Ingabe UNkulunkulu Uyakuvumela Ukuphilisa?
“SIBONE izimanga namuhla!” Yebo, izibukeli zazihlabeke umxhwele. Indoda eyayikhubazeke kakhulu yaphiliswa phambi kwamehlo abo. Umphilisi watshela lendoda: “Vuka uthabathe uhlaka lwakho, uye endlini yakho.” Futhi lendoda yenza lokho kanye! Yayingasakhubazekile. Kungakho labo ababekhona “bamdumisa uNkulunkulu”! (Luka 5:18-26) Lokhu kuphulukisa, okwenziwa uJesu Kristu cishe eminyakeni engu-2 000 edlule, ngokusobala uNkulunkulu wayekuvumela.
Kuthiwani ngokwanamuhla? Ingabe ukuphilisa ngokuyisimangaliso kusengenye indlela kulabo abangalapheki ngemithi? UJesu wenza izimangaliso zokuphilisa. Abaphilisi namuhla bathi balingisa yena. Kufanele sikubheke kanjani lokho abakushoyo?
Ukuphilisa kuchazwa ngokuthi “indlela yokwelapha izifo ngomthandazo nangokuba nokholo kuNkulunkulu.” IEncyclopædia Britannica iyaqinisekisa: “Umlando wokuphilisa ebuKristwini waqala ngezinkonzo ezimangalisayo zikaJesu ngokwakhe nabaphostoli bakhe.” Yebo, uJesu wenza ukuphulukisa okuvelele. Ingabe abaphilisi namuhla benza izimangaliso njengoba yena enza?
Ukholo—Ingabe Luyimfuneko?
NgokweBlack’s Bible Dictionary, uJesu “wathi [ukholo] luyimfuneko eyinhloko yezimangaliso zakhe zokuphilisa.” Kodwa ingabe kwakunjalo? Ingabe uJesu wayefuna ukuba umuntu ogulayo abe nokholo ngaphambi kokuba amphilise? Impendulo ingucha. Ukholo lwaludingeka kulowo ophilisayo kodwa hhayi kumuntu ogulayo. Kwesinye isenzakalo abafundi bakaJesu bahluleka ukuphulukisa umfana owayenesithuthwane. UJesu wamphilisa lomfana wayesetshela abafundi bakhe ukuthi kungani babehlulekile ukumphilisa. “Wayesethi kubo: Kungenxa yokukholwa kwenu okuncane.”—Mathewu 17:14-20.
NgokukaMathewu 8:16, 17, uJesu “waphulukisa bonke abagulayo.” Yiqiniso, labantu babenesilinganiso esithile sokholo kuJesu esababangela ukuba baye kuye. (Mathewu 8:13; 9:22, 29) Ngokuvamile kwakudingeka beze bamcele ngaphambi kokuba abaphilise. Nokho, akukho kuvunywa kokholo okwakuyimfuneko yokwenza isimangaliso. Kwesinye isenzakalo uJesu waphilisa indoda eyayiyisishosha eyayingazi nokuthi uJesu wayengubani. (Johane 5:5-9, 13) Ngobusuku aboshwa ngabo, uJesu wabuyisela indlebe eyayinqanyuliwe yenceku yompristi omkhulu, nakuba lendoda yayingomunye weqembu lezitha zikaJesu ezazizombopha. (Luka 22:50, 51) Yebo, ngezikhathi ezithile uJesu wayevusa ngisho nabafileyo!—Luka 8:54, 55; Johane 11:43, 44.
UJesu wayezenza kanjani lezozimangaliso? Ngoba wayethembele emoyeni ongcwele kaNkulunkulu, noma amandla ayisiphekupheku. Lokhu yikho okwakwelapha, hhayi ukholo lomuntu ogulayo. Uma ufunda ukulandisa okusemaVangelini, uyophawula futhi ukuthi ukuphilisa okwakwenziwa uJesu kwenziwa ngaphandle kwemicikilisho eminingi. Kwakungekho kubukisa noma ukudlala ngemizwelo. Ngaphezu kwalokho, kungakhathaliseki ukuthi kwakusifo sini, uJesu wayengahluleki. Wayephumelela njalo, futhi akazange neze afune inkokhelo.—Mathewu 15:30, 31.
Ingabe Ukuphilisa Kwanamuhla KunjengokukaJesu?
Ukugula kuyinkinga enkulu, futhi lapho kuhlasela, ngokwemvelo sifuna ikhambi. Nokho, kuthiwani uma siphila endaweni lapho “abantu, ikakhulukazi labo abampofu, bephathiswa okwezinto hhayi okwabantu yilezozisebenzi zezempilo ezifundile”? Leso isimo udokotela othile asibona ezweni elithile laseLatin-America. Futhi kuthiwani uma siphila endaweni, njengakulelozwe, lapho ‘kungamaphesenti angu-40 kuphela odokotela bezokwelapha afanelekela ukusebenza njengodokotela’?
Kungakho abaningi, bebona kungekho abangakwenza, bebheka ukuphilisa kungokufanele ukuzanywa. Nokho, ukuphulukisa okuthiwa kwenziwa abaphilisi kuyaphikiswana ngakho. Ngokwesibonelo, abantu abalinganiselwa ku-70 000 beza emhlanganweni owawuseSão Paulo, eBrazil, lapho abaphilisi ababili ‘bagxoba ngezinyawo amakhulu amaningi ezibuko zamehlo ezaziphonswa izilaleli, bethembisa abaninizo abakhohliseka kalula ukuthi babezobenza bakwazi ukuphinde babone kahle.’ Omunye wabaphilisi wavuma ngokwethembeka lapho kuxoxwa naye: “Anginakusho ukuthi bonke abagulayo esibathandazelayo bayophulukiswa. Kuxhomeke okholweni lwabo. Uma umuntu ekholwa, uyophulukiswa.” Wathi noma ikuphi ukuhluleka kokuphilisa kubangelwa ukuntula ukholo komuntu ogulayo. Nokho khumbula ukuthi, njengoba sibonile ngaphambili, uJesu wathi ukuhluleka kokuphilisa kwakubangelwa ukuntula ukholo kwalabo abaphilisayo!
Omunye umphilisi wathembisa ukuthi uzokwelapha umdlavuza nokukhubazeka. Kwenzekani? Ngokukamagazini iVeja, “ngokusobala, lesithembiso asizange sigcwaliswe.” Futhi lalela indlela lendoda eyaziphatha ngayo: “Cishe phakathi namahora amabili, [lomphilisi] wayejabulisa izilaleli ngezintshumayelo, imithandazo, ukumemeza, ukucula—esebenzisa ngisho nezingqindi, ngethemba lokukhipha amademoni ahlala emizimbeni yabathembekile. Ekugcineni, waphonsa uthayi wakhe neduku ezilalelini ezazithatheke kakhulu wayesedlulisa ipuleti lenkongozelo ukuze aqoqe ‘iminikelo yokuzithandela.’” UJesu nabaphostoli bakhe abazange balokothe bafune imali ngokuphilisa ngokuyisimangaliso, futhi abazange bahlanganyele ezenzweni ezinjalo zokubukisa.
Ngokusobala-ke, abaphilisi abanjalo banamuhla abenzi lokho uJesu akwenza. Futhi kunzima ukubona ukuthi uNkulunkulu ubengavumela lokho abakwenzayo. Nokho, ingabe uyakuvumela noma ikuphi ukuphilisa ngokuyisimangaliso namuhla? Noma ingabe ikhona indlela ukholo lwethu olungasisiza ngayo lapho sigula noma kugula abathandekayo bethu?