«Neca maʼ gútibe, dede yanna caniʼbe»

TI DXI nuu Abel cayuuyaʼ ca dendxuʼ huiiniʼ stiʼ cayó guixi cueʼ ti dani. Zándaca zitu de ra nuube que biiyabe xtuxhu ti biaaniʼ. Nánnabe raqué nuu ti espada naze bele ne cudii buelta, ne nuu ni raqué para cadi chuʼ tuuxa ndaaniʼ jardín stiʼ Edén que. Bixhózebe ne jñaabe gulézacaʼ ndaaniʼ ni ti tiempu, peru yanna maʼ nin laacaʼ nin ca xiiñicaʼ zanda chuʼcaʼ ndaaniʼ ni. Guníʼ ique ti huadxí laga cundubi ti bi nisa guicha ique Abel gundisalú guibáʼ ne caníʼ ique Dios ni bizáʼ laa. Ne caníʼ íquebe pa ziuu dxi chuʼ binni né Dios tobi si sti biaje. Nga nga ni jma gucaláʼdxibe.

Caniʼné Abel, guiropa xiiñiʼ Adán, laanu yanna. Ñee zanda gunadiágaluʼ laabe la? Zándaca guiniʼluʼ nagana nga, purtiʼ Abel, guiropa xiiñiʼ Adán riʼ, maʼ xadxí de guti. Ne cumu maʼ 6,000 iza de gútibe la? dede dxita ládibe maʼ guca yu dé. Sicaríʼ na Stiidxaʼ Dios de ca binni ni maʼ guti: «Cani maʼ guti la? laacabe qué liica gánnacabe gastiʼ» (Eclesiastés 9:5, 10). Ne qué liica rieeteʼ nin ti diidxaʼ ni guníʼ Abel lu Biblia. Yanna, ximodo nga casi ñaca niníʼnebe laanu yaʼ.

Dios gudxi apóstol Pablu gucaa ca diidxaʼ riʼ de Abel: «Neca maʼ gútibe, dede yanna caniʼbe» (Hebreos 11:4, TNM). Zacá rieeteʼ de laabe pur fe ni gúpabe. Laabe nga primé binni ni nabé gupa fe ndaaniʼ Guidxilayú riʼ. Cumu nabé gúpabe fe la? nga runi jneza nga chinándanu ejemplu stibe. Pa quixhe íquenu gápanu fe cásica gúpabe la? zacá nga casi ñaca laapebe niníʼnebe laanu.

Yanna, guidúʼyanu xi zanda guizíʼdinu de Abel ne de fe ni gupa neca huaxiéʼ ruzeeteʼ Biblia de laa.

Abel biniisi dxi deruʼ cadale binni lu Guidxilayú. Ne despué bizeeteʼ Jesús bibani Abel «dxi bizulú guidxilayú» (Lucas 11:50, 51). Ora guníʼ Jesús diidxaʼ «guidxilayú», caniʼbe de ca binni ni zanda guilá de lu náʼ guendaruchee. Abel nga guidapa binni ni bibani lu Guidxilayú, peru laabe nga primé binni biiyaʼ Dios zanda guilá.a Rihuinni dxíchica qué niniisi diʼ Abel lade binni ni ñacané laa.

Neca cadi xadxí de nuu binni ndaaniʼ Guidxilayú la? maʼ gupa xidé bidxaagalúcabe guendanagana. Zándaca nabé sicarú guca bixhozeʼ ne jñaa Caín ne nabé gúcacaʼ nadipaʼ. Peru bíʼnicabe ti cosa nabé naxoo ne nanna dxíchicabe cadi jneza ngue ni bíʼnicabe. Gúcacabe binni ni qué ñalené donda ne ñanda nibánicabe sin ñuu dxi ñáticabe, peru despué bidxiidéchecabe Dios ne gulee laacabe ndaaniʼ Paraísu ni guyuu Edén que. Ra gudixhe íquecabe guyúbicabe para laasicabe ne qué niníʼ íquecabe pa zuninácabe ca xiiñicabe la? beeda gácacabe binni napa donda ne biníticabe guendanabani ni qué zaluxe que (Génesis 2:15–3:24).

Dxi maʼ biree Adán ne Eva ndaaniʼ jardín que, maʼ nagana guca para laacaʼ guibánicaʼ. Peru ora gule primé xiiñicabe gulee lácabe laa Caín, ni riníʼ «Ni gule», ne dxi ca guníʼ Eva: «Maʼ gucané Jiobá naa gapaʼ ti hombre». Ca diidxaʼ riʼ rusihuínnicani zándaca guníʼ ique Eva ca diidxaʼ ni guníʼ Jiobá ndaaniʼ jardín que. Jiobá guníʼ zapa ti gunaa ti xiiñiʼ ni chigunitilú Binidxabaʼ, ni guleechú Adán ne Eva que (Génesis 3:15; 4:1). Ñee guníʼ ique Eva laa ngue gunaa ni bizeeteʼ Dios que ne xiiñiʼ gunaa que nga Caín la?

Pa nga nga ni guníʼ ique Eva la? cadi zaqué diʼ ni. Ne pa laabe ne Adán gúdxicabe Caín laa ngue ni zá de gunaa ni bizeeteʼ Dios que la? bicaacabe laabe guchabe bi yánnibe. Despué gupa Eva sti xiiñiʼ, peru dxi gule guiropa xiiñibe riʼ qué niníʼdibe nin ti diidxaʼ para nusisácabe laa. Gulee lácabe laabe Abel, ni zándaca riníʼ «ora ribee binni bi neza xii» o «xiixa ni qué risaca» (Génesis 4:2). Ñee rusihuinni ni riníʼ lá Abel ca guníʼ ique Adán ne Eva qué risácabe casi Caín la? zándaca, peru qué ganna chaahuinu pa zacá ni.

Ca dxi stinu riʼ, ca binni ni napa xiiñiʼ zanda guiziidicaʼ stale cosa de Adán ne Eva. Ñee zusiidiluʼ ca xiiñiluʼ guchacaʼ bi yánnicaʼ o gannaxhiicaʼ Dios ne guyúbicaʼ chuʼcaʼ gaxha de laabe lu cani guiniʼluʼ ne lu cani gúniluʼ la? Neca Adán ne Eva qué nusiidicaʼ xiiñicaʼ jneza, peru cani zá de laacabe zándaruʼ guiziidicaʼ gúnicaʼ ni jneza.

Dxi biniisi guiropaʼ xiiñiʼ Adán, zándaca bisiidibe laacaʼ gúnicaʼ dxiiñaʼ ni gacané laacaʼ gudiicaʼ ni guibaniné binnilídxicaʼ. Nga runi biʼniʼ Caín dxiiñaʼ layú ne Abel gupa dendxuʼ.

Peru Abel biʼniʼ ti cosa jma risaca. Ra zidiʼdiʼ iza jma gúpabe fe, ti guenda nabé sicarú ni bizeeteʼ Pablu. Guníʼ ique dxi bibani Abel qué ñuu nin ti binni ni niguixhe ti ejemplu galán para laabe. Yanna, ximodo beeda gápabe fe Jiobá Dios yaʼ. Guidúʼyanu chonna cosa ni gucané laabe para biguidxi fe stibe.

Cani bizáʼ Jiobá.

Cumu maʼ qué ñapa Guidxilayú ndaayaʼ stiʼ Dios la? maʼ guca nagana para laacabe gudxiibacabe lu layú, purtiʼ gundani yaga guichi ne yaga guiʼxhiʼ luni. Neca zaqué gunda bidii layú que ni gudócabe para guibánicabe. Peru ca maniʼ que gúparucaʼ ndaayaʼ stiʼ Dios, casi ca maniʼ ripapa ne benda, ne zaqueca ca dani, laguna, guiiguʼ ne nisadóʼ; zaqueca guibáʼ, ca za ni nuu guibáʼ, Gubidxa, beeu ne beleguí. Ora biiyadxí Abel guiráʼ ladu, biiyaʼ pabiáʼ nadxii Jiobá Dios binni, pabiáʼ nuu xpiaaniʼ ne pabiáʼ nachaʼhuiʼ (Romanos 1:20). Ra guníʼ íquebe guiráʼ nga la? gucaneni laabe iguidxi fe stibe.

Nanna dxíchinu gulee Abel tiempu para guníʼ ique de Jiobá. Yanna, cumu dendxuʼ nga gúpabe la? nabé guzabe. Bixuiʼlú laabe zinebe ca maniʼ huiiniʼ stibe lade ca dani que, gudíʼdibe guiiguʼ para biyúbibe paraa nuu jma guixi gaʼ ne ra zanda gueʼ ca dendxuʼ stibe nisa, ra zanda guiaapacaʼ para guiziiláʼdxicaʼ. Lade guiráʼ ca maniʼ ni bizáʼ Dios, ca dendxuʼ huiiniʼ ca nga cani jma caquiiñeʼ gapa binni laacaʼ, casi ñaca guyáʼpecame para sané binni laacame ne gapa laacame. Yanna, Abel yaʼ, ñee laaca biʼniʼ sentirbe caquiiñeʼ chuʼ tuuxa jma nuu xpiaaniʼ ne jma nadipaʼ que binni para guluíʼ laabe xi gúnibe ne gapa laabe la? Nanna dxíchinu gúdxibe Jiobá guiráʼ nga ora biʼniʼ orarbe laa, ne zacá nga jma biguidxi fe stibe.

Cani guníʼ Jiobá zuni.

Zándaca bisiene Adán ne Eva ca xiiñiʼ xiñee gulee Dios laacaʼ de ndaaniʼ jardín ni guyuu Edén que. Ngue runi, stale cosa nga ni guníʼ ique Abel.

Jiobá guníʼ maʼ qué zapa layú que ndaayaʼ stiʼ. Ne Abel biiyaʼ dxiichi dxandíʼ guca ni guníʼ Jiobá que, purtiʼ nabé gundani yaga guichi ne yaga guiʼxhiʼ luni. Jiobá laaca guníʼ zapa Eva xhiuubaʼ baʼduʼ, ne laaca ziudu yuubaʼ laa ora gapa baʼduʼ. Gúnnabe zaqué ni dxi gule ca bíʼchibe ne ca bizáʼnabe. Jiobá maca biiyaʼ zuyubi Eva gannaxhii xheelaʼ laa ne gulabi laa ne Adán zuni mandar laa. Ne zaquepeʼ nga biiyaʼ Abel nabani bixhoze ne jñaa. Laabe bidiibe cuenta dxandíʼ raca guiráʼ ni riníʼ Jiobá. Nga runi, gúpabe razón para biʼniʼ crebe ora guníʼ Dios zadxiña dxi zale xiiñiʼ gunaa ni guníʼ Jiobá que ne zuni chaahuiʼ guiráʼ ni qué ñaca jneza ndaaniʼ jardín ni guyuu Edén que (Génesis 3:15-19).

Ca xpinni Jiobá.

Nin tobi de ca binnilidxi Abel qué nudii ti ejemplu galán laabe. Peru cadi binni si nga guyuu ndaaniʼ Guidxilayú dxiqué, sínuque laaca guyuu ángel ni zanda chinándabe ejemplu stiʼ. Dxi gulee Dios Adán ne Eva ndaaniʼ jardín ni guyuu Edén que, Jiobá peʼ biiyaʼ cadi guibiguétacabe ndaaniʼ ni ne nin ca xiiñicabe. Ngue runi, para cadi chuʼ guirutiʼ ndaaniʼ ni la? bizuhuaa Jiobá querubín, caadxi ángel nabé risaca, gapa ni ne laaca guluube ti espada naze bele ne cudii buelta (Génesis 3:24).

Guníʼ ique nahuiiniruʼ Abel cayuuyaʼ ca querubín ni nuu raqué. Ca querubín que nápacaʼ cuerpu casi binni ne biiyaʼ Abel nabé nadípacabe. Cumu naze bele espada que ne cudiini buelta la? ngue runi guizáʼ bichíbini binni. Ra jma ziniisi Abel, biiyabe qué niree ca querubín que gana ne qué nusaanacaʼ dxiiñaʼ ni bidii Jiobá laacaʼ gúnicaʼ. Dxi ne gueelaʼ, gudiʼdiʼ iza, gudiʼdiʼ stálepeʼ iza nuuruʼ ca querubín que raqué. Neca nadípacabe ne ñanda niguixhe íquecabe nusaanacabe dxiiñaʼ que la? qué ñúnicabe ni. Zacá nga biziidiʼ Abel napa Jiobá xpinni ni runi ni jneza, ne laaca biiyabe qué rudxiidéchecaʼ Jiobá ne ruzuubacaʼ stiidxabe, ni qué ñuuyabe ñuni binnilídxibe. Nanna dxíchinu ejemplu stiʼ ca ángel que gucané laabe gaca fe stibe jma naguidxi.

Ra guníʼ ique Abel guiráʼ ni bizáʼ Jiobá, cani guniʼbe zaca ne ora biiyabe ejemplu stiʼ ca xpinni Dios la? ngue gucané laabe iguidxi fe stibe. Ñee cadi dxandíʼ stale nga ni zanda guizíʼdinu de ejemplu stibe la? Ejemplu stiʼ Abel riʼ racaneni cani nahuiiniʼ gúʼyacaʼ zanda gaca fe sticaʼ naguidxi, neca binnilídxicaʼ qué guni ni jneza. Yanna, xi zanda gacané laanu iguidxi fe stinu yaʼ. Ni zacané laanu nga guidúʼyanu guiráʼ cosa sicarú ni bizáʼ Dios, Stiidxabe ne guiráʼ ejemplu stiʼ ca binni ni napa fe laabe.

Ra jma zigapa Abel fe Jiobá bicaa ngue laabe gúnibe xiixa para gusihuínnibe ni. Peru xi zanda gudii ti binni guidxilayú Dios ni bizáʼ guiráʼ xixé cosa yaʼ. Dios cadi caquiiñeʼ diʼ gudiicabe laa gastiʼ o gacanécabe laa. Abel bidii cuenta pa de guidubi ladxidóʼ gudii Jiobá ni jma galán napa la? ziechené Bixhózebe ni nuu guibáʼ laabe.

Ngue runi, gucuaa Abel caadxi xténdxuʼ para gudii Jiobá. Gulibe cani jma galán lade ca dendxuʼ ni gule primé ne gulibe ca pedasu jma galán ti guzaaquibe cani para Jiobá. Ne Caín laaca bidii Dios cani bidii lu layú stiʼ purtiʼ biyubi chuulaʼdxiʼ Dios ni cayuni ne cuʼ ndaayaʼ Dios laa. Peru qué ñúnibe ni de guidubi ladxidoʼbe casi biʼniʼ Abel. Ne bihuinni zacá ni ora bidxiña guirópacabe para gusigáʼdecabe Jiobá ni zinécabe que.

Caín ne Abel zándaca bíʼnicaʼ altar ne biquiiñecaʼ guí para bidiicaʼ Jiobá ni zinecaʼ, ne zándaca biiyaʼ ca querubín que ni cayúnicabe ne laasicaʼ nga cani cayúnicaʼ ni na Jiobá dxiqué. Biblia na: «Jiobá guyuulaʼdxiʼ ni bisigaʼdeʼ Abel laa» (Génesis 4:4). Lu Biblia qué rieeteʼ ximodo bisihuinni Dios guyuulaʼdxiʼ ni bidii Abel, peru xiñee guyuuláʼdxibe ni yaʼ.

Ñee pur ni bisigaʼdeʼ Abel Dios que la? Laabe bidiibe Dios ti maniʼ huiiniʼ nabani ne bixhiibe rini stime. Ñee gunna Abel pabiáʼ zasaca ni biʼniʼ que la? Gudiʼdiʼ gayuaa iza despué de bibani Abel guníʼ Dios naquiiñeʼ gati ti dendxuʼ huiiniʼ para gusihuinni ni chiguni Xiiñibe ni zeeda gaca «Dendxu huiini sti Dios», ni chiguxhii rini sin donda stiʼ (Juan 1:29; Éxodo 12:5-7). Peru Abel qué liica ñanna ximodo chiguiquiiñeʼ Jiobá ni bíʼnibe ca despué.

Ni nánnanu nga bidii Abel Jiobá ni jma galán gupa. Ne Jiobá qué ruuyaʼ si ni rudii binni laa, sínuque ruuyabe ni nuu ndaaniʼ ladxidóʼ. Cumu gunnaxhii Abel Jiobá ne gúpabe fe laa la? ngue runi biitibe ti maniʼ huiiniʼ bidiibe laa.

Peru maʼ gadxé modo biiyaʼ Jiobá ni bisigaʼdeʼ Caín laa, purtiʼ qué nicaadibe ni (Génesis 4:5). Ñee pur cadi galán ni bidii Caín que nga qué nicaabe ni la? Coʼ, purtiʼ despué lu Ley ni bidii Dios ca xpinni guníʼ zanda gudiicabe laa ni rudii layú stícabe (Levítico 6:14, 15). Ne Biblia na cadi jneza ni biʼniʼ Caín (1 Juan 3:12). Cásica runi stale binni yanna, Caín guníʼ ique né gudii si xiixa Dios maʼ cusihuinni cayuni adorar laabe. Peru qué nindaa bisihuínnibe lu cani bíʼnibe qué ñápabe fe Jiobá o cadi dxandíʼ nadxiibe laa.

Ora biiyaʼ Caín qué nicaa Jiobá ni bidiibe laa que, ñee gudixhe íquebe chinándabe ejemplu stiʼ Abel la? Coʼ, laabe nabé gucananaláʼdxibe bíʼchibe. Jiobá biiyaʼ xi nuu ndaaniʼ ladxidóʼ Caín ne gudxi laabe né diidxaʼ nadóʼ guchaabe xpiaʼbe, purtiʼ pa qué gúnibe ni la? zanda gucaa ngue laabe gucheebe. Ne Jiobá gudxi laabe zusisaca laabe pa guchaabe modo laabe (Génesis 4:6, 7).

Qué nulabi Caín ni gudxi Dios laa que, laga yenebe bíʼchibe ra ñaa ne raqué biitibe laa (Génesis 4:8). Zanda guininu Abel nga primé binni ni guzanándacabe ne biiticabe pur biʼniʼ adorar Dios. Neca gútibe peru qué ziuu dxi guiaandaʼ cani bíʼnibe.

Casi ñaca nucaa rini stiʼ Abel ridxi Jiobá para guni castigar binni ni biiti laa. Ne zaqué biʼniʼ Jiobá ni ra biʼniʼ castigar Caín pur biiti Abel (Génesis 4:9-12). Peru ni jma risaca nga casi ñaca caniʼné Abel laanu yanna pur fe ni gupa. Zándaca bibánibe ti gayuaa iza ne para dxicá nabé huaxiéʼ tiempu nga, peru dxi bibánibe bíʼnibe ni guyuulaʼdxiʼ Dios. Ne ante gátibe, gúnnabe gunnaxhii Jiobá, Bixhózebe ni nuu guibáʼ, laabe ne guyuulaʼdxiʼ cani bíʼnibe (Hebreos 11:4). Nga runi nanna dxíchinu qué ziuu dxi gusiaandaʼ Jiobá laabe, ne cabézabe dede dxi gusibani Jiobá laabe lu Guidxilayú riʼ ndaaniʼ ti paraísu (Juan 5:28, 29). Ñee ñuuláʼdxiluʼ ñunibiaʼluʼ laabe la? Zanda gunibiaʼluʼ laabe pa quixhe íqueluʼ gucaadiágaluʼ Abel ne chinándaluʼ ejemplu stiʼ.