Eksodusi

28 “Wena, phakathi kwabantwana bakwa-Israyeli, sondeza kuwe u-Aroni umfowenu namadodana akhe kanye naye ukuba abe ngumpristi kimi,+ u-Aroni,+ uNadabi no-Abhihu,+ u-Eleyazare no-Itamari,+ amadodana ka-Aroni. 2 Kumelwe wenzele u-Aroni umfowenu izingubo ezingcwele, ngenjongo yenkazimulo nobuhle.+ 3 Wena kumelwe ukhulume nabo bonke abahlakaniphileyo abanenhliziyo engiyigcwalise ngomoya wokuhlakanipha,+ benze izingubo zika-Aroni zokumngcwelisa, ukuze abe ngumpristi kimi.+

4 “Yilezi izingubo abazozenza: isiqephu sesifuba,+ i-efodi+ nejazi elingenamikhono+ nesembatho esinezikwele, umshuqulo+ nebhande lendwangu;+ kumelwe benzele u-Aroni umfowenu namadodana akhe izingubo ezingcwele, ukuze abe ngumpristi kimi. 5 Bona bazothatha igolide nentambo eluhlaza okwesibhakabhaka noboya obudaywe baba nsomi ngokubomvu nendwangu ebomvu ngokunsomi nelineni elicolekileyo.

6 “Kumelwe benze i-efodi legolide, intambo eluhlaza okwesibhakabhaka noboya obudaywe baba nsomi ngokubomvu, indwangu ebomvu ngokunsomi nelineni elicolekileyo elisontiwe, umsebenzi womfekethisi.+ 7 Kumelwe libe neziqephu ezimbili zasemahlombe okumelwe zihlanganiswe emikhawulweni yalo emibili, lihlangane.+ 8 Nebhande,+ elingaphezu kwalo lokulibopha liqine, kufanele lenziwe ngezinto elenziwe ngazo ngokokwenziwa kwalo, ngegolide, intambo eluhlaza okwesibhakabhaka noboya obudaywe baba nsomi ngokubomvu nendwangu ebomvu ngokunsomi nelineni elicolekileyo elisontiwe.

9 “Futhi kumelwe uthathe amatshe amabili e-onikisi+ uqophe+ kuwo amagama amadodana ka-Israyeli,+ 10 amagama awo ayisithupha etsheni elilodwa namagama ayisithupha asele kwelinye itshe ngokwelamana kwawo.+ 11 Kumelwe uqophe amagama amadodana ka-Israyeli+ kula matshe amabili ngomsebenzi wengcweti yamatshe, ngendlela yokuqoshwa kophawu. Uzowenza uwafake ezisekelweni zegolide.+ 12 La matshe amabili kumelwe uwabeke eziqeshini zasemahlombe ze-efodi abe amatshe esikhumbuzo kubantwana bakwa-Israyeli;+ u-Aroni kumelwe athwale amagama awo phambi kukaJehova phezu kweziqephu zakhe ezimbili zasemahlombe njengesikhumbuzo. 13 Kumelwe wenze izisekelo zegolide, 14 namaketanga amabili egolide elihlanzekileyo.+ Uzowenza abe njengezintambo, njengokwenziwa kwendophi; futhi kumelwe unamathisele la maketanga anjengendophi ezisekelweni.+

15 “Kumelwe wenze isiqephu sesifuba sokwahlulela+ ngomsebenzi womfekethisi. Uzosenza njengokwenziwa kwe-efodi. Uzosenza ngegolide, intambo eluhlaza okwesibhakabhaka noboya obudaywe baba nsomi ngokubomvu nendwangu ebomvu ngokunsomi nelineni elicolekileyo elisontiwe.+ 16 Kufanele sibe nezinhlangothi ezine ezilinganayo lapho siphindiwe, ubude baso bube ngangobubanzi besandla nobubanzi baso bube ngangobubanzi besandla.+ 17 Kumelwe usigcwalise ngamatshe, kube khona izinhlu ezine zamatshe.+ Uhlu lokuqala uluhlu lwerubi,+ itopazi+ nesimaragidu.+ 18 Uhlu lwesibili itherkhoyisi,+ isafire+ nejaspi.+ 19 Uhlu lwesithathu itshe le-leshemu, i-agathe+ ne-amethiste.+ 20 Uhlu lwesine ikrisolithe,+ i-onikisi+ nejeyidi. Kufanele kube khona izikhoxe zegolide ezikhaleni zawo.+ 21 Futhi la matshe kufanele abe ngokwamagama amadodana ka-Israyeli, amadodana ayishumi nambili ngokwamagama awo.+ Kufanele aqoshwe ngendlela yokuqoshwa kophawu, yilelo nalelo ngokwegama lalo, abe awezizwe eziyishumi nambili.+

22 “Esiqeshini sesifuba kumelwe wenze amaketanga elukiwe, enziwe njengezindophi, ngegolide elihlanzekileyo.+ 23 Kumelwe wenze esiqeshini sesifuba amasongo amabili egolide,+ ufake lawo masongo amabili emikhawulweni emibili yesiqephu sesifuba. 24 Kumelwe uchushise zombili izindophi zegolide emasongweni womabili emikhawulweni yesiqephu sesifuba.+ 25 Futhi uzochushisa amachopho amabili ezindophi zombili ezisekelweni ezimbili, uzibeke phezu kweziqephu zasemahlombe ze-efodi, ngaphambili kulo.+ 26 Kumelwe wenze amasongo amabili egolide uwabeke emikhawulweni yomibili yesiqephu sesifuba echosheni laso elisohlangothini olungakuyi-efodi ngaphakathi.+ 27 Futhi kumelwe wenze amasongo amabili egolide uwafake eziqeshini ezimbili zamahlombe ze-efodi ezansi, ngaphambili kulo, eduze nendawo elihlangana kuyo, ngenhla kwebhande le-efodi.+ 28 Bazobopha isiqephu sesifuba ngamasongo aso basibophele emasongweni e-efodi ngentambo eluhlaza okwesibhakabhaka, ukuze sihlale ngenhla kwebhande le-efodi futhi isiqephu sesifuba singagudluki phezu kwe-efodi.+

29 “U-Aroni kumelwe athwale amagama amadodana ka-Israyeli esiqeshini sesifuba sokwahlulela phezu kwenhliziyo yakhe lapho engena eNgcwele njengesikhumbuzo phambi kukaJehova njalo. 30 Kumelwe ufake i-Urimi+ neThumimi esiqeshini sesifuba sokwahlulela, kube phezu kwenhliziyo ka-Aroni lapho engena phambi kukaJehova; u-Aroni kumelwe athwale izahlulelo+ zamadodana ka-Israyeli phezu kwenhliziyo yakhe phambi kukaJehova njalo.

31 “Ijazi elingenamikhono le-efodi kumelwe ulenze lonke ngentambo eluhlaza okwesibhakabhaka.+ 32 Kumelwe libe nembobo phezulu maphakathi nalo. Le mbobo yalo kufanele ibe nomphetho ojikelezayo, umkhiqizo wosebenzisa uhlaka lokweluka indwangu. Kufanele ibe njengembobo yejazi lensimbi, ukuze ingadabuki.+ 33 Emphethweni walo kumelwe wenze amahalananda entambo eluhlaza okwesibhakabhaka noboya obudaywe baba nsomi ngokubomvu nendwangu ebomvu ngokunsomi, emphethweni walo kuzungeze, nezikhencezo+ zegolide phakathi kwawo kuzungeze; 34 kube isikhencezo segolide nehalananda, isikhencezo segolide nehalananda emphethweni wejazi elingenamikhono kuzungeze.+ 35 Kumelwe libe phezu kuka-Aroni ukuze akhonze, futhi kuzwakale umsindo ovela kuye lapho engena endlini engcwele phambi kukaJehova nalapho ephuma, ukuze angafi.+

36 “Kumelwe wenze ungcwecwe ocwebezelayo wegolide elihlanzekile uqophe kuwo ngendlela yokuqoshwa kophawu ukuthi, ‘Ubungcwele bungobukaJehova.’+ 37 Kumelwe uwubophe ngentambo eluhlaza okwesibhakabhaka, ube ngaphezu komshuqulo.+ Kufanele ube ngaphambili emshuqulweni. 38 Kumelwe ube phezu kwebunzi lika-Aroni, futhi u-Aroni kumelwe aphendule ngesiphambeko esenziwe ezintweni ezingcwele,+ lezo abantwana bakwa-Israyeli abazozingcwelisa, okungukuthi, zonke izipho zabo ezingcwele; kumelwe uhlale phezu kwebunzi lakhe njalo, ukuze abatholele ukwamukelwa+ phambi kukaJehova.

39 “Kumelwe waluke isembatho selineni elicolekileyo sibe nezikwele wenze nomshuqulo welineni elicolekileyo,+ wenze nebhande lendwangu,+ umsebenzi womeluki.

40 “Amadodana ka-Aroni wona uzowenzela izembatho,+ futhi kumelwe uwenzele amabhande endwangu, uwenzele okokuthwala ekhanda+ ngenjongo yenkazimulo nobuhle.+ 41 Kumelwe wembathise ngakho u-Aroni umfowenu namadodana akhe kanye naye, ubagcobe+ futhi ugcwalise isandla sabo ngamandla+ ubangcwelise, babe abapristi kimi. 42 Kumelwe ubenzele izikhindi zangaphansi zelineni ukuze bamboze ubunqunu babo.+ Kumelwe zisuke ezinqulwini zize zifike emathangeni. 43 Kumelwe u-Aroni namadodana akhe babe bezigqokile lapho bengena etendeni lokuhlangana noma lapho besondela e-altare ukuba bakhonze endaweni engcwele, ukuze bangaziletheli isiphambeko bafe nakanjani. Kuyisimiso kuze kube nini nanini kuye nasenzalweni yakhe emva kwakhe.+