Genesise
25 Ngaphezu kwalokho, u-Abrahama waphinda wathatha umfazi, igama lakhe kwakunguKetura.+ 2 Ngemva kwesikhathi wamzalela uZimrani noJokishani noMedani+ noMidiyani no-Ishibaki noShuwahi.+
3 UJokishani wazala uSheba+ noDedani.+
Amadodana kaDedani kwaba ngu-Ashurimi noLetushimi noLewumimi.
4 Amadodana kaMidiyani kwakungu-Efa+ no-Eferi noHanoki no-Abida no-Elidaha.+
Wonke lawa kwakungamadodana kaKetura.
5 Kamuva u-Abrahama wanika u-Isaka konke ayenakho,+ 6 kodwa amadodana ezancinza u-Abrahama ayenazo u-Abrahama wawanika izipho.+ Wabe esewamukisa ku-Isaka indodana yakhe,+ esaphila, wawayisa ngasempumalanga, ezweni laseMpumalanga.+ 7 Yilezi izinsuku zeminyaka yokuphila kuka-Abrahama, iminyaka eyikhulu namashumi ayisikhombisa nanhlanu. 8 Khona-ke u-Abrahama wagqabuka wafa esegugile impela, esemdala, anelisekile, wabuthelwa kubantu bakubo.+ 9 Ngakho u-Isaka no-Ishmayeli amadodana akhe bamngcwaba emhumeni waseMakaphela ensimini ka-Efroni indodana kaZohari umHeti, phambi kwaseMamre,+ 10 insimu u-Abrahama ayeyithenge emadodaneni kaHeti. Wangcwatshwa lapho u-Abrahama, noSara umkakhe.+ 11 Kwathi ngemva kokufa kuka-Abrahama uNkulunkulu waqhubeka embusisa u-Isaka indodana yakhe,+ futhi u-Isaka wayehlala eduze kwaseBheri-lahayi-royi.+
12 Lona ngumlando ka-Ishmayeli+ indodana ka-Abrahama, uHagari umGibhithe incekukazi kaSara amzalela yena u-Abrahama.+
13 Yilawa amagama amadodana ka-Ishmayeli, ngamagama awo, ngokwendabuko yemikhaya yawo: izibulo lika-Ishmayeli uNebhayoti+ noKhedari+ no-Adibeli noMibisamu+ 14 noMishima noDuma noMasa, 15 uHadadi+ noThema,+ uJethuri, uNafishi noKhedema.+ 16 Lawa ngamadodana ka-Ishmayeli, futhi lawa ngamagama awo ngamagceke awo nangamakamu awo abiyelwe ngezindonga:+ izikhulu eziyishumi nambili ngokwemindeni yazo.+ 17 Futhi yile iminyaka yokuphila kuka-Ishmayeli, iminyaka eyikhulu namashumi amathathu nesikhombisa. Khona-ke wagqabuka wafa wabuthelwa kubantu bakubo.+ 18 Bahlala ematabernakele kusukela eHavila+ eduze kwaseShuri,+ ephambi kweGibhithe, kuze kufike e-Asiriya. Wahlala phambi kwabo bonke abafowabo.+
19 Lo ngumlando ka-Isaka indodana ka-Abrahama.+
U-Abrahama wazala u-Isaka. 20 U-Isaka wayeneminyaka engamashumi amane ubudala lapho ethatha uRebheka indodakazi kaBhetuweli+ umSiriya+ wasePhadani-aramu, udadewabo kaLabani umSiriya, ukuba abe umkakhe. 21 U-Isaka wayelokhu emncenga uJehova ikakhulukazi ngenxa yomkakhe,+ ngoba wayeyinyumba;+ ngakho uJehova wavuma ukuba ancengwe ngenxa yakhe,+ uRebheka umkakhe wakhulelwa. 22 Amadodana ayengaphakathi kuye aqala ukulwa+ waze wathi: “Uma kungale ndlela, ngiphilelani?” Ngakho waya kobuza kuJehova.+ 23 UJehova wathi kuye: “Kukhona izizwe ezimbili esiswini sakho,+ futhi kuyohlukaniswa amaqembu amabili ezizwe ezibilinini zakho;+ elinye iqembu lesizwe liyoba namandla kunelinye iqembu lesizwe,+ futhi omdala uyokhonza omncane.”+
24 Kancane kancane zaphelela izinsuku zakhe zokuba abelethe, futhi bheka! kwakukhona amawele esiswini sakhe.+ 25 Owokuqala waphuma ebomvu yonke indawo njengesembatho soboya sezikhulu;+ ngakho bamqamba ngokuthi u-Esawu.+ 26 Ngemva kwalokho kwaphuma umfowabo, isandla sakhe sibambe isithende sika-Esawu;+ ngakho bamqamba ngokuthi uJakobe.+ U-Isaka wayeneminyaka engamashumi ayisithupha lapho uRebheka ebazala.
27 Abafana bakhula, u-Esawu waba yiphisi,+ indoda yasendle, kodwa uJakobe waba indoda engasoleki,+ ehlala ematendeni.+ 28 U-Isaka wayethanda u-Esawu, ngoba kwakusho inyamazane emlonyeni wakhe, kuyilapho uRebheka yena ayethanda uJakobe.+ 29 Ngesinye isikhathi uJakobe wayebilisa isitshulu esithile, lapho u-Esawu efika evela endle ekhathele. 30 Ngakho u-Esawu wathi kuJakobe: “Ngicela usheshise ungiphe umthamo walokho okubomvu—lokho okubomvu okulapho, ngoba ngikhathele!” Yingakho igama lakhe kwathiwa u-Edomi.+ 31 UJakobe wathi: “Qale ungithengisele ilungelo lakho lobuzibulo!”+ 32 U-Esawu waqhubeka: “Bheka sengizofa, bunanzuzoni kimi ubuzibulo?” 33 UJakobe wanezela: “Funga kimi kuqala!”+ Wayesefunga kuye walithengisela uJakobe ilungelo lakhe lobuzibulo.+ 34 UJakobe wamnika u-Esawu isinkwa nesitshulu sikadali, wadla waphuza.+ Wabe esesukuma wahamba. Wabudelela kanjalo-ke u-Esawu ubuzibulo.+