10 Kamuva inkosi yama-Amoni + yashona, uHanuni indodana yayo wabusa esikhundleni sayo. + 2 UDavide wathi: “Ngizombonisa uthando oluqotho uHanuni indodana kaNahashi, njengoba nje uyise angibonisa uthando oluqotho.” Ngakho uDavide wathumela izinceku zakhe ukuba ziyomduduza ngenxa yokushona kukayise. Kodwa lapho izinceku zikaDavide zifika ezweni lama-Amoni, 3 izikhulu zama-Amoni zathi kuHanuni inkosi yazo: “Ucabanga ukuthi uDavide udumisa uyihlo ngokuthumela abantu abazokududuza? Akukhona yini ukuthi uDavide uthumele izinceku zakhe kuwe ukuze zenze uphenyo edolobheni, zilihlole ukuze aligumbuqele?” 4 Ngakho uHanuni wathatha izinceku zikaDavide wazishefa ingxenye yentshebe, + wasika izingubo zazo ukusuka ezinqeni kwehle, wayesezidedela zahamba. 5 Lapho uDavide etshelwa ngalokhu, ngaso leso sikhathi wathumela amadoda ukuba ayozihlangabeza, ngoba zazilulazeke kakhulu; inkosi yathi kuzo: “Hlalani eJeriko + zize zikhule izintshebe zenu, bese niyabuya.”