Ukuphela Kwendlala Kuseduze!
UNGASE ubuze, ‘Luhlobo luni lwendlala?’ Indlala yokudla okungokomoya! Le ndlala yabikezelwa umprofethi ongumHeberu wasendulo: “‘Bhekani, izinsuku ziyeza,’ isho iNkosi uJehova, ‘lapho ngiyakuthuma indlala ezweni, kungabi yindlala yezinkwa, kungabi ngukomela amanzi, kepha kube ngeyokuzwa amazwi kaJehova.’” (Amose 8:11) Ukuze kuncishiswe le ndlala engokomoya, amalungu angu-48 ekilasi le-112 le-Watchtower Bible School of Gilead, esePatterson, eNew York, azoya emazweni angu-19 asemazwekazini naseziqhingini ezinhlanu.
Awazukuhamba ethwele inyama nokusanhlamvu okungokoqobo, kodwa azobe ehlome ngolwazi nokuhlangenwe nakho futhi eqeqeshiwe. Aye asebenzisa izinyanga ezinhlanu etadisha iBhayibheli ngokujulile ukuze ukholo lwawo luqine, alungele ukukhonza njengezithunywa zevangeli kwamanye amazwe. Ngo-March 9, 2002, abangu-5 554 ababekhona esimisweni sokuthweswa kweziqu balalela ngesasasa.
UStephen Lett, oyilungu leNdikimba Ebusayo YoFakazi BakaJehova, waqala isimiso ngentshiseko. Wazamukela ngokukhethekile izihambeli eziningi ezazivela ezingxenyeni ezihlukahlukene zomhlaba. Wabe esesebenzisa amazwi kaJesu athi “Niwukukhanya kwezwe” emsebenzini walaba abase bezoba izithunywa zevangeli. (Mathewu 5:14) Wachaza: ‘Ezabelweni zenu “nizokhanyisa” izici ezihlukahlukene zomsebenzi kaJehova omangalisayo, nenze abanhliziyo ziqotho bakwazi ukubona ubuhle bukaJehova nezinjongo zakhe.’ UMfoweth’ uLett wakhuthaza izithunywa zevangeli ukuba zisebenzise ukukhanya kweZwi likaNkulunkulu ukuze zidalule ubumnyama bezimfundiso zamanga futhi zinikeze abafuna iqiniso isiqondiso.
Isimo Sengqondo Esifanele Sibalulekile Ukuze Baphumelele
Ngemva kwamazwi kasihlalo okwamukela, uBaltasar Perla, oyilungu leKomiti Yegatsha e-United States wanikeza inkulumo yokuqala ochungechungeni oluhlelelwe ukusiza abathweswa iziqu ukuba babe izithunywa zevangeli eziphumelelayo. Inkulumo yakhe yayinesihloko esithi “Yibani Nesibindi, Niqine, Nithathe Isinyathelo.” (1 IziKronike 28:20) Inkosi yakwa-Israyeli wasendulo uSolomoni yathola isabelo esinzima sokwenza into eyayingakaze iyenze—ukwakha ithempeli eJerusalema. USolomoni wathatha isinyathelo, futhi ngosizo lukaJehova ithempeli laphela. Ebhekisa isifundo kuleli kilasi, uMfoweth’ uPerla wathi: ‘Nithole isabelo esisha sokuba izithunywa zevangeli, futhi kudingeka nibe nesibindi niqine.’ Kwabaduduza impela abafundi ukuqinisekiswa ukuthi uJehova ngeke abashiye, uma nje behlala beseduze naye. UMfoweth’ uPerla wathinta izilaleli lapho ephetha ngala mazwi aphathelene naye: ‘Kuningi okuhle eningakufeza njengezithunywa zevangeli. Yizithunywa zevangeli ezalethela mina nomkhaya wakithi iqiniso!’
Inkulumo eyanikezwa uSamuel Herd, naye oyilungu leNdikimba Ebusayo, yayinesihloko esithi, “Bheka KuJehova Ukuze Uphumelele.” Laba bafundi baqala umsebenzi wezithunywa zevangeli, futhi ukuphumelela kwabo kuxhomeke kakhulu ebuhlotsheni babo noJehova. UMfoweth’ uHerd wabayala: ‘Nithole ulwazi oluningi lweBhayibheli eGileyadi. Benamukela ngenjabulo. Kodwa manje ukuze niphumelele ngempela, kuzodingeka niqale ukupha abanye lokho enikufundile.’ (IzEnzo 20:35) Izithunywa zevangeli zizoba namathuba amaningi okukwenza lokhu njengoba ‘zizithulula’ ukuze zisize abanye.—Filipi 2:17.
Yisiphi iseluleko sokugcina abafundisayo ababezosinika abafundi? UMark Noumair wasisekela kuRuthe 3:18 isihloko sakhe esithi, “Hlala Uthule Uze Ubone Ukuthi Indaba Izophetha Kanjani.” Sisebenzisa isibonelo sikaNawomi noRuthe, isikhulumi sakhuthaza ababethweswa iziqu ukuba bawethembe ngokugcwele amalungiselelo abekwe inhlangano kaNkulunkulu yasemhlabeni futhi bahloniphe igunya elingokwasezulwini. Ethinta izinhliziyo zabafundi uMfoweth’ uNoumair wathi: ‘Ngezinye izikhathi ningase ningaqondi ukuthi kungani isinqumo esithile esinithintayo senziwe noma ningase nizizwe niqiniseka ukuthi into ethile kufanele ngabe yenziwe ngendlela ehlukile. Niyokwenzenjani? Ingabe niyosukuma nizibambele izinto mathupha noma “niyohlala nithule,” nithembele esiqondisweni sikaNkulunkulu, niqiniseka ukuthi ngokuhamba kwesikhathi uyokwenza umphumela ube muhle.’ (Roma 8:28) Akungabazeki ukuthi iseluleko ‘sokugxila ekuthuthukiseni izithakazelo zoMbuso, ukubheka ukuthi inhlangano kaJehova yenzani kunokubheka ubuntu babantu,’ sizoba usizo kulezi zithunywa zevangeli zesikhathi esizayo ezabelweni zazo zakwamanye amazwe.
UWallace Liverance, owayeyisithunywa sevangeli kwayena futhi osefundisa eGileyadi, wanikeza inkulumo yokugcina ochungechungeni lokuqala. Isihloko senkulumo yakhe sasithi, “Hlala Ugxilile, Hlala Enkonzweni KaNkulunkulu.” Wabonisa ukuthi umprofethi uDaniyeli wabona ngokuwa kweBabiloni nangalokho uJeremiya ayekubikezele ukuthi kwakuseduze ukuba ama-Israyeli akhululwe ebugqilini. (Jeremiya 25:11; Daniyeli 9:2) UDaniyeli wayeluqaphela uhlelo lukaJehova lwezikhathi, okwamsiza wahlala egxile ekuthombululekeni kwenjongo kaNkulunkulu. Ngokuphambene, ama-Israyeli osuku lomprofethi uHagayi athi: “Akukabi yisikhathi.” (Hagayi 1:2) Awagxilanga ezikhathini ayephila kuzo, kunalokho agxila ekunethezekeni nasekwanelisekeni kwawo, ayeka umsebenzi ayekhululwe eBabiloni ukuze azowenza, ukwakha ithempeli kabusha. UMfoweth’ uLiverance waphetha ngokuthi: “Ngakho hlalani nigxilile ngokucabanga ngenjongo kaJehova ngaso sonke isikhathi.”
Ofundisa eGileyadi, uLawrence Bowen, wéngamela ingxenye enesihloko esithi, “UJehova Uyababusisa Labo Abasebenzisa IZwi Eliphilayo.” (Heberu 4:12) Le ngxenye yayiphathelene nokuhlangenwe nakho kwasensimini kwekilasi, iqokomisa indlela uJehova ababusisa ngayo labo abasebenzisa iBhayibheli lapho beshumayela nalapho befundisa. Umqondisi waveza ukuthi uJesu Kristu wabekela zonke izikhonzi zikaNkulunkulu isibonelo esihle: ‘UJesu wayengasho eqinisile ukuthi lokho ayekufundisa kwakungasuki kuye, kodwa wayekhuluma iZwi likaNkulunkulu.’ Abanhliziyo ziqotho baliqaphela iqiniso, balamukela. (Johane 7:16, 17) Kuba njalo nanamuhla.
Ukuqeqeshwa KwaseGileyadi Kuhlomisela Umuntu Yonke Imisebenzi Emihle
Amalungu asenesikhathi eside omkhaya waseBethel, uRichard Abrahamson noPatrick LaFranca, abe esexoxa nabayisithupha asebaphothula eGileyadi, manje abakhonza emikhakheni ehlukahlukene yenkonzo yesikhathi esigcwele. Ababethweswa iziqu kuleli kilasi lama-112 kwabakhuthaza ukuzwa ukuthi nangemva kweminyaka laba abayisithupha basaqhubeka bekusebenzisa ukuqeqeshwa abakuthola eGileyadi ekutadisheni iBhayibheli, ekucwaningeni nasekuphilisaneni nabantu, kungakhathaliseki ukuthi babelwe kuphi manje.
UTheodore Jaracz, oyilungu leNdikimba Ebusayo, wanikeza inkulumo eyisihluthulelo esimisweni. Yayinesihloko esithi, “Lokho Okufezwa Ukukhuthazelela Inzondo KaSathane.” Phakathi nezinyanga ezinhlanu ezedlule, abafundi babehlala endaweni enothando nesebenzisa izimiso ezingokwasezulwini. Kodwa njengoba kwakushiwo ezifundweni zabo, siphila ezweni lesitha. Abantu bakaJehova bayahlaselwa emhlabeni wonke. (Mathewu 24:9) Esebenzisa ukulandisa kweBhayibheli okuningana, uMfoweth’ uJaracz waveza ukuthi ‘uDeveli usihlasela ngokukhethekile. Kumelwe siqinise ubuhlobo bethu noJehova, siqine ukuze sibhekane novivinyo.’ (Jobe 1:8; Daniyeli 6:4; Johane 15:20; IsAmbulo 12:12, 17) UMfoweth’ uJaracz waphetha ngokuthi naphezu kokuba abantu bakaNkulunkulu beqhubeka bezondwa, njengoba kusho u-Isaya 54:17, ‘asikho isikhali esenzelwa thina esiyakuphumelela. UJehova uyoqiniseka ukuthi ngesikhathi sakhe esifanele nangendlela yakhe siyakhululwa.’
Njengoba ‘behlonyiswe ngokuphelele,’ akungabazeki ukuthi abathweswa iziqu ekilasini le-112 laseGileyadi bayokwenza lukhulu ekunciphiseni indlala yokudla okungokomoya emazweni abazokhonza kuwo. (2 Thimothewu 3:16, 17) Siyilindele ngabomvu imibiko yokuthi bawuhambisa kanjani umyalezo onomsoco kubantu abakula mazwe.
[Ibhokisi ekhasini 23]
IMINININGWANE YEKILASI
Inani lamazwe amelelwe: 6
Inani lamazwe ababelwe kuwo: 19
Inani labafundi: 48
Isilinganiso seminyaka yobudala: 33,2
Isilinganiso seminyaka beseqinisweni: 15,7
Isilinganiso seminyaka besenkonzweni yesikhathi esigcwele: 12,2
[Isithombe ekhasini 24]
Ikilasi Le-112 Elithweswa Iziqu E-Watchtower Bible School of Gilead
Ohlwini olungezansi, imigqa ibalwa kusukela phambili kuya emuva, futhi amagama ahlelwe ukusuka kwesokunxele kuya kwesokudla emgqeni ngamunye.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.