Genesise
22 Manje ngemva kwalezi zinto uNkulunkulu weqiniso wamvivinya+ u-Abrahama. Wathi kuye: “Abrahama!” yena wathi: “Ngilapha!”+ 2 Waqhubeka wathi: “Ngicela uthathe indodana yakho, indodana yakho okuwukuphela kwayo oyithanda kakhulu,+ u-Isaka,+ uthathe uhambo oluya ezweni laseMoriya+ uyinikele lapho njengomnikelo wokushiswa kwenye yezintaba engizokubonisa yona.”+
3 Ngakho u-Abrahama wavuka kusesekuseni kakhulu wabophela imbongolo yakhe wathatha ezimbili zezikhonzi zakhe kanye no-Isaka indodana yakhe;+ wacanda izinkuni zomnikelo wokushiswa. Khona-ke wasuka wathatha uhambo oluya endaweni uNkulunkulu weqiniso ayembonise yona. 4 Kwakungosuku lwesithathu lapho u-Abrahama aphakamisa amehlo akhe wayibona leyo ndawo ekude. 5 U-Abrahama manje wathi ezikhonzini zakhe:+ “Nina hlalani lapha kanye nembongolo, kodwa mina nomfana sifuna ukuqhubekela laphaya siyokhulekela+ bese sibuyela kini.”
6 Ngemva kwalokho u-Abrahama wathatha izinkuni zomnikelo wokushiswa wazithwesa u-Isaka indodana yakhe+ yena waphatha umlilo nommese wokuhlaba, bobabili bahamba ndawonye.+ 7 U-Isaka wathi ku-Abrahama uyise: “Baba!”+ Yena wathi: “Ngilapha, ndodana yami!”+ Waqhubeka wathi: “Nanku umlilo nezinkuni, kodwa iphi imvu yomnikelo wokushiswa?”+ 8 Kulokhu u-Abrahama wathi: “UNkulunkulu uzoyilungiselela ngokwakhe imvu yomnikelo wokushiswa,+ ndodana yami.” Bobabili baqhubeka behamba ndawonye.
9 Ekugcineni bafika endaweni uNkulunkulu weqiniso ayembonise yona, u-Abrahama wakha i-altare+ lapho, wahlela izinkuni, wabopha u-Isaka indodana yakhe izandla nezinyawo, wambeka phezu kwe-altare phezu kwezinkuni.+ 10 Khona-ke u-Abrahama welula isandla sakhe wathatha ummese wokuhlaba ukuze abulale indodana yakhe.+ 11 Kodwa ingelosi kaJehova yambiza isezulwini yathi:+ “Abrahama, Abrahama!” yena waphendula wathi: “Ngilapha!” 12 Yaqhubeka yathi: “Ungaseluleli isandla sakho kumfana futhi ungenzi lutho kuye,+ ngoba manje ngiyazi ukuthi uyamesaba uNkulunkulu ngoba awungigodlelanga indodana yakho, okuwukuphela kwayo.”+ 13 Khona-ke u-Abrahama waphakamisa amehlo akhe wabheka, futhi laphaya phambili, ekujuleni kuleyo ndawo, kwakukhona inqama ibambeke ngezimpondo ehlozini. Ngakho u-Abrahama waya wayithatha inqama wanikela ngayo njengomnikelo wokushiswa esikhundleni sendodana yakhe.+ 14 U-Abrahama waqamba leyo ndawo ngokuthi iJehova-jire. Yingakho ngokujwayelekile kuthiwa namuhla: “Entabeni kaJehova kuyolungiselelwa.”+
15 Ingelosi kaJehova yambiza okwesibili u-Abrahama isezulwini 16 yathi: “‘Ngizifunga mina ngokwami,’ kusho uJehova,+ ‘ukuthi ngenxa yokuthi wenzé le nto futhi awuyigodlanga indodana yakho, okuwukuphela kwayo,+ 17 ngokuqinisekile ngiyokubusisa futhi ngokuqinisekile ngiyoyandisa inzalo yakho ibe ngangezinkanyezi zamazulu nangangesihlabathi esisogwini lolwandle;+ inzalo yakho iyokudla ifa lesango lezitha zayo.+ 18 Futhi ngenzalo+ yakho zonke izizwe zomhlaba ngokuqinisekile ziyobusiswa ngenxa yokuthi ulalelé izwi lami.’”+
19 Ngemva kwalokho u-Abrahama wabuyela ezikhonzini zakhe, zasukuma bahamba ndawonye baya eBheri-sheba;+ u-Abrahama waqhubeka ehlala eBheri-sheba.
20 Kwathi ngemva kwalezi zinto kwafika umbiko ku-Abrahama othi: “Bheka uMilka+ naye umzalele amadodana uNahori+ umfowenu. 21 U-Uze izibulo lakhe noBuzi+ umfowabo noKhemuweli uyise ka-Aramu, 22 noKesedi noHazo noPhilidashe noJidilafu noBhetuweli.”+ 23 UBhetuweli wazala uRebheka.+ Laba abayisishiyagalombili uMilka wabazalela uNahori umfowabo ka-Abrahama. 24 Kwakukhona nesancinza sakhe futhi, esigama laso kwakunguRewuma. Ngemva kwesikhathi naso futhi sazala uTheba noGahamu noThahashi noMahakha.+