ISIFUNDO 26
Kungani Kukhona Ububi Nokuhlupheka?
Lapho kwenzeka into ebuhlungu, kungokwemvelo ukubuza ukuthi “kungani lokhu kwenzeka?” Asive sijabula ngokuthi iBhayibheli linikeza izimpendulo ezicacile zalowo mbuzo!
1. USathane wabufaka kanjani ububi emhlabeni?
USathane uDeveli wavukela uNkulunkulu. USathane wayefuna ukubusa, ngakho wenza ukuba nabantu bokuqala, u-Adamu no-Eva, bavukele uNkulunkulu. USathane wakwenza lokhu ngokutshela u-Eva amanga. (Genesise 3:1-5) Wamenza wacabanga ukuthi uJehova wayebagodlele okuthile okuhle. Ngokwenza kanjalo, wayesho ukuthi abantu bangajabula lapho bengamlaleli uNkulunkulu. USathane waqamba amanga okuqala lapho etshela u-Eva ukuthi ngeke afe. Ngenxa yalokho, iBhayibheli libiza uSathane ngokuthi “ungumqambimanga noyise wamanga.”—Johane 8:44.
2. U-Adamu no-Eva bakhetha ukwenzani?
UJehova wayenike u-Adamu no-Eva konke ababekudinga. Wathi babengadla kuzo zonke izihlahla ezazisensimini yase-Edene ngaphandle kwesisodwa. (Genesise 2:15-17) Kodwa bona banquma ukudla isithelo sesihlahla esenqatshelwe. U-Eva “wathatha isithelo saso wasidla.” Kamuva, u-Adamu “naye wadla.” (Genesise 3:6) Bobabili abamlalelanga uNkulunkulu. Ngenxa yokuthi u-Adamu no-Eva babengenaso isono, kwakulula ngabo ukwenza okulungile. Ngokungamlaleli ngamabomu uNkulunkulu, benza isono futhi benqaba ukubuswa nguye. Leso sinqumo sabo sababangela ukuhlupheka okukhulu.—Genesise 3:16-19.
3. Isinqumo sika-Adamu no-Eva sibe namuphi umphumela kithi?
Lapho u-Adamu no-Eva bengalaleli, baba nesono, ngakho badlulisela isono kuyo yonke inzalo yabo. Ngokuqondene no-Adamu, iBhayibheli lithi: “Ngomuntu oyedwa isono sangena ezweni nokufa kwangena ngesono, ngaleyo ndlela ukufa kwasakazekela kubantu bonke.”—Roma 5:12.
Ziningi izizathu ezisenza sihlupheke. Ngesinye isikhathi siyahlupheka ngenxa yezinqumo ezimbi esizenzayo. Ngezinye izikhathi siyahlupheka ngenxa yezinqumo ezimbi ezenziwa abanye abantu. Kanti ngezinye izikhathi siyahlupheka ngoba isikhathi nezenzakalo ezingalindelekile zibehlela bonke.—Funda umShumayeli 9:11.
FUNDA OKWENGEZIWE
Thola ukuthi kungani kungeyena uNkulunkulu obangela ububi nokuhlupheka emhlabeni namuhla nokuthi uzizwa kanjani lapho sihlupheka.
4. Ubani obangela ukuhlupheka?
Abantu abaningi bakholelwa ukuthi nguNkulunkulu obusa izwe. Kuyiqiniso yini lokho? Dlalani IVIDIYO.
Fundani uJakobe 1:13 neyoku-1 Johane 5:19, bese nixoxa ngalo mbuzo:
Ingabe uNkulunkulu ubangela ukuhlupheka nobubi?
5. Selokhu uSathane aqala ukubusa, ibe yini imiphumela?
Fundani uGenesise 3:1-6, bese nixoxa ngale mibuzo:
Yimaphi amanga ashiwo uSathane?—Bheka ivesi 4 no-5.
Yini eyashiwo uSathane esikisela ukuthi uJehova wayegodlela abantu okuhle?
Ngokusho kukaSathane, kuyadingeka yini abantu babuswe uJehova ukuze bajabule?
Fundani umShumayeli 8:9, bese nixoxa ngalo mbuzo:
Njengoba kungeyena uJehova obusa umhlaba, kuye kwenzekani?
U-Adamu no-Eva babengenaso isono futhi behlala ePharadesi. Kodwa balalela uSathane bavukela uJehova
Ngemva kokuvukela, kwaba khona isono, ukuhlupheka nokufa emhlabeni
UJehova uzokuqeda ukuhlupheka, isono nokufa. Abantu bayobe bengasenaso isono futhi bephila ePharadesi
6. Ingabe uJehova akanandaba nokuthi siyahlupheka?
Ingabe uNkulunkulu uyasizwela lapho sihlupheka? Cabanga ngalokho okwabhalwa iNkosi uDavide nomphostoli uPetru. Fundani iHubo 31:7 neyoku-1 Petru 5:7, bese nixoxa ngalo mbuzo:
Kukwenza uzizwe kanjani ukwazi ukuthi uJehova uyabona lapho sihlupheka futhi uyasizwela?
7. UNkulunkulu uzokuqeda konke ukuhlupheka kwabantu
Fundani u-Isaya 65:17 nesAmbulo 21:3, 4, bese nixoxa ngalo mbuzo:
Kungani kududuza ukwazi ukuthi uJehova uzoyilungisa imiphumela yazo zonke izinto ezimbi ezenzeke kubantu?
Ingabe bewazi?
Lapho uSathane eqamba amanga okuqala, wanyundela uJehova. Okusho ukuthi lapho ethi uJehova akayena uMbusi onothando futhi akenzi izinto ngendlela efanele, wenza abantu bacabanga izinto ezimbi ngoJehova. Lapho uJehova eqeda ukuhlupheka kwabantu maduzane, uzohlanza igama lakhe. Ngamanye amazwi, uzobonisa ukuthi nguye okufanele abuse. Ukuhlanzwa kwegama likaJehova kuyindaba ebaluleke kunazo zonke emhlabeni nasezulwini.—Mathewu 6:9, 10.
ABANYE ABANTU BATHI: “UNkulunkulu vele nje ufuna sihlupheke.”
Ubungaphendula uthini?
UKUBUYEKEZA
USathane uDeveli nabantu ababili bokuqala ngokuyinhloko yibo abayimbangela yobubi obukhona emhlabeni. UJehova uyasizwela kakhulu lapho sihlupheka, futhi maduzane uzokuqeda konke ukuhlupheka.
Ufundeni?
Yimaphi amanga uSathane uDeveli awasho ku-Eva?
Ukuvukela kuka-Adamu no-Eva kusithinte kanjani thina?
Sazi kanjani ukuthi uJehova uyazwelana nathi lapho sihlupheka?
HLOLA OKWENGEZIWE
Funda ukuthi iBhayibheli lithi isono siyini.
Funda okwengeziwe mayelana nempikiswano eyaphakanyiswa uSathane uDeveli ensimini yase-Edene.
“Kungani UNkulunkulu Evumela Ukuhlupheka?” (INqabayokulinda, Januwari 1, 2014)
Hlola izimpendulo eziduduzayo zombuzo onzima.
“Kungani KwaQothulwa Isizwe? Kungani UNkulunkulu Engakuvimbelanga?” (isihloko esikuyi-Inthanethi)
Bona ukuthi indoda ethile yafundani ngokuhlupheka okwakuyizungezile.