñabe. Nga rusihuinni cayacané Dios laanu guilanu.
Xi rusiidiʼ cani laanu:
1:3-5. Neca pobre ca de Filipos que la? nabé gucanécabe de guidubi ladxidóʼcabe, ne zacá bidiicabe ti ejemplu sicarú (2 Cor. 8:1-6).
2:5-11. Jesús qué nudxiibaʼ laa, peru cadi purtiʼ bidxíbibe, sínuque purtiʼ gudixhe íquebe gúnibe ni jneza. Ne Jiobá rudxiibaʼ cani qué rudxiibaʼ laca laa (Pro. 22:4).
3:13. Zándaca «irá ni ma udiʼdiʼ» o cani bisaananu nga, guireendunu lu xiixa dxiiñaʼ para gápanu jma bidxiichi o bisaananu binnilídxinu neca napa bueltu. Laaca zándaca gueeda gácani ca pecadu nabé malu stiʼ cani maʼ guca arrepentir ne maʼ bia ladxidoʼcaʼ (1 Cor. 6:11). Naquiiñeʼ gusiaandanu guiráʼ cosa ca o maʼ cadi chuʼnu xizaa pur laacani, ne gudxíʼlunu ni cabeza laanu neza ziuunu.
«LAUZUHUAA DXIICHI LU NI RUNI CRE TU»
Lu carta ni bicaa Pablu ra nuu ca xpinni Cristu de Colosas bisihuinni cadi jneza diʼ rusiidiʼ ca maestru ni cadi dxandíʼ que. Laabe bisiénebe cadi naquiiñeʼ si guni binni ni na Ley para ganda guilá, sínuque zalacaʼ pa «cadi ichaacha[caʼ] de ni runi cre[caʼ]». Ne laaca gúdxibe laacaʼ: «Zacaca lasá né [Cristu] tobi si. Lausaana idubi xpida tu lu ná be ti ma de laabe iree ni usiniisi laatu casi ricaa xcu ti yaga ndaani yu. Ne lauzuhuaa dxiichi lu ni runi cre tu». Xi bicaa ca diidxaʼ ca laacabe gúnicabe yaʼ (Col. 1:23; 2:6, 7).
Pablu bicaa: «Peru jma naquiiñe ganaxhii saa tu, purti zacá zaca pe tu tobi si. Laudii lugar quixhe dxí Dios ladxidóʼ to». Ne gudxi laacabe: «Irá ni guni tu la? laguni ni de idubi ladxidó to, casi ñaca xhiiña Señor cayuni tu, cadi xhiiña binni». Ne bidiibe conseju riʼ laacaʼ: «Lasá jneza nezalú cani qué runi cre», o cani cadi nuu lade ca binni ridagulisaa (Col. 3:14, 15, 23; 4:5).
Chigusiénenu caadxi textu zeeda lu Biblia:
2:8. Xii nga cani gudixhe «binni guidxilayú» de cani na Pablu naquiiñeʼ guuyaganu laanu. Ca binni guidxilayú riʼ zinándacaʼ conseju stiʼ Binidxabaʼ (1 Juan 2:16). Lade ca cosa ni rucaa binni guni ni cadi jneza nga, guendananna stiʼ xcaadxi binni, gápacaʼ jma bidxichi ne ca religión ni cadi dxandíʼ.
4:16. Xiñee cadi zeeda ndaaniʼ Biblia carta ni gucuá ra nuu ca xpinni Cristu de Laodicea. Zándaca purtiʼ luni cadi zeeda conseju ni gacané binni yanna, o zándaca purtiʼ cuzeeteni caadxi cosa ni maca cá lu xcaadxi carta stiʼ Biblia.
Xi rusiidiʼ cani laanu:
1:2, 20. Ra guti Jesús para gudixe pecadu stinu que bihuinni guca Dios nachaʼhuiʼ ne laanu, ne pur laani zanda guiá xquendabiaaninu ne gatadxí ladxidoʼno.
2:18, 23. Cani racalaʼdxiʼ gusihuinni «nadóʼ» para si guuyaʼ xcaadxi la? rucueeza laa de guni xcaadxi cosa o runiná xcuerpu, peru ni ribeendúsicabe nga gusihuínnicabe «raca cabe nandxóʼ pur ni riníʼ ique si cabe».