Zanda gudxiiluluʼ ca guendanagana ni guniná binnilídxiluʼ

 1. Xi guendanagana nuu ndaaniʼ caadxi familia.

CASI biluxe gudiibicabe ti carru yooxhoʼ ne guluucabe cera ladi. Ne ca binni zidiʼdiʼ raqué ruuyacaʼ cuzaaniʼ ni casi ñaca nacubi ni. Peru xagueteʼ pintura stini cayó tini ni. Zacaca rizaaca ndaaniʼ caadxi familia. Neca rusihuínnicabe nuucabe galán ne ruluíʼ nayecheʼ nuucabe, peru ni dxandíʼ nga nabánicabe né dxiibi ne nuu ni cayuniná laacabe. Cásica qué rihuinni pa cayó tini carru que, zaqueca qué rihuinni pa nuu xiixa ni cuxheleʼ binnilídxicabe. Chupa guendanagana ni ruxheleʼ caadxi familia nga: ora tobi de laacaʼ qué randa ribani sin gueʼ nisadxuʼniʼ o nabé riuulaʼdxiʼ tinde.

 2. 1) Xi cuzeeteʼ Biblia de nisadxuʼniʼ. 2) Xi chiguzéʼtenu lu capítulo riʼ.

² Biblia na cadi malu diʼ gueʼ binni tuudxi si nisadxuʼniʼ, peru caniʼni malu nga xhudxi binni (Proverbios 23:20, 21; 1 Corintios 6:9, 10; 1 Timoteo 5:23; Tito 2:2, 3). Ti binnigüeʼ nga ti binni ni málasi gueʼ xhaataʼ nisadxuʼniʼ. Peru nuu xcaadxi binni huaniisi dede né nahuiiniʼ qué randa ribani sin gueʼ nisadxuʼniʼ, ne de clase binni ca nga chiguzéʼtenu lu capítulo riʼ.

3, 4. Guníʼ ximodo racaná ti familia ora tuuxa de laacaʼ qué randa ribani sin gueʼ nisadxuʼniʼ.

³ Maʼ xadxí ruzeeteʼ Biblia ora gueʼ xhaataʼ binni nisadxuʼniʼ qué ziuu binnilidxi tobi si (Deuteronomio 21:18-21). Cásica ró tini guiibaʼ, zaqueca runiná nisadxuʼniʼ ti familia. Xheelaʼ ti binni ni qué randa ribani sin gueʼ nisadxuʼniʼ runi stipa pur gucueeza laabe ti cadi guérube ne runi stipa pur gudxiilú cani gúnibe. Peru qué rinabe gusaanabe de guebe nisadxuʼniʼ neca gucaachiʼ xheelabe ni reʼbe, guxhii ni, gucaachiʼ bueltu ne gabi laabe gusisácabe xquendanabánibe ne gusihuínnibe nadxiibe binnilídxibe ne Dios. Ora guʼyaʼ xheelabe qué ganda guchaabe, riuu triste ne riníʼ ique maʼ qué zanda gacané laabe. Ne zándaca guidxibi, guidxiichi, ugaaniʼ donda ique ne chuʼ xizaa.

⁴ Cani nahuiiniʼ ca laaca racanacaʼ ora qué rusaana bixhózecaʼ o jñaacaʼ de gueʼ nisadxuʼniʼ. Nuucaʼ riguíñecabe laacaʼ, ne xcaadxi rilaxoocabe laacaʼ. Zándaca guni sentírcabe nápacabe donda pur qué rusaana bixhózecabe o jñaacabe de gueʼ nisadxuʼniʼ. Stale biaje ruuyacabe ruchaa bixhózecabe o jñaacabe modo laa purtiʼ maʼ qué randa ribani sin xhudxi, nga runi raca nagana para laacabe guni crécabe xcaadxi binni. Cumu qué zanda guiníʼcabe xi rizaaca ndaaniʼ lídxicabe la? chaahuidugá maʼ qué randa riníʼcabe xi nuu ndaaniʼ ladxidóʼcabe, ne stale biaje dede runi huará ni laacabe (Proverbios 17:22). Nuu de cani nahuiiniʼ ora maʼ huaniisicaʼ riníʼ íquecaʼ qué iquiiñecaʼ ne qué rannaxhiicaʼ laca laacaʼ.

 5. Ximodo zanda gacanécabe binni ni qué rusaana de gueʼ nisadxuʼniʼ, ne xiñee nagana gacanécabe laabe.

⁵ Neca stale doctor riníʼ gastiʼ remediu para cani qué randa ribani sin nisadxuʼniʼ, nácabe zanda gusaana binni ni pa qué lica gueʼ nin tuudxihuiiniʼ de laani (zanda gúʼndaluʼ Mateo 5:29). Peru nagana raca para ti binni ni qué rusaana de gueʼ nisadxuʼniʼ gudii lugar gacanécabe laa, purtiʼ riníʼ ique qué gapa ti viciu. Peru ora ca binnilídxibe guyúbicaʼ gacanecaʼ laabe pur ni maʼ biʼniʼ nisadxuʼniʼ ca laabe, zándaca gudiibe cuenta dxandíʼ maʼ naaze viciu ca laabe. Sicaríʼ guníʼ ti doctor ni maʼ huayacané stale binni ni qué rusaana de gueʼ nisadxuʼniʼ ne binnilídxicaʼ: «Rabeʼ naa ni jma galán guni ti familia nga guyubi modo guibaniné binnilidxi galán. Binni ni qué rusaana de gueʼ nisadxuʼniʼ naquiiñeʼ guʼyaʼ zeʼ dxi jma gadxé laa que ca binnilidxi».

 6. Paraa zadxela ti familia conseju ni gacané laacaʼ pa tobi de laacaʼ qué rusaana de gueʼ nisadxuʼniʼ.

⁶ Pa nuu tuuxa qué randa ribani sin gueʼ nisadxuʼniʼ lade binnilídxitu la? zanda gacané ca conseju ni zeeda lu Biblia laatu para guibánitu galán (Isaías 48:17; 2 Timoteo 3:16, 17). Guidúʼyanu caadxi conseju ni huayacané caadxi familia gudxiilucaʼ guendanagana ni rapa binni ni qué ribani sin gueʼ nisadxuʼniʼ.

 7. Tuu nga napa donda pa ti binnilídxitu qué rusaana de gueʼ nisadxuʼniʼ.

⁷ Cadi ugaanitu donda íquetu. Biblia na: «Cada tobi zuaʼ donda stiʼ» ne «cada tobi nu zabidxi Dios cuenta laanu» (Gálatas 6:5; Romanos 14:12). Zándaca binni ni qué rusaana de gueʼ nisadxuʼniʼ guiníʼ pur binnilidxi nga reʼ. Nuu de laacabe riníʼ: «Pa nizaaláʼdxitu naa la? qué ñeediaʼ». Ora gulabi binni laacabe casi ñaca nucaa laacabe guérucabe. Neca lii ne binnilídxiluʼ cayacanatu pur binni ni qué rusaana de gueʼ nisadxuʼniʼ ne pur ni gabi xcaadxi binni laatu, naquiiñeʼ gánnatu zabidxi Dios cuenta cada tobi de laatu (zanda gúʼndaluʼ Filipenses 2:12).

 8. Xi naquiiñeʼ gaca ti gudxiilú binni ni reʼ nisadxuʼniʼ ca guendanagana ni gapa.

⁸ Cadi guiníʼ íquetu nápatu xidé gápatu laabe guiráʼ ora para cadi gacanabe pur rixúdxibe. Proverbio ni caníʼ de binni ni nabé ridxiichi laaca riquiiñeʼ ni para cani qué randa ribani sin nisadxuʼniʼ: «Pa gacaneluʼ laabe, laaca zúniluʼ ni guiráʼ biaje» (Proverbios 19:19). Naquiiñeʼ gudiitu lugar gudxiilú binni ni reʼ nisadxuʼniʼ ca guiráʼ guendanagana ni gapa pur rixudxi. Galán gudiitu lugar laapebe guchaabe ra guni biidibe o cuídxibe patrón stibe para gábibe laa xiñee qué zúnibe dxiiñaʼ.

9, 10. Ca familia ni napa ti binnilidxi ni qué rusaana de gueʼ nisadxuʼniʼ, xiñee naquiiñeʼ gudiicaʼ lugar gacanécabe laacaʼ, ne tu laa naquiiñeʼ guyúbicabe gacané laacabe.

⁹ Lagudii lugar gacanécabe laatu. Proverbios 17:17 na: «Ni dxandíʼ xhamígunu la? guiráʼ ora nadxii laanu, ne zeeda gácabe casi ti bíchinu o ti bizánanu ni nuuca para gacané laanu ora nápanu xiixa guendananá». Binni ni qué rusaana de gueʼ nisadxuʼniʼ runiná ladxidóʼ binnilidxi, nga runi lagudii lugar gacanécabe laatu. Laguyubi cani dxandíʼ xhamígutu gacanecaʼ laatu (Proverbios 18:24). Xcaadxi binni ni riene ni cazaacatu o maʼ huadíʼdicaʼ ra cadíʼditu, laaca zanda gábicaʼ laatu xi zanda gúnitu o xi cadi naquiiñeʼ gúnitu. Peru laatu nga naquiiñeʼ guiníʼ íquetu xii nga ni jma jneza gúnitu. Cadi guiníʼnetu tutiica, sínuque laguiniʼné cani dxandíʼ nánnatu zacanecaʼ laatu ne qué zaniʼcaʼ ni gábitu laacaʼ (Proverbios 11:13).

¹⁰ Laguni stipa gábitu ca binnigola xi cayácatu. Ca binnigola ni nuu ndaaniʼ ca neza binni ridagulisaa zanda gacanecaʼ laatu. Ca hombre riʼ maʼ biziidicaʼ ca conseju ni zeeda lu Stiidxaʼ Dios ne nánnacaʼ xi conseju zanda gacané binni. Zeeda gácacabe «casi ti lugar ra zanda chuʼ binni ora cundubi bi ne ra gucaachilú binni ora cayaba dxacha nisaguié, casi nisa ziguxooñeʼ ndaaniʼ ti guidxi ra gastiʼ nisa, casi bandáʼ stiʼ ti guié ngola lu ti desiertu» (Isaías 32:2). Cadi rapa si ca binnigola riʼ guiráʼ cani nuu ndaaniʼ neza binni ridagulisaa para cadi guicá cosa malu laacaʼ, sínuque laaca racanécabe ne riguixhedxícabe ladxidóʼ cani napa guendanagana ne rizaaláʼdxicabe cada tobi de laacaʼ. Nga runi, cadi gusaana de guyúbitu gacanécabe laatu.

11, 12. Tuu nga ni jma zanda gacané ca familia ni napa ti binnilidxi ni qué rusaana de gueʼ nisadxuʼniʼ, ne xi naquiiñeʼ gúnicaʼ para gacanebe laacaʼ.

¹¹ Ni jma naquiiñeʼ gúnitu nga guyúbitu gudii Jiobá stipa laatu. Biblia riguixhedxí ladxidóʼ binni né ca diidxaʼ riʼ:«Jiobá nuu gaxha de cani maʼ gucadé ladxidóʼ; ne rula be cani maʼ biree gana» (Salmo 34:18). Pa maʼ gucadé ladxidoʼto o maʼ bireetu gana pur nabezanetu tuuxa binnilídxitu ni qué rusaana de gueʼ nisadxuʼniʼ la? laganna«Jiobá nuu gaxha» de laatu. Laabe nánnabe xi guendanagana cadíʼditu (1 Pedro 5:6, 7).

¹² Pa guni cretu zuni Jiobá cani zeeda lu Stiidxaʼ zanda gacané nga laatu cadi chúʼpetu xizaa (Salmo 130:3, 4; Mateo 6:25-34; 1 Juan 3:19, 20). Ora ruundatu Stiidxaʼ Dios ne rinándatu ca conseju stini, zuuyatu zacané espíritu santu stiʼ Dios laatu, purtiʼ laani rudiini stipa binni para guni huantar intiica cosa guidxaagalú lu xquendanabani (2 Corintios 4:7).a

13. Xi sti guendanagana runiná stale familia.

¹³ Ora reʼ xhaataʼ binni nisadxuʼniʼ zanda gucaani xfamíliacaʼ gapa sti guendanagana ndaaniʼ lídxicaʼ: tíndenecaʼ binnilídxicaʼ.

14. Padxí bizulú gudinde binni ndaaniʼ ti familia, ne xi cayaca yanna.

¹⁴ Primé guendaridinde guyuu ndaaniʼ ti familia nga dxi bicaalú Caín Abel, biʼchiʼ (Génesis 4:8). Dede dxiqué nabé huadinde binni ndaaniʼ lidxi. Nuu hombre runiná xheelaʼ, gunaa rucaalú xheelaʼ, hombre ne gunaa riguíñecaʼ xiiñicaʼ sin guiacaʼ laacabe, ne nuu xiiñiʼ binni ni maʼ huaniisi runinacaʼ bixhózecaʼ ne jñaacaʼ ni maʼ nagola.

15. Ximodo runi sentir stale binni ora runinácabe laa ndaaniʼ lidxi.

¹⁵ Ora riguíñecabe binnilídxicabe cadi ládisicaʼ racaná. Ti gunaa ni bininácabe laa guníʼ: «Napaʼ xidé guneʼ stale stipa para cadi guneʼ sentir napaʼ donda ne cadi guituiluaʼ. Stale biaje ca siadóʼ ca pa ñanda si qué ñasaʼ de lu cama ne pa ñanda si ñaca ni ti bacaandaʼ». Ora ruuyaʼ cani nahuiiniʼ ca ridinde bixhózecaʼ ne jñaacaʼ o guninácabe laacaʼ ndaaniʼ lídxicaʼ laaca zándaca guninacaʼ binnilídxicaʼ ora maʼ guichaganacaʼ.

16, 17. Ximodo runiná binni ladxidóʼ binnilidxi ne xi rucaani laacaʼ guiníʼ íquecaʼ.

¹⁶ Stale biaje cadi riguiñesícabe binnilídxicabe, sínuque laaca runinácabe laacaʼ né ni guiníʼcabe. Proverbios 12:18 na zeeda gaca ca diidxaʼ ni riníʼ binni sin guiníʼ ique casi ra «runiná ti espada». Ximodo zanda gueeda guizaaca ndiʼ ndaaniʼ ti familia yaʼ. Rizaaca nga ora cuʼdícabe ne guiníʼ xhaatacabe, guiníʼsaacabe mal de laacabe, guidaacabe xiana ne guiníʼcabe zaguíñecabe binnilídxicabe. Qué rihuinni modo runiná ca nga ladxidóʼ binni casi rihuinni ca golpe ni riaana ladi ora quíñecabe laa.

¹⁷ Jma triste nga guninácabe ladxidóʼ xiiñicabe ora guiníʼcabe cadi jneza ni runi o guiníʼcabe qué gánnabe gúnibe xiixa, nahuátibe ne qué iquiiñebe. Ora gúnicabe zacá zanda gucaa nga xiiñicabe guiníʼ ique qué zanda guni xiixa stubi si. Dxandíʼ, guiráʼ xiiñiʼ binni caquiiñeʼ uguu jnézacabe laacaʼ. Peru Biblia cudii conseju riʼ cani napa xiiñiʼ: «Cadi uyubi tu uchiichi tu xiiñi tu, ti cadi iree ca gana» (Colosenses 3:21).

18. Paraa riale guniná binni tuuxa, ne xi conseju cudii Biblia para guchaa modo laa.

¹⁸ De ndaaniʼ ladxidóʼ binni ne de ndaaniʼ ique nga riale guniná; guiráʼ ni runi binni riale cani de ndaaniʼ ique (Santiago 1:14, 15). Binni ni nandáʼ ique naquiiñeʼ guchaa modo riníʼ ique ti gusaana de guniná stobi (Romanos 12:2). Ñee zanda guchaabe la? Zanda pue. Stiidxaʼ Dios racané binni guchaa modo laa. Dede zanda cueeni intiica cosa ni maʼ ucuaa xcu ndaaniʼ ique binni (2 Corintios 10:4; Hebreos 4:12). Ora ganna chaahuiʼ binni cani rusiidiʼ Biblia racanécani laa guchaa modo naca (Efesios 4:22-24; Colosenses 3:8-10).

19. Ximodo naquiiñeʼ gaca ti xpinni Cristu né xheelaʼ.

¹⁹ Ximodo naquiiñeʼ gaca binni né xheelaʼ. Stiidxaʼ Dios na: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa» (Efesios 5:28). Biblia laaca canabaʼ gusisaca hombre xheelaʼ purtiʼ «jma nadá cabe» (1 Pedro 3:7). Ca gunaa ca laaca naquiiñeʼ «ganaxhii ca xheela ca» ne gápacaʼ «stale respetu xheela[caʼ]» (Tito 2:4; Efesios 5:33, TNM). Cani bizéʼtenu riʼ rusihuínnicani nin ti hombre ni runi ni na Dios qué zanda guiníʼ rusisaca xheelaʼ pa riguiñe o runiná laabe né cani riníʼ. Ne nin ti gunaa ni gucaa ridxi xheelaʼ, guiníʼ xiixa ni guniná laabe o tindené laabe zanda guiníʼ nadxii xheelaʼ ne dxandíʼ runi respetar laabe.

20. Tuu nga zabidxi cuenta cani napa xiiñiʼ, ne xiñee cadi naquiiñeʼ cuézacabe guni xiiñicabe ni qué zanda guni.

²⁰ Ximodo naquiiñeʼ gaca binni né xiiñiʼ. Caquiiñeʼ gannaxhii binni xiiñiʼ ne cuee tiempu para laacabe. Stiidxaʼ Dios na zeeda gaca xiiñiʼ binni ti herencia ni rudii Jiobá o ni rusigáʼdebe cani napa xiiñiʼ (Salmo 127:3). Nga runi, nápacaʼ xidé gápacaʼ herencia ni bidii Jiobá laacaʼ purtiʼ zabídxibe cuenta laacaʼ. Biblia ruzeeteʼ de «enda xcuidi» ne de «guendahuati» ni runi binni ora nahuiiniʼ (1 Corintios 13:11; Proverbios 22:15). Pur nga, cadi naquiiñeʼ guidxagayaa binni ora gúʼyacaʼ guni xiiñicaʼ xiixa guendahuati, purtiʼ caʼruʼ gaca ca hombrehuiiniʼ ne ca dxaapahuiiniʼ ca binni huaniisi. Cadi naquiiñeʼ guinabaʼ binni xiiñiʼ jma de ni qué zanda guni biaʼ iza stiʼ ne cadi gucaacabe laa guni biaʼ huayuni xcaadxi binnilídxicabe (biindaʼ Génesis 33:12-14).

21. Ximodo rinabaʼ Dios gaca binni né bixhoze ne jñaa ni maʼ nagola.

²¹ Ximodo naquiiñeʼ gaca binni né bixhoze ne jñaa ni maʼ nagola. Levítico 19:32 na: «Nezalú ti binni ni maʼ natoope ique naquiiñeʼ guiásaluʼ, ne naquiiñeʼ guiéneluʼ ti binnigola». Ngue runi, lu Ley stiʼ Dios gucuá gusisaca binni cani maʼ huaniisi ne guni respetarcaʼ laacabe. Zándaca gaca nga nagana pa bixhoze binni ni maʼ nagola gacalaʼdxiʼ guiúbaca gaca ni na o maʼ huará ne maʼ nanene riniibi ne zaqueca para guiníʼ ique. Neca zacá, Stiidxaʼ Dios cusietenalaʼdxiʼ guiráʼ binni gacanecaʼ bixhózecaʼ ne jñaacaʼ «saca bisiniisi cabe laacaʼ» (1 Timoteo 5:4). Nga riníʼ naquiiñeʼ gápacabe respetu bixhózecabe ne jñaacabe ne gacanécabe laacaʼ pa caquiiñecaʼ bueltu. Ora guninácabe bixhózecabe o jñaacabe ni maʼ nagola ne ora qué guizaaláʼdxicabe laacaʼ zusihuínnicabe cadi zinándacabe ni na Stiidxaʼ Dios.

22. Xi zacané binni para cadi tindené binnilidxi, ne xi zanda gúnicabe para gusihuínnicabe ni.

²² Laguiziidiʼ gucueezatu laca laatu. Proverbios 29:11 na: «Ti binni huati rusihuínnica guiráʼ xiana stiʼ, peru tobi ni nuu xpiaaniʼ rucueeza ni». Xi zanda gúnitu para gucueezatu xiana ca yaʼ. Naquiiñeʼ guni chaahuitu guendanagana stitu nagueendaca ti cadi tiidiʼ stale dxi ne dáʼrutu xiana (Efesios 4:26, 27). Ne pa guni sentirtu qué zanda gucueezatu laatu la? jma galán guixéletu de ra nuutu ca. Laaca zanda guinábatu Dios espíritu santu stiʼ para gacané laatu gucueezatu laca laatu (Gálatas 5:22, 23). Pa satu ti ratu ne gúnitu caadxi ejerciciu laaca zanda gacané nga laatu gucueezatu laatu (Proverbios 17:14, 27). Laguni stipa para cadi guidxiichitu nagueenda (Proverbios 14:29).

23. Xi zándaca guizaaca pa tobi de ca binni ridagulisaa qué gusaana de guidxiichi xhaataʼ dede quiñe binnilidxi.

²³ Lade cani rieeteʼ lu Biblia ni qué riuulaʼdxiʼ Dios nga gaca nanaláʼdxinu stobi, tinde diidxanu ne guidxiichi xhaatanu, ne laaca cuzeeteni «qué ziuu cani runi irá nga ra runi mandar Dios» (Gálatas 5:19-21). Nga runi, cani na xpinni Cristu laa ne qué gusaana de guidxiichi xhaataʼ, dede quiñe xheelaʼ ne ca xiiñiʼ, zándaca cueecabe laa ndaaniʼ xquidxi Dios (zanda gúʼndaluʼ 2 Juan 9, 10). Zacá maʼ qué ziuu binni nandáʼ ique lade ca binni ridagulisaa (1 Corintios 5:6, 7; Gálatas 5:9).

24. 1) Xi zanda quixhe ique tuuxa guni pa riguiñe xheelaʼ laa. 2) Pa tuuxa riguiñe xheelaʼ laa, ximodo zanda gacané ca xhamígube laabe ne ca binnigola, peru xi cadi naquiiñeʼ gúnicabe.

²⁴ Xi zanda guni ti xpinni Cristu pa xheelaʼ riguiñe laa ne qué náʼ xheelabe guchaa modo laa yaʼ. Nuu tu qué riná gusaana xheelaʼ pur xiixa razón. Xcaadxi la? rusaana xheelaʼ purtiʼ riníʼ ique nuu riesgu gacaná xcuerpu ne zaqueca xquendabiaaniʼ ne gusaana de guni ni na Dios dede guniti xquendanabani. Binni cayacaná ca naquiiñeʼ guʼyaʼ ximodo riníʼ ique Jiobá, peru laasi nga naquiiñeʼ guʼyaʼ xi quixhe ique guni (1 Corintios 7:10, 11). Zándaca nuu de ca xhamígube, ca xfamíliabe o ca binnigola ni nuu lade ca binni ridagulisaa gacaláʼdxicaʼ gacanecaʼ laabe ne gudiicaʼ conseju laabe, peru ora gúnicabe ni cadi naquiiñeʼ gucaacabe laabe gúnibe ni cayábicabe laabe. Laasibe nga naquiiñeʼ gúʼyabe xi quixhe íquebe gúnibe (Romanos 14:4; Gálatas 6:5).

25. Ximodo gucalaʼdxiʼ Jiobá nibani ca familia ca.

²⁵ Dxi bicheelaʼ Jiobá Adán ne Eva, qué ñacaláʼdxibe ñapa ca familia ca guendanagana pur nisadxuʼniʼ o pur ñuninásaacaʼ laacaʼ (Efesios 3:14, 15). Ni gucalaʼdxiʼ Jiobá nga guiráʼ ca binni ni nuu ndaaniʼ ti familia ñuni sentircaʼ nayecheʼ, ñatadxí ladxidoʼcaʼ ne ñuucaʼ gaxha de laabe. Peru dede dxi bichee Adán ne Eva, maʼ qué nibani ca familia ca galán (zanda gúʼndaluʼ Eclesiastés 8:9).

26. Ximodo zabani binni lu guidxilayú cubi stiʼ Jiobá pa chinándacaʼ ca conseju stibe.

²⁶ Nabé sicarú nga gánnanu qué huachaa Jiobá ni gudixhe ique para ca familia ca. Laabe cudii stiidxabe gudiibe ca xpínnibe ti guidxilayú cubi ra maʼ qué zadinde binni ne racá maʼ qué ziuu «enda ruuna nin enda racaná ladxidóʼ nin yuubaʼ» (Apocalipsis 21:4). Dxi ca, maʼ qué ziuu binni ni qué randa ribani sin gueʼ nisadxuʼniʼ, maʼ guirutiʼ zuniná binnilidxi ne maʼ qué zapa ca familia ca guendanagana. Binni maʼ qué zuxidxi para gucaachiʼ dxiibi stiʼ o para gucaachiʼ yuubaʼ stiʼ, sínuque zuxídxicaʼ purtiʼ «zacaacaʼ guidxilayú, ne zadxélacaʼ guendanayecheʼ purtiʼ ziuu stale guendariuudxi» (Salmo 37:11).